Melikat—Baka ni Sida Bisi Kaul Enggau Pengidup Kitai?

 1. Nama kebuah kitai patut belajar pasal bala melikat?

ENTI nuan deka ngelala seiku orang, nuan mega patut ngelala orang ke sebilik enggau iya. Pia mega, enti kitai deka ngelala Petara Jehovah, kitai mega patut ngelala bala melikat ke begulai enggau Iya ba serega. Nyadi, nama pengawa bala melikat tu? Kelia menya, kala bala melikat bekaul enggau pengidup mensia? Tauka, enggau pengidup nuan empu kemaya hari tu? Enti kala, baka ni?

 2. Ari ni penatai bala melikat, lalu berapa penyampau sida?

² Bup Kudus nyebut beratus kali pasal bala melikat. Aram kitai beratika sekeda chunto pasal bala melikat tu. Ari ni penatai sida? Kolosi 1:16 madah: “Laban semua utai ti di serega enggau di dunya udah digaga ulih Kristus.” Nya alai, semua melikat digaga Petara Jehovah ngena Anak tuai Iya. Berapa penyampau sida? Bup Kudus madah, beratus juta melikat udah digaga, lalu semua sida bisi kuasa.—Masmur 103:20.

 3. Nama dipadah Jop 38:4-7 pasal bala melikat?

³ Jaku Petara, Bup Kudus, madahka kitai maya dunya tu digaga, “bala orang serega [melikat] manjung gaga ati.” (Jop 38:4-7) Bala melikat lama udah bisi, sebedau mensia enggau semua utai ba dunya tu digaga. Ayat Bup Kudus tu mega madahka bala melikat bisi asai ati, laban sida “manjung gaga ati.” Maya nya, semua melikat begulai nyembah Petara Jehovah.

 4. Baka ni Bup Kudus ngayanka bala melikat ke ngasi bisi pengerindu ngagai mensia?

⁴ Ari keterubah mensia digaga, bala melikat ke ngasi ngayanka pengerindu ngagai mensia. Sida gaga ati meda mensia majak mayuh enggau meda tuju Petara dikenataika. (Jaku Dalam 8:30, 31; 1 Peter 1:11, 12) Tang, bala melikat meda makin hari makin mayuh mensia enggai nyembah Penempa ti pengasih. Utai tu ngasuh bala melikat ke ngasi tusah ati. Tang, enti bisi seiku aja mensia pulai baru nyembah Jehovah, ‘bala melikat Petara deka rami gaga ati.’ (Luke 15:10) Laban bala melikat ibuhka mensia ke nyembah Petara, nya kebuah Jehovah suah ngena sida ngeringka, lalu nyaga mensia ke ngasi ba dunya tu. (Hebrew 1:7, 14) Peratika sekeda chunto tu.

 5. Nama chunto ba Bup Kudus pasal sukung ti diberi bala melikat?

⁵ Dua iku melikat nulung Lot enggau dua iku anak indu iya pansut ari nengeri Sodom enggau Gomorah maya nengeri nya dirusak. (Pemungkal 19:15, 16) Beratus taun udahnya, nabi Daniel dibuai ngagai lubang singa, tang iya enda disambar singa. Daniel madah: ‘Petara udah ngasuh melikat Iya nutup mulut singa.’ (Daniel 6:22) Maya jeman Jesus, seiku melikat ngelepaska Peter ari rumah jil. (Kereja Rasul 12:6-11) Bala melikat mega nyukung Jesus maya iya belabuh nginjil ba dunya tu. (Mark 1:13) Sebedau Jesus mati, seiku melikat ngayanka diri ngagai Jesus, lalu “ngeringka iya.” (Luke 22:43) Sukung ari melikat nya endang ngeringka ati Jesus!

 6. (a) Kemaya hari tu, baka ni bala melikat nyaga mensia ke nyembah Petara? (b) Nama tanya ti deka disaut kitai?

⁶ Kemaya hari tu, bala melikat enda ngayanka diri ngagai orang ke nyembah Petara ba dunya tu. Taja pan enda dipeda, bala melikat ke bisi kuasa agi nyaga orang ke nyembah Petara. Kelebih agi utai ti ulih ngerusak pengarap kitai ngagai Petara. Bup Kudus madah: ‘Melikat Jehovah nyaga orang ke ngemesaika Jehovah lalu ngelepaska sida ari utai ti tau nganu sida.’ (Masmur 34:7) Nama kebuah ayat tu ngelantangka ati kitai? Laban bisi bala melikat jai deka munaska kitai! Sapa sida? Ari ni penatai sida? Baka ni sida ulih ngemedis kitai? Enggau beratika nama utai ti nyadi ari pun sejarah pengidup mensia, kitai deka nemu saut tanya tu.

 7. Naka ni Sitan ulih ngelimpangka mensia ari Petara?

⁷ Ba Pelajar 3 bup tu, kitai udah belajar pasal seiku melikat ke bisi pengingin deka merintah, lalu ngelaban Petara. Melikat tu dikumbai Antu Sitan. (Pemandang 12:9) Sepemanjai 1,600 taun, pengudah Sitan nipu Hawa, iya udah ngelimpangka mayuh mensia ari Petara. Taja pia, bisi mensia meruan ngasika Petara. Chunto, Abel, Enok enggau Noah.—Hebrew 11:4, 5, 7.

 8. (a) Nama kebuah sekeda melikat nyadi antu? (b) Kena nyelamatka diri ari Bah Besai maya jeman Noah, nama digaga bala antu tu?

⁸ Maya jeman Noah, sekeda melikat ngelaban Jehovah. Sida ninggalka serega, lalu nurun ke dunya tu ngena tubuh mensia. Nama kebuah? Kitai ulih macha tu ba bup Pemungkal 6:2: ‘Sekeda anak Petara [melikat] meda sida indu nya bajik gamal. Nya alai sida lalu jadi enggau indu ke dikerinduka sida.’ Tang, Petara Jehovah enggai meda pengawa bala melikat jai tu terus ngerusak mensia. Petara ngemunaska semua mensia ke jai ngena bah besai. Taja pia, Petara nyelamatka orang ke ngasika Iya. (Pemungkal 7:17, 23) Nya alai, bala melikat jai tauka antu ninggalka tubuh mensia sida, lalu pulai baru ke serega nyadi melikat. Pengawa bala melikat jai nya nunjukka sida nyukung Sitan, ke dikumbai “raja antu.”—Matthew 9:34.

 9. (a) Nama nyadi ngagai bala melikat jai maya sida pulai baru ke serega? (b) Nama utai deka dipelajarka kitai pasal bala antu?

⁹ Maya bala melikat jai tu pulai baru ke serega, sida enda diterima Petara agi, baka Sitan. (2 Peter 2:4) Taja pan sida diatu enda ulih ngena tubuh mensia agi, tang sida ulih nesatka mensia enggau pengawa ti jai. Enggau sukung bala melikat jai tu, Sitan “nipu semua dunya.” (Pemandang 12:9; 1 John 5:19) Baka ni? Bala antu ngena mayuh chara nesatka orang. (2 Korint 2:11) Aram kitai meda sekeda chara dikena Sitan nesatka orang.

10. Nama reti pengawa bemanang?

¹⁰ Bala antu ngena pengawa bemanang nesatka orang. Pengawa bemanang bisi kaul enggau bala antu, enda ngira ngena mensia tauka ngena roh ti jai. Bup Kudus ngasuh kitai nyeliahka diri ari pengawa bemanang. (Galatia 5:19-21) Pengawa bemanang baka umpan ti dikena orang nginti. Orang ke nginti ngena mayuh bengkah umpan kena ngulihka mayuh macham ikan. Pia mega, roh ti jai ngena mayuh bengkah pengawa bemanang kena nesatka mayuh macham orang.

11. Nama reti nujum, lalu nama kebuah kitai patut nyeliahka diri ari pengawa tu?

¹¹ Nujum tauka tenung nya siti umpan ti dikena bala antu. Nama reti nujum? Nujum nya pengawa kena nemu utai ti deka nyadi jemah ila tauka pasal utai ti enda ditemu orang. Sekeda ari pengawa nujum nya, pengawa belian, meda tapa jari, pechaya ke mimpi tauka ngena puchau. Taja pan mayuh orang ngumbai pengawa nujum enda ngemedis, tang Bup Kudus nunjukka pengawa tu bisi kaul enggau roh ti jai. Chunto, Kereja Rasul 16:16-18 madah pasal seiku indu “ke dirasuk antu ti ngasuh iya nemu nujum.” Tang pengudah antu pansut ari tubuh iya, iya enda ulih ngaga pengawa nujum agi.

12. Nama kebuah bejaku enggau orang ke udah mati nya, pengawa ti salah?

¹² Bejaku enggau orang ke udah mati nya siti agi chara dikena bala antu nesatka mensia. Orang ke benung tusah ati lenyau orang dikesayau, selalu ditipu enggau penemu ti salah pasal orang ke udah mati. Bala manang ngenataika pesan ari orang ke udah mati tauka nunda chara sida bejaku. Nya alai, mayuh orang arap bendar orang ke mati agi ulih bejaku enggau orang ke idup. Penemu tu baka ke ulih “ngelantangka” ati orang ke kena penusah pemati. Tang, utai nya bula. Nama kebuah? Laban bala antu ulih nunda munyi nyawa orang ke udah mati, lalu meri penemu pasal orang ke udah mati ngena bala manang. (1 Samuel 28:3-19) Pia mega, baka ke udah dipelajar ba Pelajar 6, orang ke udah mati nadai agi. (Masmur 115:17) Nyadi, orang ke “betanya ngagai semengat orang ke udah mati” ditesatka roh ti jai, lalu pengawa sida enda nitihka peneka Petara. (Ulang Adat 18:10, 11; Isaiah 8:19) Nya alai, kitai patut nulak umpan ke dikena bala antu tu.

13. Nama utai ulih digaga mayuh orang ke kala takut ke bala antu?

¹³ Roh ti jai ukai semina nesatka orang, tang mega ngenakutka sida. Kemaya hari tu, Sitan enggau bala antu iya nemu “timpuh diri nyau deka abis.” Enda lama agi, sida enda ulih ngaga nama-nama utai. Nya alai, diatu sida enggau naka ulih ngenakutka mensia. (Pemandang 12:12, 17) Taja pia, beribu iku orang ke kala takut ke roh ti jai, enda takut agi. Baka ni sida ulih ngereja nya? Nama utai ulih digaga orang ke udah enggau pengawa bemanang?

14. Baka orang Kristian ba Epesus, baka ni kitai ulih ngelepaska diri ari roh ti jai?

¹⁴ Bup Kudus madahka kitai baka ni ngelaban enggau ngelepaska diri ari roh ti jai. Peratika chunto orang Kristian ba nengeri Epesus kelia. Sekeda ari sida ngereja pengawa bemanang sebedau nyadi orang Kristian. Maya sida deka muai pengawa bemanang, nama digaga sida? Bup Kudus madah: “Mayuh manang datai mai bup sida, lalu nunu bup nya di mua orang mayuh.” (Kereja Rasul 19:19) Pia mega, kemaya hari tu kitai patut muai lalu nunu semua utai ti bisi kaul enggau pengawa bemanang, enda ngira bup, majalah, cherita wayang, cherita enggau lagu ba DVD tauka VCD. Tu nyengkaum jimat enggau utai bukai ti dikena nyaga diri empu ari utai ti jai.—1 Korint 10:21.

15. Nama patut digaga kitai kena ngelaban roh ti jai?

¹⁵ Udah orang Kristian ba Epesus nunu bup ti bisi kaul enggau pengawa bemanang, rasul Paul nulis surat ngagai sida iya: “Kitai . . . ngelaban kuasa roh ti jai di langit.” (Epesus 6:12) Bala antu enda ngetu. Sida majak ngiga peluang. Nyadi, nama agi patut digaga orang Kristian ba Epesus? “Nambahka nya,” ku Paul, “ambi pengarap nyadika terabai kena kita madamka semua laja ti beapi-api ti ditimbakka Sitan.” (Epesus 6:16) Kering agi terabai pengarap kitai, kering agi kitai ulih ngelaban roh ti jai.—Matthew 17:20.

16. Baka ni kitai ulih ngeringka pengarap kitai?

¹⁶ Baka ni kitai ulih ngeringka pengarap kitai? Enggau belajarka Bup Kudus. Baka dinding ti teguh bepanggai ba palan ti kering, peneguh pengarap kitai mega bepanggai ba penemu ti betul pasal Jaku Petara, Bup Kudus. Enti kitai macha enggau belajarka Bup Kudus ninting ari, pengarap kitai majak teguh. Baka dinding ti teguh, pengarap ti teguh ulih nyaga kitai ari kuasa roh ti jai.—1 John 5:5.

17. Nama agi patut digaga kena ngelaban roh ti jai?

¹⁷ Nama agi patut digaga orang Kristian ba Epesus? Sida begunaka jaga ti lebih agi, laban sida diau ba nengeri ti penuh enggau roh ti jai. Nyadi Paul madahka sida: “Besampi dalam Roh tiap kali kita besampi, ngena semua macham sampi enggau peminta.” (Epesus 6:18) Laban kitai mega diau ba dunya ti penuh enggau roh ti jai, kitai patut bebendar besampi ngagai Jehovah ngambika dijaga Iya. Endang amat, kitai patut ngena nama Jehovah maya kitai besampi. (Jaku Dalam 18:10) Nya alai, kitai patut terus besampi ngagai Petara “lepaska kami ari penyai,” Antu Sitan. (Matthew 6:13) Jehovah deka nyaut sampi ari ati kitai ti bendar.—Masmur 145:19.

18, 19. (a) Nama kebuah kitai pechaya kitai ulih ngelaban roh ti jai? (b) Nama tanya ti deka disaut ba Pelajar 11?

¹⁸ Roh ti jai ulih ngemedis. Tang, enti kitai ngelaban Antu lalu semak ngagai Petara enggau ngereja peneka Iya, kitai enda patut takut ke sida. (James 4:7, 8) Kuasa roh ti jai bisi sekat. Sida udah diukum maya jeman Noah, lalu sida deka nganti diakim maya Hari Pechara jemah ila. (Jude 6) Kingatka, kitai mega dijaga bala melikat Jehovah ke bisi kuasa. (2 Raja 6:15-17) Bala melikat tu gaga ati meda kitai ulih ngelaban roh ti jai. Sida ke ngasi tu meransang kitai ngelaban roh ti jai. Aram kitai terus semak ngagai Jehovah enggau bala melikat Iya ke ngasi. Kitai mega patut nyeliahka diri empu ari semua pengawa bemanang, lalu seruran nitihka ajar Jaku Petara. (1 Peter 5:6, 7; 2 Peter 2:9) Enggau tu, kitai pechaya kitai ulih ngalahka roh ti jai.

¹⁹ Tang nama kebuah Petara ngelakka roh ti jai enggau penyai ngasuh mensia balat merinsa? Tanya tu deka disaut ba Pelajar 11.