Nasayaat nga Ulidan​—Ni David

Kaay-ayo ni David ti musika. Isu ket natalugadingan a musikero ken nalaing nga agputar iti kanta. Nagaramid pay ketdi kadagiti bukodna nga instrumento. (2 Cronicas 7:6) Gapu iti kinasigona, isu ket inawis ti ari ti Israel nga agtokar iti palasio. (1 Samuel 16:15-23) Pinatgan ni David dayta nga awis ngem saan a nagpannakkel ken saanna met nga impalubos a ti musika ti agbalin a kapatgan iti biagna. Imbes ketdi, inusarna ti talugadingna a mangidaydayaw ken Jehova.

Kaay-ayom kadi met ti musika? Nalabit a saanka a nalaing a tumutokar, ngem mabalinmo latta a tuladen ti ulidan ni David. Kasano? Babaen ti dimo panangipalubos a ti musika ti mangdominar iti biagmo wenno mangiduron kenka nga agpanunot ken agtignay iti wagas a di pakaidayawan ti Dios. Imbes ketdi, usarem ti musika a mangnayon iti ragsak iti biagmo. Sagut ti Dios ti abilidad a mangputar ken mangtagiragsak iti musika. (Santiago 1:17) Inusar ni David dayta a sagut iti pamay-an a makaay-ayo ken Jehova. Kasta kadi met ti kayatmo nga aramiden?