Dagiti Nakabasol Nadusada
IDI ti damag ti panangpapatay nakagteng idiay Kinshasa, dagiti agtuturay ti gobierno nagtignayda tapno maipaay iti kinahustisia. Gapu itoy, dagiti agtuturay masapul a makomendaranda.
Naibaon dagiti trak ken kamkameng ti militar iti dayta a lugar. Idi agangay, dagidiay nakabasol natiliwda ket naiyegda iti pangukoman iti korte ti distrito ti Kindu, Kivu.
Ti panangikeddeng iti kaso ket saan a nalaka, ta dagiti uk-ukom naglasatda iti masansan a pammutbuteng ken panangpilit tapno ballikugenda ti kinahustisia. Dadakkel a pasuksok ti maituktukon kadakuada. Idi a maiyulogen ti panggeddeng kadagiti nakabasol, immawatda pay ti awan pirmana a surat a mangibagbaga a ni Kimbilikiti ti mangbalesto kadakuada.
Makapainteres, uray pay bayat ti pannakabista impapilit dagiti naidarum a ni Kimbilikiti ket maysa nga espiritu ket daytoy nga espiritu ti nangiturong kadakuada iti dayta nga aramid. Bayat ti bista, ni Hues Tumba ti sisisirib a nangiyurnos iti pannakapatimek ti instrumento ti Kimbilikiti a dengdenggen dagiti amin idiay pangukoman. Inrasonna a no ni Kimbilikiti ket maysa nga espiritu, ti aweng ti instrumento ti awanan koma ti epekto kadagiti umili ti Rega nga adda idiay pangukoman. Ti resulta? Idi a pinataudda dagiti karkarna nga aweng, adda idi kinagulo idiay pangukoman. Nagtataray dagiti babbai a sibubuteng, nga agbutengda di la ket ta makitada ni Kimbilikiti ket mapapatayda. Indumog dagiti lallaki ti ul-uloda iti panagbain ket pimmanawda iti pangukoman, a nangibati laeng kadagiti naidarum, dagiti kameng ti korte, ken sumagmamano a nagbuya a saan a paset ti tribo ti Rega. Gapuna naminsan manen naibutaktak ni Kimbilikiti kas maysa nga an-anito a kinaulbod a nangkayaw kadagiti umili ti Rega.
Ti pangukoman ti Kindu ti nangsentensia ken patay kadagiti innem a direkta a makinbiang iti panangpapatay. Sumagmamano a dadduma pay ti immawat kadagiti sentensia a pannakabalud ken dagiti multa. Mainayon pay, naimandar ti panangbayadda kadagiti maladingitan a babbalo. (Dagiti sentensia ti naiyapelar iti nangatngato a pangukoman idiay Bukavu, Kivu.)
Ti responsable a panagtignay dagiti agtuturay ipalagipna dagiti sasao ni apostol Pablo: “Ta dagiti agturay saan a pagbutngan ti aramid a naimbag, no saan ket a ti dakes. . . . [Ti agtuturay] isu ti ministro ti Dios, a mangibales iti pungtot a maipaay kadagiti agaramid iti dakes.” (Roma 13:1-4) Gapuna itultuloy dagiti Saksi ni Jehova ti agaramid kadagiti “araraw, dawdawat, panangibabaet, panagyaman . . . a maipuon kadagiti amin a kita dagiti tattao, maipuon kadagiti ar-ari ken kadagiti isuamin nga adda iti panagturay; tapno agbiagtayo a natalna ken naulimek babaen iti nadiosan a debosion ken kinanakman.” Innayon pay ni Pablo: “Daytoy naimbag ken makaay-ayo iti imatang ti Dios, a Manangisalakantayo, isu a kayatna nga isuamin dagiti tattao maisalakanda koma ken dumtengda iti umiso a pannakaammo iti kinapudno.”—1 Timoteo 2:1-4.
Kas resulta dagitoy a paspasamak idiay Pangi, kumbinsidokami nga adu kadagiti napasnek a tattao ti Rega ket “dumtengda iti umiso a pannakaammo iti kinapudno” ket mawayawayaanda met manipud panangkayaw dagiti makaallilaw nga an-anito. Agpaay kadagitoy ken kadagiti dadduma pay a nasingpet-panagpuspusona iti intero a daga, itultuloy dagiti Saksi ni Jehova ti panangbirok kadakuada. Pudno unay, maragsakankami nga agtignay a buyogen pammati ket iranud ti kinapudno ti Pagarian kadagiti isuamin a managayat iti kinalinteg, agingga kadagiti adayo a paspaset ti Africa.