Maysa nga Apocalipsis ken Juan

10 Nakakitaak iti sabali pay a napigsa nga anghel a bumabbaba manipud langit. Nakawesan* iti ulep, adda bullalayaw iti ulona, kasla init ti rupana,+ ken kasla umap-apuy nga adigi dagiti gurongna.* 2 Adda ig-iggamanna a naukrad a bassit a lukot. Imbaddekna ti kannawan a sakana iti baybay, ngem ti kannigid a sakana iti daga, 3 ket nagpukkaw a kas iti panagungor ti leon.+ Idi nagpukkaw, nangngegko ti timek ti pito a gurruod.+

4 Agsuratak koman idi nagsao ti pito a gurruod, ngem adda timek a nangngegko manipud langit+ a nangibaga: “Selioam ti bambanag nga imbaga ti pito a gurruod, ket dimo isurat dagita.” 5 Ti anghel a nakitak nga agtaktakder iti baybay ken iti daga inngatona ti kannawan nga imana idiay langit, 6 ket insapatana iti Daydiay sibibiag iti agnanayon nga awan inggana,+ a nangparsua iti langit, daga, baybay, ken amin a linaonda:+ “Nalpasen ti panaguray. 7 Ngem inton dandanin puyoten ti maikapito nga anghel+ ti trumpetana,+ naibanagen ti sagrado a palimed+ nga impakaammo ti Dios kas naimbag a damag kadagiti adipenna a propeta.”+

8 Nangngegko a nagsao manen kaniak ti timek manipud langit+ ket imbagana: “Inka alaen ti naukrad a lukot nga ig-iggaman ti anghel nga agtaktakder iti baybay ken iti daga.”+ 9 Napanak iti anghel ket imbagak nga itedna kaniak ti bassit a lukot. Kinunana: “Alaem ket kanem.+ Pagsakitennanto* ti tianmo, ngem nasam-itto a kas diro iti ngiwatmo.” 10 Innalak ti bassit a lukot iti ima ti anghel ket kinnanko.+ Nasam-it dayta iti ngiwatko a kas iti diro,+ ngem idi nakankon, simmakit* ti tianko. 11 Naibaga kaniak: “Agipadtoka pay maipapan kadagiti ili ken nasion ken lengguahe ken adu nga ari.”