Ti Panangmatmat ti Biblia
No Apay a Rumbeng a Liklikam ti Espiritismo
ITI maysa a pagilian ti Asia, rinambakan ti maysa a bunggoy ti piesta a pammadayaw kadagiti espiritu. Dimteng ti tampok ti piesta babaen ti seremonia a sadiay ket luganan dagiti espiritu ti dua a napili a babbai. Nagbuligawgaw dagiti babbai sada nagpigerger a kasla nakoriente.
Idiay Puerto Rico, ti makium-uman iti espiritu (santero) ti mangangay iti maysa a seremonia tapno makisarita iti espiritu a maawagan iti Changó, ti dios ti gurruod. Bayat a mangisalsalaysay kadagiti parmata, mangrugi nga agpigerger ti amin nga adda iti kuarto a kaslada naluganan.
Gagangayen ti pannakinamin iti okulto iti adu a pagilian. Lumatlatak ti panamati kadagiti datdatlag ken ad-addan a makaatrakar dayta kadagiti tattao. Nagadun dagiti libro, ay-ayam, pabuya iti telebision, ken pelikula a mangitampok kadagiti demonio, panangkulam, ken karkarna a pasamak.
Nupay kasta, isuro ti Biblia a ti pannakiraman iti aniaman nga adda pakainaiganna iti okulto ket talaga nga espiritismo. Ti espiritismo ket saan a basta maysa laeng a di makadangran a paglinglingayan, wenno maysa laeng a panangsukisok iti karkarna. Imbes ketdi, pannakiuman dayta kadagiti demonio, dagiti nadangkes nga anghel nga immalsa iti Dios.—Apocalipsis 12:9, 12.
Kas kadagiti mangngalap, dagiti demonio usarenda ti espiritismo a kas appan. Agusar dagiti mangngalap iti nagduduma nga appan tapno makakalapda iti nagduduma nga ikan. Umasping iti dayta, nagduduma met a kita ti espiritismo ti usaren dagiti dakes nga espiritu tapno maallukoyda ti amin a kita ti tao. Natukoy ti lider dagiti demonio kas “dios daytoy [dakes] a sistema ti bambanag.” Nabaelanna a binulsek ti isip dagiti di manamati iti panggep ti Dios ken iti kinapudno ti Saona.—2 Corinto 4:4.
Ti Pagbanagan ti Espiritismo
Daytoy ti panggep dagiti dakes nga espiritu: Kayatdatayo a singaen wenno allilawen tapno mayadayotayo iti Namarsua kadatayo. Allukoyenda dagiti tattao a mangsalungasing kadagiti nalinteg a pagalagadan ti Dios, pagaammoda man dayta wenno saan. Ngarud, ti espiritismo agbanag iti di pananganamong ti Dios, kinaawan namnama, ken pannakadadael inton agangay.—Apocalipsis 21:8.
Kinuna ni Luis a taga-Puerto Rico: “Makinamnamin ti pamiliami iti espiritismo sipud pay kinaubingko. Paset dayta ti relihion ti pamiliami ken wagas ti panagbiagmi. Pagarupko idi a gagangay laeng ti abilidadko a makakita iti masakbayan ken ti laingko a mangbasa kadagiti baraha a mausar iti panagpadles. Masansan pay a mapugtuak ti numero a mangabak iti loteria ket matulongak ti dadduma a mangabak. Dagitoy nga impagarupko nga abilidadko ti nanglapped kaniak a manggun-od iti pannakaammo iti Biblia ken maaddaan iti relasion iti Dios.”—Juan 17:3.
Adu ti mamati a saan a makadangran ti pannakinamin iti espiritismo, ken mamatida a makagunggona pay ketdi dayta. Mabalin nga ibagada nga adda met dagiti nasingpet nga espiritu wenno ibagada a dagiti espiritistiko nga aramid ket mabalin a mangyeg iti nalawlawag a pannakaawat, kinabaknang, wenno kinaragsak. Ngem saan a pudno dayta. “Kanayon nga adda pagdaksan ti espiritismo,” kinuna ni Luis.
Maysa nga agtutubo nga agnagan iti Chad ti nangrugi a makakita kadagiti nakabutbuteng a sirmata ket masansan a di makaturog gapu iti panangriribuk dagiti demonio. Kinunana: “Nangrugi a riribuken ken parigatendak dagiti demonio iti tunggal rabii.” Kasanotayo a masalakniban manipud iti kasta a panangriribuk?
No Kasano a Masalaknibantayo
Tapno masalaknibantayo, masapul nga iwaksitayo ti aniaman nga adda pakainaiganna iti espiritismo. (Galacia 5:19-21) Gapuna, ibilin ni Jehova a Dios kadagiti adipenna a liklikanda dagiti sumaganad nga aramid: “Awan koma ti masarakan kenka nga . . . asinoman a mangaramat iti panagpadles, maysa a managsalamangka wenno asinoman nga agsapul kadagiti partaan wenno maysa a mangkukulam, wenno maysa a mangkayaw iti sabsabali babaen ti pagilabeg wenno asinoman nga umuman iti mannakiuman iti espiritu wenno maysa a propesional a managipadles kadagiti pasamak wenno asinoman nga agimtuod iti natay. Ta isuamin nga agar-aramid kadagitoy a banag ket nakarimrimon ken Jehova.”—Deuteronomio 18:10-12.
Maitunos kadagitoy a sasao, adu ti nagtignay a nangsalaknib iti bagida babaen ti panangibellengda iti aniaman a libro wenno bambanag a mainaig iti espiritismo. Kinuna ni Ken a nakalapsut iti espiritismo, “Sinukimatko amin a sanikuak ket dinadaelko amin a pagarupek a dakes.”—Kitaen ti Aramid 19:19, 20.
Ti panangpatanor iti personal a relasion iti pudno a Dios a ni Jehova ti kasayaatan a salaknib. Amirisem ti dinakamat ti Santiago 4:7, 8 a nasken nga aramidentayo: “Ngarud, agpasakupkayo iti Dios; ngem busorenyo ti Diablo, ket isu agtalawto kadakayo. Umadanikayo iti Dios, ket isu umadaninto kadakayo. Dalusanyo dagiti imayo, dakayo a managbasol, ket gugoranyo dagiti pusoyo, dakayo a di makapangngeddeng.”
Sursuruan ken salakniban ni Jehova a Dios dagidiay umadani kenkuana. Saanda nga ‘ignorante kadagiti gakat ni Satanas’ wenno maallilaw kadagiti panagpammarangna. (2 Corinto 2:11; 11:14) Kasta met, Mannakabalin-amin ni Jehova. Dagidiay umawag ken Jehova buyogen ti pammati ket wayawayaanna manipud iti panangriribuk dagiti dakes nga espiritu. Kinuna ni Chad a nadakamat itay, “Idi naammuak a dagiti demonio ti mangrirriribuk kaniak, immawagak ken Jehova a Dios a salaknibannak manipud iti panangriribukda ket simmardengda.”—Salmo 91:1, 2.
Nalawag a dagiti nalinteg maragragsakanda gapu iti pannalaknib ti Dios ita ken iti pannakaammo a mabiiten a madadael dagiti demonio ken ti amin a nagpaallukoy kadakuada. Panunotem laengen ti aglaplapusanan a rag-o ken talna iti intero a daga inton nawayawayaan ti sangatauan manipud iti espiritismo!—Isaias 11:9; Apocalipsis 22:15.
NAPANUNOTYO KADIN?
◼ Ania dagiti aramid mainaig iti espiritismo a masapul a liklikan dagiti Kristiano?—Deuteronomio 18:10-12; Apocalipsis 21:8.
◼ Asino ti mangitantandudo iti espiritismo?—2 Corinto 2:11; 11:14; Apocalipsis 12:9, 12.
◼ Kasanotayo a masalakniban ti bagitayo manipud kadagiti dakes nga espiritu?—Santiago 4:7, 8.
[Ladawan iti panid 10]
Kas kadagiti mangngalap, dagiti demonio us-usarenda ti espiritismo a kas appan