Ezekiel

44 Insublinak iti makinruar a ruangan ti santuario a sumango iti daya,+ ngem nakarikep dayta.+ 2 Kinuna kaniak ni Jehova: “Agtalinaed a nakarikep daytoy a ruangan. Saan a maluktan, ken awan ti tao a sumrek iti dayta; ta simrek iti dayta ni Jehova, ti Dios ti Israel,+ isu nga agtalinaed a nakarikep. 3 Ngem agtugawto dita ti panguluen tapno mangan iti tinapay iti sanguanan ni Jehova,+ ta isu ket panguluen. Sumrek ken rummuarto iti dayta, a magna iti beranda ti ruangan.”+

4 Kalpasanna, impannak iti sanguanan ti templo a lumasat iti ruangan iti amianan. Idi kimmitaak, nakitak a napno ti templo ni Jehova iti dayag ni Jehova.+ Isu a nagrukobak iti daga.+ 5 Kinuna kaniak ni Jehova: “Anak ti tao, siputam,* buyaem, ken denggem a naimbag ti amin nga ibagak kenka maipapan kadagiti paglintegan ken linteg maipapan iti templo ni Jehova. Siputam a naimbag ti pagserkan ti templo ken ti amin a pagruaran ti santuario.+ 6 Masapul nga ibagam iti rebelioso a sangakabbalayan ti Israel, ‘Daytoy ti kinuna ti Kangatuan* nga Apo Jehova: “Nakaron ti dakes nga aramidyo, O sangakabbalayan ti Israel. 7 No iserrekyo iti santuariok dagiti ganggannaet a dakes ti pusoda ken saanda a nakugit, rugitanda ti templok. Agidatdatonkayo kaniak iti tinapay, taba ken dara, ngem suksukirenyo met ti tulagko gapu iti amin a dakes nga aramidyo. 8 Saanyo nga inasikaso dagiti nasantuan a banagko.+ Imbes ketdi, nangdutokkayo kadagiti sabali a mangaramid kadagiti trabaho iti santuariok.”’

9 “‘Daytoy ti kinuna ti Kangatuan nga Apo Jehova: “Saan a mabalin a sumrek iti santuariok ti ganggannaet a dakes ti pusona ken saan a nakugit nga agnanaed iti Israel.”’

10 “‘Ngem dagiti Levita nga immadayo kaniak+ idi inadaywannak ti Israel tapno agserbida kadagiti makarimon nga idoloda* ti aglak-amto iti resulta ti basolda. 11 Agserbidanto iti santuariok tapno aywananda dagiti ruangan ti templo+ ken agserbida iti templo. Partiendanto ti sibubukel a daton a mapuoran ken ti daton para kadagiti umili, ken agtakderdanto iti sanguanan dagiti umili tapno agserbida kadakuada. 12 Gapu ta nagserbida kadakuada iti sanguanan dagiti makarimon nga idoloda ken nagbalinda a pakaitibkolan a namagbasol iti sangakabbalayan ti Israel,+ inngatok ti imak tapno agsapataak maibusor kadakuada,’ kuna ti Kangatuan nga Apo Jehova, ‘ket lak-amendanto ti resulta ti basolda. 13 Didanto umasideg kaniak tapno agserbi kas padik wenno umasideg iti aniaman a nasantuan wenno kasasantuan a banagko, ket maibabaindanto gapu kadagiti dakes nga inaramidda. 14 Ngem pagbalinekto ida a paraasikaso kadagiti responsabilidad iti templo, tapno asikasuenda ti panagserbi ken amin a banag a rumbeng a maaramid sadiay.’+

15 “‘No maipapan kadagiti papadi a Levita, dagiti annak ni Zadok,+ a nangasikaso kadagiti responsabilidad iti santuariok idi immadayo kaniak dagiti Israelita,+ umasidegdanto tapno agserbida kaniak, ken agtakderdanto iti sanguanak tapno idatonda ti taba+ ken dara,’+ kuna ti Kangatuan nga Apo Jehova. 16 ‘Isudanto ti sumrek iti santuariok ken umasideg iti lamisaanko tapno agserbida kaniak,+ ket asikasuendanto dagiti responsabilidadda kaniak.+

17 “‘No sumrekda kadagiti ruangan iti makin-uneg a paraangan, masapul nga agbadoda iti lienso.+ Masapul a saanda nga agbado iti delana no agserbida kadagiti ruangan iti makin-uneg a paraangan wenno iti uneg dayta. 18 Masapul nga agusarda iti lienso a turbante ken agsapinda iti lienso.+ Masapul a saanda nga agusar iti aniaman a makapaling-et. 19 Sakbay a mapanda iti makinruar a paraangan—ti makinruar a paraangan nga ayan ti tattao—masapul nga ikkatenda dagiti bado nga inusarda a nagserbi+ ket ikabilda dagita kadagiti nasantuan a siled a panganan.*+ Kalpasanna, agbadoda iti sabali tapno saanda a mayakar ti kinanasantuan iti* tattao babaen ti badoda. 20 Saanda a kiskisan ti uloda+ wenno paatiddogen ti buokda. Masapul a pukisanda ti buok ti uloda. 21 Masapul a saan nga uminum iti arak dagiti papadi no sumrekda iti makin-uneg a paraangan.+ 22 Saanda a mangasawa iti balo wenno naidiborsio a babai;+ ngem mabalinda ti mangasawa iti birhen nga anak ti Israel wenno iti balo nga asawa idi ti padi.’+

23 “‘Masapul nga isuroda iti ilik ti nagdumaan ti nasantuan ken di nasantuan; ken isuroda ti nagdumaan ti narugit ken nadalus.+ 24 Agserbida kas ukom iti maysa a kaso;+ masapul a mangukomda maitunos kadagiti pangngeddengko.+ Masapul a tungpalenda dagiti linteg ken paglintegak mainaig iti amin a piestak+ ken ibilangda a nasantuan dagiti sabbathko. 25 Saanda nga umasideg iti aniaman a bangkay ti tao, tapno saanda nga agbalin a narugit. Ngem mabalinda a rugitan ti bagida iti bangkay ti ama, ina, anak a lalaki wenno babai, kabsat a lalaki, wenno kabsatda a babai a di naasawaan.+ 26 Kalpasan a madalusan ti maysa a padi, mangpalabasda iti pito nga aldaw sakbay a makapagserbi manen. 27 Iti aldaw a sumrek iti nasantuan a disso, iti makin-uneg a paraangan, tapno agserbi iti nasantuan a disso, rumbeng nga idatagna ti datonna gapu iti basol,’+ kuna ti Kangatuan nga Apo Jehova.

28 “‘Daytoyto ti tawidda: Siak ti tawidda.+ Saanyo nga ikkan ida iti aniaman a sanikua iti Israel, ta siak ti sanikuada. 29 Isudanto ti mangan iti daton a bukbukel,+ daton gapu iti basol, ken daton gapu iti biddut.+ Kukuadanto ti amin a sagrado a banag a maited iti Israel.+ 30 Kukuanto dagiti papadi ti kasayaatan iti amin nga umuna a naluom a bungbunga ken ti tunggal kita ti kontribusionyo.+ Masapul nga itedyo iti padi ti nakersang nga arina manipud iti umuna nga apityo.+ Daytoyto ti mangyeg iti bendision iti sangakabbalayanyo.+ 31 Masapul a saan a kanen dagiti papadi ti aniaman a billit wenno animal a nasarakan a natay wenno narangrangkay.’+