Deuteronomio

28 “No dumngegkayo iti timek ni Jehova a Diosyo babaen ti panangsurotyo a naimbag iti amin a bilinna nga itedko ita kadakayo, sigurado a pagbalinennakayto ni Jehova a Diosyo a natantan-ok ngem iti amin a nasion iti daga.+ 2 Kamakamendakayto amin dagitoy a bendision,+ ta ipangpangagyo ti timek ni Jehova a Diosyo:

3 “Mabendisionankayto iti siudad, ken mabendisionankayto iti away.+

4 “Mabendisionanto dagiti annakyo*+ ken dagiti apityo ken dagiti annak dagiti tarakenyo, dagiti urbon a baka ken karneroyo.+

5 “Mabendisionanto ti basketyo+ ken ti malukong a pagmasaanyo.+

6 “Mabendisionankayto iti sadinoman a papananyo ken iti amin nga aramidenyo.

7 “Parmekento ni Jehova dagiti bumusor kadakayo.+ Aggapudanto iti maymaysa a direksion a dumarup kadakayo, ngem agtaraydanto nga aglibas iti pito a direksion.+ 8 Bendisionanto ni Jehova dagiti kamarinyo+ ken ti amin nga aramidenyo, ken sigurado a bendisionannakayo iti daga nga ited kadakayo ni Jehova a Diosyo. 9 Pagbalinennakayto ni Jehova a nasantuan nga ilina,+ kas inkarina kadakayo,+ gapu ta tungtungpalenyo dagiti bilin ni Jehova a Diosyo ken magmagnakayo iti dalanna. 10 Makitanto ti amin a tattao iti daga a naawagankayo iti nagan ni Jehova,+ ket agbutengdanto kadakayo.+

11 “Ikkannakayto ni Jehova iti nakaad-adu nga annak, taraken, ken apit iti daga+ nga inkari ni Jehova kadagidi ammayo nga itedna kadakayo.+ 12 Luktanto kadakayo ni Jehova ti napunno a kamarinna, ti langit, tapno pagtuduenna iti umiso a tiempo+ ken tapno bendisionanna ti amin nga aramidenyo. Pautanganyonto ti adu a nasion, ngem diyonto kasapulan ti umutang.+ 13 Pagbalinennakayto ni Jehova nga ulo, saan nga ipus; ken addakayto iti ngato,+ saan nga iti baba, no itultuloyyo ti agtulnog kadagiti bilin ni Jehova a Diosyo nga itedko kadakayo ita a tungpalen ken aramidenyo. 14 Diyo sukiren ti amin nga ibilinko kadakayo ita, ket dikay agturong iti kannawan wenno kannigid+ tapno sumurot ken agserbi kadagiti sabali a dios.+

15 “Ngem no diyo ipangag ti timek ni Jehova a Diosyo ket diyo aramiden ti amin a bilin ken lintegna nga itedko kadakayo ita, kamakamendakayto amin dagitoy a lunod:+

16 “Mailunodkayto iti siudad, ken mailunodkayto iti away.+

17 “Mailunodto ti basketyo+ ken ti malukong a pagmasaanyo.+

18 “Mailunodto dagiti annakyo*+ ken ti apit iti dagayo ken dagiti annak dagiti tarakenyo, dagiti urbon a baka ken karneroyo.+

19 “Mailunodkayto iti sadinoman a papananyo ken iti amin nga aramidenyo.

20 “Ipalak-amto ni Jehova ti lunod, riribuk, ken dusa iti amin nga aramidenyo ket ibusennakayto a dagus, gapu kadagiti dakes nga inaramidyo ken iti panangtallikudyo kenkuana.*+ 21 Ipalubosto ni Jehova a makaptankayo iti sakit agingga a mataykayo iti daga a tagikuaenyo.+ 22 Didigraennakayto ni Jehova iti sarut, nakaro a gurigor,+ panagebbal, ken makasinit a pudot, espada,+ tikag, ken buot.+ Lak-amenyonto amin dagitoy agingga a mataykayo. 23 Kaslanto gambang ti tangatangyo ken kaslanto landok ti dagayo.+ 24 Pagtuduento ni Jehova ti dagayo iti tapok agingga a mataykayo amin. 25 Ipalubosto ni Jehova nga abakendakayo dagiti kabusoryo.+ Darupenyonto ida iti maymaysa a direksion, ngem agtaraykayto nga aglibas iti pito a direksion; ket agbutengto ti amin a pagarian iti daga a makakita iti mapasamak kadakayo.+ 26 Kanento dagiti billit iti tangatang ken animal iti daga dagiti bangkayyo, ket awanto ti mangpapanaw kadagita.+

27 “Pagsakitennakayto ni Jehova iti nakaro a letteg a sinagaba dagiti Egipcio, almoranas, kurad, ken gudgod, ket dikayto umimbag. 28 Ipalubosto ni Jehova nga agmauyong ken mabulsekkayo,+ ket diyonto ammo ti turturongenyo.* 29 Agar-arikapkayto iti tengnga ti aldaw, kas iti bulsek nga agar-arikap iti kasipngetan,+ ket saanto nga agballigi ti aniaman nga aramidenyo. Kanayonto a magundawayan ken matakawankayo, ket awanto ti mangisalakan kadakayo.+ 30 Maitulagkayto a mangasawa iti babai, ngem ramesento ti sabali a lalaki. Mangbangonkayto iti balay, ngem dikayto agnaed iti dayta.+ Agmulakayto kadagiti ubas, ngem dikayto magunggonaan iti dayta.+ 31 Mapartinto ti kalakian a bakayo iti sanguananyo, ngem diyonto maramanan. Matakawto ti asnoyo iti mismo a sanguananyo, ngem saanto a maisubli kadakayo. Maitedto dagiti karneroyo kadagiti kabusoryo, ngem awanto ti mangisalakan kadakayo. 32 Makitayonto ti panangala ti sabali a tattao+ kadagiti annakyo a lallaki ken babbai. Kanayonto a kailiwyo ida ngem awan ti maaramidanyo. 33 Kanento dagiti tattao a saanyo nga am-ammo dagiti bunga ken apit iti dagayo ken dagiti taraonyo.+ Kanayonto a magundawayan ken maidadaneskayo. 34 Agmauyongkayto gapu kadagiti makitayo.

35 “Pagsakitennakayto ni Jehova iti naut-ot ken saan nga umimbag a letteg iti tumeng ken luppoyo, manipud dapan agingga iti uloyo. 36 Pagtalawennakayto ni Jehova ken ti ari nga insaadyo ken iyawatnakayo iti nasion a diyo am-ammo ken dagidi ammayo,+ ket agserbikayto sadiay kadagiti sabali a dios a naaramid iti kayo ken bato.+ 37 Pagbutngan, laisen, ken uyawendakayto* ti amin a tattao a pangipanan ni Jehova kadakayo.+

38 “Agmulakayto iti adu a bukel, ngem bassitto ti maapityo,+ ta ibusento dagiti dudon. 39 Mulaan ken aywananyonto dagiti kaubasanyo, ngem awanto ti apiten ken inumenyo nga arak,+ ta ibusento dagiti igges. 40 Addanto dagiti kayo nga olibo iti intero a teritoriayo, ngem awanto ti lana ti olibo a pagsapsapoyo, ta agregregto dagiti bungada. 41 Mangyanakkayto iti lallaki ken babbai ngem saandanto nga agtalinaed iti dennayo, ta maipanawdanto kas adipen.+ 42 Arakento dagiti insekto ti amin a kayo ken apityo. 43 Bumilegto a bumileg ti ganggannaet a residente iti tengngayo, idinto ta kumapuy a kumapuykayo. 44 Pautangannakayto, ngem diyonto mapautangan.+ Isunto ti ulo, ket dakayto ti ipus.+

45 “Sigurado a kamakamendakayto amin dagitoy a lunod+ agingga a maibuskayo,+ ta diyo impangag ti timek ni Jehova a Diosyo babaen ti diyo panangaramid kadagiti bilin ken lintegna nga imbilinna kadakayo.+ 46 Agtalinaedto dagitoy kadakayo ken iti kaputotanyo kas permanente a pagilasinan ken tanda,+ 47 gapu ta dikay nagserbi a siraragsak ken sirarag-o ken Jehova a Diosyo idi adda pay amin a kasapulanyo.+ 48 Ipalubosto ni Jehova a rautendakayo dagiti kabusoryo, ket agserbikayto kadakuada+ bayat a mabisbisinkayo,+ mawawkayo, nakapimpiman ti badoyo, ken agkurang ti kasapulanyo. Mangikabilto iti sangol a landok iti tengngedyo agingga a maibuskayo.

49 “Mangibaonto ni Jehova iti maysa a nasion iti adayo a mangraut kadakayo,+ manipud iti ungto ti daga, a mangsippayot kadakayo a kasla agila.+ Maysa a nasion a diyo maawatan ti lengguahena,+ 50 naranggas dagiti tattaona ken saanda a maasian kadagiti nataengan wenno ubbing.+ 51 Kanendanto ti urbon dagiti tarakenyo ken dagiti apit iti dagayo agingga a maibuskayo. Saandanto a mangibati iti aniaman a bukbukel, baro nga arak wenno lana, urbon a baka wenno karnero agingga a madadaeldakayo.+ 52 Palawlawandakayto, ket dikayto makaruar iti amin a siudadyo* agingga a marpuog ti nangato ken nalagda a pader a pagtaltalkanyo. Wen, sigurado a palawlawandakayto iti amin a siudadyo iti intero a daga nga inted kadakayo ni Jehova a Diosyo.+ 53 Kanenyonto dagiti bukodyo nga annak,* ti lasag dagiti annakyo a lallaki ken babbai+ nga inted ni Jehova a Diosyo, ta palawlawan ken parigatendakayto unay dagiti kabusoryo.

54 “Uray ti naalumamay ken naasi a lalaki kadakayo ket saanto a maasian iti kabsatna, ipatpategna nga asawa, wenno annakna a nabati. 55 Saannanto nga ikkan ida iti aniaman a lasag ti anakna, ta awanen ti makanna gapu ta pinalawlawan dagiti kabusoryo dagiti siudadyo ken parparigatendakayo unay.+ 56 Ken ti naalumamay ken naasi a babai kadakayo a dina pay kayat nga ipayat ti sakana iti daga+ ket saanto a maasian iti ipatpategna nga asawa, wenno iti anakna a lalaki wenno babai. 57 Sililimedto a kanenna ti kadkadua ken ti kappasngay nga anakna, ta pinalawlawan dagiti kabusoryo dagiti siudadyo ken parparigatendakayo unay.

58 “No diyo suroten a naimbag ti amin a sasao daytoy a Linteg a naisurat iti daytoy a libro+ ken no diyo kabuteng ti nadayag ken nakaskasdaaw a nagan+—ti nagan ni Jehova+ a Diosyo, 59 ipalak-amto ni Jehova kadakayo ken iti kaputotanyo dagiti nakaro ken saan nga agpatpatingga a didigra,+ ken dagiti naut-ot ken saan nga umimbag a sakit. 60 Ipalak-amnanto kadakayo ti amin a sakit a sinagaba dagiti Egipcio, a kabutengyo idi, ket dikayto umimbag. 61 Ipalubosto pay ni Jehova nga agsagabakayo kadagiti sakit wenno didigra a saan a naisurat iti daytoy a libro ti Linteg agingga a maibuskayo. 62 Uray no immadukayo a kas kadagiti bituen ti langit,+ manmanonto ti mabati kadakayo,+ gapu ta diyo impangag ti timek ni Jehova a Diosyo.

63 “No kasano a naayatan idi ni Jehova a mangbendision ken mangpaadu kadakayo, maayatanto met ni Jehova a mangdadael ken mangibus kadakayo, ket mapapanawkayto iti daga a tagikuaenyo.

64 “Iwarawaranakayto ni Jehova iti amin a nasion, manipud iti maysa nga ungto ti daga agingga iti sabali nga ungtona,+ ket agserbikayto sadiay kadagiti dios a naaramid iti kayo ken bato, a diyo am-ammo ken dagidi ammayo.+ 65 Saankayto a natalged kadagita a nasion+ ken awanto ti lugar a pagnaedanyo. Imbes ketdi, ipalubosto ni Jehova nga agdanag ti pusoyo,+ kumapuy ti matayo, ken maupaykayo.+ 66 Agpeggadto ti biagyo iti kasta unay, ket aldaw ken rabii a mabutbutengkayto. Diyonto masigurado no makalasatkayo. 67 Iti bigat, ibagayonto, ‘Rabii la koman!’ ket iti rabii, ibagayo, ‘Bigat la koman!’ gapu iti butengyo ken gapu kadagiti makitkitayo. 68 Isublinakayto ni Jehova idiay Egipto babaen ti barko, iti daga nga imbagak kadakayo a pulos a saanyonton a makita, ket ilakoyonto sadiay ti bagiyo kadagiti kabusoryo kas adipen a lallaki ken babbai, ngem awanto ti manggatang kadakayo.”