‘Panangpaatiddog kadagiti Lubid ti Tolda’ Idiay Japan

“PADAKKELEM ti disso ti toldam. Ket pabistradmo kadakuada dagiti bengbeng ti pagyanam. Dika medmedan. Paatiddogem dagiti lubidmo ket patibkerem dagiti pasokmo.”​—Isaias 54:2.

Babaen kadagidiay a sasao ti mammadto a ni Isaias intudona ti tiempo inton ti pudno a panagdayaw ken Jehova a Dios aglasatto iti napartak nga irarang-ay. Ita, kadagiti agsasaruno a pagpagilian iti lubong, maim-imatangantayon ti kasta a nakaskasdaaw a teokratiko nga irarang-ay. Daytoy, nalabit, saan nga iti sadinoman ti ad-adda pay a makita idiay Japan, a sadiay addan ti agarup 96,000 a managdaydayaw iti pudno a Dios.

Irarang-ay Bayat dagiti Tawtawen

Iti nasapa a paset ti maikadua a dekada iti daytoy a siglo a ti naimbag a damag ti Pagarian ti Dios damo a nakagteng idiay Japan. Ni Charles T. Russell, ti umuna a presidente ti Watch Tower Society, nangaramid iti 700-milia (1,100-km) a panagpasiar iti intero nga isla a Hapon ket nakitana ti pannakasapul iti panangikasaba iti pudno a Kinakristiano. Idi 1926 maysa nga Americano a Hapones ti naidestino idiay Japan kas ti umuna a misionero ti Watch Tower Society.

Bayat ti agarup 20 a tawtawen, adu a bukbukel ti kinapudno ti naimula ket pinulpullo a tattao ti nakaammo maipapan iti Pagarian ni Jehova. Adu kadakuada ti naglasat kadagiti nakaro a pannakasuot iti pammatida kadagiti im-ima dagiti namilitaran a gobierno bayat ti panawen iti 1933-45.a

Idi 1949 ti trabaho a panangasaba idiay Japan nakagun-od iti nasayaat a pangrugian. Dagiti nasanay idiay Gilead a misionero nangrugin a sumangpetda. Idi Agosto, addan pito a misionero nga agtartrabaho idiay Tokyo, ket, iti promediona, siam a tattao ti makiramraman iti trabaho a panagebanghelio iti tunggal bulan. Innem pay a misionero ti simmangpet idi Oktubre, lima kadagitoy ti nangrugi iti trabaho a panangasaba idiay Kobe. Kasano a maawat daytoy a panangasaba iti daytoy a pagilian dagiti Buddhista ken Shinto, a bumangbangon pay laeng manipud iti pannakakigtot iti Gubat Sangalubongan II?

Iti nakurkurang ngem sangapulo a tawen ti bilang dagiti manangikasaba iti Pagarian immadu iti 1,000. Ngem ti ‘panangpadakkel ti disso ti tolda ti maaramidto pay laeng.’ Idi Nobiembre 1970 ti bilang dagiti Saksi immadu iti maminsangapulo a daras, ket tallo a tawen kalpasanna nakagteng iti bilang a 20,000. Iti sabali pay a tallo ket kagudua a tawtawen dayta a bilang nagdoble manen​—ket adda kabbaro a kangatuan a bilang a 40,000-ken-ad-adu pay a mangikasaba iti Pagarian! Nupay kasta, adda pay adu a mara-karnero a masarakan, ket intultuloy ni Jehova ti nangibukbok kadagiti bendisionna kadagiti naregta nga ar-aramid dagiti tattaona idiay Japan. Iti nasurok laeng bassit nga innem a tawtawen, idi Hunio 1983, ti 40,000 nagdoble manen a nagbalin a nasurok nga 80,000, ket, sigun iti daytoy a report, ti bilang dagiti manangibunannag ti Pagarian idiay Japan nakagtengen iti 97,305!

Dagidiay a Nangasaba iti Amin-Tiempo

Nalawag, ni Jehova a Dios Daydiay adda iti likudan ti irarang-ay. Nupay kasta, dagiti naregta a misionero ken dadduma pay nga amin-tiempo a manangaskasaba addaanda ti napateg a paset. Idi 1952 ti grupo dagiti misionero immadun iti agarup 50 ket sumagmamano a kabbaro nga umili a Saksi ti sumsumreken iti trabaho a kinapayunir. Ti ulidan dagiti naregta a misionero ti nangparegta nga ad-adda kadagiti kabbaro a nabautisaran a kakaduada a mangipaay iti bagbagida iti amin-tiempo a panagserbi ken Jehova. Ita, 37 a tawenen kalpasan ti iseserrek ti immuna a misionero iti pagilian, ngangnganin 40 porsiento kadagiti amin a Saksi idiay Japan ti adda iti amin-tiempo (payunir) a trabaho iti binulan, a 36,118 ti agrepreport uray pay iti ababa a katengngaan ti kalam-ekna a bulan iti Pebrero 1985. Adu kadagiti misionero a nakiraman iti daytoy nga irarang-ay nanipud pangrugian ti agserserbi pay laeng sadiay, ngem ti agdama a grupo dagiti 76 a misionero ket kasla maysa a bassit laeng a ‘tedted iti baybay’ dagiti pinulpullo a ribo a lokal a payunir.

Kayatyo kadi a sabten dagiti dadduma kadagitoy a nareregta? Am-ammuentayo ti sumagmamano a mangirepresentar iti grupo dagitoy a payunir.

Umuna, sabtenyo dagiti nabayagen. Ni Iwako Kono isu ti kalalakayan nga espesial a payunir. Iti tawen a 70 isut’ mangtagtagiragsak iti daytoy a pribilehio iti panagserbi bayaten iti agarup 28 a tawtawen ket natulongannan ti ngangngani 50 a tattao a dimteng iti dedikasion ken bautismo. Ket adda met ni Sadakichi Shimada. Iti 87 a tawennan isu ti kalalakayan a regular a payunir idiay Japan. Ni Toyoko Umemoto ket 26 ti edadnan idi nangrugi nga espesial a payunir. Itan, nga addaanen iti nasurok a 29 a tawtawen a matalek a panagserbi, isut’ nakapagserbin iti kabayagan kadagiti aniaman nga umili a Hapones nga espesial a payunir.

Iti sabali pay a pungto ti timbangan, adda met dagiti adu nga agtutubo a mangus-usar iti kinaagtutuboda iti panagserbi ken Jehova. Ni Meri Aida ket 14 ti tawenna idi inawatna ti pannakadutokna nga agserbi kas regular a payunir. Sakbay dayta isut’ nakiraman iti auxiliary payunir a panagserbi bayat iti 41 a bulbulan nanipud pannakabautisarna idi agtawen iti 11. Inaramidna dayta bayat ti panageskuelana.

Ni Akiko Goto ket pito ti tawenna idi a ni nanangna nangrugi iti trabaho a regular payunir, nupay isut’ mangay-aywan iti dua nga ubbing. Ni Akiko sinurotna ti nasayaat nga ulidan ni nanangna ket nagbalin a regular payunir idi isut’ agtawen iti 18, ket dua a tawen kalpasanna isut’ nagbalin a kaubingan nga espesial payunir idiay Japan. Ni Hisako Wakui ket 21 ti tawenna idi nangrugi kas maysa nga espesial payunir. Itan kalpasan ti agarup 28 a tawtawen, isut’ naaddaan iti pribilehio a nangtulong kadagiti agarup 37 a tattao nga agbalin a managdaydayaw ni Jehova.

Adu ti naggapu kadagiti dadakkel a siudad a napan kadagiti babassit nga il-ili ken barbario a mangipan iti “naimbag a damag ti pagarian” kadagiti amin a maikari. Makapainteres, agarup 60 porsiento kadagiti amin a regular payunir ti agtagibalay, ket ti kaaduan kadakuada saan a manamati ti assawada. Daytoy a nakaskasdaaw nga espiritu iti kinapayunir ti nangidaulo iti irarang-ay iti intereses ti Pagarian idiay Japan.

Ti Nasken a Pannakasapul dagiti Paggigimongan

Dagiti Hapones a Saksi naan-anay nga apresiarenda ti bilin ti Biblia a saan a ‘mangbaybay-a ti panaggigimongtayo ket nangnangruna gapu ta makitatayo nga umas-asideg ti aldaw.’ (Hebreo 10:25) Kadagiti immuna a tawtawen, kaaduan a kongregasion ti mangaramid kadagiti gimgimongda kadagiti babassit a kukuarto dagiti pasilio iti pagtrabahuan wenno auditorium sibiko. Adu kadagitoy ti maabangan iti linawas. Masansan dagiti kakabsat sumangpetda iti paggigimonganda tapno maibaga laeng kadakuada a ti kuarto saan a mabalin a magun-odan iti dayta nga aldaw. Daytoy kaipapananna ti panagtignayda a dagus a mangsapul iti sabali a lugar ket kalpasanna, iti nakurkurang ngem maysa nga oras, isaganada dayta a maipaay iti panaggigimong!

Nakaragragsak, kaaduan iti dayta ti napalabasen. Ti kaaduan kadagiti kongregasion ita addaandan kadagiti bukodda a paggigimongan. Dadduma agabangda iti tinawen ket dagiti dadduma ti nangtarimaan kadagiti bakante a patakder wenno kamarin. Ngem ti presio iti daga idiay Japan nakangingngina​—aggatad iti manipud $35 agingga iti $50 (E.U.) ti kada pie kuadrado​—ket sumagmamano laeng a kongregasion ti makabael a manggun-od iti bukodda a daga a pangipatakderanda kadagiti Kingdom Halls. Dadduma a kakabsat nga addaan iti sanikua ti nangrebba kadagiti balbalayda ket imbangonda manen dayta nga addaan iti Kingdom Hall iti umuna a grado ket agnaedda iti ngato. Kadagiti sumagmamano a naisangsangayan a kaso, dagiti tattao a saan a Saksi ni Jehova wenno saan pay nga interesado iti Kinakristiano intukonda ti mangibangon kadagiti Kingdom Hall iti sanikuada ket ipaabangda kadagiti Saksi, a dawatenda pay kadagiti Saksi ti panangitedda kadagiti plano a maipaay iti pasilioda. Daytoy ti nagbanag iti pudno a naisangsangayan a Kingdom Halls.

Kas pangarigan, idiay Yokohama, maysa a makinkukua iti lote a pagparadaan ti immanamong a mangibangon iti maysa a Kingdom Hall kadagiti naipatakder a poste iti lotena ket ipaabangna ti pasilio kadagiti Saksi. Maysa idiay Tokyo ti adda iti maikadua a grado iti maysa a patakder a naipatakder iti nagbaetan dagiti poste iti naipangato a riles ti tren. Iti naudi a report dagiti kakabsat nairuamdan iti ungor iti tren iti ngato.

Bayat a dumakkel dagiti kongregasion dumakkel met dagiti asamblea sirkito. Nupay 20 a tawenen ti napalabas ti maysa nga asamblea sirkito ti mabalin a 300 agingga ti 400 laeng dagiti tumabuno, itan mabalin nga addan iti 1,500 agingga iti 2,000, wenno ad-adu pay. Dagiti pasilidades a maipaay iti asamblea kas iti daytoy a kadakkel ket narigat a biruken. Gapuna, idi 1975, maysa a nalugi a pagay-ayaman iti bowling nga adda iti ruar ti Tokyo ti naisalda ket natarimaan tapno agbalin nga umuna nga Assembly Hall idiay Japan, a mabalin a makatugaw dagiti 1,200. Ti maikadua, ket maysa a nasayaat a ferroconcrete wenno napalagdaan a konkreto a patakder, ti simmaruno idi 1982. Dayta ti adda iti makintengnga a paset iti lugar ti (Kansai) idiay Japan ket interamente nga imbangon dayta dagiti boluntario a Saksi a lallaki, babbai, ken ubbing. Makapagtugaw ti 1,800 iti dayta. Ti maikatlo nga Assembly Hall ti imbangon dagiti boluntario a trabahador iti sanikua ti hedkuarter ti Watch Tower Society idiay Ebina. Makapagtugaw ti 3,000 iti dayta.

Iti naudi a panagtitipon dagiti amin a managibunannag idiay Japan a maipaay iti maysa nga asamblea isu idi internasional a kumbension idiay Ōsaka idi 1973, nga addaan ti 31,263 a nagatender. Nanipud idin, gapu iti kinakurang dagiti maibagay a pasilidades, dagiti babbabassit a kumbension ti napaneknekan nga ad-adda a praktikal, ken ti maysa a pammaneknek iti Pagarian ti naipaay kadagiti ad-adu a lugar. Duapulo ket uppat kadagiti kakasta a kumbension ti naaramid idi 1984, nga addaan iti 179,439 a nagatender ket 3,236 ti nabautisaran.

Irarang-ay Idiay Sanga

Tapno makiaddang iti napartak nga irarang-ay iti tay-ak, ti sanga nga opisina ti Sosiedad naglasat met iti kasta unay nga irarang-ay bayat dagiti tawtawen. Manipud 1949 agingga iti 1962 ti opisina ti masarakan iti dua a grado a Hapones ti estilona a balay idiay Minato Ward, Tokyo. Dayta kamaudiananna ti sinukatan ti pito-grado a patakder a nagserbi kas hedkuarter agingga idi 1972. Idin ti Sosiedad nakitana ti pannakasapul a mangaramid ti bukodna a panagimprenta. Gapuna maysa a kabbaro a paktoria ken pagtaengan a Bethel ti naibangon iti maysa nga acre (0.4 ha) a daga idiay Siudad ti Numazu, 75 milias (120 km) iti abagatan a laud ti Tokyo.

Iti uneg laeng ti lima a tawen, nupay kasta dagiti pasilidades idiay Numazu ti nasikep unayen. Gapuna, maysa nga 18 acres (7 ha) ti nagatang idiay Ebina, ket maysa a nagsayaatan a paktoria ken pagtaengan a Bethel, tallo a daras ti kadakkelna ngem kadagiti pasilidades idiay Numazu, ti naibangon. Daytoy a grupo dagiti patpatakder ti imbangon nga interamente dagiti Saksi a mismo, ket naidedikar idi Mayo 15, 1982.

Ti panagpataud kadagiti magasin nangrugi babaen iti maysa a kabbaro a rotary offset a pagimprentaan bayat a madama pay laeng ti panagibangon. Kalpasan a nakompleto ti panagibangon, sabali manen nga uppat-kolorna a rotary offset a pagimprentaan ti nainayon. Dagiti kakabsat ti nangnangruna a maragsakan idi a pinullo a ribo a kopia iti New World Translation of the Holy Scriptures a Hapones ti naiprenta iti pagimprentaan ti sosiedad idi 1982. Tapno makiaddang iti umad-adu a panagkalikagum kadagiti magasin ken dadduma a literatura, maysa a lima-kapaset a rotary offset a pagimprentaan ti naibangon idi Enero 1984. Daytoy makapataud iti sangaribo a magasin iti maysa a minuto ket makaiprenta iti Ti Pagwanawanan ken Agriingkayo! nga aggiddan.

Tapno maaramid amin daytoy a panagiprenta ken panagitulod ken maaywanan dagiti kasapulan dagiti trabahador, ti pamilia ti Bethel dimmakkel agingga iti 345 a miembro. Mainayon iti dayta, 165 ti agtartrabaho iti kabbaro a proyekto iti panagibangon. Makapainteres, adda 19 a grupo dagiti agkakabsat iti lasag iti daytoy a pamilia.

Nupay no tallo pay laeng a tawen ti napalabas idi a naidedikar dagiti pasilidades ti Ebina, maisagsaganan ti kanayonan pay nga irarang-ay. Madama a maibangbangon iti dayta met laeng a sanikua ti maysa a kabbaro a walo grado a pagtaengan a Bethel, isu a pagtaenganto ti 250 a tattao, ken ti maysa nga innem-grado a mainayon iti paktoria. Pudno, dagiti “lubid ti tolda” napaatiddogda iti labes ti amin a pananginanama.

Inanama iti Masanguanan

Iti daytoy a daga dagiti Buddhista ken Shinto a pammati, addada adu a tattao nga agsapsapul iti maysa a banag a pangipaayanda iti pammati. No mano pay ti umayto iti “tolda” ni Jehova makitanto pay laeng. Kas pammaneknek iti masanguanan pay nga irarang-ay isu ti kinapudno a 224,696 a tattao ti nagtataripnong idi Abril 15, 1984, tapno selebraranda ti ipapatay ni Jesus. Ket ti nagkaykaysa a panangikagumaan ti naipaay a tumulong kadagiti interesado. Tunggal bulan, agarup 142,000 a panagadal iti Biblia iti pagtaengan ti maikonkondukta.

Idi a dimteng ti immuna a misionero idi 1949, siasino ti makapanunot a kalpasan dagiti 37 a tawtawen addanto nasurok a 97,000 nga aktibo a managdaydayaw ken Jehova iti daytoy a daga? Ngem, ni Jehova impaayna dayta. Kas inkarina, ‘binistradna kadakuada dagiti bengbeng ti pagyananna’ ket ‘pinaatiddogna dagiti lubid ti toldana’ a maipaay kadagiti tattaona. Dagiti Saksina itultuloydanto ti agtrabaho a sigagaget ket agpannurayda kenkuana a mangiyegto ti apit sakbay ti panungpalan daytoy a sistema dagiti bambanag.

[Dagiti Footnote]

[Graph iti panid 23]

(Para iti aktual a pannakaurnosna, kitaem ti publikasion)

Irarang-ay dagiti managibunannag iti Pagarian idiay Japan kadagiti napalabas a 37 a tawtawen

(Feb.)

1949 9

1958 1,000

1970 10,000

1973 20,000

1976 40,000

1983 80,000

1985 97,305

[Ladawan iti panid 24]

Ni Toyoko Umemoto ti kababayagan ti panagserbi iti kinaespesial payunir

[Ladawan iti panid 25]

Ni Sadakichi Shimada ti kalalakayan a regular payunir idiay Japan