Numeros

9 Kinuna ni Jehova ken ni Moises idiay let-ang ti Sinai iti umuna a bulan+ ti maikadua a tawen kalpasan ti iruruarda idiay Egipto: 2 “Masapul nga isagana dagiti Israelita ti daton ti Paskua+ iti naikeddeng a tiempo.+ 3 Iti maika-14 nga aldaw daytoy a bulan, masapul nga isaganayo dayta iti naikeddeng a tiempo, sakbay a sumipnget kalpasan a lumnek ti init;* maitunos iti amin a paglintegan ken proseso ti pannakaisaganana.”+

4 Gapuna, imbaga ni Moises kadagiti Israelita nga isaganada ti daton ti Paskua. 5 Iti kasta, insaganada ti daton ti Paskua iti maika-14 nga aldaw ti umuna a bulan, sakbay a sumipnget kalpasan a lumnek ti init,* idiay let-ang ti Sinai. Inaramid dagiti Israelita ti amin nga imbilin ni Jehova ken ni Moises.

6 Adda idi lallaki a maibilang a narugit ta nakasagidda iti bangkay*+ isu a saanda a naisagana ti daton ti Paskua iti daydi nga aldaw. Gapuna, napanda kada Moises ken Aaron iti daydi nga aldaw+ 7 ket kinunada: “Narugitkami ta nakasagidkami iti bangkay.* Apay a maparitankami nga agdaton ken Jehova iti naikeddeng a tiempo a kadua dagiti Israelita?”+ 8 Gapuna, insungbat ni Moises: “Aguraykayo ta ammuek no ania ti ibaga ni Jehova maipapan kadakayo.”+

9 Iti kasta, kinuna ni Jehova ken ni Moises: 10 “Ibagam kadagiti Israelita, ‘No ti asinoman kadakayo wenno iti sumaruno a henerasionyo ket agbalin a narugit gapu ta nakasagid iti bangkay*+ wenno nagdaliasat iti adayo, masapul nga isaganana latta ti daton ti Paskua para ken Jehova. 11 Isaganada dayta iti maika-14 nga aldaw ti maikadua a bulan,+ sakbay a sumipnget kalpasan a lumnek ti init.* Masapul a kanenda dayta agraman dagiti tinapay nga awan lebadurana ken napait a natnateng.+ 12 Masapul nga awan ti iteddada para iti sumaruno a bigat,+ ken awan ti tukkolenda a tulangna.+ Nasken nga isaganada dayta maitunos iti tunggal paglintegan mainaig ti Paskua. 13 Ngem no nadalus ti maysa a tao* wenno saan a nagdaliasat ket liniwayanna nga isagana ti daton ti Paskua, masapul a mapapatay+ ta saan a nagdaton ken Jehova iti naikeddeng a tiempo. Madusanto dayta a tao gapu iti basolna.

14 “‘No adda ganggannaet a residente, isaganana met ti daton ti Paskua para ken Jehova,+ maitunos iti paglintegan ti Paskua ken iti proseso ti pannakaisaganana.+ Masapul a maymaysa a paglintegan ti surotenyo agraman dagiti ganggannaet a residente.’”+

15 Idi naibangon ti tabernakulo,+ adda ulep a mangab-abbong iti tabernakulo, wenno ti tolda ti Testimonia iti aldaw, ngem iti rabii, agbalin dayta a kasla apuy iti ngatuen ti tabernakulo agingga iti bigat.+ 16 Kasta ti agtultuloy a napasamak: Abbongan ti ulep ti tabernakulo iti aldaw, ken agbalin dayta a kasla apuy iti rabii.+ 17 No umakar ti ulep nga adda iti ngatuen ti tolda, pumanaw a dagus dagiti Israelita,+ ket agkampoda iti lugar a pagsardengan ti ulep.+ 18 Pumanaw dagiti Israelita no ibilin ni Jehova, ken agkampoda met no ibilin ni Jehova.+ Agtalinaedda iti nagkampuanda no saan nga umakar ti ulep iti ngatuen ti tabernakulo. 19 No agtalinaed ti ulep iti ngatuen ti tabernakulo iti adu nga aldaw, agtulnog dagiti Israelita ken Jehova ket saanda a pumanaw.+ 20 No dadduma, agtalinaed ti ulep iti sumagmamano nga aldaw iti ngatuen ti tabernakulo. Agtalinaedda iti nagkampuanda no ibilin ni Jehova, ket pumanawda met no ibilin ni Jehova. 21 No dadduma, agtalinaed laeng ti ulep iti rabii agingga iti bigat, ket pumanawdan no agpangaton ti ulep iti bigat. Aldaw man wenno rabii ti panagpangato ti ulep, masapul a pumanawda.+ 22 Dua nga aldaw man wenno makabulan wenno nabaybayag pay, agingga nga adda ti ulep iti ngatuen ti tabernakulo, agtalinaed dagiti Israelita iti nagkampuanda ket saanda a pumanaw. Ngem pumanawda no agpangaton ti ulep. 23 Agkampoda no ibilin ni Jehova, ket pumanawda met no ibilin ni Jehova. Nagtulnogda ken Jehova maitunos iti imbilin ni Jehova ken ni Moises.