Eclesiastes
2 Kalpasanna, kinunak iti pusok: “Umayka, padasek ti agragsak ket kitaek no ania ti pagimbaganna.” Ngem awan met serserbi dayta.
2 Kinunak maipapan iti panagkatawa, “Kinamauyong!”
Ken iti panagragsak, “Ania ti usarna?”
3 Inkeddengko a kitaen no ania ti pagimbagan ti panaglemmes iti arak,+ bayat a pinagtalinaedko ti siribko; inabrasak pay ketdi ti kinamaag tapno maammuak ti kasayaatan nga aramiden dagiti tattao bayat ti ababa a biagda iti baba ti langit. 4 Adu ti naindaklan nga inaramidko:+ Nagibangonak kadagiti balayko;+ nagmulaak kadagiti kaubasak.+ 5 Nagaramidak kadagiti hardin ken parke, ken minulaak dagita iti amin a kita ti kayo nga agbunga. 6 Nagaramidak kadagiti pagurnongan iti danum, tapno mapadanuman dagiti babassit pay a kayo iti kabakirak. 7 Nangalaak iti adipen a lallaki ken babbai,+ ket naaddaanak kadagiti adipen a nayanak iti sangakabbalayak.* Nangalaak met iti adu a taraken—baka, karnero, ken kalding+—nga ad-adu ngem iti taraken ti asinoman nga immun-una kaniak idiay Jerusalem. 8 Nagurnongak iti pirak ken balitok,+ ti gameng dagiti* ari ken probinsia.+ Nangalaak iti lallaki ken babbai a kumakanta, kasta met iti aniaman a banag a mangparagsak iti lallaki nga annak ti tao—maysa a babai, wen, adu a babbai.* 9 Iti kasta, nagbalinak a natan-ok ket linab-awak ti asinoman nga immun-una kaniak idiay Jerusalem.+ Ket nagtalinaed ti siribko.
10 Pinennekko ti amin a tarigagayko.*+ Diak pinaidaman ti pusok iti aniaman a kita ti panagragsak, ta narag-o ti pusok gapu iti amin a napasnek a panagtrabahok, ket daytoy ti gunggonak* iti amin a napasnek a panagtrabahok.+ 11 Ngem idi pinanunotko ti amin nga inaramidko ken amin a napasnek a panagtrabaho a nagbannogak nga ileppas,+ nabigbigko nga awan serserbi amin dagita, maysa a panangkamat iti angin.+ Awan ti banag a talaga a napateg* iti baba ti init.+
12 Inusigko ngarud ti sirib, kinamauyong, ken kinamaag.+ (Ta ania ti maaramidan ti tao a sumaruno iti ari? Ti laeng naaramiden.) 13 Nabigbigko a nasaysayaat ti sirib ngem ti kinamaag,+ no kasano a nasaysayaat ti lawag ngem ti sipnget.
14 Ti masirib nalawag a makitana ti* bambanag,+ ngem ti maag magmagna iti sipnget.+ Nabigbigko met a maymaysa ti pagbanaganda* amin.+ 15 Kinunak iti pusok: “Mapasamakto met kaniak ti mapasamak iti maag.”+ Ania ngarud ti magunggonak iti panagbalinko a nakasirsirib? Iti kasta, kinunak iti pusok: “Awan met serserbi daytoy.” 16 Ta saan nga agnanayon a malaglagip ti masirib wenno ti maag.+ Kadagiti sumaganad nga aldaw, malipatanto ti amin a tao. Kasanonto a matay ti masirib? Kas met laeng iti maag.+
17 Gapuna, ginurak ti biag,+ ta maupayak iti amin a maar-aramid iti baba ti init, ta awan serserbi dagita,+ maysa a panangkamat iti angin.+ 18 Ginurak ti amin a bunga ti napasnek a panagtrabahok iti baba ti init,+ ta masapul nga ibatik dayta iti tao a sumaruno kaniak.+ 19 Asino ti makaammo no agbalinto a masirib wenno maag?+ Ngem isunto ti makaammo iti amin a ginun-odko iti baba ti init babaen ti pigsa ken siribko. Awan met serserbi daytoy. 20 Nangrugi a maupay ti pusok iti amin a napasnek a panagtrabahok iti baba ti init. 21 Ta mabalin a napasnek nga agtrabaho ti maysa a tao, nga usarenna ti sirib, pannakaammo, ken abilidadna, ngem iyawatnanto ti bingayna* iti tao a saan a nagtrabaho para iti dayta.+ Awan met serserbi daytoy ken dakkel a didigra.*
22 Ania ti magunggona ti tao iti amin a napasnek a panagtrabaho ken iti ambisionna a nakatignayanna* nga agtrabaho a sipipinget iti baba ti init?+ 23 Ta iti amin nga aldawna, ut-ot ken pannakaupay ti inyeg ti trabahona,+ ket saan nga aginana ti pusona uray iti rabii.+ Awan met serserbi daytoy.
24 Awanen ti nasaysayaat iti maysa a tao no di ti mangan, uminum, ken mangtagiragsak* iti bunga ti napasnek a panagtrabahona.+ Nabigbigko met a naggapu daytoy iti ima ti pudno a Dios,+ 25 ta asino ti nasaysayaat ti kanen ken inumenna ngem siak?+
26 Ikkan ti pudno a Dios ti tao a pakaragsakanna iti sirib ken pannakaammo ken panagragsak,+ ngem ikkanna ti managbasol iti trabaho a panagurnong ken panagkolekta laeng tapno itedna iti daydiay pakaragsakanna.+ Awan met serserbi daytoy, maysa a panangkamat iti angin.