Isaias

60 “Tumakderka,+ O babai, mangipaayka iti lawag,+ ta dimteng ti lawagmo+ ket ti mismo a dayag ni Jehova nagsilnag kenka.+ 2 Ta, adtoy! ti met laeng sipnget+ abbongannanto ti daga, ken ti napuskol a daguyemyem abbonganna dagiti nasional a bunggoy; ngem ni Jehova agsilnagto kenka, ket ti bukodna a dayag makitanto kenka.+ 3 Ket dagiti nasion pudno nga umaydanto iti lawagmo,+ ken ti ar-ari+ iti raniag ti panagsilnagmo.+

4 “Itangwam dagita matam iti intero nga aglikmut ket kitaem! Isuda amin naummongda a sangsangkamaysa;+ immayda kenka.+ Manipud iti adayo agtultuloy nga umay ti bukodmo nga annak a lallaki, ken ti annakmo a babbai a mataripatonto a maubba iti bakrang.+ 5 Iti dayta a tiempo makitamto ket pudno unay nga agraniagka,+ ket ta pusom pudno nga agtayegtegto ken dumakkel, agsipud ta ti kinabaknang ti baybay agturongto a mismo kenka; dagiti mismo a sanikua ti nasnasion umaydanto kenka.+ 6 Ti met laeng agallo-allon a reprep dagiti kamelio abbongandakanto, dagiti urbon a kalakian a kamelio ti Midian ken ti Efa.+ Amin dagidiay aggapu iti Sheba+—umaydanto. Balitok ken olibano awitendanto. Ket dagiti pakaidaydayawan ni Jehova iwaragawagdanto.+ 7 Amin dagiti arban ti Quedar+—maummongdanto a sangsangkamaysa kenka. Dagiti kalakian a karnero ti Nebayot+—agserbidanto kenka.+ Buyogen ti pannakaanamong umulidanto iti altarko,+ ket papintasekto ti bukodko a balay ti kinapintas.+

8 “Siasino dagitoy nga umay nga agtaytayab a kas iti ulep,+ ken kas kadagiti kalapati nga agturong kadagiti tawa ti aponda a balay ti tumatayab? 9 Ta agtultuloyto a manginanama kaniak dagiti met laeng isla,+ kasta met dagiti barko ti Tarsis+ kas idi damo, tapno iyegda ti annakmo manipud iti adayo,+ a ti pirakda ken balitokda naikuyog kadakuada,+ maipaay iti nagan+ ni Jehova a Diosmo ken maipaay iti Daydiay Santo ti Israel,+ ta napapintasnakanton.+ 10 Ket dagiti ganggannaet pudno a bangonendanto dagiti padermo,+ ket ti mismo nga ar-arida agserbidanto kenka;+ ta iti rurodko kinabilka koman,+ ngem iti naimbag a nakemko sigurado a maasianakto kenka.+

11 “Ket dagiti ruanganmo pudno a mapagtalinaedto a silulukat a patinayon;+ saandanto a maiserra uray iti aldaw wenno iti rabii, tapno iyegda kenka dagiti sanikua ti nasnasion,+ ket ti ar-arida ti mangidaulonto.+ 12 Ta aniaman a nasion ken aniaman a pagarian a saanto nga agserbi kenka madadaelto; ket dagiti met laeng nasion di bumurong a mapagwalangwalangto.+

13 “Ti mismo a dayag ti Libano umayto kenka, ti kayo a parwa, ti kayo a presno ken ti sipres nga aggigiddan,+ tapno mapapintas ti lugar ti santuariok;+ ket padayagekto ti mismo a disso ti saksakak.+

14 “Ket ti annak dagidiay mangparparigat kenka mapandanto kenka, nga agruknoyda;+ ket amin dagidiay saan a mangraraem kenka agparintumengdanto kadagiti mismo a dapan ti saksakam,+ ket naganendakanto iti siudad ni Jehova, ti Sion+ Daydiay Santo ti Israel.

15 “Imbes nga agbalinka a maysa a naan-anay a nabaybay-an ken magurgura, nga awan asinoman a lumasat,+ aramidenkanto pay a kas maysa a banag a pagpannakkel agingga iti tiempo a di nakedngan, maysa a pagrag-oan iti kinapkaputotan.+ 16 Ket pudno a susopemto ti gatas dagiti nasion,+ ket ti barukong ti ar-ari susopemto;+ ket siguradonto a maammuam a siak, ni Jehova,+ ti Manangisalakanmo,+ ket Daydiay Mannakabalin+ ni Jacob isu ti Manangsakam.+ 17 Imbes a ti gambang mangyegakto iti balitok,+ ket imbes a ti landok mangyegakto iti pirak, ket imbes a ti kayo, gambang, ket imbes a ti batbato, landok; ket dutokakto ti talna kas dagiti manangaywanmo+ ken ti kinalinteg kas dagiti manangitudingmo iti akem.+

18 “Awanton ti mangngegan a kinaranggas iti dagam, pannakaagaw wenno pannakarba iti uneg dagiti beddengmo.+ Ket pudno unay a dagiti bukodmo a pader naganemto iti Salakan+ ken dagiti ruanganmo iti Dayaw. 19 Kenka ti init saanton nga agbalin a lawag iti aldaw, ket ti met laeng bulan saanton a mangted kenka iti lawag maipaay a raniag. Ket ni Jehova agbalinto kenka a maysa a di nakedngan ti kapautna a silaw,+ ket ti Diosmo ti pintasmo.+ 20 Saanton a lumnek ti initmo, wenno uray bumassit ti bulanmo; ta ni met laeng Jehova agbalinto kenka a di nakedngan ti kapautna a silaw,+ ket dagiti aldaw ti panagleddaangmo nairingpaston.+ 21 Ket no maipapan kadagiti umilim, isuda amin nalintegdanto;+ agingga iti tiempo a di nakedngan ikutandanto ti daga,+ ti tarubong ti panagmulak,+ ti aramid dagiti imak,+ tapno mapapintasak.+ 22 Daydiay met laeng bassit agbalinto a sangaribu, ket daydiay nagbassitan maysa a mannakabalin a nasion.+ Siak, ni Jehova, papardasekto dayta iti bukodna a tiempo.”+