Ti Panangmatmat ti Biblia

Posible Kadi nga Agbalin a Makaparagsak ti Panagdayaw iti Dios?

“ADDA pammatik ken panagayatko iti Dios,” insurat ti maysa nga agkunkuna a Kristiano. “Ngem . . . naumaakon a makimismisa.” Kasta met kadi ti riknam? Kinapudnona, dadduma ti agbukbukoden nga agdaydayaw iti Dios gapu ta naumadan, saanda a kontento, ken naupaydan.

Sigun iti maysa a pagiwarnak, adu ita ti agdaydayaw iti Dios iti bukodda a pamay-an. Ngem dagidiay a kayatda a tagiragsaken ti panagdayawda iti Dios saanda a mapnek iti kasta a pamuspusan. Apay? Agsipud ta mabalin a maulit laeng ti pannakaupayda iti dati a relihionda.

Gapuna, tumaud daytoy a saludsod: Makauma kadi ken makapaladingit ti agbiag maitunos iti pannursuro ti Biblia? Saan a pulos! Usigenyo kas pagarigan ti nakuna ti maysa a salmista iti Biblia: “O umaykayo agdir-itayo a sirarag-o ken Jehova! . . . O sumrekkayo, agdayaw ken agruknoytayo; agparintumengtayo iti sanguanan ni Jehova a Nangaramid kadatayo.”​—Salmo 95:1, 6.

Agyamyaman ti maysa pay a salmista iti Biblia a nangikanta kenni Jehova: “Sika laeng ti Kangatuan iti intero a daga.” Iti Kasuratan, naawagan ni Jehova iti “naragsak a Dios,” ket dagiti agdaydayaw kenkuana idi ken ita masansan nga iyebkasda ti rag-oda.​—Salmo 83:18; 1 Timoteo 1:11.

Ti Rason Tapno Agrag-o

Tapno masagraptayo ti pudpudno a rag-o iti panagdayawtayo, masapul a bigbigentayo ti aktual nga inaramiden ni Jehova a mangipakita iti ayatna kadatayo. Ania dayta? “Ti Dios inayatna ti lubong iti kasta unay isu nga intedna ti bugbugtong nga Anakna [ni Jesu-Kristo], tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”​—Juan 3:16.

Gapuna, kas kunaen ti Biblia, pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:3, 4) Saan a kaipapanan dayta ti basta panangammo laeng iti kunaen dagiti partikular a bersikulo ti Biblia. Imbes ketdi, kasapulan nga ‘alaentayo ti kababagas’ ti basbasaentayo. Ramanen dayta ti naannad ken napasnek a panagadal. (Mateo 15:10) Ti gunggona? “Masarakamto ti mismo a pannakaammo iti Dios.” Talaga a makaparagsak dayta!​—Proverbio 2:1-5.

Kasta ti narikna dagiti umili iti siudad ti Berea idiay Macedonia idi umuna a siglo. Idi insuro kadakuada ni apostol Pablo ti sao ti Dios, “inawatda ti sao buyogen ti napalalo unay a kinagagar ti panunot, a siaannad a suksukimatenda ti Kasuratan iti inaldaw no agpayso dagitoy a banag.” Saan koma a kasta ti kinagagarda no makauma wenno di makapnek ti panagadalda iti Kasuratan.​—Ara. 17:11.

Kinuna ni Jesus: “Naragsak dagidiay mabisin ken mawaw iti kinalinteg, yantangay mapennekdanto.” (Mateo 5:6) Kas kadagiti mabisbisinan a tattao a nangrugin a mangan a regular, adu ita ti maragragsakan unay ta mabmabsogdan iti naespirituan. Gapuna, kas kadagiti taga-Berea, “adu kadakuada ti nagbalin a manamati.”​—Aramid 17:12.

Wagas ti Panagbiag

Dagiti pudno nga agdaydayaw idi umuna a siglo inawatda “Ti Dalan,” ti termino a nausar iti Aramid 9:2 a tumukoy iti baro a wagas ti panagbiag a sinurot dagiti nagkauna a Kristiano. Masapul a kasta met ti aramiden dagidiay agsapsapul ita iti rag-o iti panagdayawda iti Dios. Nasken a palubosanda dagiti kinapudno iti Biblia a mangimpluensia iti pampanunot ken inaldaw a panagbiagda.

Dayta ti makagapu nga indagadag ni apostol Pablo kadagiti taga-Efeso: “Ikkatenyo koma ti daan a personalidad a mayannurot iti sigud a dana ti kababalinyo.” Ngem saan laeng a dayta, ta intuloy ni Pablo: “Ikawesyo koma ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.”​—Efeso 4:22-24.a

Bayat nga ipangpangagtayo dayta a balakad ket ituntunostayo ti panagbiagtayo iti pagayatan ti Dios, adda panggapuantayo a makarikna iti kasta unay pannakapnek ken rag-o. Ania dayta? Insurat ni Pablo kadagiti Kristiano iti Colosas a masapul a mangaramidda kadagiti panagbalbaliw iti biagda ‘tapno magnada a maikari ken Jehova iti panggep a panangay-ayo a naan-anay kenkuana.’ (Colosas 1:10) No ammotayo nga agbibiagtayo iti pamay-an a pakaay-aywan ti Dios, addaantayo la ketdi iti panggapuan nga agrag-o! Kanayonanna, pinagbalin ti Dios a posible ti “panangay-ayo” kenkuana. Kasano? Babaen ti pammakawan.

Managbasoltayo amin isu a kasapulantayo ti pammakawan ti Dios. Iti 1 Timoteo 1:15, kinuna ni Pablo: “Ni Kristo Jesus immay ditoy lubong tapno mangisalakan kadagiti managbasol.” Gapu iti panangidaton ni Jesus iti biagna agpaay kadatayo, nagbalin a posible ti pannakapakawan dagiti basoltayo. Gapuna, mabang-aranen ti maysa a pudno nga agdaydayaw agsipud ta saanen a nakaro ti panangsidir ti konsiensiana. Mabalinnan ti maaddaan iti nadalus a konsiensia ken makapagrag-on gapu iti panagtalekna a mapakawan dagiti basolna la ketdi ta naimpusuan nga aramidenna ti pagayatan ti Dios.

Kanayonan a Panggapuan nga Agrag-o

Saan nga agbukbukod ti maysa no rugiannan ti agdayaw iti pudno a Dios. Insurat ni David a salmista iti Biblia: “Nagrag-oak idi kinunada kaniak: ‘Mapantayo idiay balay ni Jehova.’” (Salmo 122:1) Kinapudnona, napalaus ti rag-otayo no regular a makitaripnongtayo kadagiti pudno nga agdaydayaw.

Kalpasan ti itatabunona iti maysa a gimong dagiti Saksi ni Jehova, insurat ti maysa a lalaki: “Siaayat nga inabrasa ken tinulongandakami. Daytat’ pakakitaan nga amin a timmabuno ket nasingedda iti maysa ken maysa. Ti kinatakneng ken kinatanang ti nagadu nga agtutubo ket pakaragsakan la ketdi ti amin nangruna dagiti dadakkelda. Agyamanak unay ta naawisak iti kasta a makapainteres ken nagsayaat a taripnong.”

Mabalinyo met a tagiragsaken dagiti gundaway nga agdayaw ken Jehova, a pagrag-oanyo dagita a kas ken ni David idi un-unana. Indagadagna: “Agserbikayo ken Jehova buyogen ti panagrag-o. Umaykayo iti sanguananna buyogen ti narag-o nga ikkis.” (Salmo 100:2) Amin nga addaan iti umiso a motibo nga agserserbi iti Dios manamnamada a matagiragsakda ti panagdayawda.

[Footnote]

NAPANUNOTYO KADIN?

◼ Ania ti nakaibasaran ti pudno a panagdayaw?​—1 Timoteo 2:3-6.

◼ Kasano a mangyeg kadatayo iti rag-o ti daton a pangsubbot ni Kristo?​—1 Timoteo 1:15.

◼ Ania ti maitulong dagiti Nakristianuan a gimong tapno matagiragsakmo ti panagdayawmo?—Salmo 100:1-5.

[Ladawan iti panid 10]

Makaparagsak ti pannakipagadal iti Biblia