Jeremias

26 Idi rugrugi ti panagturay ni Jehoiakim+ nga anak ni Josias, ti ari ti Juda, daytoy ti mensahe a naggapu ken Jehova: 2 “Daytoy ti imbaga ni Jehova, ‘Agtakderka iti paraangan ti balay ni Jehova ken agsaoka maipapan iti* amin a tattao kadagiti siudad ti Juda nga um-umay agdaydayaw* iti balay ni Jehova. Ibagam kadakuada ti amin nga ibilinko kenka; saanmo a kissayan iti uray maysa laeng a sao. 3 Bareng mangipangagda ken isardeng ti tunggal maysa ti dakes a kababalinna, ket balbaliwakto ti panunotko maipapan iti* panangdidigrak kadakuada gapu kadagiti dakes nga aramidda.+ 4 Ibagam kadakuada: “Daytoy ti kuna ni Jehova, ‘No didak ipangag ken diyo suroten ti linteg* nga intedko kadakayo, 5 ken saanyo nga ipangag ti ibaga dagiti adipenko a propeta, a maulit-ulit nga imbaonko kadakayo,* ngem saanyo nga impangag,+ 6 pagbalinekto ngarud daytoy a balay a kas iti Shilo,+ ken pagbalinekto daytoy a siudad a lunod iti amin a nasion iti daga.’”’”+

7 Nangngeg dagiti papadi, propeta, ken amin nga umili dagiti imbaga ni Jeremias iti balay ni Jehova.+ 8 Idi naibagan ni Jeremias iti amin a tattao ti amin nga imbilin kenkuana ni Jehova, tinengngel dagiti papadi, propeta, ken amin nga umili, ket kinunada: “Sigurado a matayka. 9 Apay nga ipadpadtom iti nagan ni Jehova, ‘Daytoy a balay ket agbalinto a kas iti Shilo ken madadael daytoy a siudad ket awanton ti agnaed’?” Ket immaribungbong ti amin a tattao ken Jeremias iti balay ni Jehova.

10 Idi nangngeg dagiti prinsipe ti Juda dagitoy a sasao, pimmanawda iti balay* ti ari sa simmang-atda iti balay ni Jehova ket nagtugawda iti pagserkan ti baro a ruangan ni Jehova.+ 11 Imbaga dagiti papadi ken propeta kadagiti prinsipe ken amin nga umili: “Daytoy a tao ket maikari a madusa iti ipapatay,+ ta nagipadto maikontra iti daytoy a siudad kas iti nangngegyo a mismo.”+

12 Imbaga ngarud ni Jeremias iti amin a prinsipe ken iti amin nga umili: “Ni Jehova ti nangibaon kaniak nga agipadto iti amin a nangngegyo maikontra iti daytoy a balay ken iti daytoy a siudad.+ 13 Isu nga ita, balbaliwanyo dagiti kababalin ken aramidyo ken agtulnogkayo iti timek ni Jehova a Diosyo, ket ni Jehova balbaliwannanto ti panunotna maipapan iti* imbagana a panangdidigrana kadakayo.+ 14 Ngem makaammokayon kaniak. Aramidenyo kaniak ti ammoyo a nasayaat ken umiso. 15 Ngem tandaananyo a no patayendak, maisingir kadakayo ken iti daytoy a siudad ken kadagiti umilina ti dara ti inosente. Ta kinapudnona, ni Jehova ti nangibaon kaniak a mangibaga kadakayo iti amin a nangngegyo.”

16 Imbaga ngarud dagiti prinsipe ken amin nga umili kadagiti papadi ken propeta: “Daytoy a tao ket saan a maikari a madusa iti ipapatay, ta nagsao kadatayo iti nagan ni Jehova a Diostayo.”

17 Kanayonanna, timmakder ti dadduma a panglakayen iti dayta a lugar ket imbagada iti amin a naguummong a tattao: 18 “Idi kaaldawan ni Ari Ezekias+ ti Juda, agipadpadto ni Mikias+ a taga-Moreset ket imbagana iti amin a tattao iti Juda, ‘Daytoy ti kinuna ni Jehova a panguluen dagiti armada:

19 “Pinatay kadi isuna ni Ari Ezekias ti Juda ken ti intero a Juda? Saan aya a nagbuteng ken Jehova ken nagpakpakaasi ken Jehova,* tapno baliwan ni Jehova ti panunotna maipapan iti* didigra nga imbagana kadakuada?+ Isu a dandanitayon nakaaramid iti nakaro a pakadidigraantayo met laeng.

20 “Ni Uria nga anak ni Semaias iti Kiriat-jearim+ ti maysa pay a lalaki nga agipadpadto idi iti nagan ni Jehova. Agipadpadto a maikontra iti daytoy a siudad ken iti daytoy a daga a kas kadagiti ibagbaga ni Jeremias. 21 Nangngeg ni Ari Jehoiakim+ ken ti amin a nabileg a soldadona ken ti amin a prinsipe ti imbagana, isu a binirok ti ari tapno patayenna.+ Idi nangngeg dayta ni Uria, dagus a nagbuteng ken nagkamang idiay Egipto. 22 Isu nga imbaon ni Ari Jehoiakim ni Elnatan+ nga anak ni Akbor a mapan idiay Egipto a kaduana ti dadduma a lallaki. 23 Innalada ni Uria idiay Egipto ket impanda ken Ari Jehoiakim. Pinatayna iti espada+ ket impalladawna ti bangkayna iti tanem dagiti ordinario a tattao.”

24 Ngem ni Ahikam+ nga anak ni Safan+ tinulonganna ni Jeremias tapno saan a papatayen dagiti tattao.+