Jeremias

41 Iti maikapito a bulan, ni Ismael+ nga anak ni Netanias nga anak ni Elisama, a kaputotan ti ari* ken maysa kadagiti kangrunaan a soldado ti ari, ket napan ken Gedalias nga anak ni Ahikam idiay Mizpa.+ Kaduana ti 10 a lallaki. Bayat nga agkakaduada a mangmangan idiay Mizpa, 2 timmakder ni Ismael nga anak ni Netanias ken ti 10 a lallaki a kaduana ket pinatayda ni Gedalias nga anak ni Ahikam nga anak ni Safan. Pinatayna iti espada daydiay dinutokan ti ari ti Babilonia a mangituray iti daga. 3 Pinatay met ni Ismael ti amin a Judio a kadua ni Gedalias idiay Mizpa, ken uray dagiti Caldeo a soldado nga adda sadiay.

4 Iti maikadua nga aldaw kalpasan a napapatay ni Gedalias, ken awan pay ti makaammo iti dayta, 5 immay ti 80 a lallaki a naggapu idiay Sikem,+ Shilo,+ ken Samaria.+ Nakiskisan ti barbasda, napisang dagiti badoda, sinugatsugatda ti bagida,+ ken nagitugotda iti bukbukel ken olibano+ nga idatonda iti balay ni Jehova. 6 Isu a pimmanaw ni Ismael nga anak ni Netanias idiay Mizpa tapno sabtenna ida ket agsangsangit a magmagna. Imbagana idi nagsasabatda: “Umayyo kitaen ni Gedalias nga anak ni Ahikam.” 7 Ngem idi nakadanonda iti siudad, pinatay ida ni Ismael nga anak ni Netanias ken dagiti tattaona, sa intapuakna ida iti pagurnongan iti danum.

8 Ngem imbaga ti 10 kadakuada ken Ismael: “Saannakami a patayen, ta adu a trigo, sebada, lana, ken diro ti inlemmengmi iti talon.” Isu a saanna ida a pinatay a karaman dagiti kakabsatda. 9 Intapuak ni Ismael iti dakkel a pagurnongan iti danum ti amin a bangkay dagiti pinatayna. Ni Ari Asa ti nangaramid iti dayta a pagurnongan gapu ken Baasa nga ari ti Israel.+ Pinunno dayta ni Ismael nga anak ni Netanias kadagiti pinatayna.

10 Impanaw ni Ismael ti amin a nabati a tattao idiay Mizpa,+ agraman dagiti annak a babbai ti ari ken amin nga umili a nabati idiay Mizpa, nga impaaywan ni Nabuzaradan a panguluen dagiti guardia ken ni Gedalias+ nga anak ni Ahikam. Impanaw ida ni Ismael nga anak ni Netanias ket napanda iti ayan dagiti Ammonita.+

11 Nadamag ni Johanan+ nga anak ni Karea ken ti amin a kaduana a pangulo ti armada ti amin a dakes nga inaramid ni Ismael nga anak ni Netanias, 12 isu nga inkuyogda ti amin a lallaki tapno kamatenda ni Ismael nga anak ni Netanias. Ket nasarakanda iti igid ti dakkel a dandanum* ti Gibeon.

13 Naragsakan ti amin a tattao nga impanaw ni Ismael idi nakitada ni Johanan nga anak ni Karea ken ti amin a pangulo ti armada a kaduana. 14 Amin a tattao nga impanaw ni Ismael idiay Mizpa+ ket napan kimmuyog ken Johanan nga anak ni Karea. 15 Ngem ni Ismael nga anak ni Netanias ken ti walo kadagiti tattaona nalibasanda ni Johanan sa napanda kadagiti Ammonita.

16 Inkuyog ni Johanan nga anak ni Karea ken ti amin a pangulo ti armada ti nabati a tattao a taga-Mizpa, dagidiay insalakanda ken Ismael nga anak ni Netanias kalpasan a pinatayna ni Gedalias+ nga anak ni Ahikam. Manipud idiay Gibeon, insublida dagiti lallaki, soldado, babbai, ubbing, ken dagiti opisial ti palasio. 17 Ket dimmagasda iti pagdagusan iti Kimham nga asideg ti Betlehem,+ ta panggepda ti mapan idiay Egipto+ 18 gapu ta mabutengda kadagiti Caldeo. Pinatay ngamin ni Ismael nga anak ni Netanias ni Gedalias nga anak ni Ahikam, a dinutokan ti ari ti Babilonia a mangituray iti daga.+