Bala Nembiak—Pengidup ti Baka Ni ke Deka Dikembuan Nuan?

 1. Nama penanggul ke ditapi Joas, Usiah, enggau Josiah?

NAMA asai ati nuan enti nuan diasuh merintah nembiak Petara lebuh nuan agi biak? Baka ni nuan deka ngena kuasa nuan? Bup Kudus madah pasal sekeda bala nembiak ke nyadi raja menua Judah. Ambika chunto, Joas nyadi raja lebuh iya beumur 7 taun, Usiah nyadi raja lebuh iya beumur 16 taun, lalu Josiah nyadi raja lebuh iya beumur 8 taun. Tu tentu amat tusah ke sida. Taja pan nya enda senang, tang Jehovah enggau orang bukai nulung sida ngereja mayuh utai ti manah.

 2. Nama kebuah kitai patut belajar pasal chunto Joas, Usiah, enggau Josiah?

² Taja pan kitai ukai raja tauka kuin, tang kitai ulih belajar mayuh utai ari cherita pengidup Joas, Usiah, enggau Josiah. Kitai ulih belajar ari pemutus ti manah sereta pemutus ti enda manah ke digaga sida. Ari chunto sida, kitai ulih belajarka tiga iti pekara tu: (1) Nama kebuah kitai patut milih bala kaban ti manah? (2) Nama kebuah kitai patut mengkang baruh ati? Lalu (3) nama kebuah kitai patut majak semak ngagai Jehovah?

 3. Baka ni Imam Besai Jehoiada nulung Raja Joas ngaga pemutus ti manah?

³ Neladan pemutus ti manah ke digaga Joas. Apai Raja Joas udah nadai lebuh Joas agi biak. Nyadi, Imam Besai Jehoiada nyaga iya, lalu ngajar iya pasal Jehovah. Nya alai, Joas ulih ngaga pemutus ti manah laban iya mendingka jaku lalau ke diberi Jehoiada ngagai iya. Ketegal teladan Johaiada ti manah, Joas ngaga pemutus deka nyembah Jehovah. Lalu iya mega nulung bala rayat iya ngereja utai ti sama. Joas mega nentuka Rumah Sembiang Jehovah diaduka baru.—2 Ban. 24:​1, 2, 4, 13, 14.

 4. Nama penguntung iya lebuh kitai rindu sereta ngasika pesan Jehovah? (Jaku-Dalam 2:​1, 10-12)

⁴ Apai indai tauka orang bukai engka benung ngajar nuan rinduka Jehovah sereta idup nitihka standard Iya. Enggau nya, nuan benung nerima siti pemeri ti berega. (Bacha Jaku-Dalam 2:​1, 10-12.) Bala apai indai ulih ngelatih bala anak sida enggau mayuh chara. Peratika baka ni apai siku menyadi indu ke benama Katya, nulung iya ngaga pemutus ti manah. Tiap hari lebuh apai iya nganjung iya ngagai sekula, apai iya deka berandauka ayat ninting hari enggau iya. Ku Katya madahka: “Randau nya udah nulung aku ngereja utai ti betul lebuh bisi penanggul ke nyadi ba hari nya.” Kelimpah ari nya, apai indai nuan engka ngaga atur bepelasarka prinsip ari Bup Kudus. Tang nuan engka ngasaika atur ke digaga sida nagang nuan ari ngereja utai ti dikerinduka nuan. Nama ulih nulung nuan ngasika sida? Siku menyadi indu ke benama Anastasia, ngenang baru utai ke dikereja apai indai iya. Ku iya madah: “Apai indai aku nerangka kebuah seduai iya ngaga sekeda atur. Seduai iya nulung aku faham, atur ke digaga seduai iya ukai kena ngawal aku. Tang atur nya kena nyaga aku laban seduai iya sayauka aku.”

 5. Nama kesan ari pemutus ke digaga nuan ngagai apai indai nuan sereta Jehovah? (Jaku-Dalam 22:6; 23:​15, 24, 25)

⁵ Apai indai nuan deka gaga ati lebuh nuan nitihka jaku lalau ke diberi seduai iya ari Bup Kudus. Tang ke pemadu penting, Jehovah deka gaga ati, lalu kaul Iya enggau nuan deka nyadi majak tegap. (Bacha Jaku-Dalam 22:6; 23:​15, 24, 25.) Semua tu kebuah ti manah nuan patut neladan Joas lebuh iya agi biak.

 6. Pengudah Imam Besai Jehoiada mati, Joas berengkah ningaka jaku lalau ari sapa, lalu nama asil iya? (2 Bansa Israel 24:​17, 18)

⁶ Belajar ari pemutus ti enda manah ke digaga Joas. Pengudah Imam Besai Jehoiada mati, Joas milih bala kaban ti enda manah. (Bacha 2 Bansa Israel 24:​17,18.) Iya nitihka jaku lalau ke diberi bala tuai orang Judah, ke enda rinduka Jehovah. Joas kebendar iya patut nyeliahka diri ari bekaban enggau sida laban sida ngereja utai ti enda manah. (J-lam. 1:10) Tang, iya agi mendingka jaku lalau sida ti salah. Indah lebuh petunggal iya, Sekariah, nguji deka ngemetulka iya, Joas ngasuh iya diukum bunuh. (2 Ban. 24:​20, 21; Mat. 23:35) Utai ke dikereja Joas nya beli sereta amat jai! Terubah iya, Joas siku raja ti tetap ati. Tang sayau amat, udah nya, iya limpang ari pengarap sereta ngelaban Petara, lalu nyadi siku pemunuh. Pengujung iya, bala pemesai iya empu munuh iya. (2 Ban. 24:​22-25) Enti iya terus mendingka Jehovah sereta orang ke rinduka Jehovah, pengidup iya tentu enda nyadi baka nya! Nama utai ke ulih dipelajarka nuan ari chunto Joas?

 7. Sapa ke deka dipilih nuan nyadika kaban? (Peda mega gambar.)

⁷ Joas ngaga pemutus ti enda manah lebuh iya milih bala kaban. Nya alai, kitai belajar, kitai patut milih kaban ti manah, iya nya sida ke rinduka Jehovah sereta deka ngasuh Iya gaga ati. Bala kaban ke baka tu nulung kitai ngereja utai ti manah. Kitai ulih bekaban enggau sida ke tuai agi tauka biak agi ari kitai. Ingat meh, Joas jauh biak agi ari kaban iya, Jehoiada. Lebuh nuan deka milih bala kaban, tanya diri empu: ‘Ulih sida nulung aku negapka pengarap aku ngagai Jehovah? Kati sida bebendar deka ngasika Jehovah, lalu meransang aku ngereja utai ti sama? Kati sida bisi bejaku pasal Jehovah enggau utai ke dipelajarka sida ari Bup Kudus? Kati sida meri aku jaku lalau lebuh aku begunaka nya?’ (J-lam. 27:​5, 6, 17) Seliahka meh ari bekaban enggau sida ke enda rinduka Jehovah. Tang, enti bala kaban nuan rinduka Jehovah, anang sekali-kali ninggalka sida laban sida deka seruran nulung nuan.—J-lam. 13:20.

 8. Enti kitai bisi ngena media sosial, nama utai ke patut diperundingka kitai?

⁸ Media sosial ulih nyadi siti perengka ti manah kena bekomunikasi enggau diri sebilik sereta bala kaban. Taja pia, mayuh orang ngena chara tu ngeso utai ke udah digaga sida. Sida ngepos gambar tauka video pasal utai ke udah dibeli sida tauka utai ke udah dikereja sida. Enti nuan bisi ngena media sosial, tanya diri empu: ‘Nama motif aku? Kati aku deka ngeso utai ke dikereja aku? Kati tuju aku nya deka meransang orang bukai tauka ketegal aku deka sida muji aku? Kati aku neju runding orang bukai ngachau runding, jaku, sereta ulah aku?’ Menyadi Nathan Knorr, ke kala nyadi siku ari Raban ti Ngiring, meri jaku lalau tu: “Anang ngereja utai ketegal nuan deka ngelantangka ati orang bukai. Enti nuan ngereja nya, nuan enda ulih ngelantangka ati sapa-sapa. Tang, kereja meh utai ti ngelantangka ati Jehovah. Enti nuan ngereja nya, nuan deka ngelantangka ati semua orang ke rinduka Jehovah.”

 9. Jehovah nulung Usiah ngereja nama? (2 Bansa Israel 26:​1-5)

⁹ Neladan pemutus ti manah ke digaga Usiah. Lebuh Raja Usiah agi biak, iya siku raja ti baruh ati. Bup Kudus madahka, iya belajar betuaika tauka nangika Jehovah enggau ati ti tetap. Iya idup nyentukka iya beumur 68 taun, lalu Jehovah merekat iya nyauka sepemanjai pengidup iya. (Bacha 2 Bansa Israel 26:​1-5.) Usiah ngalahka mayuh munsuh, lalu negapka kuta nengeri Jerusalem. (2 Ban. 26:​6-15) Usiah tentu gaga ati enggau semua tulung ke udah diberi Jehovah.—P-jar. 3:​12, 13.

10. Nama nyadi ngagai Usiah?

¹⁰ Belajar ari pemutus ti enda manah ke digaga Usiah. Raja Usiah suah meri arahan ngagai orang bukai. Engka tu ngasuh iya ngumbai diri ulih ngereja sebarang utai ti dikedekaka iya. Bisi sekali, Usiah tama ngagai Rumah Sembiang Jehovah, lalu nguji deka nunu menyan. Tang, bala raja enda dikemendarka ngereja pengawa tu. (2 Ban. 26:​16-18) Imam Besai Asariah bisi nguji deka nagang iya ari ngereja nya, tang Usiah nyadi ringat. Sayau amat, Usiah enda mengkang tetap ati. Ketegal nya, Jehovah ngukum iya ngena penyakit lan. (2 Ban. 26:​19-21) Pengidup iya tentu manah agi enti sema iya mengkang baruh ati!

11. Nama ulih nulung kitai mengkang baruh ati? (Peda mega gambar.)

¹¹ Jehovah udah ngereja mayuh utai ti manah ke Usiah. Tang lebuh Usiah nyadi raja ti bekuasa, iya nyau enda agi berasai beterima kasih ngagai Jehovah. Nama utai ke ulih dipelajarka kitai ari Usiah? Kitai patut seruran ingat, semua berekat ke diasaika kitai sereta tanggung pengawa ke dikembuan kitai datai ari Jehovah. Ari ke bejaku begah pasal utai ke udah dijapai kitai, kitai patut meri terima kasih ngagai Jehovah laban udah nulung kitai ngereja semua nya.b (1 Kor. 4:7) Kitai mega patut sedar, kitai enda sempurna, lalu begunaka disiplin. Siku menyadi lelaki ke beumur kira-kira 60 taun madahka: “Lebuh bisi menyadi ke madah pasal penyalah aku, aku nguji enda pedis ati tauka asa ati. Lebuh aku nerima disiplin ketegal udah ngereja penyalah, aku enggau naka ulih ngaga ubah, lalu terus nyembah Jehovah.” Lebuh kitai nangika Jehovah, lalu mengkang baruh ati, kitai deka ngembuan pengidup ti ngagaka ati.—J-lam. 22:4.

12. Lebuh Josiah agi nembiak, baka ni iya nunjukka diri deka ngerinduka ati Jehovah? (2 Bansa Israel 34:​1-3)

¹² Neladan pemutus ti manah ke digaga Josiah. Lebuh Josiah beumur 16 taun, iya berengkah ngiga Jehovah. Iya deka belajar pasal Jehovah, lalu ngereja peneka Iya. Taja pia, nya ukai utai ti senang dikereja. Maya nya, mayuh orang nyembah petara pelesu. Ketegal Josiah raja ti biak maya nya, iya begunaka pemerani ngambika ulih ngasuh orang badu ngereja nya. Lalu sebedau Josiah beumur 20 taun, iya berengkah muai semua pengarap ti pelesu ari menua nya. Naka meh pemerani Josiah!—Bacha 2 Bansa Israel 34:​1-3.

13. Pengudah nuan nyerahka diri ngagai Jehovah, nama ubah ke deka nyadi ba pengidup nuan?

¹³ Taja pan nuan agi biak, nuan ulih neladan Josiah. Nuan pan ulih belajar mayuh agi pasal Jehovah enggau sifat-sifat Iya ti ngerinduka ati. Lebuh nuan ngereja nya, nuan tentu diperansang deka nyerahka diri ngagai Iya. Baka ni pemutus tu deka ngubah pengidup nuan? Peratika utai ke dipadah Luke. Iya dibaptisa maya iya beumur 14 taun. Ku iya: “Belabuh ari diatu, aku deka ngenuluka Jehovah ba pengidup aku, lalu aku deka enggau naka ulih ngelantangka ati Iya.” (Mrk. 12:30) Nuan mega deka diberekat enti nuan milih deka nyerahka diri ngagai Jehovah!

14. Baka ni sekeda nembiak neladan Raja Josiah? Beri sekeda chunto.

¹⁴ Nama sekeda cabaran ke ditapi bala nembiak ke nyembah Jehovah? Johan, dibaptisa maya iya beumur 12 taun. Iya madahka, orang ke sekelas enggau iya nguji mejal iya ngena vape. Nama nulung Johan bulih pengering ngelaban penguji nya? Iya ngingatka diri, enti iya ngena vape, nya ulih ngachau pengerai iya sereta kaul iya enggau Jehovah. Rachel, dibaptisa maya iya beumur 14 taun. Iya nerangka utai ke nulung iya napi cabaran ba sekula. Ku iya: “Aku beratika utai ke ulih nulung aku ingat pasal Jehovah sereta utai ke bisi dalam Bup Kudus. Ambika chunto, utai ke dipelajar ba kelas Sejarah engka ngingatka aku pasal siti cherita Bup Kudus tauka jaku benabi. Tauka kekadang, lebuh aku bejaku enggau orang bukai ba sekula, aku berundingka siti ayat Bup Kudus ke ulih dikunsika aku enggau sida.” Cabaran ke ditapi nuan engka enda sama enggau cabaran ke ditapi Raja Josiah, tang nuan ulih ngayanka penemu-dalam enggau penetap ati baka Raja Josiah. Lebuh nuan mujur mutarka penanggul diatu, iya nya lebuh nuan agi nembiak, tu deka nulung nuan besedia agi napi sebarang penanggul ke deka datai dudi hari.

15. Nama nulung Josiah nyembah Jehovah enggau tetap ati? (2 Bansa Israel 34:​14, 18-21)

¹⁵ Lebuh Josiah beumur 26 taun, iya ngaduka baru Rumah Sembiang Jehovah. Lebuh pengawa nya dipejalaika, ‘Bup Adat Jehovah, iya nya Adat ti udah diberi Petara ngagai Moses’ ditemu. Lebuh Raja Josiah ninga bup Adat nya dibacha, iya tekala nya ngaga ubah ngambika ulih ngasi utai ti ditulis dalam bup nya. (Bacha 2 Bansa Israel 34:​14, 18-21.) Kati nuan deka macha Bup Kudus enggau tetap? Engka nuan benung nguji ngereja nya ninting hari. Kati nuan rindu ngereja nya? Kati nuan bisi nulis ayat Bup Kudus ke ulih nulung nuan? Luke, ke disebut tadi, nulis dalam siti bup, poin ti manah ke ditemu iya. Lebuh nuan ngereja utai ti sama, nya ulih nulung nuan ingatka ayat Bup Kudus tauka poin ti dikerinduka nuan. Enti penemu enggau pengerindu nuan ke Bup Kudus majak dalam, nuan tentu keran agi deka nyembah Jehovah. Lalu baka Raja Josiah, Jaku Petara mega deka nulung nuan ngereja utai ti betul.

16. Nama kebuah Josiah ngaga penyalah ti besai, lalu nama ulih dipelajarka kitai?

¹⁶ Belajar ari pemutus ti enda manah ke digaga Josiah. Lebuh Josiah beumur 39 taun, iya ngereja siti penyalah ke ngujungka ngagai pemati iya. Ari ke ngiga iring ari Jehovah, iya bepanggai ba penemu diri empu. (2 Ban. 35:​20-25) Nama utai ke ulih dipelajarka kitai ari utai ti nyadi ngagai Raja Josiah? Enda ngira kitai tuai tauka biak, tauka berapa lama kitai udah belajarka Bup Kudus, kitai mesti terus ngiga Jehovah. Baka ni kitai ulih ngereja nya? Seruran besampi minta iring ari Jehovah, belajarka Jaku Iya, sereta ningaka jaku lalau ari bala menyadi Kristian ke tegap ba pengarap. Enti kitai ngereja nya, kitai ulih nyeliahka diri ari ngereja penyalah ti besai, lalu kitai deka gaga agi ati.—Jas. 1:25.

17. Nama utai ti penting ke ulih dipelajarka kitai ari tiga iku raja menua Judah?

¹⁷ Bisi mayuh utai ti manah ke ulih dikereja nuan lebuh nuan agi biak. Utai ti ditulis dalam Bup Kudus pasal Joas, Usiah, enggau Josiah nunjukka bala nembiak ulih ngaga pemutus ti manah, lalu ngena pengidup sida ngelantangka ati Jehovah. Endang amat, tiga iku nembiak tu ngereja penyalah ti ngujungka utai ti enda manah nyadi. Tang, enti nuan neladan utai ti manah ke dikereja sida, lalu nyeliah ari ngereja penyalah ke digaga sida, nuan tau ngembuan pengidup ti ngagaka ati.

18. Nama chunto ari Bup Kudus ke nunjukka nuan tau ngembuan pengidup ti ngagaka ati? (Peda mega gambar.)

¹⁸ Bup Kudus ngundan cherita pengidup bala nembiak ke bukai, ke datai semak ngagai Jehovah, ngereja utai ti ngerinduka ati Iya, lalu bulih pengidup ti ngagaka ati. David siku ari sida. Lebuh iya agi biak, iya milih deka nyadi kaban Petara, lalu udah nya iya nyadi siku raja ti taluk. Amat, bisi maya iya David ngereja penyalah. Tang Petara agi ngumbai David nembiak Iya ti tetap ati. (1 Raj. 3:6; 9:​4, 5; 14:8) Lebuh nuan belajar pasal David, teladan iya deka meransang nuan terus nyembah Jehovah enggau tetap ati. Kelimpah ari nya, nuan mega ulih belajar pasal Mark tauka Timoti. Seduai iya berengkah nyembah Jehovah lebuh agi biak, lalu seduai iya terus nyembah Iya enggau tetap ati. Pemutus seduai iya ti deka nyembah Jehovah ngagaka ati Jehovah. Tu mega ngasuh seduai iya gaga ati.

19. Nama jalai pengidup ti dikedekaka nuan?

¹⁹ Chara nuan ngena pengidup nuan diatu deka nentuka gaya pengidup nuan dudi hari. Enti nuan bepanggai ba Jehovah, lalu enda bepanggai ba penemu diri empu, Iya deka nulung nuan ngaga pemutus ti manah ba pengidup. (J-lam. 20:24) Nuan tau ngembuan pengidup ti ngagaka ati sereta penuh enggau berekat. Kingatka meh, Jehovah beterima kasihka utai ke digaga nuan ke Iya. Chara ti pemadu manah ngena pengidup nuan, iya nya nyembah Jehovah Apai kitai ti bepengerindu. Nadai jalai pengidup ke bukai ti manah agi ari tu.