Aniat’ Kapapatgan iti Biagyo?
ISUT’ agdindinamag a kababaknangan a tao iti lubong. Ti personal a kinabaknangna ti domanon iti binilbilion a doliar. Isut’ pagraraeman dagiti adu kas nakagtengen iti tuktok ti balligi. Kaskasdi dua a tawen sakbay ti ipapatayna, kuna ni J. Paul Getty: “Ti kuarta saan a nesesita nga adda koneksionna iti kinaragsak. Nalabit ad-adda pay a mainaig iti kinaawan ragsak.”
Iti panagsapul iti pagarupen dagiti adu a kapatgan iti biag, ti agdindinamag a pangulo ti lana ti pudno a nagballigi agingga iti naisangsangayan unay a tukadna. Ngem isu aya ti agsasao kas maysa a tao a nakasarak ti kinaragsak babaen iti nagbannoganna unay a magun-odan? Wenno isut’ agsasao kas maysa a nakabigbig iti kamaudiananna a ti nagbannoganna iti kasta unay ket saan met la gayam a napateg kalpasanna?
Ti Raragpaten ken ti Kinapudno
Aniat’ ibilbilangyo kas kapapatgan unay iti biagyo? Mabalin a kunaen dagiti dadduma a tattao a ti wayawaya isut’ patpatgenda unay. Mabalin a kunaen dagiti dadduma a ti balligi dakkel kaipapananna unay iti biagda. Kaskasdi dadduma ti mabalin nga ipangpangrunada ti personal a kaitungpalan a nangnangruna ngem kadagiti dadduma.
Nupay dida kayat nga admitiren dayta, ti padron ti panagbiag ken tigtignay dagiti adu a tattao ipakitana a ti kuarta ken kinaragsak ti talaga a kapapatgan a bambanag iti panagbiagda. Determinadoda a bumaknang wenno pagreggetanda unay ‘ti ag-good time,’ a dida pulos ikankano uray pay ti panangliway ti pamiliada, ti salun-atda, ken ti naespirituan a kasasaadda iti panangar-aramidda iti kasta. Ket makapainteres ta, impadto ti Biblia “kadagiti maud-udi nga al-aldaw” dagiti tattao “agayatdanto kadagiti bagbagida, naagumda iti pirak” ken “managayatda kadagiti ragragsak a nangnangruna ngem iti panagayatda iti Dios.”—2 Timoteo 3:1, 2, 4.
Banag a Napatpateg Pay
Ni Jesu-Kristo, ti nangibangon ti Kinakristiano, ti namataud iti mamagpanunot a saludsod. “Adda aya aniaman a malak-am ti maysa a tao no magun-odanna ti intero a lubong ngem mapukawna met ti biagna?” insaludsodna. (Marcos 8:36, Today’s English Version) Panunotenyo dayta. Aniat’ maaramidan ti maysa a tao nga awan biagna? Awan!—Eclesiastes 9:5, 10.
Nalabit maysakay pay nga agtutubo ket pagarupenyo nga adut’ panawenyo pay a mangaramid kadagiti bambanag a kayatyo nga aramiden. Ngem pudno aya dayta? Dagiti gubgubat, krimen, saksakit, ken dagiti aksidente ti nanggupeden iti din mabilang a nababaneg a lallaki ken babbai—a kellaat ken di ninamnama. Aniat’ napasamak kadagiti amin a plano ken kalkalatda?
Mabalin nga addaankay iti pamilia wenno mabalin a nagbiagkayo metten iti adu a tawtawen. Gapuna pagarupenyo a masapul nga ikabilyon amin a panawen ken pigsayo iti panangibangon iti maysa a natalged a masanguanan nga agpaay kadakayo ken dagiti inay-ayatyo sakbay nga agpanunotkayo iti aniaman pay a banag. Ngem aniat’ ibilangyo a natalged? Kas pagaammoyo, ti implasion, ti panagkapuy ti negosio, ken ti kinaawan panggedan ti nangibusen iti urnong dagiti adu, a nangibati kadakuada a nakapangpanglaw ken awan pagtaenganda. Malaksid pay, gapu iti di kinatibker dagiti kasasaad iti intero a lubong, ania a garantiya ti adda a dagiti bambanag a nagreggetanyo wenno nagbannoganyo unay ket dinto mapukaw babaen kadagiti di namnamaen a pasamak?
Gapuna, nalabit makitayo nga awan duadua, ti kinapateg iti panangsukimat kadagiti personal a kalkalatyo. Gapuna, aniat’ pudno nga ibilbilangyo a kapapatgan unay iti biagyo?