Levitico

7 “‘Daytoy ti linteg maipapan iti daton gapu iti biddut:+ Nasantuan unay dayta. 2 Partienda ti daton gapu iti biddut iti disso a pagpartian kadagiti daton a mapuoran, ket maiwarsi ti darana+ iti amin a sikigan ti altar.+ 3 Idaton ti padi ti amin a taba,+ agraman ti nataba nga ipus, ti taba a nangbalkut kadagiti bagis, 4 ken ti dua a bato agraman dagiti taba kadagita iti asideg dagiti lomo. Ikkatenna met dagiti taba iti dalem agraman dagiti bato.+ 5 Puoran dagita ti padi iti rabaw ti altar kas daton a mapuoran para ken Jehova.+ Dayta ket daton gapu iti biddut. 6 Kanento daytoy ti tunggal lalaki nga agserserbi kas padi+ iti nasantuan a disso. Nasantuan unay+ dayta. 7 Ti linteg maipapan iti daton gapu iti basol ket agaplikar met iti daton gapu iti biddut; kukua dagita ti padi a mangidatag iti daton.+

8 “‘No mangidatag ti padi iti daton a mapuoran para iti sabali a tao, kukuananto ti kudil+ dayta a daton.

9 “‘Tunggal daton a bukbukel a nailuto iti urno wenno pariok wenno daplat a pariok+ ket kukuanto ti padi a mangidaton iti dayta.+ 10 Ngem tunggal daton a bukbukel a nalaokan iti lana+ wenno namaga+ ket agpaayto iti amin nga annak ni Aaron; agpapadanto ti bingayda.

11 “‘Daytoy ti linteg maipapan iti daton a pakikappia+ a mabalin nga ipaay ti maysa ken Jehova: 12 No idatonna dayta kas panagyaman,+ pakuyoganna ti daton ti panagyaman kadagiti awan lebadurana a sinansingsing a tinapay a nalaokan iti lana, awan lebadurana a naingpis a tinapay a napulagidan iti lana, ken sinansingsing a tinapay a naaramid iti napino nga arina, a nalaokan ken nayuper iti lana. 13 Mangipaay pay kadagiti sinansingsing a tinapay nga adda lebadurana ken iti daton a pakikappia kas panagyamanna. 14 Mangala iti saggagaysa kadagita a daton ket ipaayna kas sagrado a bingay ni Jehova; kukuanto dayta ti padi a mangiwarsi iti dara dagiti daton a pakikappia.+ 15 Ti karne ti daton a pakikappia kas panagyamanna ket masapul a makan iti aldaw a panangidatonna iti dayta. Awan ti maipabigat.+

16 “‘No ti idatonna ket maysa a kari+ wenno boluntario a daton,+ masapul a makan dayta iti aldaw a panangidatonna. Mabalin a kanen iti sumaganad nga aldaw ti aniaman a matedda. 17 Ngem no adda latta matedda a karne ti daton iti maikatlo nga aldaw, masapul a mapuoran.+ 18 No kanen ti mangipaay iti daton a pakikappia ti aniaman a natedda iti maikatlo nga aldaw, saanto a maay-ayo ti Dios kenkuana. Awanto ti serserbi ti datonna. Kagura dayta ti Dios, ket madusanto gapu iti basolna.+ 19 Saan a makan ti karne a maisagid iti aniaman a banag a narugit. Masapul a mapuoran. Asinoman a nadalus mabalinna a kanen ti nadalus a karne.

20 “‘Ngem no ti asinoman a narugit ket mangan iti karne ti daton a pakikappia para ken Jehova, masapul a mapapatay.+ 21 Asinoman a mangsagid iti aniaman a narugit, narugit a tao+ wenno narugit nga animal+ wenno aniaman a maibilang a narugit,+ ken mangan iti karne ti daton a pakikappia para ken Jehova, masapul a mapapatay.’”

22 Intuloy a kinuna ni Jehova ken ni Moises: 23 “Ibagam kadagiti Israelita, ‘Diyo kanen ti aniaman a taba+ ti baka wenno urbon a kalakian a karnero wenno kalding. 24 Mabalin nga usaren iti aniaman a panggep ti taba ti animal a nabirokan a natay wenno pinatay ti sabali nga animal, ngem diyo pulos kanen dayta.+ 25 Ta masapul a mapapatay ti asinoman a mangan iti taba ti animal nga ipaayna kas daton a mapuoran para ken Jehova.

26 “‘Dikay mangan iti aniaman a dara+ iti sadinoman a pagnaedanyo, dara man ti billit wenno animal. 27 Masapul a mapapatay ti asinoman a mangan iti aniaman a dara.’”+

28 Kinuna pay ni Jehova ken ni Moises: 29 “Ibagam kadagiti Israelita, ‘Mangilasin iti para ken Jehova ti asinoman a mangipaay ken Jehova iti datonna a pakikappia.+ 30 Alaenna ti taba+ agraman ti barukong kas daton a mapuoran para ken Jehova ket idatagna kas daton a mailili+ iti sanguanan ni Jehova. 31 Puoran ti padi ti taba iti altar,+ ngem kukuanto ni Aaron ken dagiti annakna ti barukong.+

32 “‘Itedyo ti kannawan a luppo ti datonyo a pakikappia kas sagrado a bingay ti padi.+ 33 Ti anak ni Aaron, a mangidatag iti dara ti daton a pakikappia ken iti taba, ti makinkukuanto iti kannawan a luppo.+ 34 Ta alaek ti barukong ti daton a mailili ken ti luppo ti sagrado a bingay manipud iti daton a pakikappia dagiti Israelita, ket itedkonto dagita ken Aaron a padi ken kadagiti annakna. Daytoy ti regulasion a suroten dagiti Israelita iti agnanayon.+

35 “‘Daytoy ti bingay a maala kadagiti daton a mapuoran para ken Jehova a mailasin para ken Aaron ken iti annakna iti aldaw a pannakapilida nga agserbi kas papadi ni Jehova.+ 36 Imbilin ni Jehova a maited dagita kas bingayda manipud kadagiti Israelita, iti aldaw a pannakadutokda.+ Daytoy a paglintegan ti masurot iti agnanayon.’”

37 Daytoy ti linteg maipapan iti daton a mapuoran,+ daton a bukbukel,+ daton gapu iti basol,+ daton gapu iti biddut,+ daton iti pannakadutok dagiti papadi,+ ken daton a pakikappia,+ 38 kas imbilin ni Jehova ken ni Moises idiay Bantay Sinai+ iti aldaw a panangbilinna kadagiti Israelita nga agdatonda ken Jehova idiay let-ang ti Sinai.+