Impatpategna Dagiti Naadalna

ITAY nabiit pay, adda nasarakan a surat ti maysa a babai a pinutarna sakbay a natay gapu iti kanser idi Mayo 2004. Dina nairingpas dayta a surat, nabatad a gapu iti kellaat nga ikakaro ti sakitna. Nupay kasta, kadagidiay nakabasa idi agangay iti dayta di naibuson a surat, nakasangit ken napabileg ti pammatida iti Dios.

Ni Susan ti nagsurat iti dayta. Insalaysayna a balasitang pay laeng idi damo nga awaganna ti maysa a Kristiano a panglakayen dagiti Saksi ni Jehova idiay Connecticut, E.U.A. Inlawlawagna ti kasasaad a sarsarangtenna kadagidi a tawen ti kinabalasitangna. Idi arinunos ti napalabas a tawen, dayta a makatukay a surat ket naipatulod iti nanang ni Susan. Ni nanangna ti nangipatulod iti kopia dayta iti hedkuarter dagiti Saksi ni Jehova idiay New York.

Insurat ni Susan a ti numero ti telepono ti panglakayen idiay Connecticut ket nakitana iti libro dagiti numero ti telepono idi 1973. Kastoy ti inlawlawagna: “Iti daydi a tawen, agtawenak iti 14. Gapu iti panagbasak kadagiti ruar Ti Pagwanawanan ken Agriingkayo!, naamirisko a daytoy la ketdi ti kinapudno. Agsipud ta awan pay a pulos ti am-ammok idi a Saksi ni Jehova, binirokko ida iti libro dagiti numero ti telepono. Pinilik ti numero a ti umuna a tallo a numerona ket kapada ti umuna a tallo a numero iti numero ti teleponomi. Idi simmungbat ni Kabsat Genrich, nasdaaw idi naammuanna nga awan pay a pulos ti am-ammok a Saksi.”a

Naidumduma a Problema

Inlawlawag ni Susan iti suratna nga idi agtawen iti sangapulo, naipan idiay Connecticut tapno makipagnaed ken ni ikitna nga adingen ni nanangna. Temporario laeng koma dayta ngem idi agangay, imbaga ni Susan ken ni nanangna, nga agsolsolo idin nga agnanaed idiay Florida, a kayatna a permanenten a makipagnaed ken ni ikitna. Insurat ni Susan a ti kasasaadna ket kayarigan ti “maaw-awagan iti Stockholm syndrome, maysa a kasasaad a ti maysa a tao masursurona nga ayaten dagiti mangmalmaltrato kenkuana.”b Nakaro ti pannakamaltrato idi ni Susan.

Kastoy ti insurat ni Susan: “Nakaro ti panangmaltrato kaniak ni ikitko ken ti kabkabbalayna. Manmano met nga adda sumarungkar idi iti balaymi. No mapanak idiay eskuelaan, didak ikkan iti pangngaldawko, wenno desente a kawes, uray no nawadwad a kuarta ti ipatpatulod ni Nanang kas sustentona kaniak. Maysa laeng a paris ti makin-uneg a pagan-anayko, idinto ta kompleto ti masapsapul ti dua a babbalasang ni ikitko, a sumagmamano a tawen nga ub-ubing ngem siak.” Impakaammo ni Susan dayta tapno mayunay-unayna nga agproblemanto la ketdi iti nakaro no maduktalan ni ikitna a kayatna a maammuan ti ad-adu pay maipapan iti Biblia.

No Kasano a Rimmang-ay ti Pannakaammo ni Susan iti Biblia

Insurat ni Susan: “Inyam-ammonak ni Kabsat Genrich ken ni Laura, maysa a nataengan a Kristiano a kabsat. Adu a tiempo ti binusbosna a nangsungbat iti adu a saludsodko maipapan iti Biblia. Masansan nga agkitakami iti puesto a pagpalpalabaanmi.” Inlawlawag ni Susan nga iti daydi a tiempo, saan pay a pulos a nakapagdesision a bukbukodna maipapan iti aniaman. Ngem kalpasan dagidi a saritaan ken iti panangbasana kadagiti naibasar iti Biblia a literatura a kas iti libro a Ti Kinapudno nga Agturong iti Biag nga Awan Inggana, nakapagdesision met laengen.

Kastoy ti tuloy ti surat ni Susan: “Rabii ti Biernes idi imbagak ken ni ikitko a makisarsaritaak kadagiti Saksi. Pinilitnak nga agtakder iti tengnga ti kosina iti intero nga agpatnag. Kalpasan dayta, ad-addan a desididoak nga agbalin a Saksi.”

Sipud idin, ni Susan ket kanayon nga ikkan ni Kabsat Genrich iti literatura a makatulong kenkuana a mangtarus iti Biblia. “Diak pulos malipatan ti 1974 Yearbook of Jehovah’s Witnesses,” insurat ni Susan. “Ngamin, naisalaysay iti dayta no kasano a dagiti Saksi idiay Alemania, nga iturturayan idi dagiti Nazi, naibturanda ti pannakaidadanes sakbay ken kabayatan ti Gubat Sangalubongan II. . . . Daydi ti tawen a kiniddawko ken Kabsat Genrich nga irekordna iti cassette tape dagiti kanta ti Pagarian tapno masursurok ida a kantaen. Iti makatawen, kabesadokon a kantaen ti amin nga agsasaruno a 119 a kanta iti libro a pagkantaan idi 1966 nga ‘Agkankanta ken Pakpakuyoganyo ti Bagiyo iti Toktokar Kadagiti Pusoyo.’ ”

“Kabayatanna, inikkannak met ni Kabsat Genrich kadagiti nai-tape a palawag, drama, ken programa ti asamblea a naibasar iti Biblia. Ibatina dagita idiay Route 10 nga asideg iti maysa a puesto a pagteleponuan, sa alaek sadiay. . . . Maup-upayak idin gapu iti kasasaadko agsipud ta nagdakkelen ti rimmang-ayak ngem pulos a diak pay nakatabuno iti uray maysa la koma a gimong. Isu a kasla diak makaanusen.”

Imbaga ni Susan a narigrigat ti napasaranna iti simmaganad a dua a tawen. Pulos a saanen a nakisarita iti dudua la a Saksi nga am-ammona. Ngem kinunana: “Mariribukanak gapu ta kabesadok ti amin a kanta.” Apay? “Malaglagipko ngamin dagiti liriko ti maysa a kanta a kas iti: ‘Buyot ti Dios nam-ay dida biroken.’ Ammok a dagita a sasao ket insurat ti maysa a Saksi kabayatan ti pannakaibaludna iti kampo konsentrasion dagiti Aleman kabayatan ti Gubat Sangalubongan II, isu nga ad-adda nga alusiisenak. Panagriknak ket takrotak ken binaybay-annakon ni Jehova.”c

Wayawaya Kamaudiananna!

“Adda napateg a napasamak kaniak iti maika-18 a kasangayko. Adun a tawen nga awan ti Saksi nga um-umay iti balaymi agsipud ta nailista dayta a karaman kadagiti ‘dida kayat ti pakasabaan.’ Ngem iti daydi nga aldaw, adda simmarungkar manipud iti sabali a kongregasion ket nakasaritanak agsipud ta sisiak idi idiay balay. Daydi pay la ti damo a malagipko nga agmaymaysaak iti balaymi iti daydi a Sabado. Imbilangko dayta kas ebidensia a dinak binaybay-an ni Jehova. Isu nga inawagak daydi kaunaan a tineleponuak a ni Kabsat Genrich. Imbagak kenkuana a nakasaganaakon a pumanaw ket dinamagko no adda aniaman a maisingasingna. Idi agangay, tinulongannak nga umakar.”

Immakar ni Susan iti sabali a lugar idi Abril 1977. Kastoy pay ti insuratna: “Kabayatan ti simmaruno a tawen, natabunuak met laengen ti amin a gimong ken asamblea, ken nangrugiakon a mangasaba. Nakasaritak manen ni nanangko. Idi laeng a naammuanna ti sinagabak a nakaro a pannakamaltrato iti napalabas a tawtawen isu a makapungtot unay. Dagus a nagtignay ket kinompletona ti amin a masapsapulko. Immakar ni Nanang idiay Alaska, sumagmamano a tawenen ti napalabas. Gapu ta interesado unay kadagiti kinapudno nga isursuro ti Biblia, immakarak idiay Alaska idi 1978 tapno agkaduakami. Nagbalin a Saksi idi agangay ken matalek agingga ita.

“Kalpasan a rinugiakon ti makigimong, adda grupo nga inyurnos ni Kabsat Genrich nga agpasiar iti sangalubongan a hedkuarter dagiti Saksi ni Jehova idiay Brooklyn, New York. Inawisnak met a makikadua iti dayta a grupo. Daydi ti maysa kadagiti manayon unay nga insagut kaniak ti maysa a tao, agsipud ta sipud iti dayta a panagpasiarko, ad-addan nga apresiarek ti organisasion ni Jehova. Bueno, dayta laeng ti makunak. Pinaababak daytoy agsipud ta kayatko a nasapa a malpas.”

Kinapudnona, dagiti naisalaysay iti ngato ket sumagmamano laeng a paset ti innem ket kagudua a panid a surat ni Susan. Iti tartaraudi dayta a surat, kastoy ti kinuna ni Susan: “Nagkidar ti sakitko idiay ospital itay napan a bulan ket impagarupko no matayakon . . . Inkararagko ken Jehova a no sumalun-atak iti uray dua la koma a lawas, kayatko nga urnosen ti sumagmamano a banag. . . . Diak namnamaen nga agpaut pay ti biagko, ngem ti laeng makunak ket nakasaysayaat dagiti tawen a kaaddak iti kinapudno, ti kasayaatan a biag a mabalin a tagiragsaken ti siasinoman.”

Awan ti pangserra a sasao wenno pirma iti dayta a surat. Saan met a pulos a naibuson. Kadagidiay nakasarak iti dayta, dida ammo no siasino ti pangipatulodanda. Ngem kas nadakamat itay, dayta a surat ket naipatulod met la idi agangay iti nanang ni Susan.

Ad-adu Pay a Detalye Maipapan ken Susan

Kalpasan ti panagbautisar ni Susan idi Abril 14, 1979, nagsubli ni nanangna idiay Florida. Nagbati ni Susan idiay Alaska, ta nagbalin a nasinged kadagiti miembro ti Kongregasion ti North Pole. Di nagbayag, rinugianna ti amin-tiempo a ministerio kas maysa a payunir. Idi agangay, immakar idiay Florida ket idi 1991, nakiasawa iti maysa a Kristiano a panglakayen ken padana a payunir a ministro a pimmusay di nagbayag kalpasan ti ipupusay ni Susan.

Ni Susan ken ni lakayna ket maipatpateg unay a pagassawaan. Agkaduada a nakipaset iti amin-tiempo a ministerio agingga a nagsakit ni Susan isu a kapilitan a simmardengda. No dagupen, tinagiragsakna ti nasurok a 20 a tawen iti amin-tiempo a serbisio. Ti programa ti pumponna idiay Florida ket naikonektar babaen ti telepono iti Kongregasion ti North Pole.

Ti surat ni Susan matulongannatayo nga ad-adda a mangapresiar kadagiti naespirituan a bendision a tagtagiragsaken dagidiay agserserbi ken Jehova agraman dagidiay addaan iti nagsayaat a namnama a panagungar. (Aramid 24:15) Ipaganetget met daytoy a pakasaritaan ti biag nga asideg ti Dios kadagiti amin nga umadani kenkuana!—Santiago 4:7, 8.

[Footnotes]

[Blurb iti panid 23]

“Nakasaysayaat dagiti tawen a kaaddak iti kinapudno, ti kasayaatan a biag a mabalin a tagiragsaken ti siasinoman”

[Ladawan iti panid 21]

Idi agtawen ni Susan iti sangapulo

[Ladawan iti panid 23]

Ni Susan ken ti lakayna a ni James Seymour