Ania ti Sigurado a Mabalbaliwan?

“Saanton nga aggugubat dagiti pagilian.”

“Awanto ti agtataeng nga agkuna: ‘Masakitak.’”

“Awanton ni patay.”

KASLA imposible a mapasamak dagita ngem siguradotayo a saan la nga arapaap. Apay? Agsipud ta dagita ket saan a parparawpaw a kari dagiti politiko a di makabael a mangbalbaliw iti lubongtayo. Imbes ketdi, dagiti kari a nakotar iti ngato ket masarakan iti Biblia.a

Para iti adu, ti Biblia ket kadaanan a libro ken saanen nga agaplikar iti kaaldawantayo. Kasta met kadi ti kapanunotam? No wen, apay a dimo sukimaten a naimbag ti linaon ti Biblia? Kinapudnona, ti Biblia ti kakaisuna a sagrado a libro a mangisalaysay iti pakasaritaan ti sangatauan manipud idi un-unana. Ilawlawagna ti sumaganad:

● No kasano a naisagmak ti sangatauan iti panagsagaba.​—Roma 5:12.

● No kasano a nangaramid ti Dios iti solusion.​—Juan 3:16.

● No apay a di kabaelan dagiti gobierno a balbaliwan ti lubongtayo.​—Jeremias 10:23.

● No apay a makapagtalektayo a matungpal ti kari ti Dios.​—Josue 23:14.

Talaga kadi a pagpatinggaen ti Dios ti mapaspasaran ti tao a bisin, gubat, sakit, ken ipapatay? Saan a narigat a patien dagita no akseptarem ti sumaganad:

1. Pinarsuanatayo ti Dios.

2. Maseknan kadatayo.

3. Adda pannakabalinna a mangbalbaliw iti lubong.

4. Panggepna nga aramiden dayta.

Adda kadi nasayaat a panggapuam a mamati kadagita nga uppat a punto? Awisendaka dagiti Saksi ni Jehova, a mangipabpablaak iti daytoy a magasin, a mangammo a mismo babaen ti panagadalmo iti Biblia.

Nalabit adda bukodmo a Biblia ngem manmanom a basaen wenno dimo pay ketdi nabasa. Uray ti adu nga agbasbasa iti Biblia kunada a marigatanda a mangtarus iti dayta. No kastaka met, kontakem dagiti Saksi ni Jehova para iti libre a panagadal iti Biblia iti pagtaengam. Minilion iti intero a lubong ti matultulongan iti kasta nga urnos. Kasano a maar-aramid dayta?

Kada lawas, adda maysa wenno dua a Saksi ni Jehova nga umay iti balaymo wenno iti sabali a kombiniente a lugar tapno adalenyo ti Biblia. Awan bayad dayta. Babaen iti kasta a panagadal iti Biblia, maammuam dagiti sungbat ti salsaludsod a kas iti, Apay nga agsagsagabatayo? Apay a di kabaelan dagiti gobierno ti tao a balbaliwan ti lubong? Ania ti Pagarian ti Dios, ken kasano a dayta ti mangibanag kadagiti saan a maaramidan ti gobierno ti tao?b

Para iti ad-adu pay nga impormasion no kasano a magunggonaanka iti panagadal ti Biblia, kontakem dagiti Saksi ni Jehova iti lugarmo wenno kitaem ti Web site a www.jw.org. Mabalinmo met ti agsurat iti maitutop nga adres nga adda iti panid 5 daytoy a magasin.

[Footnotes]