Panangmatmat iti Lubong
Dakes a Videos
Ti pannakaopera ti puso a ti pasiente ti matay iti atake ti puso, ti pannakapapatay dagiti rebolusionario babaen iti firing squads, ti maysa a balud a matmatay babaen iti silia elektrika, ken ti ranger iti parke a kagaten ti buaya agingga a matay ti sumagmamano laeng kadagiti aktual nga ipapatay a magun-odanen a buyaen a mabalin nga abangan a videotapes. Ti tallo-tomo a serie a napauluan iti Faces of Death ti nakaam-amak a mangipakita iti sine dagiti matmatay a tattao. Kasano ti panagtignay ti publiko iti daytoy a serie dagiti video? “Ditay maidulin iti estante,” kuna ti maysa a klerk iti tiendaan ti video idiay Virginia Beach, Virginia, ti nangipadamag iti The Virginian-Pilot and the Ledger-Star, maysa a pagiwarnak iti Virginia. “Apaman a dumteng, adda ti mangkita iti dayta.” Maysa a makapungtot a managbuya a di mangayat iti linaon ti pelikula ti nangaramid iti kampania a mangikkat kadagiti lokal a paglakuan iti video. Iti panagkomentona maipapan iti pelikula, kinunana: “Daytat’ nakarangranggas a pornograpiko.”
Nangina a Pannalaknib
Gapu ta ti gatad iti panagipuslit iti tagilako idiay Estados Unidos ket agarup $30 bilion iti makatawen, di nakaskasdaaw nga adda ti rumangrang-ay nga industria a mangpataud iti alikamen a mangbusor iti panagipuslit ti tagilako. Mairaman kadagitoy isu dagiti produkto ti EAS (Electronic Article Surveillance) a maawagan targets. Dagitoy ti mabalin a nagbukel a plastik a maikabit kadagiti bambanag a kas dagiti kawes, maysa a magnetiko a linabag a kas “nagpino a buok ti tao,” wenno “maysa nga elektroniko a circuit a naibangon kadagiti maibelbelleng nga etikita ti presio.” Dagiti “targets” ti mabalin a maikkat wenno mapagbalin dagiti empleado nga awan kurrina no bayadanyon dagiti ginatangyo. Dagiti suki iti titiendaan a mangusar kadagitoy nga alikamen ti masapul a rummuar wenno lumasat iti maysa nga unit a mangipaay iti pagilasinan no ti “target” ti di umiso ti panagandarna. Ti panagilako kadagitoy nga alikamen ti nakagtengen iti $150 milion.
Baro nga Agas ti Panateng?
Apay a makuna a dagiti taga Norway a managpukan iti kayo mammano nga agpanatengda? Sigun ken Dr. Olav Braenden, ti sungbat ket isu ti malang-abda nga asuk ti kayo, kuna ti The Times iti Londres. Ti virus iti panateng kasapulanna ti nagsayaatan a suplay iti oksihena tapno umadu. Nupay kasta, daytat’ malapdan met babaen iti bitamina B ken C ken kasta met, mapapati, a ti polyphenols. Dagitoy a sustansia, a masarakan kadagiti asuk iti kayo, ti manglapped iti suplay iti oksihena iti mucous membrane iti agong. Naipadamag a dagiti agas a maipatedted iti agong a naglaon kadagitoy a sustansia ti nasuboken kadagiti 300 a taga Norway a kamkameng iti air force a makuna nga addaan iti balligi a panangagas iti panateng a 82 porsiento. “Ti napateg a banag isu ti panagtomar iti agas iti damo pay laeng a pagilasinan iti panateng,” impaganetget ti direktor ti panagsirarak a ni Dr. Anton Rodahl, “sakbay a ti virus nadangrannan ti mucous epithelium [ap-ap] ti agong.” Ti panangilako iti agas nangrugi idiay Norway ita a tawen.
Maiyallatiw a Panagdayaw
Dagiti eskuela a Hapones, gaput’ gagarda a makastrek kadagiti nasasayaat a pagadalan, usarenda ti teknolohia nga umadani kadagiti didiosda. Kasano? Sigun iti Asahi Shimbun, maysa a pagiwarnak iti Tokyo, ti eskuela iserrekna ti naganna, direksion, tawen ti panageskuela, ken ti nagan ti eskuelaan nga inanamaenna a pakastrekan iti mangiyallatiw nga unit a naikabit iti maysa a telepono. Daytoy nga impormasion ti maipan iti templo ti Shinto a sadiay ti maysa a padi ti mangbasa iti dayta ket mangaramid iti panagdawdawat a mabayadan iti 3,000 yen ($20, E.U.). Kunaen dagiti autoridad iti templo, “Ti panagdayaw a mismo iti sanguanan ti altar ti talaga a kaykayatda.” Nupay kasta, ti maysa a padi iti Dazaifu Tenmangu idiay Kyushu, ti kalalatakan a templo iti Japan a naidedikar iti edukasion, inlawlawagna a dagiti nasirib a tattao nga agnanaed iti asideg ti templo ti mangsingsingir iti agingga iti 20,000 yen ($140, E.U.) iti panangibagi kadagiti managdayaw. Dagiti papadi madida nga awaten ti panangaramid dagiti tattao a saan a mainaig iti templo iti panagdayaw a maysa a negosio. Inkeddengda: “Ti mangiyallatiw nga unit idanonna met ti rikna ti puso. Ti epektona isu met laeng,” ket intukonda ti serbisio iti nalaklaka a bayad.
Dagiti Kards iti Pannakalasat
Ti panangsapul kadagiti biktima iti panagreggaay ti nabayagen a pakaseknan nga agpadpada dagiti skeirs ken dagiti managuli iti bantay. Nupay no adda dagiti nadumaduma a kita iti transmitter-receivers, sumagmamano laeng a tattao ti mangusar kadakuada gapu iti nginada ken ti dagsenda ken ti kadakkel dagiti dadduma a paandaren ti bateria a modelo. Nupay kasta, ti maysa a grupo dagiti managsirarak a Pranses ti agtartrabaho iti maysa a kabbaro a kapanunotan—dagiti kards iti pannakalasat. Babaen ti pannakaawitda iti barukong ken iti likudan ti skier wenno managuli ti bantay, dagitoy ti aggatad laeng iti sumagmamano a doliar, di makasapul iti bateria, ken kasla laeng iti kadakkel ti maysa a kredit kard. Kasano ti panagandarda? Ti inaldaw a pagiwarnak a Le Figaro ipadamagna a dagitoy ti agtignay a kasla sarming, a mangiwaragawag iti paset iti signal ti radio nga agsubli iti grupo a manangisalakan nga addaan kadagiti nabibileg a transmitter. Kadagiti panangsubok a naaramid nga addaan kadagiti prototypes, dagiti managsirarak nagballigidan a mangilasin kadagiti tattao a nailumlum agingga iti 30 pie (9 m) iti niebe.
Panagtakaw Manipud iti Gobierno
Ti nabiit pay a panangaudit kadagiti gameng ti gobierno iti Canada ipakitana iti manipud $3 milion agingga iti $4 a milion a mapukpukaw a sanikua iti gobierno iti tinawen. Nupay no dagiti bambanag ti opisial a nadeskribir a kas mapukpukaw, inaminda a “nalabit [dagitoy] ti natakaw.” Impadamag ti The Toronto Star a kadagiti bambanag a mapukpukaw isu dagiti arak, color TV sets, makinilia, desk lamps, dictaphones, 35-mm cameras, overhead projectors, calculators, maysa nga outboard motor, ken maysa a freezer. Ti sabali pay a porma iti panagtakaw manipud iti gobierno ipakitana ti ngangngani $60 milion nga innala dagiti tattao a mangpadpadas a mangituang iti sistema manipud iti seguro iti kinaawan trabaho iti Canada. “Addada 180,458 a paspasamak iti panagkusit,” sigun iti pagiwarnak a The Globe and Mail. Naragsak ta, iti dayta a pukaw, “$32.3-milion ti napasubli.”
Naidumduma nga Ibit
Ti kadi maysa nga ina mailasinna ti ibit ti anakna a mismo manipud kadagidiay dadduma nga ubbing? Wen, ipadamag ti The Sunday Times iti Londres. Ngem nakarkaro pay ngem dayta ti pannakaawat ti ina, sigun iti nasarakan ni Dr. Alain Lazartigues, maysa a sikiatrista iti ubing idiay La Pitié Salpetrière Hospital idiay Paris. Manipud iti tono iti ibit, maikeddengna ti gapu dayta, no mabisin ti ubing, nabasa, makarurod, wenno agsakit. Ti bisin, ti gagangay a gapu iti panagibit ti ubing, ti nasinggit ket adda iti nagbaetan ti 270 ken 450 hertz ken adda iti kapigsa a 80 ken 85 a decibels. Dagiti panagibit gapu iti ut-ot, pungtot, pannakaupay, ken ragsak, kuna ti doktor, ti addaan met iti naisangsangayan a kasasaad. Kunana a kadagiti dadduma a sakit, ti ibit ti ubing makatulong iti diagnosis.
Dagiti Beterano ken ti Gubat iti TV
Ti kinaranggas ken ti gubat ti kankanayon a maipabpabuya iti telebision ken kadagiti programa iti damdamag. Dagiti sine, nangnangruna, ti agannayas a mangiparang kadagiti gubgubat iti nadayaw a pamay-an. Dagiti beterano iti gubat, nupay kasta, a nakapadas iti nakaro a panagamak ti masansan a di makasarak iti kasta a maipabuya a paspasamak a makaliwliwa. Ni Stan Knorth, maysa a beterano iti Gubat Sangalubongan I, nga agtawenen iti 90, imbagana iti St. Louis Magazine: “No makitak amin dagita a panagpipinnaltog iti TV, iddepekon dayta.” Ti makagapu? “Diak maibturan dayta. Diak kayat a lagipen dayta,” inlawlawag ni Knorth.
Nakaro nga Insomnia
Maysa a lalaki nga agsagsagaba iti insomnia ti saan a nakaturog iti siam a bulan ket kalpasanna natay, kuna ti Evening Press iti Dublin, Ireland. Iti panangdeskribirna iti gapu iti ipapatayna, ni Propesor Elio Lugaresi, maysa a neurologo iti University of Bologna Medical School idiay Italia, inlawlawagna a ti mammano a sakit apektaranna ti thalamus, maysa a nerve circuit iti utek a mangipasa kadagiti mensahe iti nagbaetan ti utek ken ti bagi. No masinga ti komunikasion, “ti sentro ti utek ti agtignay a kasla motor a mabalin a saan a maiddep.” Nupay no ikagumaan ti biktima a labanan ti sakit, isut’ nagbalin a maika-14 a miembro ti pamilia a natay, nanipud idi 1822, manipud iti kinakurang iti turog. Ti report ni Lugaresi maipapan iti kaso ti nangtignay kadagiti dadduma a sientista iti nalawag a paset ti genetiko ken ti thalamus iti nakaro a kaso ti insomnia wenno saan a pannakaturog. Inlawlawag ni Lugaresi: “Ammomi ti kasasaad ti sakit, ngem awan ti pamay-anmi a mangpasardeng iti dayta.”