Panangmatmat iti Lubong

◼ Sigun iti pagayatan ti tunggal agbaybayad iti buis, nangilasin ti gobierno ti Espania iti 0.5 a porsiento a buis nga agpaay iti organisasion a tumultulong kadagiti marigrigat wenno kadagiti organisasion dagiti Katoliko. Nupay 80 a porsiento kadagiti Espaniol ti agkuna a Katolikoda, 20 la a porsiento ti mayat nga agbayad iti buis nga agpaay iti relihionda.​—EL PAÍS, ESPANIA.

◼ “No mannigarilio ti maysa a lalaki agingga nga agtawen iti 30, umababa ti biagna iti 5 1⁄2  a tawen, ken iti babai nasurok nga 6 1⁄2,” sigun iti listaan ti kapaut ti panagbiag nga impakita ti Institute of Actuaries. Nupay kasta, no isardeng ti maysa a tao ti panagsigariliona inton agtawen iti 30, maksayan ti adu a risgo a matay iti sakit a nainaig iti dayta a bisio.​—THE TIMES, ENGLAND.

◼ Kabayatan ti 2004, immadu ti langis a nausar ti lubong iti 3.4 a porsiento agingga iti 82.4 a milion a bariles iti kada aldaw. Ti Estados Unidos ken China ti nangusar iti dandani kagudua iti inaduanna ken tunggal maysa ti mangus-usar itan iti 20.5 a milion ken 6.6 a milion a bariles iti kada aldaw.​—VITAL SIGNS 2005, WORLDWATCH INSTITUTE.

“Apresiarem ni Nanangmo”

Pattapattaen dagiti mangan-anag iti kasasaad ti trabaho a no agtagibalay ti maysa nga ina a taga-Canada ken aywananna ti dua nga annakna nga ages-eskuela sa masuelduan iti amin a trabahona, $163,852 (doliar ti Canada) ti dagup ti tinawen a sueldona, agraman dagiti sueldona gapu iti overtime wenno lamay. Naibasar dayta a bilang iti agdama a promedio a sueldo ken iti “100 nga oras a panagtrabaho iti kada lawas, a buklen ti innem nga aldaw a sagsa-15 nga oras ken maysa a 10 nga oras nga agmalem,” kinuna ti periodiko a Vancouver Sun. Dagiti annongen ti agtagibalay nga ina ramanenna ti panangaywan kadagiti annakna, panangisuro, panangimaneho, panagdalus ken panangurnos iti pagtaengan, panagluto, panagbalin a nars, ken ti pangkaaduan a panangmantener. Adtoy ti isingasing ti periodiko: “Apresiarem ni nanangmo: Nalabit kurang ti maisubsubad kenkuana.”

Makariribuk a Prinsipio iti Moral Kadagiti Agtutubo

Dagiti agtutubo a taga-Finland ad-addan a “patpataudenda dagiti bukodda a moral a prinsipio,” sigun iti maysa a pagiwarnak iti University of Jyväskylä, idiay Finland. Gagangay itan a “pilien dagiti tattao ti pagarupenda a husto a prinsipio manipud iti nadumaduma a gubuayan, a kas man la makitientiendada,” kinuna ti pagiwarnak. No dadduma, agsupadi dagiti resulta. Kas pagarigan, patien dagiti agtutubo a napateg ti agpapada a panangiranud iti kinabaknang ken kinasaliwanwan; ngem kagiddanna, “patiendan a maitutop ti agresibo ken nakaro a kompetision.”

Risgo a Maakaranka iti Prion

Iti nabiit pay a damag nga inruar ti French Health and Safety Agency for Medical Products, nupay imposible, posible a dimmakkelen ti risgo a mayakar dagiti prion babaen ti panangyalison ti dara. Dagiti prion ket molekula ti protina a maipagarup a pakaigapuan ti itatanor ti Creutzfeldt-Jakob disease (vCJD) kadagiti tattao. Daytoy makapapatay ken mangdadael kadagiti urat a sakit, nga awan ti naammuan nga agasna, ti adda iti tao a naiduma a kita ti bovine spongiform encephalopathy, a kadawyan a pagaammo a mad-cow disease wenno makapapatay a sakit dagiti baka. Naipadamag a dakdakkel ti risgo ngem iti dati a naammuan kalpasan a natakuatan ti dua a tattao idiay Britania a posible a naakaran iti vCJD babaen ti panangyalison iti dara. Awan ti mapangnamnamaan a pangeksamen iti daytoy a sakit sakbay nga agdikar dagiti sintomas.

Panagtarigagay iti Naraprapis a Pammagi

Natakuatan iti panagsirarak a “dagiti ubbing a babbai nga agtawen pay laeng iti lima dida mapnek iti pammagida ken kayatda a nakutkuttongda pay koma,” impadamag ti The Sydney Morning Herald. Dinakamat ti report ti maysa a panagadal a nakausigan iti panagbiag dagiti Australiana nga agtawen iti lima agingga iti walo. Dandani kagudua kadagiti babbalasitang kayatda a nakutkuttongda koma, idinto ta ti umasping a bilang ti nangibaga nga “agdietada no lumukmegda.” Insingasing ti maysa a managsirarak a “ti di umiso a kapanunotan dagiti ubbing maipapan iti pammagi ti pakaigapuan iti bassit a panagraem iti bagi, depression ken saksakit a nainaig iti pannangan inton agtutubo wenno nataengandan.”