Report dagiti Manangibunannag ti Pagarian

Agrag-o dagiti Adu a Purpuro

TI DEKLARASION ni Jesus kadagiti adalanna ket: “Dakayto ti saksik . . . agingga iti ungto ti daga.” (Aramid 1:8) Dayta a bilin ti agangay alaennanto ti naglawa a paset ti Makinlaud a Pacipico, a sadiay ti trabaho ti Pagarian iti intero a Micronesia ti adda itan iti panangaywan ti sanga ti Watch Tower Bible and Tract Society idiay Guam. Adu kadagiti umili kadagitoy napipintas a purpuro ti agragrag-o itatta. Apay? Itden ti Salmo 97:1 ti rason: “Ni Jehova ti nagarin! Ti daga agragsak koma. Agrag-o koma dagiti adu a purpuro.”

Adu a pagsasao ti us-usarenda kadagiti nagduduma a purpuro iti daytoy a paset ti lubong, ket daytoy ti kangrunaan a parikut iti panangisaknap ti naimbag a damag a “ni Jehova nagarin.” Gapuna, maysa kadagiti tampok iti daytoy a tawen serbisio isut’ panangawat ti binulan nga edision Ti Pagwanawanan iti lima kadagiti kangrunaan a pagsasao, agraman Ti Librok dagiti Estoria ti Biblia ken ti broshur a Tagiragsakenyo ti Biag nga Agnanayon iti Daga iti sumagmamano a pagsasao iti Micronesia. Ti kaadda dagiti literatura kadagiti lokal a pagsasao a maipaay kadagiti naiputputong a tattao ket maysa a pudno a bendision ken mangtungpal iti dakkel a pakasapulan. Dagiti lokal nga umili nasayaat panangabrasada, nangnangruna ta dagiti relrelihion ti Kakristianuan kaaduanna saanda a pagaburiduan nga ipatarus dagiti literatura iti pagsasaoda.

◻ Kas pangarigan, idiay nagpintas a puro ti Moen idiay Truk impadamag dagiti misionero a Ti Librok dagiti Estoria ti Biblia iti Trukese ti namataud ti ragsak kadagiti bumalay a nangawat iti dayta ket impabpabuyada dayta kadagiti gagayyem ken kakabagianda. Pasardengen dagiti tattao dagiti misionero idiay lansangan nga agbirbiruk iti dayta a libro, ket dadduma napanda pay idiay pagtaengan dagiti misionero sakbay ti alas 6:30 t.b. nga agsapsapul iti dayta. Kaskasdi dadduma pay ti napan idiay Departamento iti Edukasion tapno mangalada kadagiti kopia manipud maysa kadagiti Saksi ni Jehova nga agtartrabaho sadiay.

Maysa kadagiti mannursuro ti nagsaludsod no kasano a dagiti Saksi ni Jehova makapataudda iti kasta a libro iti Trukese idinto a dagiti Katoliko ken Protestante a nabayagda sadiayen awan pay napataudda a kasta. Uray pay dadduma kadagiti dati a bumusbusor kayatda ti maaddaan iti libro.

◻ Maysa a kapadasan manipud Marshall Islands ipakitana no kasano a ti kinapudno ti Biblia makaiyeg panagkaykaysa ken ragsak iti maysa a pagtaengan. Ti asawa a lalaki ket mammartek ken mannigarilio, ken naregta met, managtungpal a Katoliko. Dua nga agtutubo a Saksi ti simmarungkar iti pagtaenganna ket, iti napalalo nga ibubusor ni baketna inawatna ti maysa a panagadal iti Biblia. Ti asawa a babai ti nangbusor kenkuana kadagiti sumaganad a tallo a tawen. Ngem idi napaliiwna no kasano a ti kinapudno ti nangbalbaliw kenkuana idi insardengnan ti panagsigariliona, ket saan metten a mabarbartek, ken nangrugin nga agaramid kadagiti bambanag a maipaay iti pamiliana, kamaudiananna isut’ nagimdengen iti naimbag a damag ket inranudnan dagiti naad-adalna kadagiti sabsabali. Ti agassawa pinagbalinda a legal ti panagasawadan ket insimbolodan ti dedikasionda ken ni Jehova babaen ti bautismo. Ti lalaki agserserbi itan kas maysa a panglakayen iti kongregasion, bayat a ni baketna ur-urayennan ti pannakastrekna iti serbisio a kinapayunir.

Ti ragsak ken talna ti immapay iti daytoy a pagtaengan kas kadagiti adu met laeng a kakasta a pagtaengan kadagiti purpuro a kuna ti salmista nga agrag-o agsipud ta ni Jehova nagbalinen nga Ari.​—Salmo 144:15.

[Dagiti mapa iti panid 11]

(Para iti aktual a pannakaurnosna, kitaem ti publikasion)

Belau

Yap

Rota

Guam

Saipan

Truk

Ponape

Kosrae

Nauru

Marshall Islands

Kiribati

Midway Islands

Pacific Ocean