FEATURE

Pagpagarian iti Aglikmut ti Israel

IDI nagnaed ti nasion ti Israel iti daga nga inted ti Dios, adda iti aglikmutna ti nasnasion nga agdaydayaw kadagiti ulbod a dios. Rimmuar dagiti Israelita manipud Egipto, a sadiay dagiti animal ket pagdaydayawan dagiti tattao. Ita, iti daya ken abagatan a daya dagiti Israelita adda ti Ammon, Moab, ken Edom​—adayo a kakabagianda ngem managdaydayaw dagita kadagiti idolo. Dagiti Filisteo nga agdaydayaw iti adu a didios ti nagnaed iti tanap ti igid ti baybay iti laud. Dagiti Feniciano ti nagnanaed iti amianan ti Israel iti igid ti baybay, a karaman iti narelihiosuan nga ar-aramidda ti sodomia, bestialidad, ken panagisakripisio iti ubing. Ket iti relihion dagiti Sirio, naitampok dagiti labus a ladawan dagiti diosa a ti kinaderrepda ket ipakpakita ti langa ken tigtignayda. Tapno agtultuloy a makaay-ayo ti Israel iti imatang ni Jehova, kasapulan nga agtalinaedda a naisina iti nasnasion nga adda iti aglikmutda.

Tapno masaluadan ti Israel, impaayan ida ni Jehova iti Mosaiko a Linteg, a naibilang kas ‘mamagsina a pader’ a mamagtalinaed kadakuada a naisina kadagiti nasnasion iti aglikmut. (Efe 2:14) Saanda a makialiansa kadagita a nasion, saanda a makiinnasawa kadakuada, wenno saanda a tuladen ti relihioso nga ar-aramidda. (2Cr 16:7; 2Ar 17:13-15) No la ket agtultuloy nga agtulnog ti Israel kadagitoy a linlinteg, agtalinaedda met a nasantuan nga ili.

Nupay kasta, saan a naparitan nga agdaydayaw iti pudno a Dios ti asinoman manipud iti nasnasion iti aglikmut. Mabalinda a panawan ti idolatroso nga ar-aramidda ket agbalinda a managdaydayaw ken Jehova. “Ti Dios saan a mangidumduma.” (Ara 10:34) Bayat a pagtaltalinaeden ni Jehova a naisina ti Israel, imanmaniobrana ti panggepna tapno mabendisionanto met dagiti tattao ti amin a nasnasion.​—Ge 22:18.

[Tsart iti panid 945]

NASNASION ITI AGLIKMUT—Agraman Nainaig a Kasuratan

Ammon

Uk 10:6-9; 1Ar 11:5

Edom

2Cr 25:14, 15

Moab

Nu 22:4-7; 25:1-3;

Filistia

Uk 10:6; 16:23; 2Ar 1:2

Fenicia

1Ar 11:1, 2, 5; 16:30, 31 2Ar 3:26, 27

Siria

Uk 10:6; 2Cr 28:20-23

[Mapa iti panid 945]

MAPA: Pagpagarian iti Aglikmut ti Israel

Dakkel a Baybay

FENICIA

SIRIA

FILISTIA

Jerusalem

Asin a Baybay

AMMON

MOAB

EDOM

[Dagiti Ladawan iti panid 946]

Nagnaed dagiti Moabita iti likkalikkaong a teritoria iti daya ti Natay a Baybay. Iti Bato a Moabita (kannigid), impasindayag ni Ari Mesa ti diosna a ni Kemos ket sibabassawang a tukoyenna ni Jehova

[Ladawan iti panid 946]

Chacal ti ulona a dios ti Egipto a mangas-asikaso iti pannakaipreserba ti maysa a bangkay. Karaman met dagiti tattao, tumatayab, ken an-animal kas didios ti Egipto

[Dagiti Ladawan iti panid 946]

Dagiti Feniciano, a nagnaed iti daytoy a daga iti daya nga igid ti baybay ti Mediteraneo, nagdaydayawda iti didios a kas iti naipakita ditoy a sitatakder iti rabaw ti maysa a leon