Aramid

8 Ni Saulo, iti biangna, an-anamonganna idi ti pannakapapatayna.+

Iti dayta nga aldaw timmaud ti dakkel a pannakaidadanes+ a maibusor iti kongregasion nga adda idiay Jerusalem; isuamin malaksid dagiti apostol ket naiwarawarada+ kadagiti amin a rehion ti Judea ken Samaria. 2 Ngem dagiti nadayaw a lallaki inawitda nga impan ni Esteban iti pagitabonan,+ ket nagun-unnoyda unay+ gapu kenkuana. 3 Ni Saulo, nupay kasta, rinugianna nga ulpitan ti kongregasion. Idi sinerrekna ti tunggal balay ken, inulod-ulodna nga inruar agpadpada dagiti lallaki ken babbai, inyawatna ida iti pagbaludan.+

4 Nupay kasta, dagidiay naiwarawara nagsaknapda iti daga nga idekdeklarada ti naimbag a damag ti sao.+ 5 Ni Felipe, kas maysa, simmalog a napan iti siudad ti Samaria+ ket rinugianna nga ikasaba kadakuada ti Kristo. 6 Nagkaykaysa dagiti bunggoy a nangipangag iti bambanag a sinao ni Felipe bayat nga im-imdengan ken kitkitaenda idi dagiti pagilasinan nga ar-aramidenna. 7 Ta adu dagidiay addaan kadagiti narugit nga espiritu,+ ket agikkis dagitoy buyogen ti natbag a timek ket rummuarda. Mainayon pay, adu dagiti paralisado+ ken pilay a naagasan. 8 Gapuna naadda ti dakkel unay a rag-o iti dayta a siudad.+

9 Ita iti siudad adda maysa a lalaki a managan Simon, a, sakbay daytoy, nangan-annuroten kadagiti arte ti panagsalamangka+ ken namagsidsiddaaw iti nasion ti Samaria, a kunkunana nga isu ket maysa a naindaklan.+ 10 Ket isuda amin, manipud iti kabassitan agingga iti kadakkelan, agimdengda kenkuana ket kunada: “Daytoy a tao isu ti Pannakabalin ti Dios, a mabalin a maawagan Dakkel.” 11 Gapuna agimdengda kenkuana gapu ta pinagsidsiddaawna ida iti nabayag a tiempo babaen kadagiti arte ti panagsalamangkana. 12 Ngem idi namatida ken Felipe, a nangidekdeklara iti naimbag a damag ti pagarian ti Dios+ ken iti nagan ni Jesu-Kristo, nagpabautisarda, agpadpada dagiti lallaki ken babbai.+ 13 Ni Simon a mismo nagbalin met a manamati, ket, kalpasan a nabautisaran, naynay a nagserserbi ken Felipe;+ ket nagsiddaaw iti pannakakitana kadagiti pagilasinan ken dadakkel a mannakabalin nga ar-aramid a mapaspasamak.

14 Idi a nangngeg dagiti apostol idiay Jerusalem nga inawat ti Samaria ti sao ti Dios,+ imbaonda kadakuada da Pedro ken Juan; 15 ket simmalog dagitoy ket inkararaganda ida tapno umawatda iti nasantuan nga espiritu.+ 16 Ta saan pay a bimmaba daytoy iti asinoman kadakuada, no di ket nabautisaranda laeng iti nagan ni Apo Jesus.+ 17 Idin impatayda kadakuada ti im-imada,+ ket nangrugida nga umawat iti nasantuan nga espiritu.

18 Itan idi nakita ni Simon a babaen ti panangipatay iti im-ima dagiti apostol naited ti espiritu, nangitukon kadakuada iti kuarta,+ 19 a kunkunana: “Itedyo met kaniak daytoy a kinaturay, tapno ti asinoman a pangipatayak kadagiti imak umawat koma iti nasantuan nga espiritu.” 20 Ngem kinuna kenkuana ni Pedro: “Mapukaw koma ti pirakmo a maikanunong kenka, agsipud ta pinanunotmo a babaen iti kuarta matagikuam ti awan bayadna a sagut ti Dios.+ 21 Awan pasetmo wenno uray bingaymo itoy a banag, ta ti pusom saan a nalinteg iti imatang ti Dios.+ 22 Ngarud, agbabawika iti daytoy a kinadakesmo, ket umararawka ken Jehova+ a, no mabalin, ti gandat ta pusom mapakawan kenka; 23 ta makitak a maysaka a makasabidong nga apro+ ken kawar ti kinakillo.”+ 24 Kas sungbat kinuna ni Simon: “Umararawkayo ken Jehova maipaay kaniak+ tapno awan koma iti bambanag a sinaoyo ti mapagteng kaniak.”

25 Gapuna, idi naan-anay a naipaaydan ti pangsaksi ket naisaodan ti sao ni Jehova, nagsublida idiay Jerusalem, ket indekdeklarada ti naimbag a damag iti adu a purok dagiti Samaritano.+

26 Nupay kasta, ti anghel ni Jehova+ nagsao ken Felipe, a kunkunana: “Tumakderka ket inka iti abagatan idiay dalan nga agpasalog manipud Jerusalem agingga iti Gaza.” (Daytoy ket desierto a dalan.) 27 Gapuna timmakder ket napan, ket, adtoy! maysa a eunuko+ nga Etiope,+ lalaki nga adda iti pannakabalin iti sidong ni Candace a reyna dagiti Etiope, ken agaywan iti isuamin a gamengna. Napan idiay Jerusalem tapno agdaydayaw,+ 28 ngem agsubsublin ket situtugaw iti karuahena ken basbasaenna a sipipigsa ni mammadto Isaias.+ 29 Gapuna kinuna ti espiritu+ ken Felipe: “Umasidegka ket makikuyogka iti daytoy a karuahe.” 30 Nagtaray nga immasibay ni Felipe ket nangngegna a basbasaenna a sipipigsa ni Isaias a mammadto, ket kinunana: “Ammom kadi nga agpayso no ania ti basbasaem?” 31 Kinunana: “Pudno unay, kasano koma a maawatak, malaksid no adda nangidalan kaniak?” Ket nagpakaasi ken Felipe a lumugan ken makikatugaw kenkuana. 32 Ita ti paset ti Kasuratan a basbasaenna a sipipigsa isu daytoy: “Kas iti karnero isu naipan iti pagpartian, ket kas iti kordero nga awan timekna iti sanguanan ti mamukpukis kenkuana, kasta met a saanna a ngangaen ti ngiwatna.+ 33 Kabayatan ti pannakaipababana naipanaw kenkuana ti panangukom.+ Siasinonto ti mangibaga kadagiti detalye ti kaputotanna? Agsipud ta ti biagna naikkat iti daga.”+

34 Kas sungbat kinuna ti eunuko ken Felipe: “Ipakaasik kenka, Maipapan iti siasino a kunaen daytoy ti mammadto? Maipapan iti bagina wenno maipapan iti sabali pay a tao?” 35 Linuktan ni Felipe ti ngiwatna+ ket, mangrugi iti daytoy a Kasuratan,+ indeklarana kenkuana ti naimbag a damag maipapan ken Jesus. 36 Ita bayat a nagtultuloyda iti dalan, dimtengda iti maysa a danum, ket ti eunuko kinunana: “Adtoy! Ti danum; ania ti makalapped kaniak a mabautisaran?”+ 37 —— 38 Gapuna imbilinna a mapasardeng ti karuahe, ket bimmabada a dua iti danum, ni Felipe ken ti eunuko; ket binautisaranna. 39 Idi nakasang-atdan manipud iti danum, ti espiritu ni Jehova dagus nga impanawna ni Felipe,+ ket isu saanen a nakita ti eunuko, ta sirarag-o a nagtultuloy iti dalanna. 40 Ngem ni Felipe nasarakan nga adda idiay Asdod, ket linasatna ti teritoria ket indekdeklarana+ ti naimbag a damag kadagiti amin a siudad agingga a nakadanon idiay Cesarea.+