Panagrag-o iti Sagut ti Panagasawa
“Ti pinagtipon ti Dios a maymaysa saan koma a pagsinaen ti tao.”—MATEO 19:6.
1. Ania a pamiliar a sasao ni Jesus ti pagaammo ti Kakristianuan, ngem ania a salsaludsod ti adda maipapan iti dayta?
PAMILIAR kadi dagidiay a sasao kadakayo? Awan duadua dagita ti pamiliar iti minilmilion a tattao iti Kakristianuan, a mangbukbukel iti kadakkelan a paset ti populasion ti lubong, ta isuda dagiti sasao ni Apo Jesus idi nakisao kadagiti relihiuso a Pariseo idi kaaldawanna. Numan pay dagiti sasao ti kasla pamiliar, ti ngay kaipapanan dagita a sasao ni Jesus? Ti kadi pateg ti kasta a pammagbaga ti sursuroten ti sangatauan a pangkaaduan? Kitaentayo.
2-4. (a) Ania ti kasasaad itatta ti adu a dagdaga maipapan iti panangipangag iti sasao ni Jesus idiay Mateo 19:6? (b) Ania a kababalin ti impanayag daydiay di mangikaskaso iti pammagbaga ti Biblia maipapan iti kinaagnanayon ti panagassawa?
2 Kadagiti adu a dagdaga itatta, adda nagbassit a panagraem iti biang dagiti tattao iti urnos ti panagasawa ken panamagtultuloy iti pinagtipon ti Dios. Nagtenganen ti diborsio ti mabalin a maikuna nga epidemiko a rukodna kadagiti agsasaruno a pagilian. Kadagiti dagdaga a sadiay ti diborsio ket saan a legal a palpalubosan ti gobierno, saan a nasaysayaat ti kasasaadna, ta kadagita a dagdaga masansan a dagiti tattao pampanawanda dagiti assawada ket makitiponda iti sabali. Gapuna ti maikari unay a pammagbaga ni Jesus idiay Mateo 19:6 ket saan nga ipangpangag ti minilmilion a tattao iti Kakristianuan ken iti dadduma pay a luglugar. Daytoy ket gapu kadi ta ti pammagbaga nga inted ni Jesus ket dakes, wenno gapu ta dagiti tattao dida mangipangpangag no agsasao ni Jesus, ket dida ikankano ti pammagbaga ni Jesus maipapan iti daytoy a banag?
3 Ti ebidensia a ta ti dakkel a porsiento dagiti tattao ket saanda a matmatmatan ti panagasawa a kas maysa a kapaum-paut-biag a kontrata no daytat’ mangsinga iti mismo nga istilo ti panagbiagda ken tartarigagayda. Kadagiti kakasta, kasapulan a temporario laeng nga urnos ti panagasawa no daytat’ mangsinga kadagiti bambanag a sursuroten, pagay-ayatan, wenno di pagay-ayatan ti maysa a tao. Gapuna agparang a ngangngani no kasano kalaka ti panangikkat iti maysa ti badona wenno kallugongna, dagiti dadduma sukatanda met dagiti assawada a dida man laeng pampanunoten uray iti apagkanito ti pammagbaga nga inted ni Jesus kadagidiay a sumrek iti relasion ti panagasawa.
4 Gapu iti kinaaglaplapusanan daytoy a kababalin a tunggal maysa ar-aramidenna dayta, dagidiay agtartarigagay a sumurot iti natalged a pammagbaga ti Biblia ti mabalin a maimpluensiaan iti pamay-an a mangiturong kadakuada a maiyadayo manipud iti nasayaat a pannursuro ti Sao ti Dios. Nagsasayaat a balakad ti ipapaay dagiti naimaldit a panid ken kasta met ti berbal a balakad, ngem ti di panangipangag iti pammagbaga ti Biblia ket mabalin a mangiturong kadagiti parparikut iti panagasawa. (Idiligyo iti Salmo 19:7-11.) No alaentayo ti kababalin nga aniaman a banag iti panagasawa a mangsinga iti estilo ti panagbiagtayo, ti ragragsaktayo, ti tartarigagaytayo, ket mabalin a mabalbaliwan babaen iti ditay panangannurot iti panangiwanwan ti Dios maipapan ti panagasawa, iti kasta agpegpeggadtayo. Ti maaddaan iti kasta a kababalin ket mangipasango kadatayo kadagiti kadadakkelan a parikut iti sangatauan, ti kinaagum. Ta kaaduanna ti kinaagum isut’ adda iti ramut dagiti parparikut ti panagassawa. Apay a kunaentay dayta?
Ti Paset ti Basol
5. Kasano nga imbalabala ni apostol Pablo idiay Roma 7:15-20 ti parikut nga adda kadatayo kas bunga ti pannakaiyanak iti basol?
5 Dagiti lallaki ken babbai, a putot da Adan ken Eva. naiyanakda iti basol ken kinaimperpekto. Kaipapanan daytoy a gapu iti natawid a basol, ti tao naikapis iti marka ket ngarud isu ti dakes iti maysa a banag wenno iti sabali. (1 Juan 3:4) Nagsao ni apostol Pablo maipapan iti nalabes a babantot ti basol a naipabaklay iti sangatauan, ta nasarakanna ti bagina a mangar-aramid ti dina kayat nga aramiden ket saanna met nga ar-aramiden ti rebbengna koma nga aramiden. (Roma 7:15-20) Asinoman a gaggagaraenna a salungasingen ti linteg ti Dios ket naagum. Kadagiti dadduma nga indibidual mabalin a daytat’ kinaagum iti bassit a rukodna, ngem kadagiti dadduma daytat’ agbalin a naan-anay a wagas ti panagbiagda, ket ti kinaagumda agbalin nga aglablabes unay.
6, 7. Ania dagiti dua a parparikut a patpatauden ti kinaagum iti panagassawa, a mangiturong kadatayo iti ania a nainkalintegan a saludsod?
6 Iti urnos ti panagasawa nga inyuswat ti Dios, masansan a ti kinaagum isut’ ramut ti parikut iti nagbaetan dagiti pagassawaan. Ti babai a kayatna nga isut’ pagserserbian a din pulos aggargaraw, kas ti panagkunada, ta mabalin nga isu ti pinanuynoyan ti inana wenno amana, kangrunaanna isut’ naagum. Ti lalaki met a tarigagayanna nga itultuloy ti estilo ti panagbiag ti panagmaymaysa, a daytat’ kanayon a makikadkadua kadagiti “babbaro” kalpasan ti panagasawana, kangrunaanna ket naagum. Panunotenyo laengen amin dagiti pamay-an nga adda iti di pagkinnaawatan ti asawa a lalaki ken babai, ket makitayo a ti kinaagum isu ti ramut dagiti adu unay a parparikut.
7 Iti panagregget a maparmek dagiti parparikut a mapaspasamak iti panagasawa, kasano a maparmek ti maysa daytoy nainkasigudan a pagannayasan nga agturong iti kinaagum? Addada sumagmamano a bambanag a maaramidan, a no maiyaplikar, ket mabalin a matulongan ti panagasawa a kasla lumlumneden. Ngem tunggal parte iti pagasawaan masapul a situtulokda a mangaramid iti pasetda. Daytat’ saan a maysa a dalan a di mabalin ti agsinnabet (one-way street). Sukimatentayo ti sumagmamano kadagiti bambanag a nairaman.
Kinaawan-agum iti Panagasawa
8. Kasnao a ti panagasawa ket maysa a panagrinnanud?
8 Ti panagasawa ket maysa a panagrinnanud, kayatna a sawen a tunggal maysa kadagiti agassawa ket saanda a mabalin a laglag-anen ti maysa ken maysa ket ipato a la ketdi no ti maysa kadagiti pagassawaan ket mangmangted ket ti maysa met ti umaw-awat nasayaatto latta ti pagbanaganna. Daytat’ saan nga agkurri nga agpaay a pakabendisionan ti maysa ken maysa. Kas pangarigan, dagiti kakabagyan iti agsumbangir masapul a maikkanda iti konsiderasion. Di koma palubosan dagitoy nga agbalin a gapuanan iti di pagkinnaawatan iti urnos ti panagasawa, tapno iti kasta dagiti nagannak wenno dadduma a kakabagyan ti maysa ken maysa maikkanda iti konsiderasion saan laeng a ti kabagyan ti maysa nga asawa. No sadino ti pangbusbosan ti pamilia iti panagbakasionda wenno ti dadduma a panawen iti panaglinglingay ti saan koma a kankanayon a desision ti maymaysa. Ti pannakaseknan a mabuyogan ti panagpanunot a naipakita kadagita a bambanag tumulong a mamagbalin a naballigi ti panagasawa. Dikay koma pulos laglag-anen ti maysa ken maysa no di ket ipamatmat ti kinaawan-agumna.—Filipos 2:4.
Ti Banag Maipapan iti Edad
9. Kadagiti ania a daksanggasat a resulta ti pangiturongan ti nalag-an a panangmatmat iti panagassawa?
9 Gapu iti nasaknap a panangmatmat kadagiti adu iti daytoy a kaputotan a no ti maysa a panagasawa ket saan nga agballigi daytat’ mabalin nga ipatingga babaen iti diborsio, adu kadagiti agtutubo ti mangrugrugi nga addaan iti pananglaglag-an iti urnos ti panagasawa. Daytoy ti mabalin ken pudpudno a mangiturturong iti panagsisina dagiti adu a pagassawaan kadagiti tin-edyer. Dayta met ti mangiturong iti panangiyeg ditoy lubong kadagiti di ay-ayaten nga annak. Masansan a dagitoy nga agtutubo dumakkelda a dida ammo no ania ti kaipapanan ti maaddaan iti ina ken maysa nga ama a pudpudno nga agayat kadakuada ken mangaywan kadakuada.
10. Kadagiti ania a pamay-an a makatulong ti Galacia 5:22, 23 kadagidiay mangpampanunot ti panagassawa?
10 Aniat’ edad ti maysa a tao sakbay a panunotenna ti panagasawa? Saan a maysa a kurso ti kinasirib ti panagaramid kadagiti pagalagadan iti daytoy a banag. Kaskasdi mangted naimbag a pammagbaga dagiti Kasuratan no aniat’ mangbukel iti mental ken nasepirituan a kinanataengan—daydiay kita ti kinanataengan a kasapulan dagidiay sumrek iti biag ti panagasawa. Pangngaasiyo ta basaenyo ti Galacia 5:22, 23, a sadiay ti pakakitaanyo a nailista dagiti bunga ti espiritu. Sukimatenyo a siaannad ti tunggal maysa kadagiti bunga a nadakamat sadiay. Dagidiay dagiti kualidad a kasapulan a sukayan ti maysa iti panagbiagna. Saan a kalpasan ti panagasawa a rugian ti maysa a tao nga ipakita dagita a kualidad no di ket nabayagen sakbayna iti inaldaw-aldaw a panagbiagna kas maysa a Kristiano.
11. Ania a kabukbukodan a panangsukimat ti mabalin a maaramidan dagidiay agngayngayangay a makiasawa?
11 Kas pangarigan, maysakay kadi a tao a naragsak iti panagbiag, a maragsakan gapu ta adda a sibibiag, agserserbi kadagiti intereses ti Pagarian ni Kristo? Makikapkappiakay met laeng aya kadagiti dadduma, a parparang-ayenyo dagiti natalna a relasion kadakuada? Wenno maysakayo a mannakiringgor, a nalaka nga agpungpungtot ken abusado iti panagsasaona? Maysakayo aya a mabayag ti panagiturturedna, a mabalinyo nga ibturan ti pagkapuyan dagiti kakabsatyo a lallaki wenno babbai, ti inayo wenno amayo? Wenno ababa ti aanusanyo ken nalakakayo nga agpungpungtot no dagiti dadduma ket saanda a dagus a makitunos iti kayatyo? Makitkitayo aya a mangipakpakitakayo iti kaasi kadagiti dadduma iti inkay pannakilangenlangen kadakuada, a naemmakayo ken agar-aramid iti naimbag kadakuada? Wenno maysakayo a naagum, naimut, agkurang iti panagteppel, a nalaka a makaunget kadagiti dadduma uray iti bassit laeng a pakasulbogan? Addaankay kadi ti pudpudno a panagayat kadagiti dadduma, a kayatyo ti tumulong kadakuada, a rummuarkay pay iti dalanyo, nga ipaayyo ti bagiyo ken ti pigsayo a mangyeg ragsak kadagiti dadduma? Wenno kaykayatyo a dagiti dadduma ti mangipakpakita ti ayat kadakayo, a dakayo ti kanayon nga ik-ikkanda kadagiti bambanag nga ik-ikutanda?
12. Ti maysa a lalaki wenno babai a namolden ti panagbiagna sakbay ti panagassawa ti addaan ania a bentaha
12 Umiso ti panagkuna nga awan kadatayo ti naan-anay nga addaan kadagitoy amin a kualidad. Nupay kasta, ti maysa a lalaki wenno babai a namolden babaen iti sumagmamano a tawen a panagbibiag, ken naaddaanen ti gundaway a nangsukay kadagita a naespirituan a kualidad, ket adda iti nagsayaat a saad a mamagballigi iti panagassawa—adda iti nasaysayaat a kasasaad ngem daydiay tao a dina pay rinugian a sukayan dagitoy a bungbunga ti espiritu agingga a nalpasen ti karina iti panagassawa—Idiligyo iti 2 Pedro 1:5-8.
13, 14. (a) Ti panaglabas ti panawen ti mangipaay iti ania a gundaway maipapan iti panangsukay kadagiti naespirituan nga ipatpateg? (b) Aniat’ maaramidan dagiti nagannak a mangtulong kadagiti annakda?
13 Apay a dikay pudpudno a sukimaten ti bagiyo, dagiti kaykayatyo ken dagiti diyo kaykayat? Dikay kadi makita a ti panangipategyo iti biag ket napasayaat babaen iti panaglabas ti tiempo? Addaankayo aya kadagiti isu met laeng a panangipateg idi agtawenkayon ti 13 ngem idi agtawenkay laeng iti 5, wenno addaan kadagiti isu met laeng a panangipateg idi agtawenkayon iti 20 ngem idi agtawenkayo iti 13? Ti kadi pannakaawatyo ken panangipategyo iti biag rimmang-ay wenno bimmassit idi a nakagun-odkayon iti dakdakkel a kapadasan bayat ti panaglabas dagiti tawtawen? Kas maysa a tao a nataenganen, birbirukenyo kadi dagiti isu met laeng a kualidad kadagiti tattao kas ti inar-aramidyon idi maysakay pay nga ubing? Saan kadi a masansan a pudno a ti “maymaysa” a lalaki iti biag ti maysa a babai idi isu ti 16 wenno 17 ti edadna ti nabayag a nalipatanen bayat nga isut’ nakagtengen iti naan-anay a kinabalasang ket ipapaaynan ti dakdakkel a panangipateg iti maysa a nadiosan a kababalin ken personalidad iti maysa a lalaki? Ti panangmatmatna inton agtawenen iti 22 wenno 23 awan duadua maisentro nga ad-adda iti naespirituan, mental, ken emosional a kasasaad ti maysa a lalaki imbes a kadagiti pisikal a kababalinna. Kasta met ti mabalin a maikuna para iti bumarito a nakagtengen iti naan-anay a kinalalakina. Dagiti panginanamaan ken tartarigagayna no maipapan iti maysa nga asawa ti sumayaat bayat nga isut’ agmatmataengan. Kadagiti maud-udi a tawenna, bayat nga agbalbaliw dagiti panangipategna, ti birbirukenna iti maysa nga agbalin nga asawana isu daydiay addaan pannakaawat ken naasi, nga addaan iti abilidad a mangtaripato iti pagtaengan ken agbalin a maysa nga ina, ken adda iti pusona ti nauneg ken napasnek a tarigagay a mangay-ayo umuna iti Namarsuana, ni Jehova, ken mangaramid iti pagayatanna.—Proverbio 31:10, 26, 27.
14 Ti punto daytoy a banag a ta ti panawen balbaliwanna ti panangmatmat ti maysa a tao maipapan kadagiti ipatpateg. Gapuna, ti panaggarasugas nga agasawa iti nakagangganus nga edad ket napunno kadagiti nagadu a peggad. Mabalin a saan a posible nga allukoyen dagiti dua a nakaub-ubing pay a tattao nga aguray iti sumagmamano a panawen a lumabas sakbay a sumrekda iti panagasawa. Ngem dagiti nagannak, nangnangruna kadagiti nasapa pay a tawtawen iti panagbiag dagiti annakda, mabalin a paregtaenda ida nga agpanunot a sisiserioso maipapan iti biag, maipapan iti panagbalin a naespirituan, emosional, ken sisasagana iti pampanunotda a maipaay iti panagassawa sakbay a sumrekda iti ingganat’ tungpal biag a pannakikontrata iti maysa nga indibidual a maipaay iti pagimbagan wenno pagdaksan.
15. Yantangay ti naladaw a panagassawa ket saan nga isut’ kanayon a sungbat ti amin a parikut, ania a balakad ti maipaay maipapan iti panangsalimetmet iti umiso a panangmatmat?
15 Saanna met a kayat a sawen a ti panagassawa inton natataengan ti maysa ket isu ti naan-anay a sungbat. Uray iti dayta addanto met laeng dagiti parikut, nangnangruna no ti kababalin ti kinaagum ket napalubosan a simmagepsepen ken mangikabil iti mamagsina iti nagbaetan dagiti dua a tattao. Ti mental, emosional, ken dagiti naespirituan a kasapulan ti tunggal maysa iti singgalut ti panagassawa masapul a mausigda. Dadduma kadagiti Kristiano pinalubosanda ti bagbagida a maigamer unay iti pagsapulanda, nga isut’ nakailaksidan dagiti ar-aramidda iti kongregasion, agraman ti itatabuno kadagiti gimgimong ken pannakiraman iti trabaho a panangaskasaba ken panagaramid ti adalan. Kalpasanna padpadasenda a punnuan ti pagarupda a pagkurangan ti panagbiagda babaen ti pannakiraman iti adu unay a panaglinglingay. Pagarupenda a la ketdi no isuda ti okupado, dagiti parparikutda ti mabalin a masolber nga agpaay itatta, ket inton Baro nga Urnos dagiti bambanag mapunnuanto met laengen dagiti emosional, mental, ken naespirituan a pakasapulan ti maysa ken maysa. Ngem saan a kasta ti panagandar ti biag. Ti pammagbaga ni Pablo a ta ti maysa a lalaki masapul nga aywananna ti asawana a kas met laeng iti panangaywanna iti bagina. (Efeso 5:28) Kaipapanan dayta ti pannangted ti atension itan kadagiti kasapulan ti asawana, kas iti panangtedna nga inaldaw ti atensionna kadagiti mismo a kasapulanna. Kasta met laeng ti maikuna maipapan iti babai.
Maysa a Natimbeng a Panangsango iti Biag nga Addaan Asawa
16-18. (a) Apay a kasapulan ti natimbeng nga iyaadani iti biag ken iti panagassawa, ken kasano a datayo ti napagannad maipapan kadagiti kabukbukodantayo a tartarigagay ken kasapulan dagiti dadduma? (b) Apay a nasayaat a pagpampanunotan dagita a bambanag sakbay ti panagassawa?
16 Ti natimbeng a panangsango iti biag ket makatulong iti natimbeng met a panangsango iti panagasawa. Mabigbig ti tao a natimbeng a gapu kadagiti natawid nga inaagum a pagannayasan masapul ti agtultuloy a panangparmekna kadagita a pagkapuyan. Nakalaklaka ti di panangpampanunot iti kasapulan dagiti dadduma sakbay ti personal a tartarigagay ti maysa. Ti bassit nga ubing kayatna amin dagiti ay-ayam ken kaaduanna, no di umiso ti panangsanay dagiti dadakkelna, saanna a kayat nga iranud dagitoy kadagiti sabsabali. Ti kinaagumna kadagiti maud-udi a tawtawen, ti dumanon pay kadagiti dadduma a bambanag. Gapuna masansan a makitkitatayo dagiti tin-edyer ken dagiti agtutubo a tarigagayanda dagiti bambanag nga agpaay laeng kadagiti kabukbukodanda a pamay-an, ket gaput’ panagsapsapulda a mangpennek iti mismo a tartarigagayda, saanda a masekseknan kadagiti dadduma uray no masaktanda wenno agsagabada. Kadagiti maud-udi a tawtawen iti kinanataenganen, dagita a tattao ti kanayon a mangtartarigagay iti kayatda, a di pulos as-asikasuen ti uray bassit dagiti kasapulan ti dadduma.
17 Ti natimbeng a tao saanna met a paglibakan nga interamente ti bagina, ngem sanguenna ti mismo a biagna tapno dagiti dadduma met maikkanda iti konsiderasion. Isut’ agsaludsod no ania ti maaramidanna a mangbadang kadagiti dadduma, a mangipaay iti bagina ken no ania ti adda kenkuana a makagunggona kadagiti sabsabali. Saanna nga ipappapilit ti kabukbukodanna a pamay-an nga umuna, maudi, ken kankanayon. Kuna ti libro ti Proverbio: “Ti managparabur a kararua mapalukmegto, ket ti agsibug isu met laeng masibuganto.”—Proverbio 11:25.
18 Ti panangsurot iti kasta a kurso iti agmaymaysa a panagbiag ket makagunggona unay iti maysa a tao iti kamaudiananna iti panagbiag nga addaan asawa. Ti asawa ti maysa ti kanayon a maikkan iti konsiderasion kadagiti aniaman a desision a maaramidan. Imbes a pampanunoten ti panagasawa kas maysa nga eksperimento wenno temporario laeng nga urnos, matmatan ti kasta a tao ti panagasawa kas maysa a permanente nga urnos a pinanunot ni Jehova a Dios idi a pinagtiponna ti umuna a natauan a pagassawaan idiay Eden. (Genesis 2:22-24) Iti isuamin a direksion, maaramid ti panagregget a pagtalinaeden ti panagassawa, tapno tulongan ti asawa, bayat nga isuda a dua rumang-ayda iti panangipateg iti Dios ken iti maysa ken maysa.
Kas Pananggupgop
19-21. (a) Aniat’ mangipasiguro a ditay laeng matmatmatan ti panagassawa kas maysa a pageksperimentuan nga urnos? (b) Aniat’ laglagipen koma ti isuamin a tattao, agtutubo man wenno nataenganen, nga agsapsapul ti pudpudno a ragsak iti panagassawa?
19 “Ti pinagtipon ti Dios a maymaysa saan koma a pagsinaen ti tao.” Wen, dagidiay a sasao a pammalakad ni Jesus ti nakapatpateg nga agpaay kadagiti pudno a Kristiano. Ti panagassawa ket saan a maysa a pageksperimentuan nga urnos a mabalin laeng nga ibbatan no masarakan ti maysa a rumigat ti adda a panagbiag. Masapul ti agtultuloy a pannakidangadangtayo iti imperpekto a lasag tapno kanayon a mamedmedan ti natauan a pagannayasan iti kinaagum ken tapno magun-odan ti anamong ti Dios. (Idiligyo ti Roma 7:21-25.) Tapno mapagballigi ti kontrata iti panagassawa, masaspul nga adalen ti pagassawaan ti pannangted ken panangawat, ti panangipaay ken maipaayan, ken nikaanoman ti saan a pananglaglag-an iti maysa ken maysa.—Efeso 5:21-23, 28, 33.
20 Ket nupay awan ti naikeddeng nga edad a maipapilit kas maysa a paglintegan tapno tarigagayan ti maysa a tao ti makiasawa, malaksid iti daydiay inkeddeng ti gobierno kas legal nga edad, tunggal maysa mabalinna koma a laglagipen ti pannakasapul a rumang-ay iti naespirituan a maitunos iti Galacia 5:22, 23, tapno agbalin a kualipikado a naimbag kas maysa nga asawa. Pudno a ti tiempo isut’ mamagbalbaliw iti panangmatmat ti maysa a tao. Gapuna, awan koma ti aggarasugas iti panagassawa. Umuna, tunggal maysa sukayanna koma ti Nakristianuan a personalidad tapno isu sisasagananto a maipaay iti sangol ti panagasawa. Ket di koma liplipatan nga awan koma ti mamagsina ti pinagtipon ti Dios.—Mateo 19:4-6.
21 Babaen iti panangala iti natimbeng a panangsango iti biag ken kasta met ti panagassawa, makasarakto ti maysa ti pudpudno a rag-o ken ragsak iti urnos nga imbilin ni Jehova a Dios mismo nga agpaay iti lalaki ken babai, kas naipakita iti umuna a panagassawa idiay Eden. (Proverbio 5:18) Ngem ania pay ti kanayonan a maaramidan ti tunggal maysa iti biag tapno mapaneknekan nga isu ket sisasagana a mangala iti akem ti maysa nga asawa a lalaki wenno babai? Basaenyo, pangngaasiyo, no ania ti sumaruno iti daytoy a banag no maipapan iti personalidad dagiti Kristiano a lallaki ken babbai.
Iti panangrepaso, kasanoyo a sungbatan dagiti sumaganad?
◻ Ania dagiti kababalin maipapan iti panagasawa a masapul a maliklikan?
◻ Kasano a maparmek dagiti assawa ti nakaisigudan a pagannayasan iti basol?
◻ Apay a di koma aggarasugas dagiti agtutubo a Kristiano iti panagassawa?
◻ Ania a natimbeng nga iyaadani iti biag nga addaan asawa ti mairekomendar?