Ti Maikadua a Cronicas

36 Innala dagiti umili ni Jehoahaz+ nga anak ni Josias ket pinagbalinda nga ari idiay Jerusalem a kasukat ni amana.+ 2 Agtawen ni Jehoahaz iti 23 idi nagbalin nga ari, ket nagturay iti tallo a bulan idiay Jerusalem. 3 Ngem inikkat ti ari ti Egipto iti saadna idiay Jerusalem ken pinagmultana ti daga iti 100 a talento* a pirak ken maysa a talento a balitok.+ 4 Pinagbalin pay ti ari ti Egipto ni Eliakim a kabsat ni Jehoahaz kas ari iti Juda ken Jerusalem ket sinukatanna ti naganna iti Jehoiakim; ngem innala ni Neco+ ni Jehoahaz a kabsatna sa impanna idiay Egipto.+

5 Agtawen ni Jehoiakim+ iti 25 idi nagbalin nga ari, ket nagturay iti 11 a tawen idiay Jerusalem. Inar-aramidna ti dakes iti imatang ni Jehova a Diosna.+ 6 Rimmaut ni Ari Nabucodonosor+ ti Babilonia ket pinosasanna ni Jehoiakim iti dua a gambang sa impanna idiay Babilonia.+ 7 Innala ni Nabucodonosor ti dadduma nga alikamen iti balay ni Jehova ket impanna idiay Babilonia sa inkabilna dagita iti palasiona.+ 8 Ti dadduma pay a pasamak iti pakasaritaan ni Jehoiakim, dagiti makarimon nga inaramidna, ken ti amin a dakes a banag maipapan kenkuana, ket naisurat iti Libro ti Ar-ari ti Israel ken ti Juda. Ni Jehoiakin nga anakna ti simmaruno nga ari.+

9 Agtawen ni Jehoiakin+ iti 18 idi nagbalin nga ari, ket nagturay iti tallo a bulan ken 10 nga aldaw idiay Jerusalem. Inar-aramidna ti dakes iti imatang ni Jehova.+ 10 Iti rugi ti tawen,* nagbaon ni Ari Nabucodonosor ket impaipanna ni Jehoiakin idiay Babilonia,+ ken pinaalana dagiti napateg nga alikamen ti balay ni Jehova.+ Pinagbalinna ni Zedekias a kabsat ni amana kas ari iti Juda ken Jerusalem.+

11 Agtawen ni Zedekias+ iti 21 idi nagbalin nga ari, ket nagturay iti 11 a tawen idiay Jerusalem.+ 12 Inar-aramidna ti dakes iti imatang ni Jehova a Diosna. Saan a nagpakumbaba iti sanguanan ni propeta Jeremias,+ a nagsao kas imbilin ni Jehova. 13 Nagrebelde pay ken Ari Nabucodonosor,+ a namagsapata kenkuana iti nagan ti Dios. Nagtalinaed a nasukir* ken natangken ti pusona ket saanna a kayat ti agsubli ken Jehova a Dios ti Israel. 14 Nakaro ti di panagmatalek ti amin a panguluen dagiti papadi kasta met dagiti umili, a tinuladda ti amin a dakes nga aramid dagiti nasion, ket rinugitanda ti balay ni Jehova+ idiay Jerusalem a pinagbalinna a nasantuan.

15 Pinakpakdaaran ida ni Jehova a Dios dagidi ammada babaen kadagiti mensaherona, a maulit-ulit a pinakdaaranna ida, ta naasian iti ilina ken iti pagnanaedanna. 16 Ngem linalaisda dagiti mensahero ti pudno a Dios,+ ket tinagibassitda dagiti sasaona+ ken inuy-uyawda dagiti propetana,+ agingga a nakapungtot ni Jehova iti ilina,+ agingga nga awanen ti namnama a mapaimbagda.

17 Gapuna, impalubosna a rauten ida ti ari dagiti Caldeo,+ a nangpapatay kadagiti agtutubo a lallaki babaen ti espada+ iti santuarioda.+ Saan a naasian iti agtutubo a lalaki wenno babai, nataengan wenno nakapuy.+ Inyawat amin ida ti Dios iti ima ti ari.+ 18 Amin nga alikamen iti balay ti pudno a Dios, dadakkel ken babassit, agraman dagiti gameng iti balay ni Jehova ken dagiti gameng ti ari ken dagiti prinsipena, impanna amin idiay Babilonia.+ 19 Pinuoranna ti balay ti pudno a Dios,+ rinebbana ti pader ti Jerusalem,+ inuramna ti amin a natibker a torrena, ken dinadaelna ti amin a napateg a banag.+ 20 Impanna idiay Babilonia dagiti nakalasat iti espada,+ ket nagbalinda nga adipenna+ ken adipen dagiti annakna agingga a nangrugi ti panagturay ti pagarian ti Persia,+ 21 tapno matungpal ti sao ni Jehova nga imbaga ni Jeremias,+ agingga a maikaro ti daga dagiti sabbath a saan a nangilin.+ Nangilin ti sabbath iti amin nga aldaw a napanawan ti daga, tapno matungpal ti 70 a tawen.+

22 Iti umuna a tawen ti panagturay ni Ari Ciro+ ti Persia, tinignay ni Jehova ti puso ti ari a mangaramid iti proklamasion iti intero a pagarianna ken mangisurat iti maysa a bilin. Naaramid daytoy tapno matungpal ti sao ni Jehova babaen ken Jeremias.+ Kastoy ti naisurat:+ 23 “Kuna ni Ari Ciro ti Persia, ‘Ni Jehova a Dios ti langit intedna kaniak ti amin a pagarian iti daga,+ ken binilinnak a mangibangon iti balayna idiay Jerusalem iti Juda.+ Adda koma ni Jehova a Dios kadakayo amin nga adipenna, ket agsublikayo sadiay.’”+