LEKSION 32
Agturturayen ti Pagarian ti Dios!
Nangrugi nga agturay ti Pagarian ti Dios idiay langit idi 1914. Idi met laeng a nangrugi ti maudi nga al-aldaw ti turay ti tao. Kasanotayo nga ammo? Kitaenta dagiti padto iti Biblia ken dagiti kasasaad ken ug-ugali dagiti tattao a nalawagen a makitkita sipud 1914.
1. Ania ti ipakita dagiti padto iti Biblia?
Impakpakauna ti libro a Daniel a mangrugi nga agturay ti Pagarian ti Dios inton agpatingga ti “pito a panawen.” (Daniel 4:16, 17) Ginasut a tawen kalpasanna, tinukoy ni Jesus ti isu met la a panawen kas “ti naikeddeng a tiempo dagiti nasion,” ken insurona a saan pay a nagpatingga dayta. (Lucas 21:24) Kas makitatanto, nagpatingga ti pito a panawen idi 1914.
2. Ania dagiti kasasaad ken ug-ugali dagiti tattao a nalawagen a makitkita sipud 1914?
Insaludsod idi dagiti adalan ni Jesus: “Anianto ti pagilasinan ti kaaddam ken ti panungpalan daytoy a sistema ti bambanag?” (Mateo 24:3) Kas sungbat, impakpakauna ni Jesus dagiti mapasamak inton mangrugi nga agturay idiay langit kas Ari ti Pagarian ti Dios. Karaman kadagitoy ti gubat, bisin, ken ginggined. (Basaen ti Mateo 24:7.) Naipadto met iti Biblia dagiti ug-ugali dagiti tattao “iti maudi nga al-aldaw” a ‘mangparigat’ iti biag. (2 Timoteo 3:1-5) Dagitoy a kasasaad ken ug-ugali dagiti tattao ket nalawlawagen a makita sipud 1914.
3. Apay a kimmaro dagiti kasasaad ditoy lubong sipud nangrugi nga agturay ti Pagarian ti Dios?
Idi nagbalin ni Jesus nga Ari ti Pagarian ti Dios, dagus a nakigubat ken Satanas ken kadagiti demoniona idiay langit. Naabak ni Satanas. Ibaga ti Biblia nga isu ket “naitapuak iti daga agraman dagiti anghelna.” (Apocalipsis 12:9, 10, 12) Kasta unay ti pungtot ni Satanas ta ammona a dandanin madadael. Isu a mangar-aramid iti pamay-an tapno agrigat dagiti tattao iti intero a lubong. Dayta ti rason a nagkaro dagiti kasasaad ditoy lubong! Solusionanto ti Pagarian ti Dios amin dagitoy a problema.
AMMUEM TI AD-ADU PAY
Adalem no kasanotayo nga ammo a nangrugin nga agturay ti Pagarian idi 1914 ken no ania ti epekto dayta kadatayo.
4. Ipakita ti kronolohia ti Biblia a nangrugi nga agturay ti Pagarian idi 1914
Ni Ari Nabucodonosor iti nagkauna a Babilonia ket pinagtagtagainep ti Dios maipapan iti mapasamak iti masanguanan. Dayta a tagtagainep ken ti panangilawlawag ni Daniel ipakitana a tumukoy dayta agpadpada iti panangituray ni Nabucodonosor ken iti Pagarian ti Dios.—Basaen ti Daniel 4:17.a
Basaen ti Daniel 4:20-26, sa usaren ti tsart tapno masungbatan dagitoy a saludsod:
(A) Ania ti nakita ni Nabucodonosor iti tagtagainepna?—Kitaen ti bersikulo 20 ken 21.
(B) Ania ti mapasamak iti kayo?—Kitaen ti bersikulo 23.
(C) Ania ti mapasamak inton agpatingga ti “pito a panawen”?—Kitaen ti bersikulo 26.
No Kasano a ti Kayo iti Tagtagainep Irepresentarna ti Pagarian ti Dios
TI PADTO (Daniel 4:20-36)
Panagturay
• (A) Maysa a dakkel a kayo
Naisardeng ti panagturay
• (B) “Pukanenyo ti kayo,” ket bay-anyo nga ‘aglabas ti pito a panawen’
Naisubli ti panagturay
• (C) “Agturaykanto manen iti pagariam”
Iti umuna a kaitungpalan daytoy a padto . . .
(D) Asino ti irepresentar ti kayo?—Kitaen ti bersikulo 22.
(E) Kasano a naisardeng ti panagturayna?—Basaen ti Daniel 4:29-33.
(F) Ania ti napasamak ken Nabucodonosor kalpasan ti “pito a panawen”?—Basaen ti Daniel 4:34-36.
UMUNA A KAITUNGPALAN
Panagturay
(D) Nabucodonosor, Ari ti Babilonia
Naisardeng ti panagturay
(E) Kalpasan ti 606 B.C.E., napukaw ni Nabucodonosor ti kinasimbeng ti panunotna ket saan a nakapagturay iti literal a pito a tawen
Naisubli ti panagturay
(F) Naisubli ti kinasimbeng ti panunot ni Nabucodonosor ket nagturay manen
Iti maikadua a kaitungpalan daytoy a padto . . .
(G) Asino ti irepresentar ti kayo?—Basaen ti 1 Cronicas 29:23.
(H) Kasano a naisardeng ti panagturayda? Kasanotayo nga ammo a saan pay a naisubli dayta a panagturay idi adda ni Jesus ditoy daga?—Basaen ti Lucas 21:24.
(I) Kaano ken sadino a naisubli dayta a panagturay?
MAIKADUA A KAITUNGPALAN
Panagturay
• (G) Dagiti ari ti Israel a mangirepresentar iti panagturay ti Dios
Naisardeng ti panagturay
• (H) Nadadael ti Jerusalem, ket nagsardeng ti panangituray dagiti ari ti Israel iti 2,520 a tawen
Naisubli ti panagturay
• (I) Nangrugi a nagturay ni Jesus idiay langit kas Ari ti Pagarian ti Dios
Kasano kapaut ti pito a panawen?
Makatulong kadatayo ti dadduma a paset ti Biblia tapno maawatantayo ti dadduma pay a pasetna. Kas pagarigan, ibaga ti libro ti Biblia nga Apocalipsis a ti tallo ket kagudua a panawen ket 1,260 nga aldaw. (Apocalipsis 12:6, 14) Isu a ti pito a panawen ket mamindua dayta a bilang, wenno 2,520 nga aldaw. No dadduma, iti Biblia, ti maysa nga aldaw ket tumukoy iti maysa a tawen. (Ezekiel 4:6) Kasta ti pito a panawen a nadakamat iti libro a Daniel—irepresentarda ti 2,520 a tawen.
5. Nagbaliw ti lubong sipud 1914
Impakpakauna ni Jesus dagiti kasasaad ti lubong a nalawag a makita inton agturayen kas Ari. Basaen ti Lucas 21:9-11, sa pagsaritaan daytoy a saludsod:
Ania kadagita a kasasaad ti nakitkita wenno nangnangngegmon?
Imbaga ni apostol Pablo no anianto ti ug-ugali dagiti tattao iti maudi nga al-aldaw ti turay ti tao. Basaen ti 2 Timoteo 3:1-5, sa pagsaritaan daytoy a saludsod:
Ania kadagitoy nga ugali ti makitkitamon kadagiti tattao ita?
6. Ania koma ti epekto kadatayo ti panagturay ti Pagarian ti Dios?
Basaen ti Mateo 24:3, 14, sa pagsaritaan dagitoy a saludsod:
Ania nga importante a trabaho ti mangipakita nga agturturayen ti Pagarian ti Dios?
Kasanoka a makipaset iti daytoy a trabaho?
Agturturayen ti Pagarian ti Dios ken dandaninan iturayan ti intero a daga. Basaen ti Hebreo 10:24, 25, sa pagsaritaan daytoy a saludsod:
Ania ti aramiden ti tunggal maysa kadatayo bayat a “makitkitayo nga umas-asidegen ti aldaw”?
No adda naammuam a makatulong ken mangsalbar iti biag ti dadduma, ania ti aramidem?
NO ADDA AGSALUDSOD: “Apay a sangkaibaga dagiti Saksi ni Jehova ti 1914?”
Ania ti makunam?
SUMARIO
Paneknekan dagiti padto iti Biblia, kronolohia, ken kasasaad iti lubong nga agturturayen ti Pagarian ti Dios. Ipakpakitatayo a patientayo dayta no ikasabatayo dayta ken umatendertayo kadagiti gimong.
Rebiu
Ania ti napasamak idi nagpatingga ti pito a panawen a naipakpakauna iti libro ti Biblia a Daniel?
Ania ti nangkombinsir kenka a nangrugi nga agturay ti Pagarian ti Dios idi 1914?
Kasanom a maipakita a patiem nga agturturayen ti Pagarian?
AGDISKOBREKA PAY
Kitaem no ania ti ibaga dagiti historian ken dadduma pay a tattao maipapan kadagiti panagbalbaliw iti lubong sipud idi 1914.
“No Kaano a Bigla a Nagrakaya ti Moralidad” (Agriingkayo!, Abril 2007)
Basaem no kasano a ti padto iti Mateo 24:14 binalbaliwanna ti biag ti maysa a lalaki.
“Baseball ti Kapatgan Idi Kaniak!” (Ti Pagwanawanan No. 3 2017)
Kasanotayo nga ammo a ti padto iti Daniel kapitulo 4 ket tumukoy iti Pagarian ti Dios?
“Kaano a Nangrugi nga Agturay ti Pagarian ti Dios? (Paset 1)” (Ti Pagwanawanan, Oktubre 1, 2014)
Ania ti mangipakita a ti “pito a panawen” a nadakamat iti Daniel kapitulo 4 ket nagpatingga idi 1914?
“Kaano a Nangrugi nga Agturay ti Pagarian ti Dios? (Paset 2)” (Ti Pagwanawanan, Nobiembre 1, 2014)
a Kitaen ti maudi a dua nga artikulo iti seksion nga Agdiskobreka Pay iti daytoy a leksion.