Ezekiel

22 Kinuna manen kaniak ni Jehova: 2 “Anak ti tao, nakasaganaka kadin a mangukom* iti siudad a nakabasol iti dara+ ken mangipakaammo iti amin a dakes nga aramidna?+ 3 Ibagam, ‘Daytoy ti kinuna ti Kangatuan* nga Apo Jehova: “O siudad a nakabasol iti panagibukbok iti dara,+ nga um-umayen ti tiempona,+ a nagar-aramid kadagiti makarimon nga idolo* tapno rugitanna ti bagina,+ 4 nakabasolka gapu iti panagibukbokmo iti dara,+ ken narugitka gapu kadagiti makarimon nga idolom.+ Pinaababam dagiti aldawmo, ken dimtengen ti panagpatingga dagiti tawenmo. Isu a pagbalinenkanto a puntiria ti pananglais dagiti nasion ken pagkakatawaan ti amin a daga.+ 5 Pagkakatawaandakanto dagiti daga nga asideg ken adayo kenka,+ sika a narugit ti naganna ken napno iti riribuk. 6 Tunggal panguluen ti Israel nga adda iti tengngam us-usarenna ti autoridadna tapno agibukbok iti dara.+ 7 Saan a resrespetuen dagiti umilim ti ama ken inada.+ Sasaurenda ti ganggannaet a residente, ken malmaltratuenda ti awanan ama nga ubing* ken ti balo a babai.”’”+

8 “‘Lalaisem dagiti nasantuan a dissok, ket ibabainmo dagiti sabbathko.+ 9 Manangpadakes dagiti umilim a panggepda ti agibukbok iti dara.+ Kanenda dagiti naidaton iti kabambantayan ken naalas ti aramidda.+ 10 Saanda a rinespeto ti pagiddaan ti amada,*+ ken dennaanda ti babai a narugit gapu iti panagreglana.+ 11 Adda umilim a lalaki a dakes ti ar-aramidenna iti asawa ti kaarrubana.+ Adda pay mangrugrugit iti manugangna a babai babaen ti naalas nga aramid.+ Adda met makidendenna iti kabsatna a babai, nga anak ti mismo nga amana.+ 12 Awaten dagiti umilim ti pasuksok tapno agibukbokda iti dara.+ Agpapautangka nga addaan iti interes+ wenno tapno agganansiaka,* ken kuarkuartaam dagiti kaarrubam.+ Wen, naan-anay a linipatnak,’ kuna ti Kangatuan nga Apo Jehova.

13 “‘Nagpalakpakak gapu iti pungtotko iti naagum a pananggun-odmo iti kuarta ken iti panagibukbokmo iti dara iti tengngam. 14 Agtalinaedkanto kadi a natured* ken napigsanto latta ti imam kadagiti aldaw inton agtignayak maibusor kenka?+ Siak, ni Jehova, nagsaoak ket agtignayakto. 15 Iwarawarakanto iti tengnga dagiti nasion ken iti nadumaduma a daga,+ ket pagpatinggaekto ti kinarugitmo.+ 16 Maibabainkanto iti sanguanan dagiti nasion, ket maammuamto a siak ni Jehova.’”+

17 Kinuna manen kaniak ni Jehova: 18 “Anak ti tao, nagbalin kaniak ti sangakabbalayan ti Israel kas awan serserbina a rugit. Aminda ket gambang ken lata ken landok ken buli iti urno. Nagbalinda a rugit ti pirak.+

19 “Gapuna, daytoy ti kinuna ti Kangatuan nga Apo Jehova: ‘Gapu ta nagbalinkayo amin kas awan serserbina a rugit,+ ummongenkayo iti uneg ti Jerusalem. 20 No kasano a maummong ti pirak ken gambang ken landok ken buli ken lata iti urno tapno mapuyotan iti apuy ken marunaw dagita, ummongenkayto met gapu iti unget ken pungtotko, ket puyotan ken runawenkayto.+ 21 Pagkaykaysaenkayto ken puyotankayo iti apuy gapu iti pungtotko,+ ket marunawkayto iti unegna.+ 22 No kasano a marunaw ti pirak iti urno, marunawkayto met iti unegna; ket maammuanyonto a siak, ni Jehova, imbukbokko ti pungtotko kadakayo.’”

23 Kinuna manen kaniak ni Jehova: 24 “Anak ti tao, ibagam kenkuana, ‘Maysaka a daga a saanto a madalusan wenno matuduan iti aldaw ti pungtot. 25 Nagkukumplot dagiti propetam,+ kas iti ngumerngernger a leon a mangrangrangkay iti naanupna.+ Al-alun-onenda dagiti umili.* Ag-agawenda dagiti gameng ken napateg a bambanag. Pinaaduda dagiti balo a babbai iti tengngam. 26 Sinukir dagiti papadim ti lintegko,+ ken rugrugitanda dagiti nasantuan a dissok.+ Saanda a pinagduma ti nasantuan ken ti di nasantuan a banag,+ saanda nga impakaammo no ania ti narugit ken ti nadalus a banag,+ saanda a nginilin dagiti sabbathko, ket nalalaisak iti tengngada. 27 Dagiti prinsipena ket kaslada lobo a mangrangrangkay iti naanupda; nagibukbokda iti dara ken pinapatayda dagiti umili* tapno siaagum a gumun-odda iti kuarta.+ 28 Ngem inlemmeng dagiti propetam ti dakes nga aramidda a kasla pininturaanda iti puraw. Nakakitada iti ulbod a sirmata ken di umiso a panagbuyon,+ ket imbagada: “Daytoy ti kinuna ti Kangatuan nga Apo Jehova,” uray saan met a nagsao ni Jehova. 29 Nangsaur ken nagtakaw dagiti umili ti daga,+ minaltratoda dagiti agkasapulan ken napanglaw, ken sinaurda ti ganggannaet a residente ken impaidamda kenkuana ti hustisia.’

30 “‘Nagsapulak iti lalaki iti tengngada a mangtarimaan iti bato a pader wenno agtakder iti sanguanak iti giwang agpaay iti daga, tapno saan a madadael,+ ngem awan ti nasarakak. 31 Isu nga ibukbokkonto ti pungtotko ket ibusek ida iti apuy ti ungetko. Iparabawkonto iti uloda ti resulta ti aramidda,’ kuna ti Kangatuan nga Apo Jehova.”