Kapitulo 12

Ti Kaiyulogan ti Bautismoyo

 1, 2. (a) Apay rebbeng a paginteresantayo a personal ti bautismo iti danum? (b) Iti ababa, kasanoyo a sungbatan ti saludsod nga adda iti parapo 2?

IDI tawen 29 K.P., naitaneb ni Jesus idiay Karayan Jordan. Ni Jehova a mismo ti agbuybuya ken inyebkasna ti anamongna. (Mat. 3:16, 17) Tallo ket gudua a tawen ti kamaudiananna, kalpasan ti panagungarna, nangted bilin ni Jesus kadagiti adalanna, a kunkunana: “Isuamin a pannakabalin naited kaniak idiay langit ken iti rabaw ti daga. Inkayo ngarud ket agaramidkayo ti ad-adalan dagiti amin a nasion, a bautisaranyo ida.” (Mat. 28:18, 19) Nabautisarankayon aya a maitunos ti imbilin ni Jesus sadiay? Wenno agsagsaganakayo aya a mangaramiden iti dayta?

² Iti aniaman kadagitoy a pasamak ti nalawag a pannakaawat iti bautismo ti nasken. Dagiti salsaludsod a maikari ti panangusigtayo ti iramanna dagitoy: Ti kadi bautismo dagiti Kristiano itatta addaan ti isu met laeng a kaiyulogan kas ti bautismo ni Jesus? Ti kadi amin nga ibagbaga ti Biblia maipapan ti bautismo ti agaplikar kadakayo? Aniat’ ramanen ti panagbiag a maitunos iti iladladawan ti Nakristianuan a bautismo iti danum?

Dagiti Bautismo nga Inaramid ni Juan

 3. Kadagiti siasino a limitado ti bautismo ni Juan?

³ Agarup innem a bulan sakbay a nabautisaran ni Jesus, napan ni Juan Bautista idiay let-ang ti Judea, a nangikaskasaba: “Agbabawikayo, ta ti pagarian ti langit asidegen.” (Mat. 3:1, 2) Dagiti tattao manipud amin iti dayta a paset ti nakangngeg iti kinuna ni Juan, impudnoda ti basbasolda ket nabautisaranda babaen kenkuana idiay Jordan. Dayta a bautismo ket agpaay kadagiti Judio.​—Ara. 13:23, 24; Luc. 1:13-16.

 4. (a) Apay a naganat a kasapulan ti panagbabawi dagiti Judio? (b) Aniat’ kasapulan tapno malisianda ti ‘pannakabautisarda iti apuy’?

⁴ Kasapulan a sigaganat dagidiay a Judio ti panagbabawi. Idi tawen 1513 K.K.P. idiay Bantay Sinai simrek dagiti ammada iti nasional a tulagan ken Jehova a Dios. Ngem saanda a nagbiag a maitunos kadagiti responsabilidadda iti sidong dayta a tulag ket ngarud nailunodda iti dayta kas managbasol. Napeggad ti adda a kasasaadda. “Ti dakkel ken nakakigkigtot nga aldaw ni Jehova” nga impadto ni Malakias ti asidegen, ket idi 70 K.P. daytat’ dimteng idiay Jerusalem kas nagpartak a panangdadael. Ni Juan Bautista, nga addaan regta a maipaay iti pudno a panagdaydayaw kas ken Elias, ti naibaon a nasapsapa sakbay dayta a panangdadael “tapno isaganaanna a maipaay ken Jehova ti nakasagana nga ili.” Kasapulan a pagbabawianda ti basbasolda a maibusor iti Linteg ti tulag ken agbalinda a sisasagana iti puso ken isip a mangakseptar iti Anak ti Dios, nga isut’ ibaon ni Jehova kadakuada. (Mal. 4:4-6; Luc. 1:17; Ara. 19:4) Kas inlawlawag ni Juan, ti Anak ti Dios ti mangbautisar babaen ti nasantuan nga espiritu (a dayta a bautismo ti damo a napasaran dagiti matalek nga ad-adalan idi Pentecostes idi 33 K.P.) ken babaen iti apuy (a daytat’ dimteng kadagiti awan panagbabawina kas pannakadadael idi 70 K.P.). (Luc. 3:16) Tapno malisian a personal ti panaglak-am dayta a ‘bautismo iti apuy’ kasapulan dagiti Judio idi umuna a siglo a mabautisaran iti danum kas simbolo ti panagbabawida, ket masapul nga agbalinda nga ad-adalan ni Jesu-Kristo inton manglukaten dayta a gundaway.

 5. (a) Idi immay a pabautisaran ni Jesus, apay a kinuestionan ni Juan dayta? (b) Aniat’ insimbolo ti bautismo ni Jesus iti danum? (c) Kasano kainget ti panangtungpal ni Jesus ti pagayatan ti Dios kenkuana?

⁵ Maysa kadagidiay immay ken Juan tapno pabautisaran ket isu ni Jesus mismo. Ngem apay? Ammo ni Juan nga awan basol nga ipudno ni Jesus, gapuna kinunana: “Siak masapulko ti pabautisaran kenka, ket sika umayka kaniak?” Ngem ti bautismo ni Jesus ti adda sabali nga isimsimbolona. Gapuna simmungbat: “Anamongam ita, ta kasta ti maipaay kadatayo a panangtungpal ti amin a kinalinteg.” (Mat. 3:13-15) Ti bautismo ni Jesus saanna nga isimbolo ti panagbabawi iti basol; ket saanna met a kasapulan nga idedikar ti bagina iti Dios, ta isut’ kameng ti nasion a dedikadon ken ni Jehova. Imbes ketdi, ti bautismona, idi nagtengannan ti kinanataengan a Judio idi agtawen ti 30, ti mangisimsimbolo ti panangidatagna ti bagina iti nailangitan nga Amana a mangaramid kadagiti dadduma pay a pagayatanna. Ti pagayatan ti Dios para ken “tao, a Kristo Jesus,” ket ramanenna ti ar-aramid maipapan ti Pagarian, kasta met ti panangidatonna ti perpekto a natauan a biagna kas subbot ken kas pakaibatayan ti baro a tulag. (Luc. 8:1; 17:20, 21; Heb. 10:5-10; Mat. 20:28; 26:28; 1 Tim. 2:5, 6) Minatmatan a siinget ni Jesus ti isimsimbolo ti bautismona iti danum. Saanna nga impalubos nga isut’ maisiasi kadagiti dadduma nga intereses. Agingga iti panungpalan ti naindagaan a biagna sinalimetmetanna ti panagaramid ti pagayatan ti Dios.​—Juan 4:34.

Bautismo ken Patay

 6. Ania pay a sabali a bautismo ti naglasatan ni Jesus ken iti ania a periodo ti panawen?

⁶ Maitunos iti isimsimbolo ti bautismo ni Jesus iti danum, isut’ naglasat pay met iti sabali a bautismo. Ammona a ti trabaho nga inwayat ti Dios iti sanguananna ti mangiturong iti panangipaayna iti natauan a biagna kas daton ngem isunto met laeng ti mapagungar iti espiritu iti maikatlo nga aldaw. Nasaona daytoy kas maysa a bautismo. Daytoy a “bautismo” ti nangrugi idi 29 K.P. ngem saan a nakumpleto aginggat’ di aktual a natay ken napagungar. Gapuna agarup tallo a tawen kalpasan ti pannakaitanebna iti danum siuumiso a maikunana: “Ngem adda maysa a pammautisarko a pakabautisarak, ket ania ket ti panagtuokkon agingga iti di matungpal!”​—Luc. 12:50.

 7. (a) Asino pay dagiti mabautisaran ken patay? (b) Asino ti mangaramid iti daytoy a bautismo?

⁷ Dagidiay makipagturay ken Kristo iti nailangitan a Pagarian ti masapul a mabautisaran met iti ipapatay. (Mar. 10:37-40; Col. 2:12) Iti ipapatayda laksidenna nga agnanayonen ti natauan a biagda, kas inaramid ni Jesus. Ket iti panagungarda makikaduadanton iti nailangitan a panagturay kenkuana. Bautismo daytoy nga aramiden, saan nga asinoman a tao, no di ti Dios babaen iti nailangitan nga Anakna.

 8. Ania met ti kaipapanan ti “pannakabautisarda ken Kristo Jesus”?

⁸ Dagidiay mabautisaran iti ipapatay ni Jesus ti makunkuna met a “mabautisaranda ken Kristo Jesus.” Babaen iti nasantuan nga espiritu a naipapagna ken Kristo isudat’ makipagkaykaysa kenkuana, ti uloda, kas kamkameng ti napulotan ti espiritu a kongregasion, ti “bagina.” Gapu ta dayta nga espiritu ti mangtulong kadakuada a mangisarming kadagiti natatan-ok a personalidad ni Kristo, maikuna maipapan kadakuada a nagbalinda “amin a maymaysa ken Kristo Jesus.”​—Roma 6:3-5; 1 Cor. 12:13; Gal. 3:27, 28; Ara. 2:32, 33.

Bautismo iti Danum Dagiti Adalan a Kristiano

 9. (a) Kaano ti umuna a panangrugi ti bautismo kas naibilin idiay Mateo 28:19? (b) Babaen ti panangusar ti salsaludsod ken kasuratan a naipaay iti daytoy a parapo, analisarenyo no aniat’ ipampamatmat ni Jesus a masapul a bigbigen dagiti kandidato ti bautismo.

⁹ Dagiti immuna nga adalan ni Jesus ti nabautisaranda iti danum babaen ken Juan ket kalpasanna naiturongda ken Jesus kas manamnama a kamkameng ti naespirituan a nobiana. (Juan 3:25-30) Babaen ti panangiturong ni Jesus isuda ti nangbautisar met, nga addaan ti isu met laeng a kaipapanan kas ti bautismo ni Juan. (Juan 4:1-3) Nangrugi idi Pentecostes ti 33 K.P., nupay kasta, rinugianda a tinungpal ti bilin a mangbautisar “iti nagan ti Ama ken ti Anak ken ti nasantuan nga espiritu.” (Mat. 28:19) Masarakanyo a makagunggona a repasuen no aniat’ kaipapanan dayta, iti lawag dagiti kasuratan a naisitar kadagiti sumaganad a salsaludsod:

Ti mabautisaran iti “nagan ti Ama,” aniat’ masapul a bigbigen ti maysa a tao maipapan ti Ama? (2 Ar. 19:15; Sal. 3:8; 73:28; Isa. 6:3; Roma 15:6; Heb. 12:9; Sant. 1:17)

Ti bautismo iti nagan “ti Anak” awaganna ti panangbigbig ti ania? (Mat. 16:16, 24; Fil. 2:9-11; Heb. 5:9, 10)

Aniat’ masapul a patien ti maysa a tao tapno mabautisaran iti nagan “ti nasantuan nga espiritu”? (Luc. 11:13; Juan 14:16, 17; Ara. 1:8; 10:38; Gal. 5:22, 23; 2 Ped. 1:21)

10. (a) Aniat’ isimbolo ti Kristiano a bautismo iti danum itatta? (b) Kasano a naigiddiat daytoy iti mismo a bautismo ni Jesus? (c) Inton mabautisaranen dagiti kualipikado a tattao sigun iti Kasuratan, ania ti pagbalinanda?

¹⁰ Dagiti damdamo a nabautisaran maitunos kadagidiay a bilbilin ni Jesus ket isuda dagiti Judio (ken proselita a Judio), a kas maysa a nasion ti dedikadodan iti Dios ket napakitaanda ti espesial a konsiderasion ti Dios agingga idi 36 K.P. Nupay kasta, idi naidanon ti pribilehio ti panagbalin nga adalan a Kristiano kadagiti taga Samaria ken dagiti Gentil, sakbay ti pannakabautisarda masapul ti panagaramidda pay nga umuna ti personal nga awan ikedkedkedna a dedikasion ken Jehova nga agserbida kenkuana kas ad-adalan ti Anakna. Agpaay kadagiti amin, agraman Judio, agtultuloy daytoy kas ti kaiyulogan ti Nakristianuan a bautismo iti danum agingga iti kaaldawantayo. Daytoy “maymaysa a bautismo” ti agaplikar kadagiti amin nga agbalin a pudno a Kristiano. Iti kasta agbalinda a dagiti Kristiano a saksi ni Jehova, dagiti ordinado a ministro ti Dios.​—Efe. 4:5; 2 Cor. 6:3, 4.

11. (a) Iti ania ti pakaiyaspingan ti Kristiano a bautismo iti danum, ken kasano? (b) Manipud iti ania ti pakaispalan itan ti Kristiano?

¹¹ Dayta a bautismo ti addaan dakkel a pateg iti imatang ti Dios. Kalpasan panangdakawatna ti panangbangon ni Noe iti daong a nakaispalanna ken ti pamiliana iti Layus, inyeg ni apostol Pedro daytoy iti atensiontayo. Nagsurat: “Isu a napaypayso a kaasping ti pammautisar a mangisalakan ita kadatayo met, (a saanna nga ikkaten kadatayo ti rugit ti lasag, no di kas la dawat ti maysa a nasayaat a konsiensia iti Dios,) gapu iti panagungar ni Jesu-Kristo.” (1 Ped. 3:21) Ti daong isut’ makitkita a pammaneknek nga indedikar ni Noe ti bagina a mangaramid ti pagayatan ti Dios ken nanipud idin ar-aramidenna a simamatalek ti trabaho nga intuding ti Dios kenkuana. Daytoy ti nangiturong ti pannakaispalna. Umasping met iti dayta, dagidiay mangidedikar ti bagida ken Jehova maibatay iti pammatida ken napagungar a Kristo, a nabautisaranda kas simbolo dayta ken kalpasanna intuloydan nga aramiden ti pagayatan ti Dios agpaay kadagiti ad-adipenna iti kaaldawantayo ti maisalakanda manipud iti agdama a dakes a lubong. (Gal. 1:3, 4) Itan saandan nga agturturong iti pannakadadael a kadua ti lubong. Naispaldan manipud iti daytoy ket naikkanda metten ti nadalus a konsiensia manipud Dios.

Panagbiag Maitunos Kadagiti Responsabilidadtayo

12. Apay a ti pannakabautisar ti maysa saan a garantia mismo ti pannakaisalakannan?

¹² Maysa a biddut iti panangipagarup a ti pannakabautisar ket mismo a garantia daytan ti pannakaisalakan. Dayta ti addaan laeng ti pategna no ti tao ket pudpudno nga indedikarnan ti bagina ken Jehova babaen ken Jesu-Kristo ken kalpasanna itultuloynan nga aramiden ti pagayatan ti Dios, a simamatalek agingga iti panungpalan.​—Mat. 24:13.

13. (a) Aniat’ pagayatan ti Dios maipapan ti wagas a panangusar dagiti nabautisaran a Kristiano ti biagda? (b) Kasano kapateg ti kinaadalan kas Kristiano iti biagtayo?

¹³ Ti pagayatan ti Dios para ken Jesus ket ramanenna no kasanot’ panangusarna ti biagna kas tao. Daytat’ maipaay agingga ken patay kas maysa a daton. Iti biangtayo dagiti bagbagitayo ti maidatagda iti Dios, a mangitultuloy ti biag ti panagsakripisio. Dagita ti mausar a nangnangruna iti panagaramid ti pagayatan ti Dios. (Roma 12:1, 2) Siempre saantay nga ar-aramiden a kasta no, uray sagpaminsan, igaggagaratayo ti agtigtignay kas ti lubong nga adda iti aglawlawtayo wenno no ibangbangontay ti biagtayo iti aglawlaw dagiti inaagum nga ar-aramid bayat a mangmangted laeng ti paspasaray a serbisio iti Dios. (1 Ped. 4:1-3; 1 Juan 2:15-17) Idi nagsaludsod ti maysa a Judio no aniat’ aramidenna tapno magun-odanna ti biag nga agnanayon, impalagip ni Jesus kenkuana ti kinapateg ti panagbiag a nadalus iti moral, sana intudo ti pannakasapul ti panagaramid ti Kristiano nga ad-adalan, ti panagbalin a pasurot ni Jesus, ti kangrunaan a banag iti biagna. Daytat’ saan a mabalin a maikabil iti maikadua a puesto laeng kadagiti namaterialan nga ar-aramid.​—Mat. 19:16-21.

14. (a) Ania a responsabilidad maipapan ti Pagarian ti adda kadagiti amin a Kristiano? (b) Kas naiyilustrar iti panid 101, aniat’ sumagmamano kadagiti epektibo a pamay-an a pangaramid iti daytoy a trabaho? (c) No pudpudno a makiramramantayo iti amin a pusotayo iti dayta a trabaho, aniat’ pampaneknekan dayta?

¹⁴ Rebbeng a laglagipen met koma a ti pagayatan ti Dios agpaay ken Jesus ramanenna ti nagpateg a trabaho mainaig iti Pagarian. Napulotan mismo ni Jesus nga agbalin nga Ari. Ngem bayat nga adda ditoy daga isu met ti naregta a saksi maipapan ti Pagarian. Addaantay ti umas-asping a trabaho a pammaneknek nga aramiden ket addaantay amin a rason a makiraman iti dayta iti amin a pusotayo. Babaen iti panangaramid iti dayta idemdemostratayo ti panangipategtayo iti kinasoberano ni Jehova ken ayattayo kadagiti padatayo a tattao. Kasta met ipakpakitatayo a nakipagkaykaysatayo kadagiti padatayo a managdaydayaw iti intero a lubong, nga aminda met ket saksida ti Pagarian, nga agtultuloy nga agturturong iti kalat ti biag nga agnanayon iti babaen dayta a Pagarian.

Repaso a Pagsasaritaan

● Aniat’ pagaspingan ken ania a pagdumaan ti bautismo ni Jesus ken bautismo iti danum itatta?

● Ti bautismo ni Juan ti agpaay kadagiti siasino? Asino dagiti mabautisaran ken patay? Ken asino dagiti “mabautisaran ken Kristo Jesus”?

● Aniat’ ramanen ti panagbiag a maitunos kadagiti responsabilidad ti Nakristianuan a bautismo iti danum?

[Kahon/​Dagiti ladawan iti panid 101]

Kadagiti Ania a Pamay-an ti Panangiwarwaragawagyo ti Pagarian?

Iti balaybalay

Babaen panangsubli a sarungkaran dagiti interesado

Kadagiti panangiyadal ti Biblia iti pagtaengan

Iti lanlansangan

Kadagiti kaeskuelaan

Kadagiti katrabahuan