Salmo

115 Saan a dakami, O Jehova, saan a dakami,*

No di ket ti naganmo ti maidaydayaw+

Gapu iti napudno nga ayatmo ken kinamatalekmo.+

 3 Adda idiay langit ti Diosmi;

Ar-aramidenna ti aniaman a pakaragsakanna.

 4 Pirak ken balitok dagiti idoloda

Nga inaramid dagiti tattao.+

 5 Adda ngiwatda, ngem saanda a makasao;+

Adda matada, ngem saanda a makakita;

 6 Adda lapayagda, ngem saanda a makangngeg;

Adda agongda, ngem saanda a makaangot;

 7 Adda imada, ngem saanda a makarikna;

Adda sakada, ngem saanda a makapagna;+

Awan ti timek a rummuar iti karabukobda.+

 8 Dagiti tattao nga agar-aramid kadagita ket agbalinto a kas kadagita,+

Ken uray ti amin nga agtaltalek kadagita.+

 9 O Israel, agtalekkayo ken Jehova+

—Isu ti katulongan ken kalasagyo.+

10 O sangakabbalayan ni Aaron,+ agtalekkayo ken Jehova

—Isu ti katulongan ken kalasagyo.

11 Dakayo nga agbuteng ken Jehova, agtalekkayo ken Jehova+

—Isu ti katulongan ken kalasagyo.+

12 Laglagipennatayo ni Jehova ken bendisionannatayto;

Bendisionannanto ti sangakabbalayan ni Israel;+

Bendisionannanto ti sangakabbalayan ni Aaron.

13 Bendisionanto ni Jehova dagiti agbuteng kenkuana,

Dagiti nanumo ken dagiti natan-ok.*

14 Paaduennakayto ni Jehova,

Dakayo ken dagiti annakyo.*+

15 Bendisionannakayo koma ni Jehova,+

Ti Nangaramid iti langit ken daga.+

16 Kukua ni Jehova ti langit,+

Ngem intedna ti daga kadagiti tattao.+

17 Ni Jah ket saan a maidaydayaw dagiti natay;+

Wenno ti asinoman nga addan idiay tanem.*+

18 Ngem idaydayawmi ni Jah

Manipud ita ken iti agnanayon.