Tulonganyo dagiti Annakyo nga Agbalin a Nasinged iti Dios
ITI basbassit pay ngem ti sangaribo a sasao, insalaysay dagiti mannurat ti Biblia ti umuna a 30 a tawtawen iti panagbiag ni Jesus. Ngem babaen iti pinulpullo a ribo a sasao, inreportda dagiti maudi a tallo ket kagudua a tawtawen. Ngamin ta ti ministerio publiko ni Jesu-Kristo—saan a ti pannakaiyanakna, ti panagubingna ken iti kinaagtutubona—ti dominante a tema dagiti pannalaysay dagiti Ebanghelio. Nupay kasta, ti ababa a panangtukoy ti Biblia kadagiti immun-una a tawtawen ni Jesus pagbalinenna a nalawag nga uray dagiti agtutubo ket mabalinda ti agbalin a nasinged iti Dios.
No lukatantayo dagiti Bibliatayo iti kapitulo 2 iti salaysay ni Lucas, masarakantayo a ni 12-anos a Jesus adda idiay templo, “a situtugaw iti tengnga dagiti mannursuro” ti linteg ti Dios. Isu ti “dumdumngeg ken agsalsaludsod kadakuada” ngem pinagsiddaawna ida iti “saririt ti isipna ken kadagiti sungbatna.” (Lucas 2:46, 47) Mainayon pay, mabasatayo a bayat nga isut’ dimmakkel iti pisikal isut’ rimmang-ay met iti kinasirib ken pannakaawat.—Lucas 2:40, 52.
Kasanotay a maawatan iti pannakaadda ni Jesus iti daytoy naespirituan a pagannayasan? Ti dadduma iti daytoy a pammadayaw ti masapul a mapan kadagiti dadakkelna. Kas Judio, obligadoda a mangsurot iti balakad ni Jehova maipapan iti panangpadakkel iti anak. Ni Moises a mammadto ti Dios ti nagkuna: “Ket dagitoy a sasao nga ibilinko kenka iti daytoy nga aldaw agyandanto ita pusom; ket isuromto a siaagawa dagitoy kadagiti annakmo ket dagitoy ti sasawemto kadakuada no situtugawka iti balaymo ken no magmagnaka iti dalan ken no agiddaka ken no bumangonka.” (Deuteronomio 6:6, 7) Awan duadua, siniguro ti Dios a ti Anakna ti naikabil iti maysa a pamilia a mangitungpal iti daytoy a balakad. Dagiti nagannak itatta rebbeng nga ipakitada met ti isu laeng nga interes kadagiti annakda. Tultulonganyo ida aya a mangammo ken Jehova ken tarigagayan nga agserbi kenkuana?
“Manipud Kinaubingmo”
Ti naespirituan a panagsanay ket saan a maysa a banag a siuumiso a maitantan agingga a dagiti ubbing ket natataengandan. Ni Timoteo, kas pangarigan, dimmakkel a nagbalin a maysa a naisangsangayan a Kristiano. Ngem isu ti nasursuruan iti Nasantuan a Kasuratan “manipud kinaubingmo.” (2 Timoteo 3:15) Maitunos iti daytoy, dadduma a Kristiano nga inna ti napalpaliiw a dawdawatenda a sipipigsa ti pammendision ni Jehova sakbay nga itedda kadagiti maladaga iti susoenda a botilia. Saan ngarud a pagsidsiddaawan a dagitoy a maladaga ti saan a nagbayag kunada “amen” iti panagpatingga ti kakasta a karkararag! Isu daytoy ti bassit nga umuna nga addang iti panangtulong kadakuada a mangpatanor iti panangipateg kadagiti isuamin a naespirituan ken namaterialan a sagsagut nga aw-awatenda manipud iti Dios.
Ni Michael ken ni Sephorah (pito ken walo ti tawenda) ti nangipakita iti bungbunga ti nasayaat a panangsanay dagiti dadakkelda. Naminsan, idi isuda ken dagiti dadakkelda ti napanda a nagbiahe, nagreggetanda iti idadawat iti Dios maipaay iti panangiwanwan ken pannalaknibna. Ket idi makasangpetdan idiay papananda dagiti ubbing nalagipda ti nagyaman ken Jehova a maipaay iti natalged nga isasangpetda.
Ni Christian ken ni Eric (tallo ken innem ti tawenda) ti addada iti maysa a parke a kadua dagiti dadakkelda. Kas mapaspasamak no maminsan kadagiti bassiusit, napukawda. Kaano a nasarakanda ida dagiti dadakkelda? Apaman a dagitoy babassit nga ubbing ket nagkararagda ken Jehova a tulonganna ida!
Adu a langa ti panangsanay iti maited a sibaballigi bayat a dagiti ubbing ti nakaub-ubingda pay. Iti maysa a dakkel a Nakristianuan nga asamblea idiay Belgium, ni tallot’-tawenna a Gino ti naipan idiay plataporma ket pinagtugawda iti maysa a nangato a pagtugawan. Isut’ sinaludsodan ti espiker nga inagan iti sanguanan dagiti amin nga agdengdengngeg ti nagnagan amin dagiti 66 a libro ti Biblia. Maaramidanyo aya daytoy? Bueno, mabalinan dayta ni Gino! Isut’ nagtultuloy a rimmang-ay iti sidong ti panangsanay dagiti dadakkelna ket itan isut’ agserserbi kas maysa nga agdaldaliasat a manangaywan dagiti Saksi ni Jehova. Siempre, saan amin nga ubbing ket parepareho ti abilidadda a makaadal, ngem daytoy iyilustrarna iti gunggona iti panangted kadakuada iti naespirituan a pannursuro.
Uray met dagiti babassit nga ubbing mabalin a maikkanda iti panangsagrap kadagiti doktrina ti Biblia. Iti maysa nga eskuelaan a nursery idiay Grand Duchy iti Luxembourg, ni uppat tawenna a Kai ti madi a makipagkararag a kadua dagiti dadduma nga ubbing. Idi napagsaludsodan no apay, insungbatna: “Dikam mamatpati iti maysa a dios a tallot’-sulina!” Ita ti pannakaawat ni Kai iti tallo a dios dagiti Katoliko ti mabalin nga saan nga apagpag-isu iti kinakompletona, ngem daytat’ supisiente kenkuana a makaammo nga isut’ saan nga agkararag iti dayta!—Marcos 12:29.
Panamagbalin iti Dios a Paset ti Biagda
No maminsan dagiti annak addaanda ti problema. Imbes a salsalimetmetan dagitoy a bukbukodda, rebbeng nga ikompableda dagitoy kadagiti dadakkelda. Ngem dagiti ubbing ti masapul a maparegta met nga ‘iyallatiwda ti awitda ken Jehova.’ (Salmo 55:22) Mabalin a matulonganda a mangapresiar a ni Jehova dinanto tratuen a silalag-an ti dawdawatda, ta ni Jesu-Kristo, nga Anakna, ti nagkuna: “Bay-anyo dagiti ub-ubbing a babassit nga umayda kaniak; ket dikay pawilan ida.” (Marcos 10:14) Ket dagiti ubbing ti rebbeng a masursuruanda nga agkararag iti Dios baeten ken Jesu-Kristo.—Juan 14:6.
No masursuro dagiti ubbing ti agpannuray ken Jehova a maipaay iti tulong ken makita dagiti resulta iti panangaramid ti kasta, masansan a daytoy ti addaan kadagiti dramatiko nga epekto iti pammatida. Ni Jacquy, a maysa nga agtutubo a lalaki nga agserserbi itan iti maysa kadagiti sangsanga nga opisina iti Watch Tower Society, ti nagkuna maipapan iti maysa a kapadasan a napasamak idi isut’ agtawen ti 14: “Iti dayta a tawen ti asamblea sirkitomi ti naiyeskediol iti ngudo ti lawas sakbay ti maudi nga eksaminasion. Ti problema ket saan nga inted ti maestromi ti material a repasuenmi agingga iti Biernes. Kalpasan ti pannakisarita iti daytoy a banag kadagiti dadakkelko, naikeddengmi a saanko a langanan iti programa iti asamblea, uray no kaipapanan dayta a bassitto laeng ti panawen a panagadalko. [Hebreo 10:24, 25] Nagkararagak ken Jehova a tulongannak iti panagreggetko a makapagsagana aginggat’ kabaelak a maipaay iti eksamin.
“Immay ti Lunes ti agsapa, ket amin dagiti estudiante ti agnernerbiosda unay agsipud ta, iti damdamona, ti eksamin ket maaramid nga oral. Nagkararagak manen ken Jehova a kumuyog kaniak. Aniat’ napasamak? Inawatko ti kangangatuan a grado iti asinoman kadagiti estudiante a maipaay kadagiti tema a nageksaminanmi iti dayta nga aldaw. Maysa kadagiti mannursuro manipud ti hurado iti nagsaludsod pay kadagiti kanayonan a salsaludsod kaniak, sa kinunana, ‘Kayatko a makita no kasano kaadayo iti magapuananna.’ Kaskasdi a nasungbatak amin dagiti salsaludsodna.”
Aniat’ naadal ni Jacquy manipud iti daytoy nagsayaat a nagbanaganna? “Ti pannakapadas ti tulong ni Jehova ti kaskasdi a namagbalin kaniak a nasingsinged kenkuana. Naadalko a rebbeng a ditay koma agdanag maipapan iti aniaman no di ket rebbeng nga agturongtayo ken Jehova a Dios iti isuamin a kita ti panagkararag ken araraw.”—Filipos 4:6, 7.
Wen, nasken a tulongantayo dagiti agtutubotayo, a “makaammo” ken Jehova, nga isut’ pagbalinen a paset ti inaldaw-aldaw a panagbiagda. No matarusanda a ni Jehova ket adda kadakuada kadagiti pannakilangenlangenda, didanto aya maaddaan ti dakdakkel a pammaregta nga agtultuloy nga agserbi kenkuana a simamatalek ngem no basta mangmangngeganda laeng ken mabasbasada ti maipapan kenkuana? Ti panangsanay kadakuada iti daytoy a pamay-an, siempre, ket saan a nalaka. Ngem dagiti agtutubo ket saanda a nadaras a makalipat iti entusiasmo ken kinapasnek a panangipasa dagiti dadakkelda ti naespirituan a tawidda ti pannakaammo ken Jehova kadakuada. Ket uray met ni Jehova dinanto malipatan dagiti kasta a matalek a panagregget. (Hebreo 6:10-12) Sapay koma ta dagidiay kadatayo a nagannak ngarud pagreggetanda a tulongan dagiti annakda a magun-odan ti gunggona nga ipapaay ti nailangitan nga Amatayo nga agpaay kadagidiay a makaammo kenkuana ken kadagidiay am-ammona—ti “biag nga agnanayon.”—Juan 17:3.
[Kahon iti panid 7]
Sasao a Mangparagsak ti Puso
TI AMANA ti nagsaludsod ken walot’-tawenna a Deborah: “Agkarkararagka met laeng aya ken Jehova?“ Ti sungbatna: “Wen, adu unay.” “Kaano?” “No agmaymaysaak.” “Apay a no agmaymaysaka?” “Tapno awan ti mangsingsinga kaniak!”
Maysa nga ina sinaludsodanna ti innem-tawenna a ni Laurent: “Kayatmo kadi nga ibatik a sigagangat ti silaw idiay kuartom ita a rabii?” (Ni Laurent ti agbuteng no nasipnget ket naibaga kenkuana nga agkararag ken Jehova maipapan iti dayta.) “Saan, saanakon nga agbuteng agsipud ta ni Jehova adda kaniak.”
Maysa nga babai nga agtawen ti innem ti kunana iti kararagna: ”Pagyamanan, Jehova, iti namnama iti panagungar. Nagsayaat a kapanunotan dayta!“ Iti sabali manen a kararag, kinunana: “Nagadu iti aramidem iti daytoy a pagilianmi inton addakam idiay Paraiso, Jehova, agsipud ta napalalo ti panagtudtudona ditoy.”
Ni tallot’-tawenna nga Udo ti nagkararag: “Pangngaasim, Jehova a Dios, pabasam koma ken tatangko ti Biblia tapno saanto a matay inton Armagedon!” Ti ruangan nga agturong idiay kuarto ti ubing a lalaki ti silulukat, ket nangngeg ni amana ti kararagna. Dayta iti nangdadaelen ti maudi a panagtukiadna iti kinapudno, ket itan isut’ maysa a matalek nga adipen ni Jehova.