Ezekiel

40 Iti rugi ti maika-25 a tawen ti pannakaipanmi iti sabali a daga,+ iti maika-10 nga aldaw ti bulan, iti maika-14 a tawen kalpasan a nadadael ti siudad,+ nagtignay kaniak ti pannakabalin* ni Jehova iti dayta met laeng nga aldaw, ket impannak iti siudad.+ 2 Babaen ti sirmata manipud iti Dios, impannak idiay Israel ket indissonak iti nakangatngato a bantay,+ nga addaan iti patakder a kasla iti maysa a siudad iti abagatan.

3 Idi impannak sadiay, nakakitaak iti lalaki a kasla gambang ti langana.+ Nakaiggem iti tali a lino ken pagrukod a runo,*+ ket agtaktakder iti ruangan. 4 Kinuna kaniak ti lalaki: “Anak ti tao, kumitaka ken dumngegka a naimbag, ket siputam* ti amin nga ipakitak kenka, ta dayta ti makagapu a naipanka ditoy. Ibagam iti sangakabbalayan ti Israel ti amin a makitam.”+

5 Adda nakitak a pader a naipalawlaw iti ruar ti templo.* Ig-iggaman ti lalaki ti pagrukod a runo nga innem a kasiko ti kaatiddogna (adda nainayon a sangadakulap iti tunggal kasiko).* Rinugianna a rukoden ti pader, ket maysa a runo ti kapuskolna ken maysa a runo ti kangatona.

6 Napan iti ruangan a sumango iti daya+ sa immuli kadagiti tukad ti agdan. Idi rinukodna ti pagserkan ti ruangan, maysa a runo ti kaakabana, ket maysa a runo met ti kaakaba ti sabali a pagserkan. 7 Maysa a runo ti kaatiddog ken kaakaba ti tunggal pagpuestuan ti guardia, ket lima a kasiko ti nagbaetan dagiti pagpuestuan ti guardia.+ Maysa a runo ti rukod ti pagserkan ti ruangan iti abay ti beranda ti ruangan a sumango iti uneg.

8 Rinukodna ti beranda ti ruangan nga agpauneg, ket maysa a runo dayta. 9 Simmaruno a rinukodna ti beranda ti ruangan, walo a kasiko. Rinukodna dagiti adigi iti sikiganna, dua a kasiko. Adda ti beranda ti ruangan iti sikigan a sumango iti templo.

10 Adda tallo a pagpuestuan ti guardia iti agsumbangir a sikigan ti makindaya a ruangan. Agpapada ti rukod dagita a pagpuestuan, kasta met dagiti adigi iti agsumbangir a sikigan.

11 Simmaruno a rinukodna ti kaakaba ti pagserkan ti ruangan, 10 a kasiko; ket 13 a kasiko ti kaatiddog ti pagserkan.

12 Maysa a kasiko ti rukod ti partision iti sango dagiti pagpuestuan ti guardia iti agsumbangir a sikigan. Innem a kasiko ti rukod ti tunggal pagpuestuan ti guardia iti agsumbangir a sikigan.

13 Rinukodna ti ruangan manipud iti atep ti maysa a pagpuestuan ti guardia* agingga iti atep ti sabali pay a pagpuestuan, ket 25 a kasiko ti kaakabana; agkakabatog dagiti pagserkan.+ 14 Simmaruno a rinukodna dagiti adigi iti sikigan, ket 60 a kasiko ti kangatoda, kasta met dagiti adigi iti sikigan kadagiti ruangan iti intero nga aglawlaw ti paraangan. 15 Ti rukod manipud iti sango ti pagserkan ti ruangan agingga iti sango ti beranda iti makin-uneg a sikigan ti ruangan ket 50 a kasiko.

16 Adda dagiti tawa nga umak-akikid dagiti hambana+ para kadagiti pagpuestuan ti guardia ken kadagiti adigida iti sikigan iti uneg ti ruangan iti agsumbangir a sikigan. Adda agsumbangir a tawa iti uneg dagiti beranda, ket adda ladawan dagiti kayo a palma+ kadagiti adigi iti sikigan.

17 Impannak iti makinruar a paraangan, ket nakakitaak kadagiti siled a panganan*+ ken iti pagnaan iti aglawlaw ti paraangan. Adda 30 a siled a panganan iti pagnaan. 18 Ti pagnaan iti sikigan dagiti ruangan ket kapada ti kaatiddog dagiti ruangan—daytoy ti makimbaba a pagnaan.

19 Kalpasanna, rinukodna ti distansia* manipud sango ti makimbaba a ruangan agingga iti sango ti makin-uneg a paraangan, ket 100 a kasiko iti daya ken iti amianan.

20 Addaan ti makinruar a paraangan iti ruangan a sumango iti amianan, ket rinukodna ti kaatiddog ken kaakabana. 21 Adda tallo a pagpuestuan ti guardia iti agsumbangir a sikigan. Ti rukod dagiti adigi iti sikigan ken ti berandana ket kapada dagiti rukod iti umuna a ruangan. Ti ruangan ket 50 a kasiko ti kaatiddogna ken 25 a kasiko ti kaakabana. 22 Ti rukod dagiti tawa, beranda, ken dagiti ladawan ti kayo a palma+ ket kapada ti rukod dagidiay adda iti ruangan iti daya. Madanon dayta ti tattao babaen ti iyuulida iti agdan a pito ti tukadna, ket adda berandana iti sango.

23 Adda ruangan ti makin-uneg a paraangan a kabatog ti ruangan iti amianan ken adda met ruangan a kabatog ti ruangan iti daya. Rinukodna ti distansia manipud iti ruangan agingga iti sabali a ruangan, ket 100 a kasiko.

24 Kalpasanna, impannak iti abagatan, ket nakakitaak iti ruangan iti makin-abagatan a sikigan.+ Rinukodna dagiti adigi iti sikigan ken ti beranda. Ti rukod dagita ket kapada dagiti adda iti dadduma pay a ruangan. 25 Adda dagiti tawa iti agsumbangir a sikigan ken iti berandana, kas iti dadduma pay a tawa. Ti ruangan ket 50 a kasiko ti kaatiddogna ken 25 a kasiko ti kaakabana. 26 Adda pito a tukad nga umuli iti dayta,+ ket adda beranda iti sangona. Adda ladawan dagiti kayo a palma kadagiti adigina iti sikigan, maysa iti tunggal sikigan.

27 Addaan ti makin-uneg a paraangan iti ruangan iti abagatan. Rinukodna ti distansia manipud iti ruangan agingga iti ruangan iti abagatan, ket 100 a kasiko. 28 Kalpasanna, impannak iti makin-uneg a paraangan a lumasat iti ruangan iti abagatan. Idi rinukodna ti ruangan iti abagatan, kapada dayta ti rukod ti dadduma pay a ruangan. 29 Ti rukod dagiti pagpuestuan ti guardia, dagiti adigi iti sikigan, ken dagiti beranda ket kapada ti rukod ti dadduma. Adda dagiti tawa iti agsumbangir a sikigan ken iti beranda. Ti ruangan ket 50 a kasiko ti kaatiddogna ken 25 a kasiko ti kaakabana.+ 30 Adda dagiti beranda iti intero nga aglawlaw; 25 a kasiko ti kaatiddogda ken 5 a kasiko ti kaakabada. 31 Sumango ti berandana iti makinruar a paraangan, ket adda ladawan dagiti kayo a palma kadagiti adigi iti sikiganna.+ Walo a tukad ti agdan nga umuli iti dayta.+

32 Idi impannak iti makin-uneg a paraangan manipud iti daya, rinukodna ti ruangan, ket kapadana ti rukod ti dadduma pay a ruangan. 33 Ti rukod dagiti pagpuestuan ti guardia, dagiti adigi iti sikigan, ken dagiti beranda ket kapada ti rukod ti dadduma. Adda dagiti tawa iti agsumbangir a sikigan ken iti beranda. Ti ruangan ket 50 a kasiko ti kaatiddogna ken 25 a kasiko ti kaakabana. 34 Sumango ti berandana iti makinruar a paraangan, ket adda ladawan dagiti kayo a palma iti agsumbangir nga adigi iti sikigan. Walo a tukad ti agdan nga umuli iti dayta.

35 Kalpasanna, impannak iti ruangan iti amianan+ ket rinukodna dayta; kapadana ti rukod ti dadduma pay a ruangan. 36 Ti rukod dagiti pagpuestuan ti guardia, dagiti adigi iti sikigan, ken dagiti beranda ket kapada ti rukod ti dadduma. Adda dagiti tawa iti tunggal sikigan. Ti ruangan ket 50 a kasiko ti kaatiddogna ken 25 a kasiko ti kaakabana. 37 Sumango dagiti adigi iti sikigan iti makinruar a paraangan, ket adda ladawan dagiti kayo a palma iti agsumbangir nga adigi iti sikigan. Walo a tukad ti agdan nga umuli iti dayta.

38 Ti pagserkan ti maysa a siled a panganan ket asideg dagiti adigi iti sikigan dagiti ruangan, a sadiay a mabugguan dagiti sibubukel a daton a mapuoran.+

39 Adda dua a lamisaan iti agsumbangir a sikigan ti beranda ti ruangan, a pakapartian dagiti sibubukel a daton a mapuoran,+ daton gapu iti basol,+ ken daton gapu iti biddut.+ 40 Iti dalan nga agturong iti ruangan iti amianan, adda dua a lamisaan iti ruar ti pagserkan. Adda pay dua a lamisaan iti sabali a bangir ti beranda ti ruangan. 41 Adda uppat a lamisaan iti agsumbangir a sikigan ti ruangan—walo a lamisaan amin—a pakapartian dagiti daton. 42 Naaramid iti natikap a batbato ti uppat a lamisaan para iti sibubukel a daton. Maysa ket kagudua a kasiko ti kaatiddog, maysa ket kagudua a kasiko ti kaakaba, ken maysa a kasiko ti kangato dagita. Maidulin kadagita dagiti alikamen a pagparti kadagiti daton a mapuoran ken iti dadduma pay a daton. 43 Sangadakulap ti kaakaba dagiti pagiparabawan a naikapet iti aglawlaw ti makin-uneg a diding; ket maiparabaw kadagiti lamisaan ti karne dagiti daton a sagut.

44 Iti ruar ti makin-uneg a ruangan, adda dagiti siled a panganan dagiti kumakanta;+ addada iti makin-uneg a paraangan iti asideg ti ruangan iti amianan, a sumango iti abagatan. Adda pay siled a panganan iti asideg ti ruangan iti daya, a sumango iti amianan.

45 Kinunana kaniak: “Daytoy a siled a panganan a sumango iti abagatan ket para kadagiti papadi a mangas-asikaso iti panagserbi iti templo.+ 46 Ti siled a panganan a sumango iti amianan ket para kadagiti papadi a mangas-asikaso iti panagserbi iti altar.+ Annak ida ni Zadok,+ dagiti Levita a nadutokan nga umasideg ken Jehova tapno agserbi kenkuana.”+

47 Kalpasanna, rinukodna ti makin-uneg a paraangan, ket 100 a kasiko ti kaatiddogna ken 100 a kasiko ti kaakabana, kuadrado. Adda ti altar iti sanguanan ti templo.

48 Impannak iti beranda ti templo,+ ket rinukodna ti adigi iti sikigan ti beranda, lima a kasiko ti agsumbangir a sikiganna. Ti kaakaba ti ruangan ket tallo a kasiko iti agsumbangir a sikigan.

49 Ti kaatiddog ti beranda ket 20 a kasiko, ken 11* a kasiko ti kaakabana. Madanon dayta ti tattao babaen ti iyuulida kadagiti tukad ti agdan. Adda dagiti adigi iti abay dagiti poste iti sikigan, maysa iti tunggal sikigan.+