Dagiti Saludsod Manipud Kadagiti Managbasa

◼ No patien ti maysa a Kristiano nga adda maysa iti kongregasion a saan a nasayaat a pakikuyogan gaput’ kababalin wenno ugali dayta a tao, rebbeng kadi a personal a ‘markaanda’ dayta a tao maitunos iti 2 Tesalonica 3:14, 15?

Dagidiay nagbalin a paset ti kongregasion Kristiano aramidenda dayta gapu ta inayatda ni Jehova ken sipapasnek a kayatda ti agbiag babaen kadagiti prinsipiona. Nasaysayaat ti makilangen kadagitoy ngem kadagiti tattao ti lubong. Mabalin a mas komportablekayo kadagiti dadduma a Kristiano, kas ni Jesus ‘inayatna a nangnangruna’ ni apostol Juan ket isut’ nangnangruna a nasinged kadagiti 3 kadagiti 12. Kaskasdi, pinilina, isut’ interesado, ken inayatna amin ida. (Juan 13:1, 23; 19:26; Marcos 5:37; 9:2; 14:33) Numan pay amin dagiti kakabsat addaanda kadagiti panagbiddut a masapul met ti panagbalintayo a mannakaawat ken manangpakawan, ammotayo a ti kaaduanna dagiti kapamatiantayo ti nasasayaatda a pakikaduaan. (1 Pedro 4:8; Mateo 7:1-5) Ti ayat iti maysa ken maysa isut’ tanda a pakabigbigan ti kongregasion Kristiano.​—Juan 13:34, 35; Colosas 3:14.

Nupay kasta, sagpaminsan, adda ti kababalin wenno wagas ti panagbiag ti maysa a personal a ditay anamongan. Ni apostol Pablo nagsurat maipapan ti sumagmamano idiay Corinto a ti personal a panangmatmatda maipapan iti panagungar ket saan nga umiso ken mabalin nga addaanda iti kababalin a ‘mangan, uminum, ken agragsak.’ Dagiti nataengan a Kristiano iti kongregasion masapul a pagannadanda dagiti kakasta, ta nangpatignmaan ni Pablo: “Saankayo a paallilaw. Dagiti dakes a pannakikuyog dadaelenda ti nasayaat a kababalin.”​—1 Corinto 15:12, 32, 33.

Daytoy pangkaaduan a balakad ti maiyanatup met itatta. Kas pangarigan, mabalin a makita ti Kristiano a pagassawaan a dagiti annakda ti maapektaran unay no mangbusbusda ti panawen a kaduada ti sumagmamano nga agtutubo, a nalabit saanda pay nga innala a sipapasnek ti kinapudno wenno nailubongan panagpampanunotda. Dagitoy dadduma nga annak nalabit magunggonaanda pay manipud nadiosan a panagsanay. Ngem agingga nga adda ti ebidensia iti dayta, mabalin a kedngan dagiti pagassawaan dagiti annakda a makiay-ayam ken makikuyogkuyog kadagitoy nga agtutubo. Daytoy saan a ‘panangmarka’ kas sasawenna idiay 2 Tesalonica kapitulo 3. Iyap-aplikar laeng dagiti nagannak ti pammagbaga ni Pablo a liklikan ti “dakes a pannakikuyog.”

Dagiti kasasaad a mangawag iti ‘panangmarka’ ti ad-adda a serioso ngem iti pangarigan a nga adda iti ngato maipapan kadagiti ubbing. Sagpaminsan adda maysa a tao iti kongregasion a mabalin a sumurot iti di naikasuratan a kurso a makariribuk unay, nupay saan pay met a nainkalintegan iti aksion a panangilaksid a nadakamat idiay 1 Corinto 5:11-13. Ti kasta a kababalin napasamak iti kongregasion ti kadaanan a Tesalonica, gapu ta nagsurat ni Pablo: “Ta madamdamagmi nga addat’ dadduma kadakayo a magnada a saan a naurnos, a dida sanguen ti uray ania nga aramid, no di ket manangsalsalida.”​—2 Tesalonica 3:11.

Ania ngay ita ti aramiden dagiti dadduma a Kristiano idiay Tesalonica? Nagsurat ni Pablo: “Imbilinmi ngarud kadakayo, kakabsat, babaen ti nagan ni Apotayo a Jesu-Kristo, a panawanyo ti amin a kakabsat a magna iti saan a naurnos ket saan a kas iti sursuro nga inawatyo kadakami. Ngem dakayo, kakabsat, saankayo koma maupay nga agaramid iti naimbag. Ket no addanto ti di mangtungpal iti saomi, gapu itoy a surat, markaanyo dayta ket dikayo makikuyog kenkuana, tapno mabainan. Ngem dikayo ibilang a kabusor, ngem bagbagaanyo kas kabsat.”​—2 Tesalonica 3:6, 13-15.

Gapuna, uray saanna nga innaganan daydiay sadut a manangsalsali, imbutaktak ni Pablo iti kongregasion ti serioso a kursoda. Amin a Kristiano a makaammo ti kinatao dagiti saan a naurnos ti mangtratonto kadakuada kas “namarkaan.” Ti balakad a, “markaanyo ida,” inusarna ti sao a Griego a kaipapananna “ikkanyo ti karatula dayta,” kayatna a sawen, ‘mangted iti naisangsangayan a panangmatmat iti maysa.’ (New World Translation Reference Bible, footnote) kuna ni Pablo, “Dikay makikuyog” iti daydiay namarkaan “tapno mabainan.” Dagiti kakabsat ti saan a mangliklik a naan-anay kenkuana, ta binagbagaan met ni Pablo ida a “ngem bagbagaanyo a kas kabsat.” Ngem babaen iti pananglimitar iti sosial a pannakikuykuyog kenkuana, mabalin nga isut’ maiturongda nga agbain ket nalabit mangriing kenkuana iti pannakasapul a makitunos kadagiti prinsipio ti Biblia. Kabayatanna dagiti kakabsat a lallaki ken babbai masalaknibanda manipud iti di nasayaat nga impluensiana.​—2 Timoteo 2:20, 21.

Ti kongregasion Kristiano itatta, iyap-aplikarna met daytoy a balakad.a Ti Pagwanawanan iti Agosto 1, 1982, panid 31, ipaganetgetna a ti panangmarka ket saan a maaramid kadagiti basta pribado a kapanunotan laeng wenno inton pilien a personal ti maysa a Kristiano a liklikan ti nasinged a pannakikuykuyog iti maysa. Kas ipakita ti kaso idiay Tesalonica, ti panangmarka ramanenna dagiti serioso a panagsalungasing kadagiti prinsipio iti Biblia. Umuna padpadasen dagiti panglakayen ti maulit-ulit a panangtulong iti managsalungasing babaen iti pammagbaga kenkuana. No agtultuloy latta ti problema, mabalinda a, babaen iti di pananginagan iti daydiay a tao, mangted iti palawag a pammakdaar iti kongregasion maipapan iti di naurnos a kababalin nga ar-aramiden ti maysa, kas panangpakdaar ni Pablo iti taga Tesalonica. Kalpasan dayta, dagiti sinaggaysa a Kristiano itultuloyda a “markaan” ti tao nga agbidbiddut.

Ti nasayaat a pangngeddeng ti kasapulan imbes a ti immunan a naikeddeng a pagalagadan maipapan iti tunggal paset ti panangmarka. Di nangted ni Pablo kadagiti detaliado a pagalagadan maipapan iti problema idiay Tesalonica, kas ti panangikeddeng no kasano kabayag a ti maysa madi nga agtrabaho sakbay nga isut’ namarkaan. Umasping iti dayta, dagiti panglakayen ti makikuykuyog iti arban ket mabalinda nga usaren ti kinarasonable ken pannakaawat iti panangikeddeng no ti maysa a kasasaad ket umdasen ti kinaseriosona ken panangriribukna tapno makasapul iti maysa a palawag a pammakdaar iti kongregasion.b

Maysa a panggep ti panangmarka isut’ panangtignay iti di naurnos a Kristiano nga agbain ken isardeng ti di nainkasuratan a kursona. Dagiti indibidual a nangmarka kenkuana, nangnangruna kadagiti panglakayen, ti mangitultuloy a mangparegta kenkuana ken mangmatmat iti kababalinna bayat ti pannakisasaoda kenkuana kadagiti panaggigimong ken tay-ak ti serbisio. Inton makitada a ti problema ken ti kababalinna a nangsapul ti panangmarka kenkuana ket nagbalbaliwen a nagbalin a nasayaat, mabalindan a pagpatinggaen ti limitasion maipapan iti pannakikuykuyog kenkuana.

Gapuna, ti panangmarka ket saan koma a mapagsinnukat iti personal wenno pampamilia a panangiyaplikar iti pammagbaga ti Dios a liklikan ti dakes a pannakikuykuyog. Nupay ti panangmarka ket saan a banag a masansan a kasapulan, nalawag a ti panangmarka ket maysa a Nainkasuratan nga addang a masapul nga aramiden no kasapulan dayta, a dayta nga addang ti innala met dagiti kakabsattayo a taga Tesalonica.

[Dagiti Footnote]