Ti Ayat ti Nangalaw
ITI karrugi ti Setiembre a napalabas dua a sistema dagiti bagyo ti nagdungpar idiay Korea. Iti sumagmamano laeng nga oras, sumagmamano a lugar ti narusep iti nasurok a 20 pulgadas (50 cm) a tudo. Ti resultana isu ti kadadaksan pay laeng a layus a dimteng iti dayta a pagilian iti las-ud ti 40 a tawen. Nasurok a 200,000 a tattao ti napukawan ti pagtaengan, ket 181 ti naipadamag a natnatay wenno mapukpukaw. Ti pukaw iti sanikua ti dimmanon kadagiti minilmilion a doliar ket ti pannakaperdi dagiti apit ti saanen a marukrukod.
Nangrugi ti panagtudona idi rabii ti Biernes ket nagtultuloy a nagmalmalem iti Sabado. Innem a puttot idiay makingngato a Karayan Han ti naglippias, nga isut’ nangpadakkel met kadagiti karayan iti nasursurok a sangapie ket gudua (0.5 m) a nangatngato ngem iti natalged a rukodna. Iti nasapa a paset ti agsapa ti Domingo, awan pakpakdaar, naisawang ti maysa a ruangan ti pagayusan ti danum, ket ti gumarasugas a karayan ti naglippias a nagturong iti aglawlaw. Idi a dagiti danum mangrugidan a bumaba iti dayta a rabii, agarup 60,000 a tattao iti daytoy a lugar ti napukawan kadagiti pagtaengan.
Tunggal paset iti pagilian ti nalayus. Ngem ti kabisera a siudad ti Seoul, a sadiay adda 174 a kongregasion dagiti Saksi ni Jehova, ti kakaruan a nadadaelen, nangnangruna dagiti dua a lugar a pagserserbian dagiti kongregasion ti Mangwondong ken Sungnaedong. Iti nagbaetanda a dua adda ti dagupna a 130 a pamilia dagiti Saksi a nakapukaw kadagiti pagtaenganda. Dagdagus ken sibubulos, dagiti Saksi ni Jehova idiay Korea simmungbatda kadagiti kasapulan dagiti padada a Kristiano.
Numan pay dagiti linea ti telepono nagnagsatda iti adu a luglugar, nangrugi a dumteng dagiti damdamag idiay sanga nga opisina iti Watch Tower Society. Dua a komite ti dagdagus a nagtignay a nangorganisar ti tulong nga agpaay kadagiti Saksi kadagiti dua a napadaksan unay a luglugar. Dagiti agdaldaliasat a manangaywan ti sirkito idiay Seoul ti nabilin a mapan mangsarungkar kadagiti kakabsat tapno makitada no ania dagiti kasapulan wenno no aniat’ maaramidan a mangtulong kadagidiay adda kadagidiay dua a napadaksan a luglugar.
Dagiti Saksi iti dadduma a luglugar naammuanda met ti kasaknap ti dadael babaen ti damdamag idiay TV. Rinugianda met ti immawag idiay sanga a damdamagen no sadinot’ pangipatulodanda kadagiti donasionda a maipaay kadagiti kakabsatda a marigatan. (Ti sanga ti Watch Tower idiay Japan ti nagtelepono met a mangituktukon ti tulongda.) Dagiti donasion a kuarta ti nangrugi nga umay manipud intero a pagilian. Ti bagas, pansit, ken dadduma pay a taraon, agraman kawkawes ken ul-ules, ti naipaay met. Dagitoy ti insigida a naiwaras babaen kadagiti komite nga adda iti dayta a lugar. Dagiti kakabsat sibubuslon a timmulongda a di nagbayag ti opisina idiay Seoul impakaammoda a saanen a kasapulan dagiti donasion a kuarta.
Sumaruno immay ti dakkel a trabaho ti panagdalus. Tallo gasut a kakabsat ti nagboluntario a maipaay iti daytoy a trabaho. Naibaonda a sagdudua iti tunggal pagtaengan tapno tumulongda iti panagdalus ken tumulongda a mangisubli kadagiti bambanag iti normal a kasasaadda agingga a mabalin. Maysa a boluntario ti nagkuna: “Babaen iti panagsanay nga inaw-awatmi iti organisasion ti asamblea ken kumbension, ammomi no kasano ti pannakitunos ken panangiringpas kadagiti bambanag.” Adu kadagiti tattao kadagiti il-ili ti mariribukan idi makitada a dadduma kadagiti tattao gunggundawayanda dagiti dadduma a biktima. Idi kasumbangirna, masdaawanda met a makakita iti nakalma, naragsak, ken nabulos a tulong nga impaay dagiti Saksi uray pay kadagita a narigat a kasasaad.
“Naminsan manen naidemostra,” kuna ti maysa a Saksi nga adda iti dayta a lugar, “a mabalin a pukawen ti maysa a didigra dagiti material a sanikuatayo ngem saanda a maikkat ti pammatitayo.” Buyogen dagiti lulua ti rag-o, maysa a Saksi a babai ti nagkuna: “Numan pay napukawmi dagiti isuaminmi, saankami met a nagkurang. Ti nabara nga ayat dagiti kakabsatmi ti nangted pigsa kadakami.”
Pudno unay, nakaskasdaaw a makita ti panagtignay ti ayat. Ti panagregget dagiti Saksi iti dayta a lugar ken ti insigida a panagtignay dagidiay ‘nainaig kadakuada iti pammati’ ti nakaskasdaaw. (Galacia 6:10) Dagiti kakabsat idiay Korea naparegtada unay iti daytoy a kapadasan. Kumbinsidoda a babaen ti organisado a tulong a siayat a naited kadakuada adda laeng maymaysa a panangilawlawag—ti ayat immay a nangalaw!