Ti Maikadua a Cronicas

31 Idi nalpasen ti piesta, rimmuar ti amin nga Israelita nga adda sadiay sa napanda kadagiti siudad ti Juda, ket rinebbada dagiti sagrado nga adigi,+ pinukanda dagiti sagrado a poste,*+ ken rinebbada dagiti nangato a disso+ ken dagiti altar+ iti intero a Juda ken Benjamin, kasta met idiay Efraim ken Manases,+ agingga a naan-anay a nadadael dagita. Kalpasanna, nagawid ti amin nga Israelita, kadagiti siudad a pagnanaedanda.

2 Inorganisar ni Ezekias dagiti papadi ken Levita iti nadumaduma a grupoda,+ tunggal grupo dagiti papadi ken Levita iti panagserbida+ mainaig kadagiti daton a mapuoran ken daton a pakikappia, tapno agserbi, agyaman, ken idaydayawda ti Dios kadagiti ruangan dagiti paraangan* ni Jehova.+ 3 Naited ti sumagmamano a sanikua ti ari kas daton a mapuoran,+ a pakairamanan dagiti daton iti bigat ken rabii,+ kasta met dagiti daton a mapuoran kadagiti Sabbath,+ baro a bulan,+ ken piesta,+ sigun iti naisurat iti Linteg ni Jehova.

4 Binilinna pay dagiti umili nga agnanaed iti Jerusalem nga itedda ti bingay dagiti papadi ken Levita,+ tapno naan-anay a masurotda* ti linteg ni Jehova. 5 Apaman a naipakaammo ti bilin, nangted dagiti Israelita iti umuna a bunga dagiti apitda a bukbukel, baro nga arak, lana,+ ken diro, ken amin a naapitda iti talon.+ Nangtedda iti nakaad-adu nga apagkapullo ti tunggal banag.+ 6 Dagiti umili ti Israel ken Juda nga agnanaed kadagiti siudad ti Juda nangyegda pay iti apagkapullo dagiti tarakenda a baka ken karnero ken iti apagkapullo dagiti nasantuan a banag,+ ti bambanag a napagbalin a nasantuan para ken Jehova a Diosda. Inyegda dagita a binuntobuntonda. 7 Iti maikatlo a bulan,+ rinugianda a buntonen dagiti kontribusionda. Nalpasda dayta iti maikapito a bulan.+ 8 Idi dimteng ni Ezekias ken dagiti prinsipe ket nakitada dagiti bunton, indaydayawda ni Jehova ken binendisionanda ti ilina nga Israel.

9 Nagsaludsod ni Ezekias kadagiti papadi ken Levita maipapan kadagiti bunton, 10 ket insungbat ni Azarias a panguluen a padi iti balay ni Zadok: “Idi inrugi dagiti tattao nga iyeg dagiti kontribusion iti balay ni Jehova,+ nangnanganda agingga a napnekda ket nakaad-adu pay ti natedda, ta binendisionan ni Jehova ti ilina, ket tedda laeng dagitoy a bunton.”+

11 Gapu iti daytoy, imbaga ni Ezekias nga isaganada dagiti siled a pagidulinan*+ iti balay ni Jehova, isu nga insaganada dagita. 12 Simamatalek nga inyegda dagiti kontribusion, ti apagkapullo,+ ken nasantuan a banag. Ni Conanias a Levita ti nadutokan a mangaywan kadagitoy, ket ni Simei a kabsatna ti maikadua. 13 Dagiti komisionado idi ket da Jehiel, Azazias, Nahat, Asael, Jerimot, Jozabad, Eliel, Ismakias, Mahat, ken Benaias. Tultulonganda ni Conanias ken ni Simei a kabsatna, sigun iti bilin ni Ari Ezekias, ket ni Azarias idi ti mangay-aywan iti balay ti pudno a Dios. 14 Ni Core nga anak ni Imna, a Levita a parabantay iti ruangan iti daya,+ ti agaywan kadagiti boluntario a daton+ ti pudno a Dios, ket inwarasna ti kontribusion para ken Jehova+ ken dagiti kasasantuan a banag.+ 15 Adda iti babaenna da Eden, Miniamin, Jesua, Semaias, Amarias, ken Secanias, kadagiti siudad dagiti papadi,+ iti akemda kas mapagtalkan, tapno patas ti panangtedda iti bingay dagiti grupo ti kakabsatda,+ agpadpada iti dakkel ken bassit. 16 Nayon daytoy ti mait-ited kadagiti lallaki nga agtawen iti tallo nga agpangato a nailista iti listaan ti kapuonan, nga inaldaw a mapan iti balay ni Jehova tapno agserbida ken itungpalda ti trabaho dagiti grupoda.

17 Ti listaan ti kapuonan dagiti papadi ken dagiti Levita nga agtawen iti 20 nga agpangato+ ket sigun iti pamilia dagidi ammada,+ ken sigun iti trabaho dagiti grupoda.+ 18 Nairaman iti listaan ti kapuonan ti amin nga annak, assawa, annak a lallaki ken babbai, ti amin a Levita—ta pinagtalinaedda a nadalus ti bagida gapu ta nasantuan ti trabahoda— 19 kasta met dagiti kaputotan ni Aaron, dagiti papadi nga agnanaed kadagiti talon a pagpastoran iti aglawlaw dagiti siudadda.+ Iti amin a siudad, napili ti sumagmamano a lallaki ken naikkanda iti responsabilidad a mangiwaras iti taraon kadagiti papadi ken iti amin nga adda iti listaan ti kapuonan dagiti Levita.

20 Kastoy ti inaramid ni Ezekias iti intero a Juda, ket intuloyna nga aramiden ti naimbag ken umiso ken nagmatalek iti sanguanan ni Jehova a Diosna. 21 Naimpusuan nga inaramidna ti tunggal trabaho maipapan iti panangsapulna iti Diosna, iti man panagserbi iti balay ti pudno a Dios+ wenno iti Linteg ken iti bilin, ket nagballigi.