Lucas

7 Idi nalpasnan amin a sasaona a dengdenggen dagiti tattao, simrek idiay Capernaum.+ 2 Ita ti maysa nga adipen ti opisial ti buyot, nga ipatpategna, ket masaksakit ken ngannganin pumusay.+ 3 Idi nangngegna ti maipapan ken Jesus, nangibaon kenkuana iti lallakay dagiti Judio tapno kiddawen kenkuana nga umay ket ispalenna ti adipenna. 4 Idin dagidiay immay ken Jesus rinugianda ti agpakpakaasi a sipapasnek kenkuana, a kunkunada: “Maikari nga ipaaymo kenkuana daytoy, 5 ta ay-ayatenna ti nasiontayo+ ken isu binangonna ti sinagoga maipaay kadatayo.” 6 Gapuna nagluas a nakikuyog kadakuada ni Jesus. Ngem idi addan iti saan nga adayo iti balay, ti opisial ti buyot nakaibaonen iti gagayyem tapno kunaen kenkuana: “Apo, saankan a maringgoran, ta saanak a maikari a mangpastrek kenka iti sirok ti atepko.+ 7 Iti dayta a rason diak imbilang ti bagik a maikari nga umay kenka. Ngem sawem ti sao, ket mapaimbag koma ti adipenko. 8 Ta maysaak met a tao a naikabil iti sidong ti autoridad, addaan kadagiti soldado iti babaek, ket kunaek iti daytoy a tao, ‘Inkan!’ ket isu mapanen, ket iti sabali, ‘Umayka!’ ket isu umay, ket iti adipenko, ‘Aramidem daytoy!’ ket aramidenna dayta.”+ 9 Ala ket, idi mangngeg ni Jesus dagitoy a banag isu nagsiddaaw kenkuana, ket simmango iti bunggoy a sumursurot kenkuana ket kinunana: “Ibagak kadakayo, Uray iti Israel saanak a nakasarak iti kastoy a kadakkel ti pammati.”+ 10 Ket dagidiay a naibaon, idi makasublida iti balay, nasarakanda ti adipen a nasayaaten ti salun-atna.+

11 Saan a nagbayag kalpasan daytoy isu nagdaliasat iti siudad a maawagan Nain, ket nakipagdaliasat kenkuana dagiti adalanna ken ti maysa a dakkel a bunggoy. 12 Idi a nakaasideg iti ruangan ti siudad, ay ket, adtoy! adda mairuruar a maysa a natay a tao,+ ti bugbugtong+ nga anak a lalaki ni inana. Malaksid iti dayta, isu ket balo. Naikuyog met kenkuana ti maysa a dakkel a bunggoy manipud iti siudad. 13 Ket idi nakita ti Apo, simnek ti asina+ kenkuana, ket kinunana kenkuana: “Sumardengka nga agsangsangit.”+ 14 Iti kasta immasideg ket sinagidna ti idda ti natay, ket nagintek dagiti agaw-awit, ket kinunana: “Baro, kunak kenka, Bumangonka!”+ 15 Ket bimmangon ti natay a tao ket nangrugi nga agsao, ket intedna ken inana.+ 16 Ita ti buteng+ immapay kadakuada amin, ket rinugianda nga idayaw ti Dios, a kunkunada: “Maysa a naindaklan a mammadto+ ti naibangon kadatayo,” ken, “Ti Dios inturongna ti asikasona iti ilina.”+ 17 Ket daytoy a damag maipapan kenkuana nagrakurak iti intero a Judea ken iti intero a pagilian iti aglikmut.

18 Ita dagiti adalan ni Juan impadamagda kenkuana ti maipapan kadagitoy amin a banag.+ 19 Gapuna nangayab ni Juan iti dua kadagiti adalanna ket imbaonna ida iti Apo tapno kunaenda: “Sika kadi Daydiay Umay wenno inanamaenmi aya ti sabali?”+ 20 Idi immayda kenkuana kinuna dagiti lallaki: “Ni Juan a Mammautisar imbaonnakami kenka tapno kunaenmi, ‘Sika kadi Daydiay Umay wenno inanamaenmi aya ti sabali?’” 21 Iti dayta nga oras inagasanna dagiti adu manipud kadagiti sakit+ ken nadagsen a sagubanit ken kadagiti nadangkes nga espiritu, ket impaayanna ti adu a bulsek a tattao iti pabor a makakita. 22 Gapuna kas sungbat kinunana kadagiti dua: “Mapankayo,+ ipadamagyo ken Juan ti nakita ken nangngegyo: dagiti bulsek+ makakitada, dagiti pilay magmagnada, dagiti agkukutel madaldalusanda ket dagiti tuleng makangkangngegda, dagiti natay maibangbangonda, dagiti napanglaw mapakpakaammuanda+ iti naimbag a damag.+ 23 Ket naragsak daydiay saan a naitibkol kaniak.”+

24 Idi nakapanawen dagiti mensahero ni Juan, rinugianna a kunaen kadagiti bunggoy maipapan ken Juan: “Ania ti rimmuaranyo a kitaen idiay let-ang? Maysa a runo nga ipalpallayog ti angin?+ 25 Ania, ngarud, ti rimmuaranyo a kitaen? Maysa a tao a nagkawes kadagiti nalamuyot a makinruar a pagan-anay?+ Ay ket, dagidiay nangayed ti badoda ken agbibiag iti kinaluho addada kadagiti naarian a balay.+ 26 Kinapudnona, ngarud, ania ti rimmuaranyo a kitaen? Maysa a mammadto?+ Wen, ibagak kadakayo, ket adayo a nangnangruna ngem iti maysa a mammadto.+ 27 Isu daytoy daydiay a maipapan kenkuana adda a naisurat, ‘Adtoy! ibaonko ti mensaherok iti sanguanam,+ a mangisagananto iti dalanmo nga umun-una ngem sika.’+ 28 Ibagak kadakayo, Kadagidiay nayanak kadagiti babbai awan ti dakdakkel+ ngem ni Juan; ngem daydiay a nanumnumo iti pagarian ti Dios ket dakdakkel ngem isu.”+ 29 (Ket amin dagiti tattao ken dagiti agsingsingir iti buis, idi mangngegda daytoy, indeklarada a nalinteg ti Dios,+ yantangay nabautisarandan iti pammautisar ni Juan.+ 30 Ngem dagiti Fariseo ken dagidiay nalaing iti Linteg saanda nga inkankano ti pammatigmaan+ kadakuada ti Dios, yantangay saanna ida a nabautisaran.)

31 “Ngarud, iti siasino ti pangipadisak kadagiti tattao iti daytoy a kaputotan, ket siasino ti kaaspingda?+ 32 Umaspingda kadagiti ubbing nga agtugtugaw iti plasa ken agpipinnukkaw, ken agkuna, ‘Tinokarmi ti plauta maipaay kadakayo, ngem saankayo a nagsala; nagdung-awkami, ngem saankayo a nagsangit.’+ 33 Mayasping unay, ni Juan a Mammautisar saan nga immay a mangmangan iti tinapay wenno umin-inum iti arak, ngem kunayo, ‘Adda sairona.’+ 34 Ti Anak ti tao immay a mangmangan ken umin-inum, ngem kunayo, ‘Adtoy! Maysa a tao a nabuklis ken kaay-ayona ti aginum iti arak, gayyem dagiti agsingsingir iti buis ken dagiti managbasol!’+ 35 Nupay kasta, ti kinasirib+ mapaneknekan a nalinteg babaen iti amin nga annakna.”+

36 Ita maysa kadagiti Fariseo ti nagkidkiddaw kenkuana a makipangan kenkuana. Iti kasta simrek iti balay+ ti Fariseo ket nagsadag iti panganan. 37 Ket, adtoy! maysa a babai nga am-ammo iti siudad kas maysa a managbasol naammuanna nga isu sisasadag iti panganan iti balay ti Fariseo, ket nangyeg iti prasko nga alabastro+ ti bangbanglo a lana, 38 ket, idi nagsaad iti likudan dagiti sakana, nagsangit ket rinugianna a babasaen dagiti sakana iti luluana ket punasanna ida kadagiti buok ti ulona. Kasta met, sidudungngo nga inagkanna dagiti sakana ket sinapsapuanna ida iti bangbanglo a lana. 39 Gapu iti nakitana ti Fariseo a nangawis kenkuana kinunana iti bagina: “Daytoy a tao, no maysa a mammadto,+ ammona koma no asino ken no ania a kita ti babai daytoy a mangsagsagid kenkuana, nga isu maysa a managbasol.”+ 40 Ngem kas sungbat kinuna kenkuana ni Jesus: “Simon, adda banag a sawek kenka.” Kinunana: “Mannursuro, sawem dayta!”

41 “Dua a lallaki ti addaan utang iti maysa nga agpapautang; ti maysa nakautang iti lima gasut a denario,+ ngem ti sabali limapulo. 42 Idi awananda ti aniaman a maibayad, sibubulos a pinakawanna+ ida nga agpadpada. Gapuna, siasino kadakuada ti mangayatto kenkuana iti ad-adu?” 43 Kas sungbat kinuna ni Simon: “Pagarupek a daydiay sibubulos a pinakawanna iti ad-adu.” Kinunana kenkuana: “Impatom a siuumiso.” 44 Gapuna simmango iti babai ket kinunana ken Simon: “Makitam kadi daytoy a babai? Simrekak iti balaymo; awan intedmo kaniak a danum+ a maipaay kadagiti sakak. Ngem daytoy a babai binabasana dagiti sakak iti luluana ket pinunasanna ida kadagiti buokna. 45 Sika saannak nga inagkan;+ ngem daytoy a babai, manipud iti oras a simrekak, saan a namingga a nangag-agek a sidudungngo kadagiti sakak. 46 Saanmo a sinapsapuan ti ulok iti lana;+ ngem daytoy a babai sinapsapuanna dagiti sakak iti bangbanglo a lana. 47 Gapu itoy, ibagak kenka, dagiti basolna, nupay adu, mapakawanda,+ agsipud ta nagayat iti kasta unay; ngem ti asinoman a mapakawan iti bassit, agayat iti bassit.” 48 Idin kinunana kenkuana: “Dagiti basolmo mapakawanda.”+ 49 Gapu itoy dagidiay kaduana a sisasadag iti panganan rinugianda a kunaen iti bagbagida: “Asino daytoy a tao a mangpakawan pay kadagiti basol?”+ 50 Ngem kinunana iti babai: “Ti pammatim insalakannaka;+ mapankan a sitatalna.”+