Ti Kaiyulogan dagiti Damdamag
Panagsirarak ti Kasukat ti Dara
● Ti Fluosol-DA, ti mangip-ipan ti oksina a kasukat ti dara a naaramid manipud kadagiti kemikal, ti di nakapasa iti medikal a pannakasuot idiay Estados Unidos, ket ti panageksperimento iti dayta a pluido kadagiti tattao ti pinasardeng dagiti managpataudna. Iti ngangngani lima a tawenen, ti Alpha Therapeutic Corporation, ti managaramid idiay Estados Unidos iti “sentitiko a dara,” a Fluosol-DA 20%, ti makipagtartrabaho a kadua dagiti napili nga ospital idiay Estados Unidos ken Canada iti klinikal a panangipadas iti pannakausarna. Nasurok a 120 a pasiente ti napagadalan. Ipamatmat dagiti report a ti Fluosol ti saan a napateg a kas kasukat ti dara kas ti namnamada ket dagiti dadduma a sisasagana a magun-odan a solusion epektiboda a kas met laeng iti Fluosol. Impadamag ti Chicago Tribune a maysa kadagiti ospital a nausar iti panagsirarak nangted ti dua a rason iti pannakapaay ti Fluosol. “Awan ti umdas nga oksihena a maawitna nga agturong kadagiti nasken nga organo,” kuna ti artikulo, “ket saan a nagtalinaed dayta idiay sistema ti tao iti mabayag bassit tapno salimetmetanna a sibibiag agingga a ti natural a pannakapataud ti darana masukatanna dagiti nalabaga a selula ti dara.”
Nupay kasta, intampok ti panagsirarak ti Fluosol, iti nakalablabes a panangusar dagiti siruhano ti dara ket, sigun iti Tribune, “posible ti panangopera iti maysa uray no anemic uray di agusar ti panangyalison ti dara.” Ni Dr. Bruce Friedman, a direktor kadagiti ospital iti University of Michigan, kinunana: “Ti pugpugto a panangpattapatta kada 25 porsiento agingga iti 33 porsiento iti dara a maus-usar iti daytoy a pagilian ket saan a kasapulan.” Numan pay ti panangipadas kadagiti tattao ti nagsardengen, agparang a ti panagsirarak a mangparang-ay ti fluorocarbon “artipisial a dara” ti agtultuloy.
● Ti umas-asping a kasukat ti dara ti patpatauden met ni Dr. Henry A. Sloviter idiay University of Pennsylvania School of Medicine. Daytoy nga “artipisial a dara” ket maysa a kompuesto ti kemikal a napapigsa babaen iti ultrahigh-frequency sound waves ken nabalkot ti lecithin a naala manipud iti itlog. Daytat’ naipadasen kadagiti an-animal laeng, ngem awan dagiti makadangran nga epekto a nakita numan pay ti dakkel a kantidad ti kasla gatas kapudawna a pluido ti naipastrek. Ti Almanac, nga impablaak ti unibersidad, kunana met a dagitoy ti addaan bentahe iti natural a dara: “Agparang a daytat’ natalged a saanen a pampanunoten ti tipo ti dara; saanna a kasapulan ti pannakaipalamiis; ket ikkatenna ti risgo a makaiyakar kadagiti makaimpektar a saksakit kas ti AIDS, hepatitis ken malaria iti panangyalison.” Daytat’ saanto pay laeng a sisasagana a maipaay iti pangkaaduan a pannakausarna iti uneg ti tallo a tawen.
● Agtultuloy ti panagsirarak iti sabali met a kontinente. “Dagiti sientista nga Australiano nakapataudda iti kasukat ti dara a kunada a nasaysayaat nga agpaay ti kaaduan a panangusar ngem ti interamente a dara ken plasma ti tao,” kuna ti The Bulletin, maysa a pinansial a magasin iti Australia. Napanaganan CH (casein hydrolysate), daytat’ maysa a protina ken mabalin a maaramid manipud gatas wenno iti betsuelas. Ni Dr. Louis Hissink, maysa kadagiti manangpartuat ti CH, “patienna a napeggad ti panangiserrek ti dara manipud sabali a tao a mapan iti maysa a pasiente,” intuloy ti artikulo, “saan laeng a ti tsansa a makaiyeg ti sakit no di ket kasta met ti reaksion a manglaban ti sakit.” Kuna ni Hissink: “Iti kamaudiananna, agbalbalinen a nalawag kadagiti tattao a ti dara (manipud kadagiti panangidonar) ket saan met laeng a naindaklan a banag kamaudiananna.” Ti CH masapul pay laeng a manggun-od iti anamong ti departamento ti salun-at idiay Australia.
Kanayon nga interesado dagiti Saksi ni Jehova iti daytoy a tipo ti panagsirarak. Nupay no dagiti Saksi ipalubosda a mausar dagiti saan a dara a pluido a maipaay iti panggep ti panangyalison, saanda nga inkompromiso ti narelihiusuan a pammatida—uray pay maipasangoda iti peggad—tapno ipalubosda ti pannakaiyalison ti dara. Iti amin a tiempo dagitoy a Kristiano salsalimetmetanda ti bilin ti Biblia: “Itultuloyyo nga adaywan . . . ti dara.”—Aramid 15:29.
Panangabuso ti Alkohol
● Ti panangabuso iti alkohol ti nangapektaren agpadpada kadagiti agtutubo ken dagiti natataengan. Ti panagsirarak nga indauluan ti Division of Alcoholism and Alcohol Abuse kadagiti 27,414 nga estudiante iti Estado ti Nueva York nga agtawen 12 agingga iti 18 nasarakanda a 10 porsiento ti mabarbarteken iti maminsan kada lawas. Iti kasumbangir dayta nga edad, kuna ti pagiwarnak a Medical Aspects of Human Sexuality a ti panangabuso iti alkohol “ket maysa a dakkelen a parikut kadagiti natataengan nga addaan ti manamnama a pannakapasamakna a 10% agingga iti 15%—a ti pannakapaspasamak dayta ti nangatngato pay kadagiti aggigian iti maysa nga institusion.” Makapainteres, maysa a pammaneknek iti kaadda ti sangatauanen “kadagiti maudi nga al-aldaw” isut’ dagiti tattao “awananda ti panagteppel.” (2 Timoteo 3:1-3) Ket ti panangabuso ti alkohol maysa laeng kadagiti mangipamatmat iti kinakurang ti panagteppel.