Apay nga Addatayo Ditoy?

SIGUN iti Biblia, awan makaartap iti kinasirib ti Dios nga agnagan Jehova. Isu ti Namarsua iti uniberso ken Gubuayan ti amin a puersa iti dayta. (Salmo 83:18; 92:5) Kuna ti umuna a kapitulo iti Biblia: “Idi punganay, ti Dios pinarsuana ti langlangit ken ti daga.” Kalpasanna, ti Dios inaramidna ti tao iti ‘ladawanna’—a ti kaipapanan dayta ket addaan ti tao kadagiti galad a kas iti Dios. Imbagana iti umuna nga agassawa nga agpaadu ken punnuenda ti daga.—Genesis 1:1, 26, 28.

Kayat kadi a sawen dayta a ti Dios pinarsuana ti uniberso agraman ti daga ken ti adu nga animal ken mulmula tapno laeng pagyanan ti sangatauan? Ken addatayo kadi ditoy tapno tagiragsakentayo laeng ti biag iti sumagmamano a dekada, mangan, uminum, ken maaddaan iti annak?

Apay a Pinarsuanatayo ti Dios?

Ni Jehova a Dios pinarsuana ti sangatauan kas ebkas ti ayatna—kayatna nga iranud ti biag ken kinaragsak kadagiti tattao. Sigurado a naragsakan unay ti Dios idi inaramidna ti amin a kita ti parsua tapno ti tao ket malikmut iti kinapintas ken kinaaglaplapusanan. Kangrunaan iti amin, dagiti tattao ket maaddaan iti nasinged a relasion iti Namarsua kadakuada, maam-ammoda isuna ken makikomunikarda kenkuana. Naparsuada tapno agbiagda nga agnanayon kadagiti perpekto ken natalna a kasasaad.—Genesis 3:8, 9; Salmo 37:11, 29.

Adda met napateg ken makapnek nga impatrabaho ni Jehova kadagiti tattao. Imbagana iti umuna nga agassawa: “Agbungakayo ken agadukayo ket punnuenyo ti daga ken parukmaenyo, ket pagpasakupenyo dagiti ikan iti baybay ken dagiti agtaytayab a parsua iti langlangit ken tunggal sibibiag a parsua nga aggargaraw iti rabaw ti daga.” (Genesis 1:28) Wen, ti umuna nga agassawa ken dagiti annakda ket pagbalinenda a makaay-ayo a paraiso ti intero a daga.

Saan a dagus a natungpal ti panggep ni Jehova.a Nupay kasta, matungpalto met laeng ti orihinal a panggep ti Dios para iti sangatauan.—Isaias 46:9-11; 55:11.

Kabayatanna, ti panagbirok ti tao iti panggep ti amin a banag ti nabatad a pakakitaan nga adda tarigagay—wenno panagkasapulanna a gumun-od iti pannakaammo maipapan iti Dios ken maaddaan iti relasion kenkuana. Ti tao ket naparsua nga intelihente ken tarigagayanna a sukisoken ken tarusan ti bambanag. Ken kuna ti Biblia nga iti agnanayon, ti tao ket agtultuloy a manggun-od iti makapnek a pannakaammo maipapan iti Dios ken kadagiti pinarsuana.

Kastoy ti kinuna ti maysa a nagsurat iti Biblia maipapan iti panggep ti tao: “Nakitak ti pakakumikoman nga inted ti Dios iti annak ti sangatauan nga isu ti pakakumikomanda. Tunggal banag inaramidna a napintas iti tiempona. Uray ti tiempo a di nakedngan insaadna iti pusoda, tapno ti sangatauan saanna a pulos masarakan ti aramid nga inaramid ti pudno a Dios manipud pangrugian agingga iti pagnguduan. Naammuak nga awanen ti nasaysayaat kadakuada ngem ti panagrag-o ken panagaramid iti naimbag bayat ti panagbiag ti maysa; ken kasta met a ti tunggal tao mangan ken pudno nga uminum ken makakita iti imbag iti isuamin a napinget a panagtrabahona. Dayta ti sagut ti Dios.” (Eclesiastes 3:10-13) Isu a saan a pulos nga agpatingga ti mabalin a maammuan ti sangatauan maipapan iti Dios ken kadagiti pinarsuana.

Agsursuroka Maipapan iti Dios

Mabalinmo a maam-ammo ni Jehova no sukimatem dagiti pinarsuana. Kinuna ti maysa a nagsurat iti Biblia a ‘dagiti di makita a kualidad ti Dios ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen iti bambanag a naaramid, ti mismo nga agnanayon a pannakabalin ken kina-Diosna.’ (Roma 1:20) Wen, iparangarang ti sangaparsuaan ti aglaplapusanan nga ayat, sirib, ken pannakabalin ni Jehova.

Ti sabali pay a napateg a gubuayan ti impormasion maipapan iti Dios ket ti Biblia. Dayta a naipaltiing a libro ket amang nga ad-adu ti ipakaammona kadatayo maipapan ken Jehova—dagiti panangmatmat, kualidad, ken panggepna—ngem iti masursurotayo no sukimatentayo dagiti pinarsuana.

Kuna ti Biblia maipapan iti panggep ti Dios: “No maipapan iti langlangit, kukua ni Jehova ti langlangit, ngem ti daga intedna iti annak ti tattao.” (Salmo 115:16) Agparang ngarud a ti kakaisuna a lugar iti uniberso a mabalin a pagbiagan ti sangatauan ket ditoy daga, nga inaramid ni Jehova para iti dayta a panggep.

Ti met ngay nakalawlawa nga uniberso? Ti kadi amin a bituen ket nairanta laeng a mangtaginayon iti naan-anay a kinabalanse ti sistema solartayo tapno posible ti biag ditoy daga? Dagiti kadi bambanag iti law-ang ket pangpapintas laeng iti langit no rabii? Rumbeng a bigbigentayo nga adu pay ti ditay ammo. Ngem nasayaat dayta! Apay?

Saan nga umdas ti agnanayon tapno maawatan ti sangatauan ti amin nga inaramid ken pinanggep ti Dios. Pagayatanna nga agnanayon a naragsak ti masanguanantayo a napakuyogan iti awan inggana a panagtakuat. Gapu ta agnanayonton ti biag ken kinaragsak ditoy daga, ti natulnog a sangatauan ket maaddaan iti umdas a gundaway a mangtakuat iti nakaad-adu pay maipapan iti uniberso.

[Footnote]

[Blurb iti panid 9]

Ti tao ket naparsua nga intelihente ken tarigagayanna a sukisoken ken tarusan ti bambanag

[Dagiti Ladawan iti panid 10]

Ipakita ti Biblia a ti daga ket naparsua a nangnangruna agpaay a pakaragsakan ti sangatauan