Disiembre

Adda kadi pannakabalin ni Jehova a mangpagungar kadagiti natay? Sigurado nga adda! Isu “ti Mannakabalin-amin.” (Apoc. 1:8) Talaga ngarud a kabaelanna a pukawen ti aniaman a kabusor, uray ni patay. (1 Cor. 15:26) Ti maysa pay a rason nga ammotayo a kabaelan ti Dios a pagungaren dagiti natay ket awan limitasion ti memoriana. Awaganna ti amin a bituen iti naganda. (Isa. 40:26) Kasta met, malaglagipna dagiti natayen. (Job 14:13; Luc. 20:38) Nalakana laeng a malagip uray dagiti kabassitan a detalye maipapan kadagiti pagungarennanto, agraman ti langa ken personalidadda, dagiti kapadasanda iti biag, ken memoriada. Talaga a mamatitayo iti kari ni Jehova a panagungar iti masanguanan gapu ta ammotayo a kayatna a tungpalen dayta ken adda pannakabalinna a mangtungpal iti dayta. Kitaentayo ti maysa pay a rason a patientayo ti panagungar a kari ti Dios: Addan dagiti pinagungar ni Jehova. Idi panawen ti Biblia, inikkanna iti pannakabalin ti dadduma a matalek a lallaki, a pakairamanan ni Jesus, a mangpagungar kadagiti natay. w23.04 9-10 ¶7-9

No nataktika ken naalumamay ti pannakisaritatayo, mabalin a kaykayat dagiti tattao ti dumngeg ken makisarita kadatayo. Siempre, no ti laeng kayat ti maysa ket makidebate wenno mangkritikar kadagiti patpatientayo, saanen a kasapulan nga ituloytayo pay ti makisarita kenkuana. (Prov. 26:4) Ngem saan met a kasta ti amin. Baka ad-adu pay ketdi ti mayat a dumngeg. Talaga a dakkel ti maitulongna no sursuruentayo ti agbalin a naalumamay. Ikararagmo ken Jehova a pabilgennaka nga agtalinaed a naalumamay no sungsungbatam dagiti kontrobersial a saludsod wenno di nainkalintegan a panangkritikar. Laglagipem a no naalumamayka, malapdam ti apa uray no agduma dagiti opinionyo. Ket no naalumamay ken addaan panagraem ti sungbatmo, baka matignaymo pay ketdi dagiti dumdumngeg a mangbaliw iti opinionda maipapan kadatayo ken kadagiti kinapudno iti Biblia. “Kanayon [koma] a nakasaganakayo a mangidepensa” kadagiti patpatienyo ket “aramidenyo dayta buyogen ti kinaalumamay ken nauneg a panagraem.” (1 Ped. 3:15) Wen, nabilegka no naalumamayka! w23.09 19 ¶18-19

Kitaentayo ti uppat a pamay-an a maipakitatayo ti kinaanus. Umuna, ti naanus ket nabannayat nga agpungtot. Ikagumaanna ti agtalinaed a kalmado ken saan nga agibales no makapungtot wenno mais-stress. (Ex. 34:6) Maikadua, ti naanus ket kalmado nga agur-uray. No napapaut nga aguray ti naanus ngem iti ekspektarenna, ikagumaanna ti agtutor wenno saan a masuron. (Mat. 18:​26, 27) Maikatlo, ti naanus ket saan nga agap-apura. No adda napateg nga aramiden ti naanus, dina ap-apuraen nga irugi wenno ileppas dayta. Mangiwaya ketdi iti umdas a tiempo a mangiplano iti aramidenna. Isu nga adda umdas a tiempona a mangaramid a naimbag iti dayta. Maikapat, ikagumaan ti naanus nga ibturan dagiti suot a saan nga agrekreklamo. Ti naanus aramidenna ti amin a kabaelanna tapno agtultuloy nga agibtur bayat nga agtaltalinaed a positibo. (Col. 1:11) Kas Kristiano, masapul nga ipakitatayo ti kinaanus kadagita a pamay-an. w23.08 20-21 ¶3-6

Ti maysa a napateg a rason a masapul a salaknibantayo ti simboliko a pusotayo ket suksukimaten dayta ni Jehova. Kayatna a sawen nga ad-adu ti makitana ngem iti makitkita ti dadduma ken ammona ti talaga a kinataotayo. Ayatennatayo no kanayon a panunotentayo ti pammagbagana a makatulong kadatayo nga agbiag nga agnanayon. (Juan 4:14) Iti kasta, ditay madangran iti nagdakes a moralidad ken kinaulbod ni Satanas ken ti lubongna. (1 Juan 5:​18, 19) Bayat a sumingsingedtayo ken Jehova, dumakdakkel ti panagayat ken panagraemtayo kenkuana. Ditay kayat a saktan ti rikna ti Amatayo, isu a kaguratayo uray ti mismo a panangpanunot iti panagaramid iti basol. Ni Marta a maysa a sister a taga-Croatia ket nasulisog nga agaramid iti immoralidad. Insuratna: “Narigatanak idi nga agpanunot a naimbag ken manglaban iti tarigagayko a temporario a mangtagiragsak iti basol. Ngem prinotektarannak ti panagbuteng ken Jehova.” Kasano a nakatulong kenkuana ti panagbuteng iti Dios? Imbaga ni Marta a pinampanunotna dagiti dakes a resulta ti di umiso a desision. Maaramidtayo met dayta. w23.06 20-21 ¶3-4

Ammo ni Jesus a panggep ni Jehova a masantipikar ti naganna, a mapaneknekan a kinaulbod ti amin a pammadakes kenkuana. Dayta ti rason nga insuro ti Apotayo kadagiti pasurotna nga ikararagda: “Amami nga adda iti langit, masantipikar koma ti naganmo.” (Mat. 6:9) Ammo ni Jesus a dayta ti kadakkelan nga isyu a nakairamanan ti amin a parsua. Kadagiti amin a masirib a parsua iti uniberso, ni Jesus ti kadakkelan ti naaramidan iti panangsantipikar iti nagan ni Jehova. Ngem idi naaresto ni Jesus, ania a basol ti inyakusar kenkuana dagiti bumusbusor? Pinadakesna kano ti Dios! Ammo la ketdi ni Jesus a ti panangpardaya wenno panangpadakes iti nasantuan a nagan ti Amana ti kadadagsenan a basol. Nadanagan unay ta amangan no maidarum ken masentensiaan isuna iti kasta a krimen. Baka dayta ti kangrunaan a rason a ‘nariribukan unay’ ni Jesus, sumagmamano nga oras sakbay a naaresto.—Luc. 22:​41-44. w24.02 11 ¶11

Iti lumba ti biag, masapul a da Jehova ken Jesus ti ad-adda nga ayatentayo ngem kadagiti kapamiliatayo. (Mat. 10:37) Ngem dina kayat a sawen daytoy a mabalin a baybay-antayo dagiti obligasiontayo iti pamiliatayo a kasla ket dagitoy ti manglapped kadatayo a mangparagsak iti Dios ken ni Kristo. Imbes ketdi, tapno maparagsaktayo ti Dios ken ni Kristo, masapul a tungpalentayo dagiti responsabilidadtayo iti pamiliatayo. (1 Tim. 5:​4, 8) Naragragsaktayo no aramidentayo dayta. Ammo ngamin ni Jehova a naragsak dagiti pamilia no agin-innayat ken agrinrinnaem ti agassawa, no ay-ayaten ken sansanayen dagiti nagannak dagiti annakda, ken no agtultulnog dagiti annak kadagiti nagannakda. (Efe. 5:33; 6:​1, 4) Aniaman ti papelmo iti pamilia, agtalekka iti sirib manipud iti Biblia imbes nga agpannurayka iti emosionmo, kulturam, wenno iti ibagbaga dagiti maibilbilang nga eksperto. Usarem a naimbag dagiti publikasiontayo a naibatay iti Biblia. Naglaon dagitoy kadagiti praktikal a suhestion no kasano a mayaplikar dagiti prinsipio ti Biblia. w23.08 28 ¶6-7

Masapul nga agsursuro ti maysa a Kristiano a babai kadagiti praktikal a paglaingan. Bayat nga ubing pay, adda dagiti paglaingan a masursurona a makatulongto kenkuana iti intero a panagbiagna. Kas pagarigan, sursuruem ti agbalin a nalaing nga agbasa ken agsurat. Iti dadduma a kultura, saan a maibilang a napateg a paglaingan a sursuruen dagiti babbai ti panagbasa ken panagsurat. Ngem napateg dayta para iti amin a Kristiano. (1 Tim. 4:13) Isu nga uray narigat, ikagumaam a sursuruen tapno lumaingka nga agbasa ken agsurat. Ania dagiti pagsayaatanna? Makatulong dagita tapno makabirokka ken makapagtultuloyka iti trabaho. Nalalaingkanto met nga agadal ken mangisuro iti Sao ti Dios. Kangrunaan iti amin, sumingedka ken Jehova bayat a basbasaem ken ut-utobem ti Saona.—1 Tim. 4:15. w23.12 20-21 ¶10-11

Agpatulongka ken Jehova tapno malabanam ti sulisog. Kas imperpekto, masapul a kanayon a labanantayo ti pannakasulisog nga agaramid iti dakes. Ar-aramiden ni Satanas ti amin a kabaelanna tapno lalo pay a marigatantayo a mangaramid iti dayta. Ti maysa a pamay-anna ket sabidonganna ti isiptayo babaen kadagiti dakes a paglinglingayan. Dagita ti mangpunno iti isiptayo iti narugit a panagpampanunot. Kas resultana, agbalintayo a narugit iti imatang ni Jehova ken posible a makaaramidtayo iti nadagsen a basol. (Mar. 7:​21-23; Sant. 1:​14, 15) Kasapulantayo ti tulong ni Jehova tapno malabanantayo ti sulisog nga agaramid iti dakes. Inraman ni Jesus daytoy a kiddaw iti pagtuladan a kararag: “Dinakami iyeg iti sulisog, ken isalakannakami iti daydiay managdakdakes.” (Mat. 6:13) Kayatnatayo a tulongan ni Jehova. Ngem masapul nga agpatulongtayo kenkuana. Masapul met nga aramidentayo dagiti inkararagtayo. w23.05 6-7 ¶15-17

No ipateg ti agassawa ti pannakigayyemda iti nailangitan nga Amada, kanayon a nakasaganada a mangsurot kadagiti balakadna, a makatulong tapno maliklikan ken mapagballigianda dagiti problema a mabalin a mangpalamiis iti ayatda iti maysa ken maysa. Ikagkagumaan met dagiti naespirituan a tattao a tuladen ni Jehova ken kultibaren dagiti kualidadna, kas iti kinaimbag, kinaanus, ken kinamanangpakawan. (Efe. 4:32–5:1) No ipakpakita ti agassawa dagita a kualidad, nalaklaka nga umuneg ti panaginnayatda. Imbaga ti sister nga agnagan Lena a naasawaan iti nasuroken a 25 a tawen, “Nalaklaka nga ayaten ken respetuen ti naespirituan a tao.” Usigentayo ti maysa a pagarigan iti Biblia. Idi nangpili ni Jehova iti agassawa nga agbalin a nagannak ti Mesias, da Jose ken Maria ti pinilina manipud iti adu a kaputotan ni David. Apay? Addaanda ngamin iti nasinged a personal a relasion ken Jehova, ket ammo ni Jehova a ti panagayatda kenkuana ti ipangpangrunada iti panagasawada. w23.05 21 ¶3-4

Agpayso a perpekto ti lidertayo a ni Jesus. Ngem saan a perpekto dagiti us-usarenna a mangidaulo kadatayo ditoy daga. Baka marigatantayo nga agtulnog kadakuada lalo no ditay kayat nga aramiden dagiti ipapaaramidda. Adda met idi instruksion a saan a kayat a suroten ni apostol Pedro idi damo. Idi binilin ti maysa nga anghel a mangan kadagiti animal a maibilang a narugit iti Mosaiko a Linteg, nagkedked ni Pedro—saan la a namnaminsan, no di ket namitlo! (Ara. 10:​9-16) Apay? Marigatan a mangsurot iti baro nga instruksion ta saanna a nakairuaman nga aramiden dayta. Nupay kasta, nagtulnog ni apostol Pablo idi binilin dagiti Kristiano a panglakayen iti Jerusalem a mangikuyog iti uppat a lallaki iti templo ken dalusanna ti bagina maitunos iti Linteg kas ebidensia nga agtultulnog isuna iti Linteg. Ammo ni Pablo a saanen a masapul a suroten dagiti Kristiano ti Linteg ken awan ti dakes nga inaramidna. Kaskasdi nga “inkuyog[na] dagiti lallaki iti sumaganad nga aldaw ket dinalusanda ti bagida sigun iti Linteg.” (Ara. 21:​23, 24, 26) Nakatulong ti kinatulnog ni Pablo tapno agkaykaysa ti kongregasion.—Roma 14:​19, 21. w23.10 10 ¶15-16

Baka saanmo a mapanunot a ti panagbuteng ket napateg a kualidad iti nasayaat a panaggayyem. Ngem dagidiay kayatda ti agbalin a nasinged a gayyem ni Jehova masapul nga “agbuteng kenkuana.” Kasanoman kabayagtayon nga agserserbi ken Jehova, masapul a mantenerentayo amin ti umiso a panagbuteng kenkuana. Ngem ania ti kaipapanan ti panagbuteng iti Dios? No ti maysa a tao ket umiso ti panagbutengna iti Dios, ay-ayatenna Isuna ken dina kayat ti mangaramid iti aniaman a mangdadael iti relasionna Kenkuana. Kasta ti “panagbuteng [ni Jesus] iti Dios.” (Heb. 5:7) Saanna a pulos a narikna ti sobra a panagbuteng ken Jehova. (Isa. 11:​2, 3) Imbes ketdi, ay-ayatenna la unay ti Amana ken kayatna ti agtulnog kenkuana. (Juan 14:​21, 31) Kas ken Jesus, mariknatayo ti nauneg a panagraem ken panagamanga ken Jehova ta naayat, masirib, patas, ken mannakabalin. Ammotayo met nga ay-ayatennatayo ni Jehova ken maapektaran iti reaksiontayo iti panangiwanwanna. Mabalin a masaktantayo ti rikna ni Jehova wenno maparagsaktayo ti pusona.—Sal. 78:41; Prov. 27:11. w23.06 14 ¶1-2; 15 ¶5

Idi bimmileg ni Ari Uzias, nalipatanna a ni Jehova ti Paggapgapuan ti bileg ken kinarang-ayna. Ania ti masursurotayo? Masapul a laglagipentayo a ni Jehova ti mangipapaay kadagiti bendision ken pribilehiotayo. Imbes nga ipagpannakkeltayo dagiti nagapuanantayo, masapul a ni Jehova ti padayawantayo iti amin a maar-aramidantayo. (1 Cor. 4:7) Masapul a sipapakumbaba a bigbigentayo nga imperpektotayo ken kasapulantayo ti disiplina. Insurat ti maysa a brother nga agtawen iti nasurok a 60: “Nasursurok ti agbalin a saan unay nga arsagid. No adda mangdillaw kadagiti kamali a pasaray maar-aramidak, ikagkagumaak ti agbalbaliw ken paspasayaatek ti panagserbik ken Jehova.” Kinapudnona, no agbutengtayo ken Jehova ken agtalinaedtayo a napakumbaba, nasayaat ti pagbalinanto ti biagtayo.—Prov. 22:4. w23.09 10 ¶10-11

Masapul idi nga agibtur dagiti nagkauna a Kristiano. Malaksid kadagiti problema a gagangay idi iti amin a tao, adda pay dagiti suot a napasaranda. Adu kadakuada ti naidadanes. Indadanes ida dagiti Judio a lider ti relihion, dagiti agtuturay iti Roma, ken uray dagiti mismo a kapamiliada. (Mat. 10:21) Iti met uneg ti kongregasion, adda dagiti tiempo a masapul a labananda ti impluensia dagiti apostata ken dagiti mamagsisina a pannursuroda. (Ara. 20:​29, 30) Ngem nakapagibtur dagidiay a Kristiano. (Apoc. 2:3) Kasano? Pinampanunotda dagiti naisurat iti Kasuratan nga ulidan iti panagibtur kas ken Job. (Sant. 5:​10, 11) Inkararagda met iti Dios a pabilgenna ida. (Ara. 4:​29-31) Ken nagpokusda kadagiti nasayaat a resulta ti panagibturda. (Ara. 5:41) Makapagibturtayo met no regular nga adalen ken utobentayo dagiti ulidan iti panagibtur a naisurat iti Sao ti Dios ken kadagiti publikasiontayo. w23.07 3 ¶5-6

Saan a mauma da Jehova ken Jesus kadatayo. Kalpasan nga inlibak ni apostol Pedro ni Kristo, masapul a mangaramid iti napateg a desision. Sumardeng kadi wenno itultuloyna ti agporsegi kas adalan ni Kristo? Impakaasi ni Jesus ken Jehova a saan koma a kumapuy ti pammati ni Pedro. Imbaga ni Jesus ken Pedro dayta a kararagna ken nagtalek nga inton agangay, mapabileg ni Pedro dagiti kakabsat. (Luc. 22:​31, 32) Kada malagip ni Pedro dagita nga imbaga ni Jesus, sigurado a maparparegta! No masapul met a mangaramidtayo kadagiti napateg a desision, mabalin nga usaren ni Jehova dagiti naayat a pastor tapno paregtaendatayo nga agtalinaed a matalek. (Efe. 4:​8, 11) No impaay ni Jehova dagiti material a kasapulan ni Pedro ken ti dadduma pay nga apostol, ipaayna met dagita no iyun-unatayo ti ministerio iti biagtayo. w23.09 24-25 ¶14-15

Makitkita ni Jehova uray ti kabassitan a kinaimbag nga ar-aramidentayo para iti dadduma. Ibilangna dayta kas napateg a sakripisio ken kas utang a bayadannanto. No maysaka idi a ministerial nga adipen wenno panglakayen, malaglagip ni Jehova dagiti inaramidmo ken ti ayat a nangtignay kenka a mangaramid kadagita. (1 Cor. 15:58) Makitkitana met ti ayat nga agtultuloy nga ipakpakitam. Kayat ni Jehova nga amintayo ket umuneg ti ayattayo kenkuana ken iti sabsabali. Mapaunegtayo ti ayattayo ken Jehova no regular a basaentayo ti Saona, utobentayo dayta, ken makisaritatayo kenkuana babaen ti kararag. Mapaunegtayo met ti ayattayo kadagiti kakabsat no tulongantayo ida kadagiti praktikal a pamay-an. Bayat nga umun-uneg ti ayattayo, sumingsingedtayo ken Jehova ken iti naespirituan a pamiliatayo. No aramidentayo dagita, agnanayon a matagiragsaktayo dagita a panaggagayyem! w23.07 10 ¶11; 11 ¶13; 13 ¶18

Masapul nga agdesision ti tunggal Kristiano no kasanona nga aywanan ti salun-atna. No agpili iti pamay-an ti panangagas, masapul a surotenna dagiti espesipiko a linteg ti Biblia nga adaywanna ti dara ken espiritismo. (Ara. 15:20; Gal. 5:​19, 20) Ngem iti dadduma a banag, agdepende dayta iti personal a desision ti maysa. Mabalin a kombinsidotayo a makatulong wenno delikado ti maysa nga espesipiko a pamay-an ti panangagas. Ngem masapul a respetuentayo ti kalintegan dagiti kakabsat nga agdesision para iti bukodda a salun-at. Masapul ngarud a laglagipentayo dagitoy a punto: (1) Ti laeng Pagarian ti Dios ti interamente ken permanentento a mangpaimbag. (Isa. 33:24) (2) Masapul a “kombinsido unay” ti tunggal Kristiano no ania ti kasayaatan para kenkuana. (Roma 14:5) (3) Saantayo nga ukomen ti dadduma wenno mangaramid kadagiti pakaitibkolanda. (Roma 14:13) (4) Ipakita dagiti Kristiano ti ayat ken napatpateg kadakuada ti panagkaykaysa ti kongregasion ngem kadagiti personal a desisionda.—Roma 14:​15, 19, 20. w23.07 24 ¶15

Ay-ayatem kadi unay ni Jehova? Sigurado a kasta! Sipud idi un-unana, adun a tattao ti mangay-ayat ken Jehova. (Sal. 104:​33, 34) Adu ti nagsakripisio tapno makapagdaydayawda ken Jehova. Kasta la ketdi dagiti Nazareo, wenno dagiti naidedikar, iti nagkauna nga Israel. Maibagay daytoy a termino kadagiti naregta nga Israelita a nangaramid kadagiti sakripisio tapno makapagserbida ken Jehova iti espesial a pamay-an. Iti Mosaiko a Linteg, mabalin a pilien ti maysa a lalaki wenno babai ti mangaramid iti espesial a kari ken Jehova nga agbiag kas Nazareo iti sumagmamano a tiempo. (Num. 6:​1, 2) Dayta a kari, wenno serioso a sapata, kaipapananna nga adda surotenda a pagannurotan a saan a masapul a suroten ti dadduma nga Israelita. Apay ngarud a pilien ti maysa nga Israelita ti agbalin a Nazareo? Maigapu la ketdi dayta iti nauneg nga ayatna ken Jehova ken iti naimpusuan a panagyamanna iti adu a bendisionna.—Deut. 6:5; 16:17. w24.02 14 ¶1-2

Iti Biblia, ti Hebreo a sao para iti “napudno,” wenno “napudno nga ayat,” ket ti nadekket ken naayat a pannakaisinggalut a masansan a nausar a mangdeskribir iti ayat ti Dios kadagiti adipenna. Dayta met la a sao ti nausar a mangdeskribir iti ayat nga ipakpakita dagiti adipen ti Dios. (2 Sam. 9:​6, 7) Posible nga agbalintayo nga ad-adda a napudno bayat ti panaglabas ti tiempo. Kitaentayo no kasano a pinaneknekan ni Daniel nga agpayso dayta. Nasubok ti panagbalin ni Daniel a napudno ken Jehova iti intero a panagbiagna. Ngem ti kakaruan ket idi agtawen iti nasurok a 90. Ni Daniel ket kagurgura dagiti opisial ti ari ken saanda a raraemen ti Dios a pagdaydayawanna. Isu nga implanoda a mapapatay ni Daniel. Nangaramidda iti bilin a mangsubok ken Daniel no agbalin a napudno iti Diosna wenno iti ari. Ti laeng masapul nga aramiden ni Daniel tapno mapaneknekanna ti panagbalinna a napudno iti ari ket isardengna ti agkararag ken Jehova iti 30 nga aldaw. Saan a kayat ni Daniel ti agkompromiso.—Dan. 6:​12-15, 20-22. w23.08 5 ¶10-12

Kayat ni Jehova a pagreggetantayo nga ipakita ti ayat kadagiti kakabsat. No saan a nasayaat ti panangtrato kadatayo ti maysa a kabsat, saantayo koma nga ipagarup nga inggagarana a saktannatayo. Panunotentayo nga ikagkagumaanna met nga aramiden ti umiso iti imatang ni Jehova. (Prov. 12:18) Ay-ayaten ti Dios dagiti matalek nga adipenna uray agkamalida. Uray no makaaramidtayo kadagiti kamali, kayatna latta nga agbalintayo a gayyemna ken saan nga agipempen iti sakit ti nakem. (Sal. 103:9) Nagpateg ngarud a tuladentayo ti manangpakawan nga Amatayo! (Efe. 4:32–5:1) Laglagipentayo met a bayat nga umas-asideg ti panungpalan, masapul nga agtalinaedtayo a nasinged kadagiti kakabsat. Ekspektarentayo a kumaro pay ti pannakaidadanes. Mabalin a maibaludtayto pay ketdi gapu iti pammatitayo. No mapasamak dayta, ad-adda a kasapulantayto dagiti kakabsat.—Prov. 17:17. w24.03 15-16 ¶6-7

Naglaon ti Biblia kadagiti salaysay maipapan kadagiti agtutubo a nagbalin a gagayyem ni Jehova, inayatna, ken simmayaat ti nagbalinan ti biagda. Ni David ti maysa kadakuada. Ubing pay idi rinugianna ti agserbi ken Jehova. Idi agangay, nagbalin a matalek nga ari. (1 Ar. 3:6; 9:​4, 5; 14:8) No adalem ti biag ni David, maparegtaka nga agserbi a simamatalek ken Jehova. Wenno mabalin met a pagbalinem a proyekto iti panagadalmo ti ulidan ni Marcos wenno ni Timoteo. Maammuamto a sipud kinaubingda, nagserbida a simamatalek ken Jehova ken intultuloyda nga inaramid dayta. Gapu iti dayta, naparagsakda ti Dios. Nakadepende kadagiti ar-aramidem ita ti pagbalinan ti biagmo. Iturong ni Jehova dagiti addangmo no agtalekka kenkuana, saan nga iti bukodmo a pannakaawat. Agbalin a naragsak ken makapnek ti biagmo. Laglagipem, ipatpateg ni Jehova dagiti ar-aramidem para kenkuana. Adda pay kadi nasaysayaat a pangusaram iti biagmo ngem iti panagserbi iti nadungngo a nailangitan nga Amatayo? w23.09 13 ¶18-19

Ammo ni apostol Pablo nga imperpekto dagiti kapammatianna. Kas pagarigan, isu ket hinusgaran ti dadduma a kakabsat idi mangrugin a makitimpuyog iti kongregasion. (Ara. 9:26) Idi agangay, adda met dagiti mangperperdi iti reputasionna. (2 Cor. 10:10) Nakita met ni Pablo a nagkamali ti maysa a panglakayen a mabalin a nakaitibkolan ti dadduma. (Gal. 2:​11, 12) Ken naupay met unay ni Pablo gapu iti inaramid ti maysa a nadekket a gayyemna a ni Marcos. (Ara. 15:​37, 38) Mabalin koma nga impalubos ni Pablo a dagita a situasion ti nanglapped kenkuana a makikadua kadagiti nakasair iti riknana. Ngem intultuloyna latta nga impateg dagiti kakabsat ken nagtalinaed nga aktibo iti panagserbi ken Jehova. Ania ti nakatulong ken Pablo nga agtultuloy nga agserbi ken Jehova a simamatalek? Ay-ayaten ni Pablo dagiti kakabsat. Gapu iti ayatna kadakuada, nagpokus isuna kadagiti nasayaat a kualidadda, imbes a kadagiti pagkapuyanda. Gapu met laeng iti ayat, natulongan ni Pablo a mangaramid iti insuratna a mismo nga isu ti tekstotayo ita nga aldaw. w24.03 15 ¶4-5

Adu a salaysay iti Biblia ti mangipakita iti kinapateg ti kinaalumamay. Kitaentayo ti ulidan ni Isaac. Idi nagyan idiay Gerar a teritoria dagiti Filisteo, dagiti naapal a kaarrubana ginaburanda dagiti bubon a kinali dagiti adipen ni tatangna. Imbes a makiapa ni Isaac ken ilabanna dagiti kalinteganna, inyakarna iti ad-adayo ti sangakabbalayanna ken nagkali manen kadagiti bubon. (Gen. 26:​12-18) Ngem imbaga manen dagiti Filisteo a kukuada kano ti danum iti dayta a lugar. Nupay kasta, kayat ni Isaac ti kappia, saan a makiapa. (Gen. 26:​19-25) Ania ti nakatulong kenkuana nga agtalinaed a naalumamay uray no kasla kayatda la unay a pagpungtoten? Sigurado a nakitana ti ulidan dagiti nagannakna. Adu ti nasursurona iti kinamannakikappia ni Abraham ken iti “naulimek ken naalumamay nga espiritu” ni Sara.—1 Ped. 3:​4-6; Gen. 21:​22-34. w23.09 15 ¶4

Idi dimteng ti tiempo nga inkeddeng ni Jehova, imbaonna ditoy daga ti inauna nga Anakna gapu iti ayatna. Insuro ni Jesus kadagiti tattao maipapan iti Pagarian ken intedna ti biagna tapno masubbotnatayo iti basol ken ipapatay. Kalpasan a napagungar, nagsubli idiay langit tapno agturay kas Ari ti Pagarian ti Dios. Ngem adda pay ti masapul a maammuantayo maipapan iti panggep ti Dios. Ti kangrunaan a tema ti Biblia ket ti pannakaalangon ti nagan ni Jehova bayat a tungtungpalenna ti panggepna para iti daga babaen ti Pagarianna nga iturayan ti Kristo. Saan a mabalbaliwan ti panggep ni Jehova. Impasiguradona a matungpal dayta. (Isa. 46:​10, ftn.; Heb. 6:​17, 18) Agbalinto a paraiso ti daga, ket dita nga ‘agbiagto iti agnanayon’ dagiti perpekto ken nalinteg a kaputotan da Adan ken Eva. (Sal. 22:26) Ngem adda pay aramiden ni Jehova a mangtungpal iti panggepna. Ti kangrunaan a panggepna ket pagkaykaysaenna ti amin a masirib a parsuana idiay langit ken ditoy daga. Iti kasta, amin a sibibiag ket simamatalekto nga agpasakup kenkuana kas Kangatuan nga Agturay. (Efe. 1:​8-11) Talaga a nakaskasdaaw ti nagpintas a pamay-an ni Jehova a mangtungpal iti panggepna! w23.10 20 ¶7-8

Idi nakadanon idiay Jerusalem dagiti Judio a naggapu iti Babilonia, naapektaranda iti narigat nga ekonomia ken nariribuk a kasasaad ti politika agraman ti ibubusor. Narigatan ngarud ti dadduma a mangipamaysa iti panagibangon iti templo ni Jehova. Isu a nangibaon ni Jehova iti dua a propeta a da Haggeo ken Zacarias tapno paregtaenda dagiti umili ket nakaep-epektibo ti pammaregtada. (Hag. 1:1; Zac. 1:1) Ngem dandani 50 a tawen kalpasanna, naupay manen dagiti nagsubli a Judio. Kalpasanna, manipud Babilonia, napan idiay Jerusalem ni Esdras a nalaing a parakopia ti Linteg tapno paregtaenna ti ili ti Dios nga iyun-unada ti pudno a panagdaydayaw. (Esd. 7:​1, 6) No kasano a nakatulong idi iti ili ti Dios dagiti padto da Haggeo ken Zacarias tapno agtultuloyda nga agtalek ken Jehova uray adda ibubusor, makatulong met dagita kadatayo ita tapno agtultuloytayo nga agtalek iti tulong ni Jehova uray narigat ti biag.—Prov. 22:19. w23.11 14-15 ¶2-3

Kasano a mayebkastayo ti ayattayo kadagiti kapammatiantayo? Ti maysa a pamay-an ket liwliwaentayo ida. No mannakipagriknatayo, ‘maitultuloytayo a liwliwaen ti maysa ken maysa.’ (1 Tes. 4:18) Kasanotayo a mapagtalinaed a nabileg ti ayattayo iti maysa ken maysa? Babaen ti panangaramidtayo iti amin a kabaelantayo a mangpakawan kadagiti pagkamkamalian ti sabsabali. Apay a nangnangruna a napateg ita nga ipakitatayo ti ayat iti maysa ken maysa? Kitaentayo ti rason nga inted ni Pedro: “Asidegen ti panungpalan ti amin a banag. Gapuna, . . . nauneg koma ti ayatyo iti maysa ken maysa.” (1 Ped. 4:​7, 8) Bayat nga umas-asideg ti panagpatingga daytoy dakes a lubong, ania ti ekspektarentayo? Imbaga ni Jesus maipapan kadagiti pasurotna: “Guraendakayto ti amin a nasion gapu iti naganko.” (Mat. 24:9) Tapno maibturantayo ti kasta a gura, masapul nga agtalinaedtayo nga agkaykaysa. No aramidentayo dayta, mapaay ti panangikagumaan ni Satanas a mamagsisina kadatayo ta nadekkettayo iti maysa ken maysa gapu iti ayat.—Fil. 2:​1, 2. w23.11 13 ¶18-19

Nakabilbileg dagiti kinapudno iti Sao ti Dios. Nagsasayaat ti mapasamak no isurotayo kadagiti tattao ti maipapan ken Jehova ken iti kinasiasinona. In-inut a maikkat dagiti kinaulbod nga ibagbaga ni Satanas a nangbulsek kadakuada isu a mangrugi metten a makitada dagiti makitkitatayo a nagsayaat a kualidad ti naayat nga Amatayo. Masdaawda iti awan limitasionna a pannakabalinna. (Isa. 40:26) Masursuroda ti agtalek kenkuana ta perpekto ti hustisiana. (Deut. 32:4) Adu met ti masursuroda iti awan kapadana a siribna. (Isa. 55:9; Roma 11:33) Maliwliwada pay no maammuanda nga isu ti personipikasion ti ayat. (1 Juan 4:8) Bayat a sumingsingedda ken Jehova, agbalin a napaypayso kadakuada ti namnamada a biag nga agnanayon kas annakna. Anian a nagsayaat a pribilehio ti tumulong kadagiti tattao a suminged iti Amatayo! No aramidentayo dayta, ibilangnatayo ni Jehova kas ‘katrabahuanna.’—1 Cor. 3:​5, 9. w24.02 12 ¶15

No maysaka a mayad-adalan iti Biblia wenno no Saksi dagiti nagannakmo, pampanunotem met kadin ti agpabautisar? Nagsayaat dayta a kalatmo! Ngem sakbay nga agpabautisarka, masapul nga idedikarmo ti biagmo ken Jehova. Kasanom nga idedikar ti biagmo ken Jehova? Ikarim kenkuana iti kararag nga isuna laeng ti pagdaydayawam ken iyun-unam iti biagmo. Ikarkarim ken Jehova nga itultuloymo nga ayaten isuna “iti amin a pusom ken amin a kararuam ken amin a panunotmo ken amin a pigsam.” (Mar. 12:30) No agdedikarka, aramidem dayta a siksika ket dakayo laeng ken Jehova ti makaammo iti dayta. Iti sabali a bangir, ti bautismo ket maaramid iti publiko ken ipakita dayta iti dadduma a nagdedikarkan. Ti dedikasionmo ket maysa a sagrado a kari. Masapul nga aramidem ti inkarim, ket ekspektaren ni Jehova nga aramidem dayta.—Ecl. 5:4. w24.03 2 ¶2; 3 ¶5

Maipasango iti rigat ti amin nga agassawa. Sipaprangka nga ibaga ti Biblia a dagidiay mangasawa ket ‘agrigatto iti lasag.’ (1 Cor. 7:28) Apay? Gapu ta dagiti agassawa ket agpada nga imperpekto ken agduma ti personalidadda, agraman dagiti kayatda ken dida kayat. Mabalin nga agduma ti dimmakkelanda a kultura wenno pamilia. Baka iti panaglabas ti tiempo, rummuarto dagiti ugali a mabalin a dida nakita idi agin-innaremda pay laeng. Mabalin a mangpataud dagita kadagiti problema. Imbes nga aminenda nga adda nagkurangan ti tunggal maysa kadakuada ken agtinnulongda tapno masolbar ti problema, baka agpinnabasolda pay ketdi. Mabalin a mapanunotda payen ti agsina wenno agdiborsio. Ngem dayta kadi ti solusion? Saan. Imbilin ni Jehova kadagiti agassawa a respetuenda ti urnos ti panagasawa uray no narigat a pakibagayan ti asawada. w24.03 16 ¶8; 17 ¶11

Uray no dedikado ken bautisadokan, ti namnamam nga agbiag nga agnanayon iti daga ket agtultuloy a dumakdakkel bayat nga umad-adu ti pannakaammom ken agmatmataenganka iti naespirituan. (Heb. 5:13–6:1) Mabalin a napadasam ti proseso a nadakamat iti Roma 5:​2-4. Mabalin a nadumaduma a rigat ti nakaipasanguam. Ngem inibturam amin dagita ken nariknam nga an-anamongannaka ti Dios. Gapu ta ammom nga ay-ayatennaka ti Dios ken maragragsakan kenka, nabilbilegen ti panggapuam a talaga a maawatmo dagiti banag nga inkarina. Nabilbilegen ti namnamam ngem idi damo. Napaypayso ken napatpategen dayta kenka. Dakdakkelen ti epektona iti biagmo ta im-impluensiaanna ti amin a paset ti biagmo ken paspasayaatenna ti panangtratom iti pamiliam, panangaramidmo kadagiti desision, ken uray pay ti panangusarmo iti tiempom. Adda pay innayon ni apostol Pablo a nakapatpateg a punto maipapan iti namnama nga inted kenka ti Dios kalpasan a naawatmon ti anamongna. Impasigurado ni Pablo a matungpalto ti namnamam.—Roma 15:13. w23.12 12-13 ¶16-19

No nakaro ti pakasuotantayo, baka marigatantayo a mangkontrol iti rikna, isip, ken reaksiontayo. Baka agbaliwbaliw ti emosiontayo. Kasanonatayo a tultulongan ni Jehova no kasta ti marikriknatayo? Ipaspasiguradona a tulongannatayo nga agbalin a balanse tapno saantayo nga agdiwengdiweng. No adda bagyo, mabalin a mayallo-allon ti barko iti nadawel a baybay ket napeggad dayta. Isu nga adu a barko ti addaan kadagiti stabilizer, wenno kasla pasaplak iti agsumbangir a sikigan ti makimbaba a pasetda. Makatulong dagita tapno saan unay a mayallo-allon ti barko ket nataltalged dagiti pasahero ken mas komportable ti biahe. Ngem sa la agkurri ti sistema ti adu nga stabilizer no umab-abante ti barko. Kasta met ti ar-aramiden ni Jehova. Tulongannatayo nga agbalin a balanse ken saantayo nga agdiwengdiweng bayat nga itultuloytayo ti agserbi kenkuana a simamatalek iti tiempo ti pakasuotan. w24.01 22 ¶7-8

No mabutbutengka, isaludsodmo iti bagim, ‘Ania dagiti naaramidanen ni Jehova?’ Panunotem dagiti pinarsuana. Kas pagarigan, no “paliiwen[tayo]” no kasano nga ay-aywanan ni Jehova dagiti billit ken sabong—a saan a naparsua a kaladladawanna ken saanda a makapagdaydayaw kenkuana—bumileg ti panagtalektayo nga aywanannatayo met. (Mat. 6:​25-32) Panunotem met dagiti naaramidanen ni Jehova para kadagiti agdaydayaw kenkuana. Mabalinmo nga adalen ti maysa a karakter iti Biblia a naisangsangayan ti pammatina. Wenno mabalin a basaem ti kapadasan ti maysa nga agserserbi ken Jehova iti panawentayo. Mabalinmo met nga utoben no kasano nga inaywanannaka ni Jehova. Kasanonaka a tinulongan tapno maammuam ti kinapudno? (Juan 6:44) Kasanona a sinungbatan dagiti kararagmo? (1 Juan 5:14) Kasano nga inaldaw a magunggonaanka iti subbot ti dungdungnguenna nga Anak?—Efe. 1:7; Heb. 4:​14-16. w24.01 4 ¶6; 7 ¶17