Daniel

12 “Maya nya Mikael,* iya nya tuai ti bemulia ke ngarika bansa nuan, deka angkat. Penusah deka nyadi ba siti timpuh, lalu nya nadai kala nyadi kenyau ari maya bansa ti keterubah ditumbuhka nyentuk ngagai maya nya. Maya nya, tiap iku orang ari bansa nuan ke bisi ditulis nama dalam bup deka ngelepaska diri. 2 Mayuh orang ke tinduk dalam debu dunya deka dani. Sekeda deka nuju ngagai pengidup ti meruan belama iya, lalu sekeda deka dikemaluka sereta dipegedika belama iya.

3 “Orang ke bisi runding ti dalam deka manchar enggau terang baka langit maya siang hari. Orang ke nulung mayuh orang nitihka jalai pengelurus deka manchar baka bintang belama iya.

4 “Daniel, simpan resia tu lalu engkahka chop ba bup tu nyentukka timpuh ti penudi. Mayuh orang deka mansik bup tu enggau silik, lalu penemu ti bendar deka belimpah.”

5 Udah nya, aku, Daniel, bisi meda dua iku melikat. Siku melikat bediri ba tebing sungai sepiak tu, lalu melikat ke siku agi bediri ba tebing sungai sepiak nyin. 6 Siku ari melikat nya bejaku ngagai siku lelaki ke ngena gari linin, ke benung bediri ba atas ai sungai. Ku iya nanya lelaki nya: “Berapa lama utai ke ngalitka ati tu deka nyadi?” 7 Lelaki ke ngena gari linin, ke benung bediri ba atas ai sungai nya, ngangkatka jari kanan enggau jari kiba iya lalu besumpah atas nama Petara ke idup belama iya. Aku ninga iya bejaku munyi tu: “Semua nya deka nyadi ba timpuh ke udah ditetapka, iya nya siti timpuh, dua iti timpuh, enggau setengah timpuh.* Pengudah kuasa bala orang ti kudus dianchurka, semua utai ke nyadi tu deka abis.”

8 Aku ninga utai ku iya, tang aku enda faham. Nya alai, aku nanya: “Tuan, nama deka nyadi pengujung iya?”

9 Udah nya, iya madahka: “Mupuk meh Daniel, laban jaku nya patut diresiaka lalu dichop nyentukka timpuh ti penudi. 10 Mayuh orang deka meresi diri empu, ngasuh diri nyadi tuchi, sereta digaga nyadi tulin. Orang ke jai deka ngereja utai ti jai, lalu nadai siku pan sida deka meretika utai nya. Tang, orang ke bisi runding ti dalam deka meretika utai nya.

11 “Kenyau ari maya pemeri ke diserahka ninting hari dirampas sereta utai ti keji ke nganchurka utai didirika, deka bisi 1,290 hari.

12 “Gaga ati meh orang ke tetap* nganti sampai 1,335 hari nya abis!

13 “Nyadi Daniel, nuan mesti setia nyentukka ujung. Nuan deka berehat, tang nuan deka angkat lalu nerima ungkup nuan ba pengujung hari.”