Agimtuod dagiti Agtutubo . . .

Apay Agbasa iti Biblia?

‘Maysa laeng a karpentero, ni Jesus iti Nasaret, ginunggonna ti lubong babaen iti mensahena!’ kuna ti propesor. Saan, saanna nga isursuro ti Biblia no di ket idildiligna dayta iti sursurat a maawagan Don Quixote. Ni Aaron (20 tawenna), nupay kasta, nagimdeng a naimbag. Ta daytoy a propesor, nupay saan a relihiuso, impatpategna ti Biblia kas pagbasaan​—kas kinunana, maysa a libro a ‘masapul a basaen ti tunggal edukado a lalaki ken babai.’

PUDNO kadi a ti Biblia masursuruanna ti maysa a tao? Ket ania ti makapakintayeg maipapan iti mensahe ti maysa a karpentero? Ni Aaron tarigagayanna a maammuan, gapuna inkeddengna ti mangbasa iti Biblia.

Ni George (12 tawenna) nabasana ti maysa a naadaw iti Biblia: “Laglagipem ti Naindaklan a Namarsuam iti al-aldaw ti kinaagtutubom.” (Eclesiastes 12:1) Gapuna inimtuodna ti bagina met laeng: ‘Kasano a laglagipek ti Namarsuak no umuna unay diak am-ammo?’ Isu, met, nangrugi a nakitana ti pannakasapul ti panangbasa iti Biblia.

Ni Kelvin (21 tawenna) ket maysa kadagiti Saksi ni Jehova ket kankanayon a mangaskasaba iti ruruangan. Tagtagiragsakenna ti panangibagbaga kadagiti sabsabali iti nasursurona maipapan iti Biblia. Nasarakanna, nupay kasta, a dadduma a tattao a nasabetna ti nakabasan iti paspaset iti Biblia. Ket agsipud ta ni Kelvin tarigagayanna ti maaddaan iti nasayaat a pannakisarita kadakuada, isagsaganana ti bagina met laeng babaen iti sipapasnek a panangadal iti Biblia. Kadagiti sasaona kunana, “Masapul a basaenyo ti Bibliayo tapno ammoyo no ania ti sarsaritaenna.”

Ni Aaron, George, ken Kelvin nagbalinda a napasnek nga estudiante iti Biblia. Ngem dakayo ngay? Saan kadi a masapul, a basaenyo met, ti Biblia? Kas dagiti adu nga agtutubo a tattao, mabalin a sumungbatkayo:

‘Saan Kadi a Makariro ti Biblia?’

Dadduma ti makarikna iti kasta. Ngem pudno, dida ammo no ania ti malablabsanda. Ti Biblia ket maysa a panangipalgak ti Dios iti tao. Ibagana kadatayo no kasano nga addatayo ditoy ken no sadino ti pagturongantayo. Kasano a makariro dayta?

Pudno, dadduma a paspaset ti kasla dagdagus a makatignay ngem dagiti dadduma. Ni David (19 tawenna) napaliiwna: “Kadagiti liblibro iti Numeros ken Deuteronomio, addada dadduma a paspasamak, ngem kaaduanna adda dagiti linlinteg ken dagiti rason no apay adda dagiti linlinteg. Saan a gapu ta dagitoy ket makariro, no di ket idiay Josue, ti sumaganad a libro, addada adu a paspasamak; maawiskayo a naimbag kadagiti eksena. Manipud Josue nga agtultuloy, pudno nga umaduda.” Bayat ti panangitultuloy ni David iti panagbasana, nupay kasta, ti kapanunotanna maipapan iti makuna a saan unay a makatignay a paspaset iti Biblia ti agbalbaliw. Apay? Usigenyo ti bukodyo a kapadasan.

Napadasanyo kadin ti nangbuya iti maysa a sine a nakitayon idi ubingkayo pay? Iti dayta a tiempo, nalabit a saanyo a naawatan ti adu iti dayta, ket kas banagna, sumagmamano nga eksena ti kasla makaawis. Ngem itan ta natataengankayon, ad-addan a naawatanyo dayta. Ad-addan a napateg ti estoria, ket dagiti eksena ad-adda a makaawisda. Umarngi met iti dayta ti mapasamak bayat nga umad-adu ti pannakaawatyo iti kaaduan a malako iti lubong. (Hebreo 5:14) Tunggal basaenyo dayta, dagidiay a linlinteg ken rason a maipaay kadagidiay a linlinteg addaanda iti dakdakkel a pateg. Maaddaankayo iti panangapresiar kadagiti detalye.

Ngem apay a napateg unay dagiti detalye? Bueno, usigenyo ti maysa a manangipadamag iti progreso iti ay-ayam iti radio. Ti trabahona isu ti mamagbalin a pudpudno ti panagay-ayam iti bola kadagiti managdengngegna. Ket kasano ti panangaramidna iti dayta. Mangipaay kadagiti adu a detalye​—no kasano ti panangtiro ti bola, ti kaadayona, ti ay-ayam, dagiti iskor, estadistika, estoria maipapan kadagiti managay-ayam. Makariro kadi dayta? Siempre saan! Kasta met, ti Biblia nabaknang kadagiti detalye​—dagiti kapkaputotan, bilbilang, rukrukod, linlinteg. Anian ti panamagbalin dagitoy a detalye a sibibiag kadagiti salaysay!

Kasta met, dagitoy a linlinteg ipalgakda ti personalidad ti Dios. Idiay Exodo 22:21, 22 ken Levitico 19:32, kas pangarigan, ibilin ti Dios ti nainkalintegan a panangtrato kadagiti balo, dagiti ulila, ken dagiti lallakayen. Wen, tarigagayan ni Jehova a ti isuamin ti matrato a buyogen ti panagraem, aniaman ti seksoda wenno edadda. Saan kadi a dayta ti mamagbalin kadakayo nga agtarigagay a mangammo kenkuana iti nasaysayaat pay? Kastoy ti panagrikna ti agtutubo a babai a managan Georgie. Maipapan iti panagbasana iti Biblia, kunaenna: “Pagbalinennaka a nasingsinged ken Jehova.”

Dakayo, met, masarakanyo a ti Sao ti Dios “nabiag ken napigsa.” (Hebreo 4:12) Kasano a kasta?

Ti Biblia Nabiag!

“Ti panagbasa iti Biblia naiduma manipud iti panangpidut iti maysa a pagiwarnak wenno magasin,” kuna ni Marvin (19 tawenna). “Dagiti kapanunotanyo maiturongda iti basbasaenyo. Ti panunotyo saan a basta agpasiar bayat ti panangukagyo kadagiti pinanid. Ti panagbasa iti Biblia sapulenna ti panangipamaysa. Padpadasek nga iladawan ti nakapasamakanna ket ikabilko ti bagik sadiay no basaek ti maipapan iti panagbisngay ti Nalabaga a Baybay wenno ti pannakalukat dagiti langlangit ket agsarita ni Jehova.”

Maaramidyo kadi daytoy! No basaenyo ti salaysay ni Daniel iti rukib ti leon, ikabilyo ti bagiyo sadiay! Panunotenyo nga agmaymaysakayo ket awanankayo iti armas iti rukib dagiti mabisin a leon! (Daniel 6:16-23) Wenno ti ngay maipapan iti salaysay ni Reina Ester? Dagiti tattaona ngangnganidan agbalin a biktima iti sapasap a panangpapatay. Anian a nakagangganat a kasasaad! Tapno isalakan ida masapul a mangaramid iti agsasaruno a panagtignay a mangikabil iti biagna iti peggad ket sanguenna ti kabusor. Mariknayo kadi ti panagdanag?​—Ester 3:6–5:4; 2:10; 8:3-6.

Awanen ti sabali pay a maaramidanyo a mamagbalin iti Biblia nga ad-adda pay a makaparagsak ken makaawis iti panunot. Bayat ti panangbasayo, paliiwenyo no kasano a dagiti nadumaduma a paspaset iti Biblia agkakanaigda. Kas pangarigan, ania dagiti pagpadaan dagiti salaysay ni Daniel ken ni Ester? Agpada dagitoy a paneknekanda ti kinapudno iti Salmo 34:7: “Ti anghel ni Jehova alikubkubenna dagiti agbuteng kenkuana ket ispalenna ida.”

Ti sabali pay a tema a manginaig kadagiti dadduma a paset iti Biblia isu ti Pagarian ti Dios. Ti Daniel 2:44 kunaenna: “Ti Dios mamangonto ti maysa a pagarian.” Ngem anianto ti aramiden daytoy a pagarian? Manipud iti pangrugian agingga iti ngudo, ti Biblia ipakitana a ni Jehova usarennanto daytoy a Pagarian​—ti gobiernona​—a mangiyeg iti agnanayon a kappia. “Pagsardengenna dagiti gubgubat inggana iti ungto ti daga,” kuna ti Salmo 46:9. Ket babaen iti Pagarian, “punasennanto dagiti amin a lulua kadagiti matada, ket awanton ni patay, awanto metten ti sasaibbek wenno sangsangit wenno rigrigat.”​—Apocalipsis 21:4.

Dagiti isuamin a bambanag naisinggalutda iti maysa ken maysa. Ti gobierno ti Dios ipatinggananto ti sakit, panagsagaba, ken uray ni patay. Ti kinaawan ti kinahustisia napalabaston. Tunggal maysa matratonto a buyogen iti kinalinteg ken panagraem. Di ngarud pagduaduaan a kinuna ni Jesus iti kararag, “Umay koma ti pagariam”! (Mateo 6:10) Dayta a mensahe ti Pagarian ti nanggungon ti lubong idi ket gunggunggonenna dayta ita! Saan kadi ngarud a napateg ti panangusig iti daytoy a makaited-biag a mensahe? Maaramidyo dayta, babaen ti panangbasa iti Biblia!

‘Ngem Kasano a Maawisak a Mangbasa iti Dayta?’

No ages-eskuelakayo, mabalin a mariknayo nga ukopadokayo iti homeworkyo. Ngem pudno kadi a narigat unay ti panangaramidyo iti homeworkyo ken panangbasayo iti Biblia? Saan ken Richard (17 tawenna): “Kadagiti malem nga addaanak iti homework, asikasuek dayta ket turposek dayta. Iti balaymi awan ti panagbuya iti TV bayat ti lawas.” No kasta met ti aramidenyo, mabalin a masdaawkayo a makakita nga adu a tiempo ti nabati pay a maipaay iti panagbasayo iti Biblia. Ta, no agbasakayo iti 15 minutos laeng iti maysa nga aldaw, mabalin a malpasyo ti intero a Biblia iti agarup makatawen!

Matulongannakayo Dayta Itan!

Dumakdakkelkayo iti panawen a pudno a “napeggad.” (2 Timoteo 3:1) Nupay kasta, ti Biblia tultulonganna dagitoy nga agtutubo nga agballigi:

“No dadduma maupayak gapu iti kasasaad ti lubong. Mangsapulak kadagiti kasuratan kas iti Apocalipsis 21:4, ket mangipaay dayta kaniak iti banag nga inanamaek.”​—Prentice.

“Ti panagbasa iti Biblia ket makagunggona unay, nangnangruna no addaanak iti parikut. Masansan, adda karakter iti Biblia nga addaan iti kasta met laeng a parikut, ket dayta ti mangtulong kaniak a mangtaming iti dayta.”​—Myrtie.

“Makitak a masansanayak babaen ti panagbasa iti Biblia.”​—Theresa.

Dakayo, met, mabalin a makitayo ti bagiyo met laeng a masanay. Padasenyo ti pannakapnek iti panangrugi iti maysa a banag a napateg, agtalinaed iti dayta, ken turposen dayta. Ti ad-adda pay a makagunggona isu ti panangammoyo iti Naindaklan a Namarsua. (Eclesiastes 12:1) Kabayatanna, tarigagayanyonto ti mangusar iti Biblia a mangtulong kadagiti sabsabali. Pudno, ti panagbasa ti Biblia ket maysa kadagiti kapapatgan a proyekto a mabalin nga aramidenyo!

[Blurb iti panid 20]

“Ti panagbasa ti Biblia makagunggona unay, nangnangruna no addaanak iti parikut”

[Dagiti ladawan iti panid 19]

Padasenyo nga iladawan dagiti paspasamak