Jeremias

36 Idi maikapat a tawen ti panagturay ti ari ti Juda a ni Jehoiakim+ nga anak ni Josias, daytoy ti mensahe ni Jehova ken Jeremias: 2 “Mangalaka iti lukot,* ket isuratmo ti amin nga imbagak kenka maibusor iti Israel, Juda,+ ken iti amin a nasion,+ manipud idi umuna nga aldaw a nakisaritaak kenka, idi kaaldawan ni Josias agingga ita nga aldaw.+ 3 Bareng no mangngeg ti sangakabbalayan ti Juda ti amin a panggepko a panangdidigra kadakuada ket isardengda dagiti dakes nga aramidda, tapno pakawanek ti kamali ken basolda.”+

4 Inayaban ngarud ni Jeremias ni Baruk+ nga anak ni Nerias. Indiktar ni Jeremias ti amin nga imbaga kenkuana ni Jehova, ket insurat dagita ni Baruk iti lukot.*+ 5 Kalpasanna, imbilin ni Jeremias ken Baruk: “Maiparit a sumrekak iti balay ni Jehova. 6 Sika ngarud ti sumrek ket ipigsam a basaen dagiti imbaga ni Jehova nga indiktarko nga isuratmo iti lukot. Basaem dagita tapno mangngeg dagiti tattao idiay balay ni Jehova inton aldaw ti panagayunar. Ibasam dagita iti amin a tattao iti Juda a naggapu kadagiti siudadda. 7 Bareng no makadanon ken Jehova ti panagpakaasida ket isardeng ti tunggal maysa dagiti dakes nga aramidna, ta napalalo ti unget ken pungtot ni Jehova nga imbagana maibusor kadagitoy a tattao.”

8 Inaramid ngarud ni Baruk nga anak ni Nerias ti amin nga imbilin kenkuana ni propeta Jeremias; impigsana a binasa idiay balay ni Jehova ti lukot* a nakaisuratan dagiti imbaga ni Jehova.+

9 Idi maikasiam a bulan ti maikalima a tawen a panagturay ti ari ti Juda a ni Jehoiakim+ nga anak ni Josias, ti amin nga umili ti Jerusalem ken amin a tattao nga immay idiay Jerusalem manipud kadagiti siudad ti Juda ket nangiwaragawag iti panagayunar iti sanguanan ni Jehova.+ 10 Nangngeg ti amin a tattao ti napigsa a panangibasa ni Baruk iti sasao ni Jeremias manipud iti lukot* idiay balay ni Jehova, iti kuarto* ni Gemarias+ nga anak ni Safan+ a parakopia,* iti makinngato a paraangan, iti pagserkan ti baro a ruangan ti balay ni Jehova.+

11 Idi nangngeg ni Mikaias nga anak ni Gemarias nga anak ni Safan ti amin a sasao ni Jehova iti lukot,* 12 napan iti balay* ti ari, iti kuarto ti sekretario. Nakatugaw sadiay ti amin a prinsipe:* ni Elisama+ a sekretario, ni Delaias nga anak ni Semaias, ni Elnatan+ nga anak ni Akbor,+ ni Gemarias nga anak ni Safan, ni Zedekias nga anak ni Hananias, ken amin a dadduma pay a prinsipe. 13 Imbaga kadakuada ni Mikaias ti amin a sasao a nangngegna idi imbasa ni Baruk ti lukot* kadagiti umili.

14 Imbaon ngarud ti amin a prinsipe ni Jehudi nga anak ni Netanias nga anak ni Selemias nga anak ni Cusi, a mangibaga ken Baruk: “Ipanmo ditoy ti lukot nga imbasam kadagiti tattao.” Intugot ni Baruk nga anak ni Nerias ti lukot ket impanna kadakuada. 15 Imbagada: “Pangngaasim ta agtugawka, ket ipigsam nga ibasa kadakami.” Imbasa ngarud dayta ni Baruk kadakuada.

16 Apaman a nangngegda ti amin a sasao, mabutbutengda a nagkikinnita, ket imbagada ken Baruk: “Masapul nga ibagami iti ari amin dagitoy a sasao.” 17 Ket insaludsodda ken Baruk: “Pangngaasim ta ibagam kadakami no kasanom nga insurat amin dagitoy a sasao. Indiktarna kadi?” 18 Insungbat kadakuada ni Baruk: “Indiktarna kaniak amin dagitoy a sasao, ket insuratko iti daytoy a lukot.”* 19 Imbaga dagiti prinsipe ken Baruk: “Mapankay aglemmeng, sika ken ni Jeremias, ket diyo ibagbaga ti ayanyo.”+

20 Kalpasanna, napanda iti ari, iti paraangan, ken inkabilda ti lukot iti kuarto ni Elisama a sekretario, ket imbagada iti ari ti amin a nangngegda.

21 Impaala ti ari ken Jehudi+ ti lukot ket innalana dayta iti kuarto ni Elisama a sekretario. Kalpasanna, binasa dayta ni Jehudi a dengdenggen ti ari ken ti amin a prinsipe a nakatakder iti abay ti ari. 22 Adda idi ti ari iti balayna a pangpalpalabsanna iti tiempo ti lam-ek, iti maikasiam a bulan* ket nakatugaw iti sango ti paginuduan. 23 Kada mabasa ni Jehudi ti tallo wenno uppat a binatog ti panid, pigisen dayta ti ari babaen ti kutsilio ti sekretario sana ipuruak iti apuy ti paginuduan agingga a naipuruak ti intero a lukot iti apuy ti paginuduan. 24 Saanda a nagbuteng; ket uray nangngeg ti ari ken ti amin nga adipenna dagitoy a sasao, saanda met a pinisang dagiti badoda. 25 Uray impakpakaasi da Elnatan,+ Delaias,+ ken Gemarias+ iti ari a dina puoran ti lukot, saanna ida nga impangag. 26 Imbilin met ti ari kada Jerameel nga anak ti ari, ni Seraias nga anak ni Azriel, ni Selemias nga anak ni Abdeel, a tiliwenda ni Baruk a sekretario ken ni propeta Jeremias, ngem inlemmeng ida ni Jehova.+

27 Kalpasan a pinuoran ti ari ti lukot a nakaisuratan ti indiktar ni Jeremias ken Baruk,+ kinuna manen ni Jehova ken Jeremias: 28 “Mangalaka iti sabali pay a lukot ket isuratmo amin a naisurat iti umuna a lukot a pinuoran ni Ari Jehoiakim ti Juda.+ 29 Ket masapul nga ibagam ken Ari Jehoiakim ti Juda, ‘Daytoy ti imbaga ni Jehova: “Pinuoram daytoy a lukot ket imbagam, ‘Apay nga insuratmo iti dayta: “Sigurado nga umay ti ari ti Babilonia ket dadaelenna daytoy a lugar ket pukawenna ti amin a tattao ken animal”?’+ 30 Daytoy ngarud ti imbaga ni Jehova maibusor ken Ari Jehoiakim ti Juda, ‘Awanto ti anakna nga agtugaw iti trono ni David,+ ken mabaybay-anto ti bangkayna a mabilag iti aldaw ken malamiisan iti rabii.+ 31 Singirekto isuna ken dagiti kaputotanna* ken dagiti adipenna gapu iti kamalida, ket iyegko kadakuada ken kadagiti agnanaed iti Jerusalem ken kadagiti tattao ti Juda ti amin a didigra nga imbagak maibusor kadakuada,+ ngem dida nangipangag.’”’”+

32 Nangala ngarud ni Jeremias iti sabali pay a lukot ket intedna iti sekretario+ a ni Baruk nga anak ni Nerias. Indiktar ni Jeremias ti amin nga insuratna idi iti lukot* a pinuoran ni Ari Jehoiakim ti Juda.+ Ket adu pay ti kasta a sasao a nainayon.