Dagiti Naayat a Managbangon ti Norway Binendisionan ni Jehova
TI ILIM itulnogna ti bagina a siayat.” Dagitoy a sasao ni salmista a David ti mausar a maiyanatup unay maipapan ti panagbangon kadagiti pasdek a masarakan idiay Ytre Enebakk, nga asideg ti Oslo idiay Norway. Dagiti pasdek buklenda ti baro a hedkuarters ti sanga dagiti Saksi ni Jehova idiay Norway. Idi Mayo 19, 1984, daytoy nagpintas a baro a patpatakder ti naidedikar ken Jehova a Dios.—Salmo 110:3.
Dagiti baro a pasilidad ti imbangon nga interamente dagiti Saksi ni Jehova iti boluntario a pamay-an. Ti kinatulok ken entusiasmo dagiti managbangon ti sinipsiputan a buyogen iti napalalo nga interes dagiti kakabsatda iti intero a daga, agraman dagiti adu nga adda iti ruar ti ranggo dagiti Saksi ni Jehova. Ti paulo dagiti damdamag iti sumagmamano kadagiti lokal a pagiwarnakan ti: “Ti kadadaklan a boluntario a trabaho iti pakasarsaritaan ti Norway!” “Ti naindaklan a boluntario a trabaho idiay Ytre Enebakk.” “Nakaskasdaaw a boluntario a trabaho.”
Talaga, daytat’ nakaskasdaaw! Iti las-ud ti tallo a tawen imbangon dagiti trabahador ti nagpintas ken nakalawlawa a pasdek a ngangngani 51,700 a pie kuadrado (4,800 metro kuadrado). Dagiti pasdek ti naglaon kadagiti opisina a maipaay iti administrasion ken pagipatarusan, pagimalditan, departamento ti panagipatulod, Kingdom Hall ken ti kukuarto a pagtaengan agpaay ti 54 a tattao. Amin dagiti nakakita kadagiti pasdek siguradoda a dagita ti nagpintas nga instumento a pangiyadelantar ti trabaho dagiti Saksi ni Jehova idiay Norway.
Apay a Nesesita Unay?
Idi immay ti naimbag a damag ti Pagarian ti Dios idiay Norway di nagbayag sakbay ti panagsukat ti siglo, di nagbayag dimmanon dayta iti puspuso ti dadduma kadagiti interesado a tattao, nga insigida met a nangaskasaban kadagiti dadduma. Dagiti nagaadayo a distansia, dagiti dadakkel a bambantay, dagiti nalawa a kabakiran ken karkarayan a dumanon agingga kadagiti surong ti pagilian ti namagbalin a nagrigat ti panagdaliasat kadagidiay a tiempo. Kaskasdi, ti naimbag a damag ti di nagbayag naikaskasaba ken inawatda uray pay agingga idiay labes ti Arctic Circle. Idi 1904 ti umuna nga opisina a mangiyurnos ti trabaho a panangasaba ti naipasdek iti pribado a pagtaengan idiay Oslo. Idi 1925 rimmang-ay ti trabaho agingga a kasapulan ti dakdakkel nga opisina ken espasio a pakaipatulodan dagiti literatura. Situtulok pinagbalin a posible ti ili ni Jehova ti pannakagatang ti tallo-grado a patakder idiay asideg ti sentro ti Oslo. Iti sumaganad a 58 años daytoy a patakder nagserbi kas ti sanga nga opisina ken pagtaengan a Bethel ti Norway. Ngem kalpasan amin dagitoy a tawen daytat’ nagbalin a bassit unay. Apay?
Ti bilang dagiti manangibunannag ti Pagarian ti dimmakkel manipud 165 idi 1925 agingganat’ agarup 7,000, ken dagiti kongregasion rimmang-ay manipud 20 agingganat’ ngangngani 200. Mainayon pay, iti dakkel a bilang dagiti tulong ti panagadal ti Biblia maipatpatarusda, a makasapul ti ad-adu nga agtrabaho idiay Bethel. Nupay ti kanayonan nga espasio para kadagiti opisina ken pagtaengan ti nalawag a kasapulan, awanen ti lugar a pangpadakkelan iti patakder. Naaramid ti desision a kas ar-aramiden dagiti Saksi ni Jehova iti adu a paset ti lubong—mangbirok iti daga ket agpatakder kadagiti baro a pasilidades.
Kasla nakalaklaka daytoy ngem yantangay ti Norway addaan ti promedio a 13 laeng a tattao iti tunggal kilometro kuadrado (agarup 34 a tattao iti milia kuadrada). Ngem ngangngani 97 porsiento iti pagilian ti buklen dagiti bambantay ken kabakiran, a mamagbalin kadagitoy a lugar a ngangngani di mapagtaengan. Gapuna kasapulan ti panagbirok nangnangruna iti makin-abagatan a paset ti pagilian, nga isut’ pagtataengan ti kaaduan a tattao, ken nasaysayaat dagiti pasilidades ti transportasion ken komunikasion. Kas maripiripyo, limitado laeng iti adda a daga iti daytoy a paset ti pagilian. Kalpasan ti maysa ket gudua a tawen a nainget a panagsapsapul, ti maysa a nagpintasan a paset ti daga ti nasarakan, 30 kilometros laeng (19 milia) manipud sentro ti Oslo.
Anian nga Isusungbat!
Idi nangngegan dagiti Saksi idiay Norway ti plano ti Sosiedad, nakaskasdaaw ti isusungbatda. ‘Intulnogda ti ayat ti bagida,’ a pinaneknekanda a talaga a kamengda ti nabendisionan nga ili ni Jehova. Iti las-ud ti tallo a lawas ti nagdakkelan a kantidad a kasapulan a panggatang ti daga ti naawaten. Nanipud idin ti panagayus dagiti kontribusion ken awan interesna a pautang saanen a nagsardeng. Gapuna awan pulos aniaman a panagaburido maipapan iti panangbayad kadagiti ngina ti panagbangon. Uray pay dagiti ubbing nakiramanda ti panangted. Tallo nga agtutubo a babbai ti nangipatulod ti sagut iti Sosiedad, a kakuyog ti surat a makitayo iti baba.
Daytoy nagsayaat, siaayat nga espiritu ti naipakita bayat ti intero a panawen ti panagbangon. Kalpasan a napirmaan iti kontrata ti daga, ti agsasaruno nga addang ti panagsagana a maipaay ti proyekto ti panagpatakder ti naaramid. Makapabileg ti pammati ti pannakakita no kasano ti panagtignay ti espiritu ni Jehova kadagiti situtulok nga ad-adipenna. Maysa a kabsat a makinkua ti maysa a bakir intukonna ti inkam panagpukan ti adu a kayo inggat’ kasapulanmi a maipaay kadagiti tabla. Dagiti kakabsat nga addaan kapadasan iti panagpukan kadagiti troso nagbiaheda ti adayo a distansia iti adu a ngudo ti lawlawas tapno mangpukan ti 4,000 a kaykayo a kasapulan. Dadduma tinarimaanda ti daan a pagragadian, nga isut’ naibangon idiay kagatgatang a daga. Ti las-ud iti makabulan kalpasan a napirmaan ti kontrata, napatauden ti damdamona a tabla—a dakkel ti nakaekonomiaan.
Dadduma kadagiti Saksi intukonda dagiti alikamen ken materiales, a dakkel naitulongna tapno maipababa ti gastos. Kas pangarigan, maysa a kabsat nga agikabkabil kadagiti elebeytor ti nakaam-ammo iti makinkukua iti maysa a pasdek ti komersio. Iti dayta a patakder adda elebeytor a kayat ti makinkukua a marakrak ken mailako agsipud ta kasapulanda ti espasio nga agpaay kadagiti dadduma a panggep. Inlawlawag ti kabsat ti proyekto a panagbangon ket dinamagna no mano ti kayatna a maipaay iti elebeytor. Ti sungbat ket: “No marakrakmo dayta ket maipanawmo dayta iti daytoy a lawas, kukuamon dayta a maipaay iti maysa a bandehado a kankanen.” Dayta nga elebeytor ti naikapet itan idiay baro a sanga. Dadduma kadagiti kakabsat nagiyegda kadagiti kinotkotse a taraon—patatas, natnateng, ikan, karne ken tinapay. Wen, agtigtignay ti espiritu ni Jehova kadagiti situtulok nga ad-adipenna tapno pagbalinenna a posible iti pinansial ti panagbangon.
Dagitoy Trabahador Manipud Sadino?
Nagdakkel unay ti interes iti daytoy a proyekto ti panagbangon a nasurok a 2,000 a tattao intukonda ti bagbagida iti panagbangon, iti nadumaduma a tiempo. Inusarda dagiti bakasionda wenno pinanawanda dagiti panggedanda a dakkel pagsuelduanda ket nagtaengda kadagiti nailet a kukuarto iti pagbangonan uray pay iti nakalamlamiis a panawenna a ti temperatura dumanon ti below zero. Apay? Ti sungbat dagiti trabahador kadagitoy a salsaludsod ket: “Ti ayatmi ken Jehova ken interesmi iti pannakaiwaragawag ti naimbag a damag.” Kinapudnona, aminda ti nangipakita ti kababalin nga isut’ kanayon a nangtignay ti ili ni Jehova idiay Norway, kas kadagiti dadduma a luglugar, nga impaay a siaayat ti bagbagida. Mabalin a tagiragsakenyo a maammuan ti sumagmamano kadagiti nalikudan a detaliena.
Naipatulod ti surat maipapan ti panagkasapulan kadagiti trabahador. Ti sungbatda ti nakaragragsak. Dagiti kakabsat a lallaki ken babbai ti amin a propesion intukonda ti paglainganda, panawen ken pigsada. Dadduma kadagiti retirado a tattao impaayda ti kapadasanda iti trabaho a panagbangon. Dagiti kakabsat manipud Denmark ken Sweden kayatda met ti makiraman iti trabaho, ket dakkel naitulongda a nakaited ti nagsayaat a resulta. Makaparagsak iti puso ti pannakakita no kasano a siaanep ti panagtrabaho dagiti kakabsat iti amin a kita ti panniempona.
Dagiti agtutubo, a masansan iti kabukbukodanda a panagregget, agsublida idiay proyekto kalpasan iti panagretirada manipud inaldaw a panagtrabahoda, tapno mairingpasda dagiti nasken a trabaho iti umiso a tiempo. Gapu itoy naikabil dagiti atep kadagiti patakder ngangngani dua a bulan nga immun-una iti eskediol, ket di nagbayag immayen ti kalam-ekna idiay Norway. Ngarud dagiti trabaho idiay uneg ti maaramidan iti napapudot a pagtaengan nga awanen dagiti makalapped. Ti nagsayaat a progreso ti trabaho a panagbangon pinagbalinna met a posible para iti pamilia ti Bethel a makaakar iti baro a pagtaenganda kagudua a tawen a nasapsapa ngem ti ninamnamada. Nangnangruna a dakkel a tulong dayta agsipud ta ti gimmatang iti daan a pagtaenganda nangitukon ti nasayaat a presio no daytat’ maalana iti maysa a naikeddeng a petsa.
Iti daytoy a pamay-an ti pamilia ti Bethel nakaakarda iti baro a pagtaenganda ken pagtrabahuanda idi Oktubre 21, 1983, tallo a tawen eksakto kalpasan ti pannakabirokda iti daga.
Dedikado a Patpatakder
Naiyanunsio a ti dedikasion dagiti baro a patakder ti sanga ti maaramid idi Mayo 19, 1984. Dagiti trabahador ti panagbangon ken ti pamilia ti Bethel nagtrabahoda a sigagaget tapno maisagana ti isuamin iti umiso a tiempo. Ti kadadakkelan a panagregget naaramid iti lawas sakbay ti dedikasion. Dadduma kadagiti kakabsat dinalusanda iti nakabatbato a daga ket insaganada dayta bayat a dagiti dadduma pinasayaatda iti dalan babaen kadagiti batbato ken dinalusanda iti pagburayukan ti danum. Iti aldaw sakbay ti dedikasion, adu a kaykayo ken masitas ti naimula. Sakbay a nagpatingga dayta nga aldaw, amin daytoy ti namagbalin iti aglawlaw a kas maysa a nagpintas a parke, maysa a lugar a maibagay unay a pangawatan kadagiti sangaili a naawis a maipaay iti dedikasion. Pudno a nagpintas a demonstrasion dayta iti ili ni Jehova a ‘nangitulnog ti bagbagida a siaayat.’
Dagiti sangaili a naawis inramanna dagidiay nagtrabaho iti nasurok a pito a bulan idiay pagipatakderan, dadduma a natataengan a nakiramramanen ti trabaho a panangasaba nanipud pay kadagidi 1920’s, amin a manangaywan ti sirkito ken distrito, ken ti lokal a kongregasion, a nabuangay kas resulta iti proyekto ti panagbangon.
Dagidiay naawis inramanna met dagiti pannakabagi manipud kadagiti sanga nga opisina ti Austria, Denmark, Finland, Alemania, ti Netherlands ken Sweden. Aminda iti makaibaga maipapan kadagiti proyekto ti panagbangon a malmalpasen wenno madama pay kadagiti mismo a pagilianda, a mangipakpakita a ti proyekto a panagbangon ti Norway ti maibagay la unay iti padron ti maar-aramid a panangpalawa iti sangalubongan nga organisasion ni Jehova.
Maysa a sangaili manipud adayo a daga isu ni Milton G. Henschel iti Bagi a Manarawidwid dagiti Saksi ni Jehova idiay Brooklyn, Nueva York. Isu ken ti asawana simmangpetda a nasapsapa iti dayta a lawas ket nakitada ti kinagaget dagiti kakabsat. Iti panagpalawagna iti dedikasion nadakawat ni Kabsat Henschel ti situtulok nga espiritu nga impakita dagiti kakabsat a Norwego. Kinunana: “Nakaskasdaaw ti pannakakita no kasanot’ panangipaayyo kadagiti isuamin a banag a kasapulan ken no kasanot’ panagtrabahoyo a sangsangkamaysa tapno maibangon dagitoy a pasdek.” Sana pinalagipan dagidiay mangusar kadagitoy a pasdek iti responsabilidad nga itan naipabaklay kadakuada, a kunkunana: “Inton dagitoy a pasdek mausarda maitunos ti pagayatan ni Jehova, ti bendisionna ti maaddanto iti trabaho iti daytoy a pagilian, ket daytat’ makagapu no apay a dagiti kakabsat iti Norway intedda ti panangsuportarda iti daytoy a proyekto ti panagbangon.”
Wen, bendisionan ni Jehova dagidiay situtulok a nangipaay ti bagbagida a mangaramid ti pagayatanna. Dagiti Saksi ni Jehova idiay Norway determinadoda a mangaramid ti naituding a trabahoda iti baro a patakder agraman iti tay-ak, a mangikasaba ti naimbag ti damag ti Pagarian ti Dios. Kunada: “Iti sibubulos a nakem a panangisagut agidatonakto iti sakripisio kenka. Agyamanakto iti naganmo, O Jehova, ta naimbag.”—Salmo 54:6; Mat. 24:14.
[Ladawan iti panid 28]
Ti ababa a patarus:
‘lti asamblea idiay Oslo naaddaankam ti ideya nga inton makagtengkami iti pagtaenganmi mangilukatkami iti maysa a puesto tapno makaaramid ti kuarta para iti proyekto ti panagbangon. Rinugianmi ti panagaramid kadagiti napipintas a bambanag a mailakomi iti puestomi. Ti panaglako nasayaat ket nakailakokami ti pateg ti 100 a kroner ($13).
Kablaaw,
Eva-Lill 11 años, Jannicke 11 años ken Therese 8 años.’
[Ladawan iti panid 29]
Idiay pagragadian dagiti naidonar a kaykayo napagbalinda a nausar a tabla
[Ladawan iti panid 30]
Ti nakapimpintas a lobby ti baro a sanga nga opisina