ABINADAB

[Ti Ama ket Madadaan (Natan-ok; Naparabur)].

1. Maysa nga agnanaed iti siudad ti Kiriat-jearim iti teritoria ti Juda agarup 14 km (8.5 mi) laud nga amianan-a-laud ti Jerusalem, nga adda idi tiempo nga iti pagtaenganna ti nakaikabilan ti lakasa ti tulag.

Idi a naisang-at ti sagrado a Lakasa ti tulag manipud Bet-semes kalpasan ti pito a bulan a makadidigra a kaaddana kadagiti Filisteo, naidulin dayta iti pagtaengan ni Abinadab, ket nasantipikar ti anakna a ni Eleazar a mangbantay iti dayta. Ti Lakasa ket nagtalinaed iti daytoy a pagtaengan iti agarup 70 a tawen, agingga nga inyurnos ni David nga iyakar dayta idiay Jerusalem. Bayat nga iyak-akarda, dagus a napasag a natay ti maysa pay nga anak ni Abinadab a ni Uzzah idi gimmil-ayab ti unget ni Jehova maibusor kenkuana gapu ta sinagidna ti Lakasa a maisalungasing iti bilin iti Numeros 4:15.​—1Sm 6:20–7:1; 2Sm 6:1-7; 1Cr 13:6-10.

2. Ti maikadua nga anak ni Jesse, ken maysa kadagiti tallo nga in-inauna a kakabsat ni David a kimmuyog ken Saul a napan nakigubat kadagiti Filisteo.​—1Sm 16:8; 17:13.

3. Maysa kadagiti annak ni Ari Saul a pinapatay dagiti Filisteo idiay Bantay Gilboa.​—1Sm 31:2; 1Cr 9:39.

4. Ti ama ti maysa kadagiti 12 a diputado ni Ari Solomon a mangipapaay iti abasto a taraon. Daytoy a pannakabagi nga “anak ni Abinadab” ken naawagan met iti Ben-abinadab ket inasawana ti anak a babai ni Solomon a ni Tafat. Nadutokan a mangipaay iti taraon iti sangakabbalayan ni Solomon iti maysa a bulan iti makatawen manipud iti intero a pantok ti bantay ti Dor.​—1Ar 4:7, 11.