Jehovah Deka Nulung Nuan

1, 2. Nama digaga Petara maya jeman Bup Kudus, lalu nama engka diperundingka sekeda orang kemaya hari tu lebuh sida sakit?

ENTI nuan kala balat sakit, nuan engka berunding: ‘Kati aku ulih gerai?’ Tauka engka seiku ari kita sebilik tauka seiku ari kawan nuan sakit, lalu nuan berunding sekalika iya ulih gerai tauka enda. Kitai enggau orang ke dikesayauka kitai endang seruran deka gerai. Ba Bup Kudus, kitai macha pasal sekeda orang ke enda gerai, lalu sida deka nemu sekalika sida ulih gerai tauka enda. Chunto, Raja Ahasiah, anak Ahap enggau Jesebel, deka nemu sekalika iya ulih gerai tauka enda. Lalu udah nya, Raja Benhadat ari menua Siria sakit sereta deka nemu sekalika iya ulih gerai tauka enda.—2 Raj. 1:2; 8:7, 8.

² Bup Kudus mega madah ngagai kitai, kelia menya Jehovah kekadang ngeraika orang ngena kereja ajih sereta ngangkatka sekeda orang ari mati ngena bala nabi. (1 Raj. 17:17-24; 2 Raj. 4:17-20, 32-35) Kemaya hari tu, sekeda orang ke sakit engka berunding sekalika Petara deka ngeraika sida tauka enda.

3-5. Nama ulih digaga Jehovah enggau Jesus, lalu nama tanya ke deka dikerandauka kitai?

³ Jehovah bisi kuasa nentuka pengerai orang. Iya ngukum sekeda orang ngena penyakit, baka Raja Ejip maya jeman Abraham, lalu udah nya menyadi indu Moses, Miriam. (P-kal. 12:17; P-pau. 12:9, 10; 2 Sam. 24:15) Lalu, Iya ngukum orang Israel ngena “penyakit ti balat” lebuh sida enda tetap ati ngagai Iya. (U-dat. 28:58-61) Ba maya bukai, Jehovah nyaga nembiak Iya ari kena penyakit. (P-sut. 23:25; U-dat. 7:15) Iya indah ngeraika sekeda ari sida. Chunto, Jehovah ngeraika Jop lebuh iya balat sakit sereta ngajihka diri mati.—Jop 2:7; 3:11-13; 42:10, 16.

⁴ Kitai pechaya Jehovah bisi kuasa kena ngeraika orang ke sakit. Jesus mega ulih ngeraika orang ke sakit. Lebuh Jesus ba dunya, iya ngeraika orang ke bisi penyakit baka penyakit lan sereta penyakit gila-babi. Iya ngeraika orang buta enggau orang ke sakit bajung. (Bacha Matthew 4:23, 24; Jhn. 9:1-7) Kereja ajih nya nulung kitai enda sabar nganti utai manah ke deka digaga Jesus ba dunya baru. Maya nya, “nadai orang ke diau dalam menua kitai deka mutap madahka diri sakit.”—Isa. 33:24.

⁵ Tang enti kitai kelalu balat sakit, ulih kitai ngarapka Jehovah tauka Jesus ngeraika kitai ngena kereja ajih kemaya hari tu? Lalu nama patut diperundingka kitai lebuh milih chara berubat ke dikena?

 6. Nama dipadah Bup Kudus pasal kereja ajih ke digaga orang Kristian ba kurun keterubah?

⁶ Ba kurun keterubah, Jehovah ngiri orang Kristian ngena roh kudus Iya, lalu meri sekeda sida penau kena ngaga kereja ajih. (SKR. 3:2-7; 9:36-42) Chunto, sida ulih ngeraika orang sereta bejaku ngena mayuh macham bansa jaku. (1 Kor. 12:4-11) Tang udah nya, kereja ajih ke baka nya nadai agi, baka ke udah dipadah Bup Kudus. (1 Kor. 13:8) Nya alai kemaya hari tu, kitai enda ulih ngarapka kereja ajih ari Petara ngeraika kitai tauka orang ke dikesayauka kitai.

 7. Baka ni Masmur 41:3 ulih meransang kitai?

⁷ Tang enti nuan sakit, Jehovah deka ngelantangka ati sereta nyukung nuan, baka ke udah digaga Iya ngagai nembiak Iya menya. Raja David nulis: ‘Beberekat meh orang ke nemu siru enggau orang ke seranta, laban Jehovah deka nulung sida lebuh sida dituntung penusah. Jehovah deka nyaga sida lalu ngidupka sida.’ (Mas. 41:1, 2) Endang amat, David enda ngumbai orang ke ngayanka penyiru ngagai orang ke seranta maya jeman iya deka meruan idup. Nya alai, baka ni Jehovah deka nulung orang ke bisi penyiru nya? David nerangka: ‘Jehovah deka nulung sida lebuh sida sakit lalu deka ngeraika sida.’ (Mas. 41:3) Jehovah nemu pemerinsa bala nembiak Iya, lalu Iya seruran ingat ke sida. Iya ulih meri sida pemerani enggau penemu-dalam. Jehovah mega udah ngaga tubuh mensia ngambika ulih gerai kediri empu.

 8. Nitihka Masmur 41:4, nama dipinta David ari Jehovah lebuh iya kelalu balat sakit?

⁸ Ba Masmur 41, David mega nyebut pasal maya iya ke kala balat sakit, nadai pengering sereta irau ati. Maya nya, anak lelaki iya Absalom deka nyadi raja nganti iya. David balat sakit, nya alai iya enda ulih nagang Absalom. Iya nemu penanggul ba ruang bilik iya nyadi ketegal dosa iya enggau Batseba. (2 Sam. 12:7-14) Nya alai, nama digaga iya? Iya besampi: ‘Aku udah bedosa ngelaban Nuan, O Jehovah. Kasihka aku, lalu geraika aku.’ (Mas. 41:4) David nemu Jehovah udah ngampunka dosa iya, lalu iya bepanggai ba Jehovah ngambika nulung iya lebuh iya sakit. Tang, kati David ngarapka kereja ajih ari Jehovah?

 9. (a) Nama digaga Jehovah ke Raja Hesekiah? (b) Nama diarapka David ari Jehovah?

⁹ Endang amat, ukai semua orang digeraika Petara. Chunto, lebuh Raja Hesekiah nyau deka mati, Jehovah ngeraika iya. Hesekiah idup 15 taun da agi. (2 Raj. 20:1-6) Tang, David enda ngarapka kereja ajih. Taja pia, iya ngarapka Petara nulung iya baka Petara ke deka nulung “orang ke nemu siru enggau orang ke seranta.” David bisi kaul ti manah enggau Jehovah, nya alai iya ulih minta Jehovah ngelantangka ati iya sereta nyaga iya lebuh iya sakit. Iya mega minta tubuh diri digeraika. Kitai ulih minta Jehovah ngeraika kitai enggau chara ti sama.—Mas. 103:3.

10. Nama nyadi ngagai Tropimus enggau Epaproditus, lalu nama ulih dipelajarka kitai?

¹⁰ Ba kurun keterubah, ukai semua orang Kristian digeraika ngena kereja ajih, taja pan rasul Paul enggau sida ke bukai ulih ngeraika orang ke sakit. (Bacha Kereja Rasul 14:8-10.) Rasul Paul ngeraika apai Publius ke sakit chelap angat sereta pedis perut. Paul “besampi, ngengkahka jari iya atas apai Publius, lalu ngeraika iya.” (SKR. 28:8) Tang Paul enda ngeraika semua orang ke dikelala iya. Tropimus, seiku ari kawan Paul, sama enggau Paul bejalaika pengawa nyadi pengerintis seberai tasik. (SKR. 20:3-5, 22; 21:29) Lebuh Tropimus sakit, Paul enda ngeraika iya. Nya alai, Tropimus ngetu bejalai jauh enggau Paul, lalu diau ba menua Miletus ngambika pengerai iya manah agi. (2 Tim. 4:20) Seiku da agi kawan Paul, Epaproditus, mega sakit sereta nyau deka mati. Tang, Bup Kudus nadai madahka Paul ngeraika iya.—Plp. 2:25-27, 30.

11, 12. Nama ditemu kitai pasal Luke, lalu baka ni iya nulung Paul?

¹¹ Luke nya lutur, lalu iya bejalai jauh enggau Paul. (SKR. 16:10-12; 20:5, 6; Kol. 4:14) Iya nulung Paul enggau sida ke bukai, lebuh sida sakit maya sida bejalaika pengawa nyadi pengerintis seberai tasik. (Gal. 4:13) Baka ke dipadah Jesus, “semina orang ke sakit” begunaka lutur.—Luk. 5:31.

¹² Luke ukai semina orang ke rindu meri jaku lalau pasal pengerai. Iya dilatih nyadi lutur. Bup Kudus nadai madah dini alai tauka kemaya Luke nerima latih nyadi lutur. Tang, Bup Kudus bisi madahka pasal Luke ngirumka salam ngagai bala menyadi Kristian di Kolosi nengah Paul. Nya alai, Luke engka nerima latih ba sekula perubat di Laudisia, semak menua Kolosi. Pia mega, lebuh Luke nulis Injil iya enggau Surat Pasal Kereja Rasul, dia iya ngena leka jaku ke nyemetak bekaul enggau pengawa berubat. Ketegal iya lutur, iya nulis mayuh cherita pasal Jesus ke ngeraika orang.

13. Nama patut dikingatka kitai sebedau meri tauka nerima jaku lalau pasal pengerai?

¹³ Kemaya hari tu, nadai seiku ari bala menyadi Kristian kitai ulih ngaga kereja ajih sereta ngeraika kitai. Tang ketegal sida deka nulung kitai, sekeda ari sida engka meri kitai jaku lalau pasal pengerai, taja pan kitai nadai minta iya. Endang amat, sekeda jaku lalau nya enda ngenusahka kitai. Chunto, Paul ngasuh Timoti ngirup wain mimit. Timoti selalu pedis perut, engka ketegal iya ngirup ai ti kamah.a (Peda nota kaki.) (Bacha 1 Timoti 5:23.) Tang kitai patut bejimat. Menyadi Kristian engka ngasuh kitai makai sesebengkah ubat tauka herba. Iya mega engka ngasuh kitai makai tauka nyeliahka sesebengkah pemakai. Iya engka madah ngagai kitai, ubat tauka chara pemakai nya udah nulung seiku ari sida sebilik ke bisi penyakit ti sama. Tang tu ukai reti ubat tauka chara pemakai nya ulih nulung kitai. Kitai anang enda ingat, taja pan mayuh orang ngena sesebengkah ubat tauka chara berubat, iya engka agi mai mayuh penusah.—Bacha Jaku-Dalam 27:12.

14, 15. (a) Kitai patut bejimat enggau sapa? (b) Nama ulih dipelajarka kitai ari Jaku-Dalam 14:15?

¹⁴ Semua kitai deka gerai ngambika kitai ulih ngasaika pengelantang ba pengidup sereta gawa bebendar ke Jehovah. Tang kitai enda sempurna, nya alai kitai enda ulih nyeliahka semua penyakit. Lebuh kitai sakit, kitai engka bisi mayuh bengkah chara berubat, lalu kitai bisi hak mutuska chara berubat ke deka dikena. Tang sayau amat, sekeda orang enggau kompeni madahka sida udah tetemuka chara berubat ke ulih ngeraika penyakit kitai. Sida madahka baka nya laban sida deka bulih mayuh untung. Sida engka madahka mayuh orang udah ngena chara berubat nya lalu beinsur gerai. Enti kitai sakit, kitai engka deka nguji sebarang chara berubat ke ulih ngeraika kitai sereta ngasuh kitai idup lama agi. Tang kitai anang enda ingatka jaku lalau ba Bup Kudus: “Orang ke beli deka arapka sebarang utai, tang orang ke pintar deka nyingkang enggau bejimat.”—J-lam. 14:15.

¹⁵ Enti kitai pintar, kitai deka bejimat enggau utai ti ditemu kitai, kelebih agi enti orang ke meri kitai jaku lalau pasal pengerai nya nadai ngembuan latih ke patut. Kitai ulih nanya diri empu: ‘Iya madahka vitamin, herba, tauka chara pemakai tu udah ngeraika orang, tang aku enda nemu sekalika utai tu amat udah ngeraika sida? Taja pan utai nya udah ngeraika orang bukai, baka ni aku nemu utai nya ulih ngeraika aku? Patut aku ngaga mayuh agi pansik tauka bejaku enggau orang ke landik pasal pengerai kena mutarka pengerai aku?’—U-dat. 17:6.

16. Nama patut diperundingka kitai lebuh ngaga pemutus pasal pengerai?

¹⁶ Lebuh kitai mutuska chara berubat ke deka dikena, kitai patut nemu berunding. (Tit. 2:12) Tu pemutus ti berat enti chara berubat nya nyelai ari ke kala ditemu kitai. Kati orang ke ditanya kitai pasal pengerai ulih nerangka baka ni chara berubat nya dikena? Kati chara berubat ke dipadah iya nya ulih diterima? Kati mayuh lutur setuju chara berubat tu amat ulih ngeraika orang? (J-lam. 22:29) Engka orang bisi madah ngagai kitai pasal chara berubat ti baru ke udah ditemu ba menua bukai, tang bala lutur bedau agi nemu pasal chara berubat tu. Nama nunjukka chara berubat nya amat bisi? Indah sekeda orang engka ngasuh kitai berubat ngena ubat ke enda ditemu kitai utai kena ngaga tauka enda ditemu penatai. Tu tau balat ngenusahka. Kingatka, Petara enda ngasuh kitai berubat ngena dukun tauka manang.—U-dat. 18:10-12; Isa. 1:13.

17. Nama dikedekaka kitai?

¹⁷ Bala rasul enggau tuai gempuru di Jerusalem ba kurun keterubah ngirumka surat ngagai bala menyadi Kristian ba gempuru, kena madahka sekeda utai ke patut diseliahka sida. Ba pengujung surat nya, bala rasul enggau tuai gempuru di Jerusalem nulis: “Enti kita enda ngereja utai nya, nya manah amat. Selamat tinggal.” (SKR. 15:29) Ba sekeda bansa jaku, leka jaku penutup ba ayat nya udah disalin ngena rambai jaku “Gerai nyamai ke kita,” tauka “seruran kering.” Kitai tentu deka “gerai nyamai” sereta seruran kering.

18, 19. Nama dianti kitai ba dunya baru?

¹⁸ Ketegal kitai enda sempurna, kitai enda ulih nyeliahka semua penyakit. Lalu lebuh kitai sakit, kitai enda ngarapka kereja ajih ari Jehovah ngeraika kitai. Tang kitai ulih nganti maya Petara deka ngeraika kitai jemah ila. Ba Pemandang 22:1, 2, rasul John bejaku pasal “ai pengidup” sereta “kayu pengidup” ke ulih ngeraika semua orang. “Ai pengidup” enggau “kayu pengidup” ukai ngambarka ubat ke ulih diempa kitai diatu tauka ba dunya baru kena ngeraika kitai. Tang utai tu ngambarka semua utai ke deka digaga Jehovah enggau Jesus, ngambika kitai ulih idup belama iya.—Isa. 35:5, 6.

¹⁹ Kitai nganti maya ke manah nya datai. Tang ke diatu, kitai pechaya Jehovah rinduka tiap iku kitai, lalu Iya nemu baka ni asai ati kitai lebuh kitai merinsa. Baka David, kitai pechaya enti kitai sakit, Jehovah enda ninggalka kitai. Iya seruran deka nyaga orang ke tetap ati ngagai Iya.—Mas. 41:12.