Apocalipsis
9 Ket ti maikalima nga anghel pinuyotna ti trumpetana.+ Ket nakitak ti maysa a bituen+ a natnag manipud langit nga agturong iti daga, ket naited kenkuana ti tulbek+ ti abut ti mangliwengliweng.+ 2 Ket linuktanna ti abut ti mangliwengliweng, ket ti asuk+ nagpangato manipud iti abut a kas iti asuk ti dakkel nga urno,+ ket ti init nagsipnget,+ kasta met ti angin, maigapu iti asuk ti abut. 3 Ket manipud iti asuk rimmuar dagiti dudon+ iti rabaw ti daga; ket naited kadakuada ti autoridad, ti isu met laeng nga autoridad a kas iti adda kadagiti manggagama+ ti daga. 4 Ket naibaga kadakuada nga awan ti dangranda a mulmula iti daga wenno uray aniaman a berde a banag wenno aniaman a kayo, no di laeng dagidiay tattao nga awanan iti selio ti Dios kadagiti mugingda.+
5 Ket naipalubos kadagiti dudon, a saanda ida a papatayen, no di ket tapno matutuok+ koma dagitoy iti lima a bulan, ket ti pannakatutuokda kas iti panangtuok ti manggagama+ no siludenna ti tao. 6 Ket kadagidiay nga aldaw sapulento dagiti tattao ni patay+ ngem saandanto a pulos masarakan dayta, ket tarigagayandanto ti matay ngem agtultuloy nga itarayan ida ni patay.
7 Ket ti langlanga dagiti dudon immarngida kadagiti kabalio+ a naisagana iti pannakibakal; ket iti rabaw dagiti uloda adda dagiti kasla korona a kaasping ti balitok, ket dagiti rupada kaslada iti ruprupa ti tattao,+ 8 ngem adda buokda a kas iti buok dagiti babbai.+ Ket dagiti ngipenda kas kadagiti ngipen dagiti leon;+ 9 ket addaanda kadagiti kabal ti barukong+ a kas kadagiti landok a kabal ti barukong. Ket ti uni dagiti payakda kas iti daranudor dagiti karuahe+ ti adu a kabalio nga agtataray a mapan makibakal.+ 10 Kasta met, addaanda kadagiti ipus ken kadagiti pangsilud nga umasping kadagiti manggagama;+ ket adda kadagiti ipusda ti autoridadda a mangranggas kadagiti tattao iti lima a bulan. 11 Addaanda iti maysa nga ari, ti anghel ti mangliwengliweng.+ Ti naganna iti Hebreo ket Abaddon, ngem iti Griego isu addaan iti nagan nga Apolion.+
12 Ti maysa nga ay-ay naglabas. Adtoy! Dua pay nga ay-ay+ ti umay kalpasan dagitoy a banag.
13 Ket ti maikanem nga anghel+ pinuyotna ti trumpetana.+ Ket nangngegko ti maysa a timek+ manipud kadagiti sara ti nabalitokan nga altar+ nga adda iti sanguanan ti Dios 14 a kunana iti maikanem nga anghel, nga addaan iti trumpeta: “Warwaram ti uppat nga anghel+ a sipaparaut+ idiay dakkel a karayan ti Eufrates.”+ 15 Ket nawarwaran ti uppat nga anghel, a naisagana maipaay iti oras ken aldaw ken bulan ken tawen, tapno papatayenda ti kakatlo dagiti tattao.
16 Ket ti bilang ti buybuyot dagiti nakakabalio dua a linaklaksa a laksa: Nangngegko ti bilangda. 17 Ket kastoy ti pannakakitak kadagiti kabalio iti sirmata, ken kadagidiay sisasakay kadakuada: addaanda kadagiti kabal ti barukong a nalabaga a kas iti apuy ken asul a kas iti jacinto ken duyaw a kasla asupre; ket ti ul-ulo dagiti kabalio kas iti ul-ulo dagiti leon,+ ket manipud kadagiti ngiwatda rimmuar ti apuy ken asuk ken asupre.+ 18 Babaen kadagitoy tallo a pannaplit napapatay ti kakatlo dagiti tattao, manipud iti apuy ken iti asuk ken iti asupre a rimmuar kadagiti ngiwatda. 19 Ta ti autoridad dagiti kabalio adda kadagiti ngiwatda ken kadagiti ipusda; ta dagiti ipusda ket umasping kadagiti serpiente+ ken addaanda iti ul-ulo, ket babaen kadagitoy mangdangranda.
20 Ngem ti natedda kadagiti tattao a saan a napapatay babaen kadagitoy a pannaplit saanda a nagbabawi kadagiti aramid ti im-imada,+ tapno iti kasta saanda koma nga agrukbab kadagiti sairo+ ken kadagiti idolo a balitok ken pirak+ ken gambang ken bato ken kayo, isuda a saan a makakita wenno uray makangngeg wenno makapagna;+ 21 ket saanda a nagbabawi kadagiti panagpapatayda+ wenno kadagiti espiritistiko nga aramidda+ wenno kadagiti pannakiabigda wenno kadagiti panagtakawda.