Aramid

7 Ngem kinuna ti nangato a padi: “Agpayso kadi dagitoy a banag?” 2 Kinunana: “Lallaki, kakabsat ken amma, denggenyo. Ti Dios ti dayag+ nagparang ken amatayo nga Abraham bayat nga adda idi idiay Mesopotamia, sakbay a nagtaeng idiay Haran,+ 3 ket kinunana kenkuana, ‘Pumanawka iti dagam ken kadagiti kabagiam ket umayka iti daga nga ipakitakto kenka.’+ 4 Idin isu pimmanaw iti daga dagiti Caldeo ket nagtaeng idiay Haran. Ket manipud sadiay, kalpasan a natay ni amana,+ tinignay ti Dios nga umakar iti pagtaenganna nga agturong itoy a daga a pagnanaedanyo itatta.+ 5 Ngem kaskasdi a saanna nga inikkan iti aniaman a sanikua a matawid iti dayta, saan, uray maysa a kaakaba ti dapan;+ ngem inkarina nga itedna dayta kenkuana kas sanikua,+ ken iti bin-ina+ kalpasan kenkuana, bayat nga isu awan pay anakna.+ 6 Mainayon pay, ti Dios nagsao maipapan iti daytoy, a ti bin-ina ganggannaetdanto nga agnanaed+ iti sabali a daga+ ket adipenento ida dagiti tattao ken parigatenda ida iti uppat a gasut a tawen.+ 7 ‘Ket ukomekto dayta a nasion a pakaadipenanda,’+ kinuna ti Dios, ‘ket kalpasan dagitoy a banag rummuardanto ket mangipaaydanto iti sagrado a panagserbi kaniak itoy a lugar.’+8 “Nangted met kenkuana iti tulag ti pannakakugit;+ ket iti kasta isu ti ama ni Isaac+ ket kinugitna iti maikawalo nga aldaw,+ ket ni Isaac ti ama ni Jacob, ket ni Jacob ti ama ti sangapulo ket dua nga ulo ti pamilia.+ 9 Ket dagiti ulo ti pamilia nagimonda+ ken Jose ket inlakoda idiay Egipto.+ Ngem ti Dios adda idi kenkuana,+ 10 ket inispalna kadagiti amin a rigatna ket nangted kenkuana iti kinaparabur ken sirib iti imatang ni Faraon nga ari ti Egipto. Ket dinutokanna a mangtarawidwid iti Egipto ken iti intero a balayna.+ 11 Ngem dimteng ti bisin iti intero nga Egipto ken Canaan, pudno a maysa a dakkel a rigat; ket dagidi ammatayo saanda a nakasarak kadagiti aniaman a pagtaraon.+ 12 Ngem nangngeg ni Jacob nga adda dagiti taraon idiay Egipto+ ket imbaonna dagidi ammatayo iti umuna a gundaway.+ 13 Ket bayat ti maikadua a gundaway nayam-ammo ni Jose iti kakabsatna;+ ket ti kapuonan ti pamilia ni Jose naiparangarang ken Faraon.+ 14 Gapuna nagbaon ni Jose ket pinaayabanna ni Jacob nga amana ken dagiti amin a kabagianna manipud iti dayta a lugar,+ iti bilang a pitopulo ket lima a kararua.+ 15 Ni Jacob simmalog nga agturong idiay Egipto.+ Ket pimmusay;+ ken kasta met dagidi ammatayo,+ 16 ket nayalisda idiay Siquem+ ket naikabilda iti tanem+ a ginatang ni Abraham iti maysa a gatad ti kuarta a pirak manipud iti annak ni Hamor idiay Siquem.+

17 “Bayat nga umas-asideg idi ti tiempo maipaay iti kaitungpalan ti kari a sipapanayag nga indeklara ti Dios ken Abraham, dagiti umili rimmang-ay ken immaduda idiay Egipto,+ 18 agingga nga adda timmakder a sabali nga ari iti Egipto, a saan a makaam-ammo ken Jose.+ 19 Daytoy a tao nagusar iti kinasikap ti panangituray a maibusor iti pulitayo+ ket siraranggas a pinuersana dagiti amma tapno iparangda dagiti maladagada, tapno saan ida a mataginayon a sibibiag.+ 20 Iti dayta met laeng a tiempo nayanak ni Moises,+ ket nadibinuan ti kinalibnosna.+ Ket natagibi iti tallo a bulan iti pagtaengan ni amana. 21 Ngem idi isu naiparang, innala ti anak a babai ni Faraon ket pinadakkelna a kas bukodna nga anak.+ 22 Gapu itoy nasursuruan ni Moises iti isuamin a kinasirib+ dagiti taga Egipto. Iti kinapudnona, mannakabalin idi iti sasao+ ken ar-aramidna.

23 “Ita idi a matungtungpalen ti tiempo ti maikapat a pulo a tawenna, rimsua iti pusona a sukimatenna ti kakabsatna, ti annak ti Israel.+ 24 Ket idi nakakita iti maysa a marangranggasan, inkanawana ket imbalesanna daydiay mairurrurumen babaen ti panangkabilna iti daydi Egipcio.+ 25 Impapanna a matarusan ti kakabsatna a ti Dios mangmangted idi kadakuada iti pannakaisalakan babaen ti imana,+ ngem saanda a natarusan dayta. 26 Ket iti sumaganad nga aldaw nagparang kadakuada bayat nga agap-apada, ket pinadpadasna a pagkappiaen manen ida,+ a kunkunana, ‘Lallaki, agkabsatkayo. Apay nga agrinrinnanggaskayo?’+ 27 Ngem isu inwadag daydiay mangrangranggas idi iti kaarrubana, a kunkunana, ‘Siasino ti nangdutok kenka nga agturay ken ukom kadakami?+ 28 Kayatnak kadi a papatayen iti isu met laeng a pamay-an a panangpapataymo iti Egipcio idi kalman?’+ 29 Iti daytoy a sasao nagtalaw ni Moises ket nagbalin a ganggannaet nga agnanaed iti daga ti Midian,+ a sadiay isu ti ama ti dua nga annak.+

30 “Ket idi naturposen ti uppat a pulo a tawen, nagparang kenkuana ti maysa nga anghel iti gumilgil-ayab nga apuy ti siitan a bassit a kayo+ idiay let-ang ti Bantay Sinai. 31 Ita idi nakita dayta ni Moises nagsiddaaw iti buya.+ Ngem bayat nga isu umas-asideg tapno agusisa, immay ti timek ni Jehova, 32 ‘Siak ti Dios dagidi ammam, ti Dios ni Abraham ken ni Isaac ken ni Jacob.’+ Yantangay immapay kenkuana ti panagpigerger, saanen a naitured ni Moises ti agusisa nga ad-adda pay. 33 Kinuna kenkuana ni Jehova, ‘Ikkatem dagiti palloka kadagita sakam, ta ti lugar a pagtaktakderam ket nasantuan a daga.+ 34 Pudno unay a nakitak ti naranggas a pannakatrato ti ilik nga adda idiay Egipto,+ ket nangngegko ti panagas-asugda+ ket bimmabaak tapno ispalek ida.+ Ket ita umayka, ibaonkanto idiay Egipto.’+ 35 Daytoy a Moises, a pinaglikudanda, a kunkunada, ‘Siasino ti nangdutok kenka nga agturay ken ukom?’+ daytoy a tao imbaon ti Dios+ agpadpada a kas agturay ken manangispal babaen ti ima ti anghel a nagparang kenkuana iti siitan a bassit a kayo. 36 Daytoy a tao ti nangiruar kadakuada+ kalpasan ti panangaramidna kadagiti tanda ken pagilasinan idiay Egipto+ ken idiay Nalabaga a Baybay+ ken idiay let-ang iti uppat a pulo a tawen.+

37 “Daytoy ti Moises a nagkuna iti annak ti Israel, ‘Ibangonto ti Dios maipaay kadakayo manipud iti kakabsatyo ti maysa a mammadto a kas kaniak.’+ 38 Isu daytoy+ daydi adda iti tengnga ti kongregasion+ idiay let-ang a kadua ti anghel+ a nakisao kenkuana idiay Bantay Sinai ken kadua dagidi ammatayo, ket isu immawat iti nabiag a sagrado a pammakdaar+ tapno itedna kadakayo. 39 Kenkuana nagkedked nga agtulnog dagidi ammatayo, no di ket isu inwalinda+ ket iti puspusoda nagsublida idiay Egipto,+ 40 a kunkunada ken Aaron, ‘Iyaramidannakami kadagiti didios a mapan nga umun-una kadakami. Ta daytoy a Moises, a nangiruar kadakami iti daga ti Egipto, saanmi nga ammo no ania ti napasamaken kenkuana.’+ 41 Gapuna nangaramidda iti kigaw a baka kadagidi nga aldaw+ ket nangipanda iti sakripisio iti idolo ket rinugianda ti agragragsak iti ar-aramid dagiti imada.+ 42 Gapuna timmallikud ti Dios ket inyawatna ida+ tapno mangipaayda iti sagrado a panagserbi iti buyot ti langit, a kas adda a naisurat iti libro dagiti mammadto,+ ‘Siak aya ti nagidatonanyo kadagiti naparti ken kadagiti sakripisio iti uppat a pulo a tawen idiay let-ang, O balay ti Israel?+ 43 No di ket ti tolda ni Moloc+ ken ti bituen+ ti dios a ni Refan ti innalayo, dagiti ladawan nga inaramidyo tapno pagrukbabanyo ida. Gapu itoy ibellengkayto+ iti labes ti Babilonia.’

44 “Adda kadagidi ammatayo ti tolda ti panangsaksi idiay let-ang, a kas iti imbilinna idi makisasao ken Moises tapno aramidenna dayta mayannurot iti pagtuladan a nakitana.+ 45 Ket dagidi ammatayo a simmublat iti dayta agraman ni Josue+ inserrekda met dayta iti daga a tinagikua dagiti nasion,+ a pinapanaw ti Dios manipud iti sanguanan dagidi ammatayo.+ Ditoy a nagtalinaed dayta agingga iti kaaldawan ni David. 46 Isu nakasarak iti anamong+ iti imatang ti Dios ket dinawatna ti pribilehio a panangipaay iti pagnaedan+ ti Dios ni Jacob. 47 Nupay kasta, ni Solomon ti nangibangon iti balay a maipaay kenkuana.+ 48 Uray pay kasta, ti Kangatuan saan nga agnaed kadagiti balay nga inaramid dagiti ima;+ kas iti kuna ti mammadto, 49 ‘Ti langit isu ti tronok,+ ket ti daga isu ti pagbatayan ti sakak.+ Ania a kita ti balay ti bangonenyonto a maipaay kaniak? kuna ni Jehova. Wenno ania a disso ti paginanaak?+ 50 Saan kadi a ti imak inaramidna amin dagitoy a banag?’+

51 “Tattao a nasubeg ken di nakugit iti puspuso+ ken laplapayag, kanayon a busbusorenyo ti nasantuan nga espiritu; kas iti inaramid dagidi ammayo, kasta met ti aramidenyo.+ 52 Siasino kadagiti mammadto ti saan nga indadanes dagidi ammayo?+ Wen, pinapatayda+ dagidiay nagipakaammo a nasaksakbay maipapan iti iyaay Daydiay nalinteg,+ a kenkuana nagbalinkayo itan a manangliliput ken manangpapatay,+ 53 dakayo a nangawat iti Linteg kas inyallatiw dagiti anghel+ ngem saanyo a sinalimetmetan dayta.”

54 Ala ket, idi nangngegda dagitoy a banag nasugatan dagiti pusoda+ ket rinugianda a ngaretngeten+ dagiti ngipenda kenkuana. 55 Ngem isu, yantangay napnuan iti nasantuan nga espiritu, minatmatanna ti langit ket nakitana ti dayag ti Dios ken ni Jesus nga agtaktakder iti makannawan ti Dios,+ 56 ket kinunana: “Adtoy! Makitak ti langlangit a nalukatan+ ken ti Anak ti tao+ nga agtaktakder iti makannawan ti Dios.”+ 57 Gapu itoy nagikkisda iti kapigsaan a timek ket inyapputda dagiti imada kadagiti lapayagda+ ket dimmarupda a sangsangkamaysa kenkuana. 58 Ket kalpasan ti panangiruarda kenkuana iti siudad,+ rinugianda nga inubor iti batbato.+ Ket dagiti saksi+ inkabilda dagiti makinruar a kawesda iti sakaanan ti maysa nga agtutubo a lalaki a managan Saulo.+ 59 Ket inub-uborda ni Esteban iti batbato bayat a nagdawdawat ken kinunana: “Apo Jesus, awatem ti espirituk.”+ 60 Kalpasanna, idi nagparintumeng, impukkawna buyogen ti napigsa a timek: “Jehova, dika isingir kadakuada daytoy a basol.”+ Ket kalpasan ti panangisaona iti daytoy naturogen ken patay.