YUBUYOBAN

Alikamen a mabalin a pabussogen ken eppesen; umuna a mapastrek ti angin babaen iti maysa a tubo sa maipug-aw a dumalan iti sabali pay a tubo. Sumrek ditoy ti angin manipud iti maysa a balbula sa adda met laeng tubo a pagruaran ti angin. Iti panangrubrob iti urno, nasaysayaat ti agaramat iti yubuyoban ngem iti panangpaypay laeng, wenno kadagiti puyoten a lungogan a runo ken anguyob nga ar-aramatenda met idi a pangrubrob. Simple ti pannakaaramid dagiti yubuyoban: Maysa a supot a naikapet iti maysa a baskag wenno batay ti naisilpo iti tubo nga agturong iti urno, ti tubo ket mabalin a naaramid iti landok wenno mabalin a maysa a runo a ti murdongna ket nakalupkopan iti pila a di mauram. Maar-aramat dagiti yubuyoban a de mano iti panagpanday iti babassit nga alikamen. Ngem maaramat dagiti doble a yubuyoban a payaten ti saka iti dadakkel nga urno a nakapudpudot, a dagitoy a yubuyoban ti agsinsinnublat a payaten ti dua a saka, ket kada maaramid dayta maguyod ti maysa a tali tapno makargaan iti angin ti umpes a yubuyoban. Tapno agtultuloy a mapuyotan dagitoy dadakkel nga urno, dua a lallaki ti mangkontrol iti dua a paris ti yubuyoban. Ti Hebreo a sao maipaay iti yubuyoban ket map·puʹach, a nagtaud iti ramut a sao a na·phachʹ, a kaipapananna ti ‘puyoten.’ (Ge 2:7) Daytoy nga alikamen ket naminsan laeng nga espesipiko a nadakamat iti Kasuratan (Jer 6:29), nupay nalabit naiparipirip iti Isaias 54:16 ken Ezequiel 22:20, 21. Nupay kasta, natukoy dayta kadagitoy a teksto iti piguratibo a pamay-an, a dagiti pangngarig ket naadaw kadagiti pamay-an a naaramat iti panangpasudi kadagiti metal.​—Kitaenyo ti PASUDIEN, MANANGPASUDI.