KIMHAM

[Natalipungaw [iti panangil-iliw]].

Maipagarup nga anak ni Barzillai. Idi nagkedkedan ti lakayen a ni Barzillai ti awis nga agbalin a maysa kadagiti opisial iti palasio ni Ari David ken inrekomendana a ni Kimham ti kumuyog a mangsandi kenkuana, insungbat ni David: “Makipagballasiwto [iti Jordan] kaniak ni Kimham, ket siak aramidekto kenkuana no ania ti naimbag kadagita matam; ket isuamin a piliem nga ipabaklay kaniak aramidekto maipaay kenka.” (2Sm 19:33, 37-40) Nabatad a nagtalinaed ni Kimham iti naarian a palasio, kas ipasimudaag dagiti maudi a pammilin ni David ken Solomon. (1Ar 2:7) Iti Jeremias 41:17, nadakamat ti “lugar a pagdagusan ni Kimham” iti asideg ti Betlehem. Saan nga ammo no tumukoy daytoy ken Kimham a nagbiag idi tiempo ni David wenno iti maysa a tao a kasta met laeng ti naganna ngem nagbiag iti naud-udi a tiempo. Kuna ti dadduma a komentarista a mabalin a naipaayan ni Kimham iti maysa a benneg ti daga gapu iti panagserbina ken David, wenno dayta ket lugar a nangibangonan ni Kimham iti maysa a pagdagusan dagiti managdaliasat.