Ti Kaiyulogan dagiti Damdamag
Dagiti Ospital Sapulenda dagiti Saksi
Ipadamag ti pagiwarnak a sumagmamano nga ospital iti California ti aktibo a mangsapsapulen kadagiti Saksi ni Jehova kas pasiente. Dadduma nga ospital agkedkedda a mangopera idi kadagiti Saksi agsipud ta agkedkedda a maiyalisonan iti dara gapu iti relihiuso a rason. Apay nga adda ti panagbalbaliw ti kababalin? Agsipud ta ti ekonomia ti medikal nga industria ti marirriribuk, dagiti administrador ti mangsapsapul kadagiti kanayonan a gubuayan iti masapulan. Ngem ti sabali pay a rason ti naited. “Ti nabiit pay nga irarang-ay ti medisina a mangar-aramid iti awan-dara a panagopera—ti termino a nausar a mangdeskribir iti operasion a sadiay ti panangyalison ti dara wenno dagiti paspaset iti dara ti saan a maipaay—a saan unay a napeggad ti namagbalin kadagiti ospital ken dodoktor a nairaman nga ad-adda pay a situtulok a mangopera kadagiti Saksi,” ipadamag ti Daily News iti Van Nuys, California. “Kaaduan a porma ti panagopera ti mabalin a maaramid a saan a mangipaay iti dara no naannadka unay ken naanuska iti pasiente,” inamin ti siruhano heneral a ni Dr. Sheldon N. Lipshutz.
Nupay no dagiti Saksi ni Jehova awatenda dagiti awan-darana a pamusposan, kas iti saline solutions, agkedkedda a ‘mangiwalin iti pammatida ken nasayaat a konsiensiada a maipaay iti medikal nga aramid a saan a nainkasuratan. (1 Timoteo 1:19; Aramid 15:20) Nasarakanda a ti panangtungpalda kadagiti linlinteg ti Dios ket naimbag iti medikal a pamay-an. “Sangapulo ket lima wenno 20 a tawtawenen a napalabas, diak kayat (dagiti Saksi) iti ospitalko,” imbaga ti maysa nga administrador iti Daily News. “Itan addan dagiti nakaad-adu a kaso iti AIDS ken hepatitis nga agsaksaknap babaen iti panangyalison uray pay saan a pagriruan ti panagtarigagay iti gagangay a panangyalison iti dara. Ti panangmatmat dagiti Saksi ni Jehova agbalin nga ad-adda a napateg.”
Panangsuro iti Panagaramid iti Naimbag
Apay a dagiti dadduma idiay Nazi nga Alemania irisgoda dagiti biagda tapno isalakan wenno tulongan dagiti tattao nga agpegpeggad iti pannakaidadanes wenno ipapatay nupay dadduma kadagidiay a mabalin a nakatulong koma ti nagturong iti sabali a pamay-an? Ni Dr. Samuel Oliner, maysa a sosiologo iti Humboldt State University idiay Arcata, California, agraman dagiti kakaduana, ikagkagumaanda a sapulen no apay. Ket, kuna ti The New York Times, ti nasarakanda “a maikaykaysa kadagiti kapkapadasan dagiti tattao bayat dagiti tawtawen ti panagdakkelda iti kinaubingda, isu a mamagbalin kadakuada, adu a tawtawen kalpasanna, nga ad-adda a nasaysayaat ti panagpampanunotna ngem dagiti dadduma tapno tumulong kadagiti marigrigatan.”
Umanamong ni Ervin Staub, maysa a sikologo idiay University of Massachusetts. “Dagiti nagannak a mangiyallatiw iti awanan-agum a pannakaseknan a maipaay iti pagimbagan dagiti dadduma ti epektibo,” kinuna ni Dr. Staub, “a mangipaay iti natibker a panangtengngel kadagiti annakda. Nupay no managdisiplinada, saanda a manangipalubos. Usarenda ti kumbinasion a kinatibker, kinabara ken panagrason. Itudoda kadagiti ubbing ti pagbanagan ti di umiso a kababalinda kadagiti dadduma—ken ti nasayaat a kababalin. Ket siaaktibo nga iwanwanda ti ubing nga agaramid iti naimbag, makiraman, makitinnulong.”
Di pagduaduaan, ngarud, a dagiti nagannak nabilinda a mangpadakkel kadagiti annakda “iti disiplina ken panangiturong-panunot ni Jehova” agsipud ta “ti agaramid ti naimbag tao ti Dios.”—Efeso 6:4; 3 Juan 11.